೪. ಸದ್ದಸಞ್ಞಕತ್ಥೇರಅಪದಾನಂ

೧೭. ‘‘ಅನುಗ್ಗತಮ್ಹಿ ಆದಿಚ್ಚೇ, ಪನಾದೋ [ಪಸಾದೋ (ಸ್ಯಾ. ಅಟ್ಠ.)] ವಿಪುಲೋ ಅಹು;

ಬುದ್ಧಸೇಟ್ಠಸ್ಸ ಲೋಕಮ್ಹಿ, ಪಾತುಭಾವೋ ಮಹೇಸಿನೋ.

೧೮. ‘‘ಘೋಸ [ಸದ್ದ (ಸೀ. ಸ್ಯಾ.)] ಮಸ್ಸೋಸಹಂ ತತ್ಥ, ನ ಚ ಪಸ್ಸಾಮಿ ತಂ ಜಿನಂ;

ಮರಣಞ್ಚ ಅನುಪ್ಪತ್ತೋ, ಬುದ್ಧಸಞ್ಞಮನುಸ್ಸರಿಂ.

೧೯. ‘‘ಚತುನ್ನವುತಿತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೨೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸದ್ದಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸದ್ದಸಞ್ಞಕತ್ಥೇರಸ್ಸಾಪದಾನಂ ಚತುತ್ಥಂ.