೨. ಪುಲಿನಪೂಜಕತ್ಥೇರಅಪದಾನಂ

೭. ‘‘ಕಕುಧಂ ವಿಲಸನ್ತಂವ, ನಿಸಭಾಜಾನಿಯಂ ಯಥಾ;

ಓಸಧಿಂವ ವಿರೋಚನ್ತಂ, ಓಭಾಸನ್ತಂ ನರಾಸಭಂ.

೮. ‘‘ಅಞ್ಜಲಿಂ ಪಗ್ಗಹೇತ್ವಾನ, ಅವನ್ದಿಂ ಸತ್ಥುನೋ ಅಹಂ;

ಸತ್ಥಾರಂ ಪರಿವಣ್ಣೇಸಿಂ, ಸಕಕಮ್ಮೇನ ತೋಸಯಿಂ [ತೋಸಿತೋ (ಸೀ.)].

೯. ‘‘ಸುಸುದ್ಧಂ ಪುಲಿನಂ ಗಯ್ಹ, ಗತಮಗ್ಗೇ ಸಮೋಕಿರಿಂ;

ಉಚ್ಛಙ್ಗೇನ ಗಹೇತ್ವಾನ, ವಿಪಸ್ಸಿಸ್ಸ ಮಹೇಸಿನೋ.

೧೦. ‘‘ತತೋ ಉಪಡ್ಢಪುಲಿನಂ, ವಿಪ್ಪಸನ್ನೇನ ಚೇತಸಾ;

ದಿವಾವಿಹಾರೇ ಓಸಿಞ್ಚಿಂ, ದ್ವಿಪದಿನ್ದಸ್ಸ ತಾದಿನೋ.

೧೧. ‘‘ಏಕನವುತಿತೋ ಕಪ್ಪೇ, ಪುಲಿನಂ ಯಮಸಿಞ್ಚಹಂ;

ದುಗ್ಗತಿಂ ನಾಭಿಜಾನಾಮಿ, ಪುಲಿನಸ್ಸ ಇದಂ ಫಲಂ.

೧೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪುಲಿನಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪುಲಿನಪೂಜಕತ್ಥೇರಸ್ಸಾಪದಾನಂ ದುತಿಯಂ.