೩೦. ಚಿತಕಪೂಜಕವಗ್ಗೋ

೧. ಚಿತಕಪೂಜಕತ್ಥೇರಅಪದಾನಂ

೧. ‘‘ಅಜಿತೋ ನಾಮ ನಾಮೇನ, ಅಹೋಸಿಂ ಬ್ರಾಹ್ಮಣೋ ತದಾ;

ಆಹುತಿಂ ಯಿಟ್ಠುಕಾಮೋಹಂ, ನಾನಾಪುಪ್ಫಂ ಸಮಾನಯಿಂ.

೨. ‘‘ಜಲನ್ತಂ ಚಿತಕಂ ದಿಸ್ವಾ, ಸಿಖಿನೋ ಲೋಕಬನ್ಧುನೋ;

ತಞ್ಚ ಪುಪ್ಫಂ ಸಮಾನೇತ್ವಾ, ಚಿತಕೇ ಓಕಿರಿಂ ಅಹಂ.

೩. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೪. ‘‘ಸತ್ತವೀಸೇ [ಸತ್ತತಿಂಸೇ (ಕ.)] ಇತೋ ಕಪ್ಪೇ, ಸತ್ತಾಸುಂ ಮನುಜಾಧಿಪಾ;

ಸುಪಜ್ಜಲಿತನಾಮಾ ತೇ, ಚಕ್ಕವತ್ತೀ ಮಹಬ್ಬಲಾ.

೫. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಚಿತಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಚಿತಕಪೂಜಕತ್ಥೇರಸ್ಸಾಪದಾನಂ ಪಠಮಂ.

೨. ಪುಪ್ಫಧಾರಕತ್ಥೇರಅಪದಾನಂ

೬. ‘‘ವಾಕಚೀರಧರೋ ಆಸಿಂ, ಅಜಿನುತ್ತರವಾಸನೋ;

ಅಭಿಞ್ಞಾ ಪಞ್ಚ ನಿಬ್ಬತ್ತಾ, ಚನ್ದಸ್ಸ ಪರಿಮಜ್ಜಕೋ.

೭. ‘‘ವಿಪಸ್ಸಿಂ ಲೋಕಪಜ್ಜೋತಂ, ದಿಸ್ವಾ ಅಭಿಗತಂ ಮಮಂ;

ಪಾರಿಚ್ಛತ್ತಕಪುಪ್ಫಾನಿ, ಧಾರೇಸಿಂ ಸತ್ಥುನೋ ಅಹಂ.

೮. ‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಧಾರಣಾಯ ಇದಂ ಫಲಂ.

೯. ‘‘ಸತ್ತಾಸೀತಿಮ್ಹಿತೋ ಕಪ್ಪೇ, ಏಕೋ ಆಸಿಂ ಮಹೀಪತಿ;

ಸಮನ್ತಧಾರಣೋ ನಾಮ, ಚಕ್ಕವತ್ತೀ ಮಹಬ್ಬಲೋ.

೧೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪುಪ್ಫಧಾರಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪುಪ್ಫಧಾರಕತ್ಥೇರಸ್ಸಾಪದಾನಂ ದುತಿಯಂ.

೩. ಛತ್ತದಾಯಕತ್ಥೇರಅಪದಾನಂ

೧೧. ‘‘ಪುತ್ತೋ ಮಮ ಪಬ್ಬಜಿತೋ, ಕಾಸಾಯವಸನೋ ತದಾ;

ಸೋ ಚ ಬುದ್ಧತ್ತಂ ಸಮ್ಪತ್ತೋ, ನಿಬ್ಬುತೋ ಲೋಕಪೂಜಿತೋ.

೧೨. ‘‘ವಿಚಿನನ್ತೋ ಸಕಂ ಪುತ್ತಂ, ಅಗಮಂ ಪಚ್ಛತೋ ಅಹಂ;

ನಿಬ್ಬುತಸ್ಸ ಮಹನ್ತಸ್ಸ, ಚಿತಕಂ ಅಗಮಾಸಹಂ.

೧೩. ‘‘ಪಗ್ಗಯ್ಹ ಅಞ್ಜಲಿಂ ತತ್ಥ, ವನ್ದಿತ್ವಾ ಚಿತಕಂ ಅಹಂ;

ಸೇತಚ್ಛತ್ತಞ್ಚ ಪಗ್ಗಯ್ಹ, ಆರೋಪೇಸಿಂ ಅಹಂ ತದಾ.

೧೪. ‘‘ಚತುನ್ನವುತಿತೋ ಕಪ್ಪೇ, ಯಂ ಛತ್ತಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಛತ್ತದಾನಸ್ಸಿದಂ ಫಲಂ.

೧೫. ‘‘ಪಞ್ಚವೀಸೇ ಇತೋ ಕಪ್ಪೇ, ಸತ್ತ ಆಸುಂ ಜನಾಧಿಪಾ;

ಮಹಾರಹಸನಾಮಾ ತೇ, ಚಕ್ಕವತ್ತೀ ಮಹಬ್ಬಲಾ.

೧೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಛತ್ತದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಛತ್ತದಾಯಕತ್ಥೇರಸ್ಸಾಪದಾನಂ ತತಿಯಂ.

೪. ಸದ್ದಸಞ್ಞಕತ್ಥೇರಅಪದಾನಂ

೧೭. ‘‘ಅನುಗ್ಗತಮ್ಹಿ ಆದಿಚ್ಚೇ, ಪನಾದೋ [ಪಸಾದೋ (ಸ್ಯಾ. ಅಟ್ಠ.)] ವಿಪುಲೋ ಅಹು;

ಬುದ್ಧಸೇಟ್ಠಸ್ಸ ಲೋಕಮ್ಹಿ, ಪಾತುಭಾವೋ ಮಹೇಸಿನೋ.

೧೮. ‘‘ಘೋಸ [ಸದ್ದ (ಸೀ. ಸ್ಯಾ.)] ಮಸ್ಸೋಸಹಂ ತತ್ಥ, ನ ಚ ಪಸ್ಸಾಮಿ ತಂ ಜಿನಂ;

ಮರಣಞ್ಚ ಅನುಪ್ಪತ್ತೋ, ಬುದ್ಧಸಞ್ಞಮನುಸ್ಸರಿಂ.

೧೯. ‘‘ಚತುನ್ನವುತಿತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೨೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸದ್ದಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸದ್ದಸಞ್ಞಕತ್ಥೇರಸ್ಸಾಪದಾನಂ ಚತುತ್ಥಂ.

೫. ಗೋಸೀಸನಿಕ್ಖೇಪಕತ್ಥೇರಅಪದಾನಂ

೨೧. ‘‘ಆರಾಮದ್ವಾರಾ ನಿಕ್ಖಮ್ಮ, ಗೋಸೀಸಂ ಸನ್ಥತಂ ಮಯಾ;

ಅನುಭೋಮಿ ಸಕಂ ಕಮ್ಮಂ, ಪುಬ್ಬಕಮ್ಮಸ್ಸಿದಂ ಫಲಂ.

೨೨. ‘‘ಆಜಾನಿಯಾ ವಾತಜವಾ, ಸಿನ್ಧವಾ ಸೀಘವಾಹನಾ;

ಅನುಭೋಮಿ ಸಬ್ಬಮೇತಂ, ಗೋಸೀಸಸ್ಸ ಇದಂ ಫಲಂ.

೨೩. ‘‘ಅಹೋ ಕಾರಂ ಪರಮಕಾರಂ, ಸುಖತ್ತೇ ಸುಕತಂ ಮಯಾ;

ಸಙ್ಘೇ ಕತಸ್ಸ ಕಾರಸ್ಸ, ನ ಅಞ್ಞಂ ಕಲಮಗ್ಘತಿ.

೨೪. ‘‘ಚತುನ್ನವುತಿತೋ ಕಪ್ಪೇ, ಯಂ ಸೀಸಂ ಸನ್ಥರಿಂ ಅಹಂ;

ದುಗ್ಗತಿಂ ನಾಭಿಜಾನಾಮಿ, ಸನ್ಥರಸ್ಸ ಇದಂ ಫಲಂ.

೨೫. ‘‘ಪಞ್ಚಸತ್ತತಿಕಪ್ಪಮ್ಹಿ, ಸುಪ್ಪತಿಟ್ಠಿತನಾಮಕೋ;

ಏಕೋ ಆಸಿಂ ಮಹಾತೇಜೋ, ಚಕ್ಕವತ್ತೀ ಮಹಬ್ಬಲೋ.

೨೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಗೋಸೀಸನಿಕ್ಖೇಪಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಗೋಸೀಸನಿಕ್ಖೇಪಕತ್ಥೇರಸ್ಸಾಪದಾನಂ ಪಞ್ಚಮಂ.

೬. ಪಾದಪೂಜಕತ್ಥೇರಅಪದಾನಂ

೨೭. ‘‘ಪಬ್ಬತೇ ಹಿಮವನ್ತಮ್ಹಿ, ಅಹೋಸಿಂ ಕಿನ್ನರೋ ತದಾ;

ಅದ್ದಸಂ ವಿರಜಂ ಬುದ್ಧಂ, ಪೀತರಂಸಿಂವ ಭಾಣುಮಂ.

೨೮. ‘‘ಉಪೇತಂ ತಮಹಂ [ಉಪೇತೋಪಿ ತದಾ (ಸ್ಯಾ.), ಉಪೇಸಿಂ ತಮಹಂ (?)] ಬುದ್ಧಂ, ವಿಪಸ್ಸಿಂ ಲೋಕನಾಯಕಂ;

ಚನ್ದನಂ ತಗರಞ್ಚಾಪಿ, ಪಾದೇ ಓಸಿಞ್ಚಹಂ ತದಾ.

೨೯. ‘‘ಏಕನವುತಿತೋ ಕಪ್ಪೇ, ಯಂ ಪಾದಂ ಅಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಪಾದಪೂಜಾಯಿದಂ ಫಲಂ.

೩೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಾದಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಾದಪೂಜಕತ್ಥೇರಸ್ಸಾಪದಾನಂ ಛಟ್ಠಂ.

೭. ದೇಸಕಿತ್ತಕತ್ಥೇರಅಪದಾನಂ

೩೧. ‘‘ಉಪಸಾಲಕನಾಮೋಹಂ, ಅಹೋಸಿಂ ಬ್ರಾಹ್ಮಣೋ ತದಾ;

ಕಾನನಂ ವನಮೋಗಾಳ್ಹಂ, ಲೋಕಜೇಟ್ಠಂ ನರಾಸಭಂ.

೩೨. ‘‘ದಿಸ್ವಾನ ವನ್ದಿಂ ಪಾದೇಸು, ಲೋಕಾಹುತಿಪಟಿಗ್ಗಹಂ;

ಪಸನ್ನಚಿತ್ತಂ ಮಂ ಞತ್ವಾ, ಬುದ್ಧೋ ಅನ್ತರಧಾಯಥ.

೩೩. ‘‘ಕಾನನಾ ಅಭಿನಿಕ್ಖಮ್ಮ, ಬುದ್ಧಸೇಟ್ಠಮನುಸ್ಸರಿಂ;

ತಂ ದೇಸಂ ಕಿತ್ತಯಿತ್ವಾನ, ಕಪ್ಪಂ ಸಗ್ಗಮ್ಹಿ ಮೋದಹಂ.

೩೪. ‘‘ದ್ವೇನವುತೇ ಇತೋ ಕಪ್ಪೇ, ಯಂ ದೇಸಮಭಿಕಿತ್ತಯಿಂ;

ದುಗ್ಗತಿಂ ನಾಭಿಜಾನಾಮಿ, ಕಿತ್ತನಾಯ ಇದಂ ಫಲಂ.

೩೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ದೇಸಕಿತ್ತಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ದೇಸಕಿತ್ತಕತ್ಥೇರಸ್ಸಾಪದಾನಂ ಸತ್ತಮಂ.

೮. ಸರಣಗಮನಿಯತ್ಥೇರಅಪದಾನಂ

೩೬. ‘‘ಪಬ್ಬತೇ ಹಿಮವನ್ತಮ್ಹಿ, ಅಹೋಸಿಂ ಲುದ್ದಕೋ ತದಾ;

ವಿಪಸ್ಸಿಂ ಅದ್ದಸಂ ಬುದ್ಧಂ, ಲೋಕಜೇಟ್ಠಂ ನರಾಸಭಂ.

೩೭. ‘‘ಉಪಾಸಿತ್ವಾನ ಸಮ್ಬುದ್ಧಂ, ವೇಯ್ಯಾವಚ್ಚಮಕಾಸಹಂ;

ಸರಣಞ್ಚ ಉಪಾಗಚ್ಛಿಂ, ದ್ವಿಪದಿನ್ದಸ್ಸ ತಾದಿನೋ.

೩೮. ‘‘ಏಕನವುತಿತೋ ಕಪ್ಪೇ, ಸರಣಂ ಉಪಗಚ್ಛಹಂ;

ದುಗ್ಗತಿಂ ನಾಭಿಜಾನಾಮಿ, ಸರಣಾಗಮನಪ್ಫಲಂ.

೩೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸರಣಗಮನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸರಣಗಮನಿಯತ್ಥೇರಸ್ಸಾಪದಾನಂ ಅಟ್ಠಮಂ.

೯. ಅಮ್ಬಪಿಣ್ಡಿಯತ್ಥೇರಅಪದಾನಂ

೪೦. ‘‘ರೋಮಸೋ ನಾಮ ನಾಮೇನ, ದಾನವೋ ಇತಿ ವಿಸ್ಸುತೋ;

ಅಮ್ಬಪಿಣ್ಡೀ ಮಯಾ ದಿನ್ನಾ [ಅಮ್ಬಪಿಣ್ಡೋ ಮಯಾ ದಿನ್ನೋ (ಸ್ಯಾ.)], ವಿಪಸ್ಸಿಸ್ಸ ಮಹೇಸಿನೋ.

೪೧. ‘‘ಏಕನವುತಿತೋ ಕಪ್ಪೇ, ಯಮಮ್ಬಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಅಮ್ಬದಾನಸ್ಸಿದಂ ಫಲಂ.

೪೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅಮ್ಬಪಿಣ್ಡಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಅಮ್ಬಪಿಣ್ಡಿಯತ್ಥೇರಸ್ಸಾಪದಾನಂ ನವಮಂ.

೧೦. ಅನುಸಂಸಾವಕತ್ಥೇರಅಪದಾನಂ

೪೩. ‘‘ಪಿಣ್ಡಾಯ ಚರಮಾನಾಹಂ, ವಿಪಸ್ಸಿಮದ್ದಸಂ ಜಿನಂ;

ಉಳುಙ್ಗಭಿಕ್ಖಂ ಪಾದಾಸಿಂ, ದ್ವಿಪದಿನ್ದಸ್ಸ ತಾದಿನೋ.

೪೪. ‘‘ಪಸನ್ನಚಿತ್ತೋ ಸುಮನೋ, ಅಭಿವಾದೇಸಹಂ ತದಾ;

ಅನುಸಂಸಾವಯಿಂ ಬುದ್ಧಂ, ಉತ್ತಮತ್ಥಸ್ಸ ಪತ್ತಿಯಾ.

೪೫. ‘‘ಏಕನವುತಿತೋ ಕಪ್ಪೇ, ಅನುಸಂಸಾವಯಿಂ ಅಹಂ;

ದುಗ್ಗತಿಂ ನಾಭಿಜಾನಾಮಿ, ಅನುಸಂಸಾವನಾ ಫಲಂ.

೪೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅನುಸಂಸಾವಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಅನುಸಂಸಾವಕತ್ಥೇರಸ್ಸಾಪದಾನಂ ದಸಮಂ.

ಚಿತಕಪೂಜಕವಗ್ಗೋ ತಿಂಸತಿಮೋ.

ತಸ್ಸುದ್ದಾನಂ –

ಚಿತಕಂ ಪಾರಿಛತ್ತೋ ಚ, ಸದ್ದಗೋಸೀಸಸನ್ಥರಂ;

ಪಾದೋ ಪದೇಸಂ ಸರಣಂ, ಅಮ್ಬೋ ಸಂಸಾವಕೋಪಿ ಚ;

ಅಟ್ಠತಾಲೀಸ ಗಾಥಾಯೋ, ಗಣಿತಾಯೋ ವಿಭಾವಿಭಿ.

ಅಥ ವಗ್ಗುದ್ದಾನಂ –

ಕಣಿಕಾರೋ ಹತ್ಥಿದದೋ, ಆಲಮ್ಬಣುದಕಾಸನಂ;

ತುವರಂ ಥೋಮಕೋ ಚೇವ, ಉಕ್ಖೇಪಂ ಸೀಸುಪಧಾನಂ.

ಪಣ್ಣದೋ ಚಿತಪೂಜೀ ಚ, ಗಾಥಾಯೋ ಚೇವ ಸಬ್ಬಸೋ;

ಚತ್ತಾರಿ ಚ ಸತಾನೀಹ, ಏಕಪಞ್ಞಾಸಮೇವ ಚ.

ಪಞ್ಚವೀಸಸತಾ ಸಬ್ಬಾ, ದ್ವಾಸತ್ತತಿ ತದುತ್ತರಿ;

ತಿಸತಂ ಅಪದಾನಾನಂ, ಗಣಿತಾ ಅತ್ಥದಸ್ಸಿಭಿ.

ಕಣಿಕಾರವಗ್ಗದಸಕಂ.