೩೧. ಪದುಮಕೇಸರವಗ್ಗೋ

೧. ಪದುಮಕೇಸರಿಯತ್ಥೇರಅಪದಾನಂ

೧. ‘‘ಇಸಿಸಙ್ಘೇ ಅಹಂ ಪುಬ್ಬೇ, ಆಸಿಂ ಮಾತಙ್ಗವಾರಣೋ;

ಮಹೇಸೀನಂ ಪಸಾದೇನ, ಪದ್ಮಕೇಸರಮೋಕಿರಿಂ.

೨. ‘‘ಪಚ್ಚೇಕಜಿನಸೇಟ್ಠೇಸು, ಧುತರಾಗೇಸು ತಾದಿಸು;

ತೇಸು ಚಿತ್ತಂ ಪಸಾದೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.

೩. ‘‘ಏಕನವುತಿತೋ ಕಪ್ಪೇ, ಕೇಸರಂ ಓಕಿರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೪. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪದುಮಕೇಸರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪದುಮಕೇಸರಿಯತ್ಥೇರಸ್ಸಾಪದಾನಂ ಪಠಮಂ.

೨. ಸಬ್ಬಗನ್ಧಿಯತ್ಥೇರಅಪದಾನಂ

೫. ‘‘ಗನ್ಧಮಾಲಂ ಮಯಾ ದಿನ್ನಂ, ವಿಪಸ್ಸಿಸ್ಸ ಮಹೇಸಿನೋ;

ಅದಾಸಿಂ ಉಜುಭೂತಸ್ಸ, ಕೋಸೇಯ್ಯವತ್ಥಮುತ್ತಮಂ.

೬. ‘‘ಏಕನವುತಿತೋ ಕಪ್ಪೇ, ಯಂ ವತ್ಥಮದದಿಂ [ಗನ್ಧಮದದಿಂ (ಸ್ಯಾ.)] ಪುರೇ;

ದುಗ್ಗತಿಂ ನಾಭಿಜಾನಾಮಿ, ಗನ್ಧದಾನಸ್ಸಿದಂ ಫಲಂ.

೭. ‘‘ಇತೋ ಪನ್ನರಸೇ ಕಪ್ಪೇ, ಸುಚೇಳೋ ನಾಮ ಖತ್ತಿಯೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಬ್ಬಗನ್ಧಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಬ್ಬಗನ್ಧಿಯತ್ಥೇರಸ್ಸಾಪದಾನಂ ದುತಿಯಂ.

೩. ಪರಮನ್ನದಾಯಕತ್ಥೇರಅಪದಾನಂ

೯. ‘‘ಕಣಿಕಾರಂವ ಜೋತನ್ತಂ, ಉದಯನ್ತಂವ ಭಾಣುಮಂ;

ವಿಪಸ್ಸಿಂ ಅದ್ದಸಂ ಬುದ್ಧಂ, ಲೋಕಜೇಟ್ಠಂ ನರಾಸಭಂ.

೧೦. ‘‘ಅಞ್ಜಲಿಂ ಪಗ್ಗಹೇತ್ವಾನ, ಅಭಿನೇಸಿಂ ಸಕಂ ಘರಂ;

ಅಭಿನೇತ್ವಾನ ಸಮ್ಬುದ್ಧಂ, ಪರಮನ್ನಮದಾಸಹಂ.

೧೧. ‘‘ಏಕನವುತಿತೋ ಕಪ್ಪೇ, ಪರಮನ್ನಮದಿಂ [ಪರಮನ್ನಂ ದದಿಂ (ಸೀ.), ಪರಮನ್ನಮದಂ (ಸ್ಯಾ.)] ತದಾ;

ದುಗ್ಗತಿಂ ನಾಭಿಜಾನಾಮಿ, ಪರಮನ್ನಸ್ಸಿದಂ ಫಲಂ.

೧೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪರಮನ್ನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪರಮನ್ನದಾಯಕತ್ಥೇರಸ್ಸಾಪದಾನಂ ತತಿಯಂ.

೪. ಧಮ್ಮಸಞ್ಞಕತ್ಥೇರಅಪದಾನಂ

೧೩. ‘‘ವಿಪಸ್ಸಿನೋ ಭಗವತೋ, ಮಹಾಬೋಧಿಮಹೋ ಅಹು;

ರುಕ್ಖಟ್ಠಸ್ಸೇವ ಸಮ್ಬುದ್ಧೋ, [ರುಕ್ಖಟ್ಠೇಯೇವ ಸಮ್ಬುದ್ಧೇ (ಸೀ.), ರುಕ್ಖಟ್ಠೋ ಇವ ಸಮ್ಬುದ್ಧೋ (ಅಟ್ಠ.) ಏತ್ಥ ರುಕ್ಖಟ್ಠಸ್ಸೇವ ಬೋಧಿಮಹಕಾರಜನಸ್ಸ ಸಮ್ಬುದ್ಧೋ ಚತುಸಚ್ಚಂ ಪಕಾಸೇತೀತಿ ಅತ್ಥೋಪಿ ಸಕ್ಕಾ ಞಾತುಂ] ಲೋಕಜೇಟ್ಠೋ ನರಾಸಭೋ [ಲೋಕಜೇಟ್ಠೇ ನರಾಸಭೇ (ಸೀ.)].

೧೪. ‘‘ಭಗವಾ ತಮ್ಹಿ ಸಮಯೇ, ಭಿಕ್ಖುಸಙ್ಘಪುರಕ್ಖತೋ;

ಚತುಸಚ್ಚಂ ಪಕಾಸೇತಿ, ವಾಚಾಸಭಿಮುದೀರಯಂ.

೧೫. ‘‘ಸಙ್ಖಿತ್ತೇನ ಚ ದೇಸೇನ್ತೋ, ವಿತ್ಥಾರೇನ ಚ ದೇಸಯಂ [ದೇಸಯಿ (ಸ್ಯಾ.), ಭಾಸತಿ (ಕ.)];

ವಿವಟ್ಟಚ್ಛದೋ ಸಮ್ಬುದ್ಧೋ, ನಿಬ್ಬಾಪೇಸಿ ಮಹಾಜನಂ.

೧೬. ‘‘ತಸ್ಸಾಹಂ ಧಮ್ಮಂ ಸುತ್ವಾನ, ಲೋಕಜೇಟ್ಠಸ್ಸ ತಾದಿನೋ;

ವನ್ದಿತ್ವಾ ಸತ್ಥುನೋ ಪಾದೇ, ಪಕ್ಕಾಮಿಂ ಉತ್ತರಾಮುಖೋ.

೧೭. ‘‘ಏಕನವುತಿತೋ ಕಪ್ಪೇ, ಯಂ ಧಮ್ಮಮಸುಣಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಧಮ್ಮಸವಸ್ಸಿದಂ ಫಲಂ.

೧೮. ‘‘ತೇತ್ತಿಂಸಮ್ಹಿ ಇತೋ ಕಪ್ಪೇ, ಏಕೋ ಆಸಿಂ ಮಹೀಪತಿ;

ಸುತವಾ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.

೧೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಧಮ್ಮಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಧಮ್ಮಸಞ್ಞಕತ್ಥೇರಸ್ಸಾಪದಾನಂ ಚತುತ್ಥಂ.

೫. ಫಲದಾಯಕತ್ಥೇರಅಪದಾನಂ

೨೦. ‘‘ಭಾಗೀರಥೀನದೀತೀರೇ, ಅಹೋಸಿ ಅಸ್ಸಮೋ ತದಾ;

ತಮಹಂ ಅಸ್ಸಮಂ ಗಚ್ಛಿಂ, ಫಲಹತ್ಥೋ ಅಪೇಕ್ಖವಾ.

೨೧. ‘‘ವಿಪಸ್ಸಿಂ ತತ್ಥ ಅದ್ದಕ್ಖಿಂ, ಪೀತರಂಸಿಂವ ಭಾಣುಮಂ;

ಯಂ ಮೇ ಅತ್ಥಿ ಫಲಂ ಸಬ್ಬಂ, ಅದಾಸಿಂ ಸತ್ಥುನೋ ಅಹಂ.

೨೨. ‘‘ಏಕನವುತಿತೋ ಕಪ್ಪೇ, ಯಂ ಫಲಂ ಅದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.

೨೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಫಲದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಫಲದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.

೬. ಸಮ್ಪಸಾದಕತ್ಥೇರಅಪದಾನಂ

೨೪. ‘‘‘ನಮೋ ತೇ ಬುದ್ಧ ವೀರತ್ಥು, ವಿಪ್ಪಮುತ್ತೋಸಿ ಸಬ್ಬಧಿ;

ಬ್ಯಸನಮ್ಹಿ [ಬ್ಯಸನಂ ಹಿ (ಸೀ.)] ಅನುಪ್ಪತ್ತೋ, ತಸ್ಸ ಮೇ ಸರಣಂ ಭವ’.

೨೫. ‘‘ಸಿದ್ಧತ್ಥೋ ತಸ್ಸ ಬ್ಯಾಕಾಸಿ, ಲೋಕೇ ಅಪ್ಪಟಿಪುಗ್ಗಲೋ;

‘ಮಹೋದಧಿಸಮೋ ಸಙ್ಘೋ, ಅಪ್ಪಮೇಯ್ಯೋ ಅನುತ್ತರೋ.

೨೬. ‘‘‘ತತ್ಥ ತ್ವಂ ವಿರಜೇ ಖೇತ್ತೇ, ಅನನ್ತಫಲದಾಯಕೇ;

ಸಙ್ಘೇ ಚಿತ್ತಂ ಪಸಾದೇತ್ವಾ, ಸುಬೀಜಂ ವಾಪ [ಚಾಪಿ (ಸೀ.), ವಾಪಿ (ಸ್ಯಾ.)] ರೋಪಯ.

೨೭. ‘‘ಇದಂ ವತ್ವಾನ ಸಬ್ಬಞ್ಞೂ, ಲೋಕಜೇಟ್ಠೋ ನರಾಸಭೋ;

ಮಮೇವ ಅನುಸಾಸಿತ್ವಾ, ವೇಹಾಸಂ ನಭಮುಗ್ಗಮಿ.

೨೮. ‘‘ಅಚಿರಂ ಗತಮತ್ತಮ್ಹಿ, ಸಬ್ಬಞ್ಞುಮ್ಹಿ ನರಾಸಭೇ;

ಮರಣಂ ಸಮನುಪ್ಪತ್ತೋ, ತುಸಿತಂ ಉಪಪಜ್ಜಹಂ.

೨೯. ‘‘ತದಾಹಂ ವಿರಜೇ ಖೇತ್ತೇ, ಅನನ್ತಫಲದಾಯಕೇ;

ಸಙ್ಘೇ ಚಿತ್ತಂ ಪಸಾದೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.

೩೦. ‘‘ಚತುನ್ನವುತಿತೋ ಕಪ್ಪೇ, ಪಸಾದಮಲಭಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪಸಾದಸ್ಸ ಇದಂ ಫಲಂ.

೩೧. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಮ್ಪಸಾದಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಮ್ಪಸಾದಕತ್ಥೇರಸ್ಸಾಪದಾನಂ ಛಟ್ಠಂ.

೭. ಆರಾಮದಾಯಕತ್ಥೇರಅಪದಾನಂ

೩೨. ‘‘ಸಿದ್ಧತ್ಥಸ್ಸ ಭಗವತೋ, ಆರಾಮೋ ರೋಪಿತೋ ಮಯಾ;

ಸನ್ದಚ್ಛಾಯೇಸು [ಸೀತಛಾಯೇಸು (ಸ್ಯಾ.), ಸನ್ತಚ್ಛಾಯೇಸು (ಕ.)] ರುಕ್ಖೇಸು, ಉಪಾಸನ್ತೇಸು ಪಕ್ಖಿಸು.

೩೩. ‘‘ಅದ್ದಸಂ ವಿರಜಂ ಬುದ್ಧಂ, ಆಹುತೀನಂ ಪಟಿಗ್ಗಹಂ;

ಆರಾಮಂ ಅಭಿನಾಮೇಸಿಂ, ಲೋಕಜೇಟ್ಠಂ ನರಾಸಭಂ.

೩೪. ‘‘ಹಟ್ಠೋ ಹಟ್ಠೇನ ಚಿತ್ತೇನ, ಫಲಂ ಪುಪ್ಫಮದಾಸಹಂ;

ತತೋ ಜಾತಪ್ಪಸಾದೋವ, ತಂ ವನಂ ಪರಿಣಾಮಯಿಂ.

೩೫. ‘‘ಬುದ್ಧಸ್ಸ ಯಮಿದಂ ದಾಸಿಂ, ವಿಪ್ಪಸನ್ನೇನ ಚೇತಸಾ;

ಭವೇ ನಿಬ್ಬತ್ತಮಾನಮ್ಹಿ, ನಿಬ್ಬತ್ತತಿ ಫಲಂ ಮಮ.

೩೬. ‘‘ಚತುನ್ನವುತಿತೋ ಕಪ್ಪೇ, ಯಂ ಆರಾಮಮದಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಆರಾಮಸ್ಸ ಇದಂ ಫಲಂ.

೩೭. ‘‘ಸತ್ತತಿಂಸೇ ಇತೋ ಕಪ್ಪೇ, ಸತ್ತಾಸುಂ ಮುದುಸೀತಲಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೩೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಆರಾಮದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಆರಾಮದಾಯಕತ್ಥೇರಸ್ಸಾಪದಾನಂ ಸತ್ತಮಂ.

೮. ಅನುಲೇಪದಾಯಕತ್ಥೇರಅಪದಾನಂ

೩೯. ‘‘ಅತ್ಥದಸ್ಸಿಸ್ಸ ಮುನಿನೋ, ಅದ್ದಸಂ ಸಾವಕಂ ಅಹಂ;

ನವಕಮ್ಮಂ ಕರೋನ್ತಸ್ಸ, ಸೀಮಾಯ ಉಪಗಚ್ಛಹಂ.

೪೦. ‘‘ನಿಟ್ಠಿತೇ ನವಕಮ್ಮೇ ಚ, ಅನುಲೇಪಮದಾಸಹಂ;

ಪಸನ್ನಚಿತ್ತೋ ಸುಮನೋ, ಪುಞ್ಞಕ್ಖೇತ್ತೇ ಅನುತ್ತರೇ.

೪೧. ‘‘ಅಟ್ಠಾರಸೇ ಕಪ್ಪಸತೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಅನುಲೇಪಸ್ಸಿದಂ ಫಲಂ.

೪೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅನುಲೇಪದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಅನುಲೇಪದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.

೯. ಬುದ್ಧಸಞ್ಞಕತ್ಥೇರಅಪದಾನಂ

೪೩. ‘‘ಉದೇನ್ತಂ ಸತರಂಸಿಂವ, ಪೀತರಂಸಿಂವ ಭಾಣುಮಂ;

ವನನ್ತರಗತಂ ಸನ್ತಂ, ಲೋಕಜೇಟ್ಠಂ ನರಾಸಭಂ.

೪೪. ‘‘ಅದ್ದಸಂ ಸುಪಿನನ್ತೇನ, ಸಿದ್ಧತ್ಥಂ ಲೋಕನಾಯಕಂ;

ತತ್ಥ ಚಿತ್ತಂ ಪಸಾದೇತ್ವಾ, ಸುಗತಿಂ ಉಪಪಜ್ಜಹಂ.

೪೫. ‘‘ಚತುನ್ನವುತಿತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.

೪೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಬುದ್ಧಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಬುದ್ಧಸಞ್ಞಕತ್ಥೇರಸ್ಸಾಪದಾನಂ ನವಮಂ.

೧೦. ಪಬ್ಭಾರದಾಯಕತ್ಥೇರಅಪದಾನಂ

೪೭. ‘‘ಪಿಯದಸ್ಸಿನೋ ಭಗವತೋ, ಪಬ್ಭಾರೋ ಸೋಧಿತೋ ಮಯಾ;

ಘಟಕಞ್ಚ ಉಪಟ್ಠಾಸಿಂ, ಪರಿಭೋಗಾಯ ತಾದಿನೋ.

೪೮. ‘‘ತಂ ಮೇ ಬುದ್ಧೋ ವಿಯಾಕಾಸಿ, ಪಿಯದಸ್ಸೀ ಮಹಾಮುನಿ;

ಸಹಸ್ಸಕಣ್ಡೋ ಸತಭೇಣ್ಡು [ಸತಗೇಣ್ಡು (ಸ್ಯಾ. ಕ.)], ಧಜಾಲು ಹರಿತಾಮಯೋ.

೪೯. ‘‘ನಿಬ್ಬತ್ತಿಸ್ಸತಿ ಸೋ ಯೂಪೋ, ರತನಞ್ಚ ಅನಪ್ಪಕಂ;

ಪಬ್ಭಾರದಾನಂ ದತ್ವಾನ, ಕಪ್ಪಂ ಸಗ್ಗಮ್ಹಿ ಮೋದಹಂ.

೫೦. ‘‘ಇತೋ ಬಾತ್ತಿಂಸಕಪ್ಪಮ್ಹಿ, ಸುಸುದ್ಧೋ ನಾಮ ಖತ್ತಿಯೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೫೧. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಬ್ಭಾರದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಬ್ಭಾರದಾಯಕತ್ಥೇರಸ್ಸಾಪದಾನಂ ದಸಮಂ.

ಪದುಮಕೇಸರವಗ್ಗೋ ಏಕತಿಂಸತಿಮೋ.