೩. ಛತ್ತದಾಯಕತ್ಥೇರಅಪದಾನಂ

೧೧. ‘‘ಪುತ್ತೋ ಮಮ ಪಬ್ಬಜಿತೋ, ಕಾಸಾಯವಸನೋ ತದಾ;

ಸೋ ಚ ಬುದ್ಧತ್ತಂ ಸಮ್ಪತ್ತೋ, ನಿಬ್ಬುತೋ ಲೋಕಪೂಜಿತೋ.

೧೨. ‘‘ವಿಚಿನನ್ತೋ ಸಕಂ ಪುತ್ತಂ, ಅಗಮಂ ಪಚ್ಛತೋ ಅಹಂ;

ನಿಬ್ಬುತಸ್ಸ ಮಹನ್ತಸ್ಸ, ಚಿತಕಂ ಅಗಮಾಸಹಂ.

೧೩. ‘‘ಪಗ್ಗಯ್ಹ ಅಞ್ಜಲಿಂ ತತ್ಥ, ವನ್ದಿತ್ವಾ ಚಿತಕಂ ಅಹಂ;

ಸೇತಚ್ಛತ್ತಞ್ಚ ಪಗ್ಗಯ್ಹ, ಆರೋಪೇಸಿಂ ಅಹಂ ತದಾ.

೧೪. ‘‘ಚತುನ್ನವುತಿತೋ ಕಪ್ಪೇ, ಯಂ ಛತ್ತಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಛತ್ತದಾನಸ್ಸಿದಂ ಫಲಂ.

೧೫. ‘‘ಪಞ್ಚವೀಸೇ ಇತೋ ಕಪ್ಪೇ, ಸತ್ತ ಆಸುಂ ಜನಾಧಿಪಾ;

ಮಹಾರಹಸನಾಮಾ ತೇ, ಚಕ್ಕವತ್ತೀ ಮಹಬ್ಬಲಾ.

೧೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಛತ್ತದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಛತ್ತದಾಯಕತ್ಥೇರಸ್ಸಾಪದಾನಂ ತತಿಯಂ.