೧. ಉಮಾಪುಪ್ಫಿಯತ್ಥೇರಅಪದಾನಂ

೧. ‘‘ಸಮಾಹಿತಂ ಸಮಾಪನ್ನಂ, ಸಿದ್ಧತ್ಥಮಪರಾಜಿತಂ;

ಸಮಾಧಿನಾ ಉಪವಿಟ್ಠಂ, ಅದ್ದಸಾಹಂ ನರುತ್ತಮಂ.

೨. ‘‘ಉಮಾಪುಪ್ಫಂ ಗಹೇತ್ವಾನ, ಬುದ್ಧಸ್ಸ ಅಭಿರೋಪಯಿಂ;

ಸಬ್ಬಪುಪ್ಫಾ ಏಕಸೀಸಾ, ಉದ್ಧಂವಣ್ಟಾ ಅಧೋಮುಖಾ.

೩. ‘‘ಸುಚಿತ್ತಾ ವಿಯ ತಿಟ್ಠನ್ತೇ, ಆಕಾಸೇ ಪುಪ್ಫಸನ್ಥರಾ;

ತೇನ ಚಿತ್ತಪ್ಪಸಾದೇನ, ತುಸಿತಂ ಉಪಪಜ್ಜಹಂ.

೪. ‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೫. ‘‘ಪಞ್ಚಪಞ್ಞಾಸಿತೋ ಕಪ್ಪೇ, ಏಕೋ ಆಸಿಂ ಮಹೀಪತಿ;

ಸಮನ್ತಛದನೋ ನಾಮ, ಚಕ್ಕವತ್ತೀ ಮಹಬ್ಬಲೋ.

೬. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ.

ಇತ್ಥಂ ಸುದಂ ಆಯಸ್ಮಾ ಉಮಾಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಉಮಾಪುಪ್ಫಿಯತ್ಥೇರಸ್ಸಾಪದಾನಂ ಪಠಮಂ.