೮. ಸುಮನಾವೇಳಿಯತ್ಥೇರಅಪದಾನಂ

೬೪. ‘‘ವೇಸ್ಸಭುಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;

ಸಬ್ಬೇ ಜನಾ ಸಮಾಗಮ್ಮ, ಮಹಾಪೂಜಂ ಕರೋನ್ತಿ ತೇ.

೬೫. ‘‘ಸುಧಾಯ ಪಿಣ್ಡಂ ಕತ್ವಾನ, ಆವೇಳಂ ಸುಮನಾಯಹಂ;

ಸೀಹಾಸನಸ್ಸ ಪುರತೋ, ಅಭಿರೋಪೇಸಹಂ ತದಾ.

೬೬. ‘‘ಸಬ್ಬೇ ಜನಾ ಸಮಾಗಮ್ಮ, ಪೇಕ್ಖನ್ತಿ ಪುಪ್ಫಮುತ್ತಮಂ;

ಕೇನಿದಂ ಪೂಜಿತಂ ಪುಪ್ಫಂ, ಬುದ್ಧಸೇಟ್ಠಸ್ಸ ತಾದಿನೋ.

೬೭. ‘‘ತೇನ ಚಿತ್ತಪ್ಪಸಾದೇನ, ನಿಮ್ಮಾನಂ ಉಪಪಜ್ಜಹಂ;

ಅನುಭೋಮಿ [ಅನುಭೋಸಿಂ (ಸೀ.)] ಸಕಂ ಕಮ್ಮಂ, ಪುಬ್ಬೇ ಸುಕತಮತ್ತನೋ.

೬೮. ‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;

ಸಬ್ಬೇಸಾನಂ ಪಿಯೋ ಹೋಮಿ, ಪುಪ್ಫಪೂಜಾಯಿದಂ ಫಲಂ.

೬೯. ‘‘ನಾಭಿಜಾನಾಮಿ ಕಾಯೇನ, ವಾಚಾಯ ಉದ ಚೇತಸಾ;

ಸಂಯತಾನಂ ತಪಸ್ಸೀನಂ, ಕತಂ ಅಕ್ಕೋಸಿತಂ ಮಯಾ.

೭೦. ‘‘ತೇನ ಸುಚರಿತೇನಾಹಂ, ಚಿತ್ತಸ್ಸ ಪಣಿಧೀಹಿ ಚ;

ಸಬ್ಬೇಸಂ ಪೂಜಿತೋ ಹೋಮಿ, ಅನಕ್ಕೋಸಸ್ಸಿದಂ ಫಲಂ.

೭೧. ‘‘ಇತೋ ಏಕಾದಸೇ ಕಪ್ಪೇ, ಸಹಸ್ಸಾರೋಸಿ ಖತ್ತಿಯೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೭೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸುಮನಾವೇಳಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸುಮನಾವೇಳಿಯತ್ಥೇರಸ್ಸಾಪದಾನಂ ಅಟ್ಠಮಂ.