೩೨. ಆರಕ್ಖದಾಯಕವಗ್ಗೋ

೧. ಆರಕ್ಖದಾಯಕತ್ಥೇರಅಪದಾನಂ

೧. ‘‘ಧಮ್ಮದಸ್ಸಿಸ್ಸ ಮುನಿನೋ, ವತಿ ಕಾರಾಪಿತಾ ಮಯಾ;

ಆರಕ್ಖೋ ಚ ಮಯಾ ದಿನ್ನೋ, ದ್ವಿಪದಿನ್ದಸ್ಸ ತಾದಿನೋ.

೨. ‘‘ಅಟ್ಠಾರಸೇ ಕಪ್ಪಸತೇ, ಯಂ ಕಮ್ಮಮಕರಿಂ ತದಾ;

ತೇನ ಕಮ್ಮವಿಸೇಸೇನ, ಪತ್ತೋ ಮೇ ಆಸವಕ್ಖಯೋ.

೩. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಆರಕ್ಖದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಆರಕ್ಖದಾಯಕತ್ಥೇರಸ್ಸಾಪದಾನಂ ಪಠಮಂ.

೨. ಭೋಜನದಾಯಕತ್ಥೇರಅಪದಾನಂ

೪. ‘‘ಸುಜಾತೋ ಸಾಲಲಟ್ಠೀವ, ಸೋಭಞ್ಜನಮಿವುಗ್ಗತೋ;

ಇನ್ದಲಟ್ಠಿರಿವಾಕಾಸೇ, ವಿರೋಚತಿ ಸದಾ ಜಿನೋ.

೫. ‘‘ತಸ್ಸ ದೇವಾತಿದೇವಸ್ಸ, ವೇಸ್ಸಭುಸ್ಸ ಮಹೇಸಿನೋ;

ಅದಾಸಿ ಭೋಜನಮಹಂ, ವಿಪ್ಪಸನ್ನೇನ ಚೇತಸಾ.

೬. ‘‘ತಂ ಮೇ ಬುದ್ಧೋ ಅನುಮೋದಿ, ಸಯಮ್ಭೂ ಅಪರಾಜಿತೋ;

ಭವೇ ನಿಬ್ಬತ್ತಮಾನಮ್ಹಿ, ಫಲಂ ನಿಬ್ಬತ್ತತೂ ತವ.

೭. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಭೋಜನಸ್ಸ ಇದಂ ಫಲಂ.

೮. ‘‘ಪಞ್ಚವೀಸೇ ಇತೋ ಕಪ್ಪೇ, ಏಕೋ ಆಸಿಂ ಅಮಿತ್ತಕೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಭೋಜನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಭೋಜನದಾಯಕತ್ಥೇರಸ್ಸಾಪದಾನಂ ದುತಿಯಂ.

೩. ಗತಸಞ್ಞಕತ್ಥೇರಅಪದಾನಂ

೧೦. ‘‘ಆಕಾಸೇವ ಪದಂ ನತ್ಥಿ, ಅಮ್ಬರೇ ಅನಿಲಞ್ಜಸೇ;

ಸಿದ್ಧತ್ಥಂ ಜಿನಮದ್ದಕ್ಖಿಂ, ಗಚ್ಛನ್ತಂ ತಿದಿವಙ್ಗಣೇ [ತಿದಿವಙ್ಗಣಂ (ಸ್ಯಾ. ಕ.)].

೧೧. ‘‘ಅನಿಲೇನೇರಿತಂ ದಿಸ್ವಾ, ಸಮ್ಮಾಸಮ್ಬುದ್ಧಚೀವರಂ;

ವಿತ್ತಿ ಮಮಾಹು ತಾವದೇ [ವಿತ್ತಿ ಮೇ ಪಾಹುಣಾ ತಾವ (ಸ್ಯಾ.), ವಿತ್ತಿ ಮೇ ತಾವದೇ ಜಾತಾ (ಸೀ.)], ದಿಸ್ವಾನ ಗಮನಂ ಮುನಿಂ [ಮುನೇ (ಸೀ.)].

೧೨. ‘‘ಚತುನ್ನವುತಿತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.

೧೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಗತಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಗತಸಞ್ಞಕತ್ಥೇರಸ್ಸಾಪದಾನಂ ತತಿಯಂ.

೪. ಸತ್ತಪದುಮಿಯತ್ಥೇರಅಪದಾನಂ

೧೪. ‘‘ನದೀಕೂಲೇ ವಸಾಮಹಂ, ನೇಸಾದೋ ನಾಮ ಬ್ರಾಹ್ಮಣೋ;

ಸತಪತ್ತೇಹಿ ಪುಪ್ಫೇಹಿ, ಸಮ್ಮಜ್ಜಿತ್ವಾನ ಅಸ್ಸಮಂ.

೧೫. ‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಸಿದ್ಧತ್ಥಂ ಲೋಕನಾಯಕಂ;

ದಿಸ್ವಾ ನಭೇನ [ವನೇನ (ಸ್ಯಾ. ಕ.)] ಗಚ್ಛನ್ತಂ, ಹಾಸೋ ಮೇ ಉದಪಜ್ಜಥ.

೧೬. ‘‘ಪಚ್ಚುಗ್ಗನ್ತ್ವಾನ ಸಮ್ಬುದ್ಧಂ, ಲೋಕಜೇಟ್ಠಂ ನರಾಸಭಂ;

ಅಸ್ಸಮಂ ಅತಿನಾಮೇತ್ವಾ, ಜಲಜಗ್ಗೇಹಿ ಓಕಿರಿಂ.

೧೭. ‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೮. ‘‘ಇತೋ ತೇ ಸತ್ತಮೇ ಕಪ್ಪೇ, ಚತುರೋ ಪಾದಪಾವರಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೧೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸತ್ತಪದುಮಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸತ್ತಪದುಮಿಯತ್ಥೇರಸ್ಸಾಪದಾನಂ ಚತುತ್ಥಂ.

೫. ಪುಪ್ಫಾಸನದಾಯಕತ್ಥೇರಅಪದಾನಂ

೨೦. ‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಪೀತರಂಸಿಂವ [ಸತರಂಸಿಂವ (ಸೀ. ಸ್ಯಾ.)] ಭಾಣುಮಂ;

ಅವಿದೂರೇನ ಗಚ್ಛನ್ತಂ, ಸಿದ್ಧತ್ಥಂ ಅಪರಾಜಿತಂ.

೨೧. ‘‘ತಸ್ಸ ಪಚ್ಚುಗ್ಗಮಿತ್ವಾನ, ಪವೇಸೇತ್ವಾನ ಅಸ್ಸಮಂ;

ಪುಪ್ಫಾಸನಂ ಮಯಾ ದಿನ್ನಂ, ವಿಪ್ಪಸನ್ನೇನ ಚೇತಸಾ.

೨೨. ‘‘ಅಞ್ಜಲಿಂ ಪಗ್ಗಹೇತ್ವಾನ, ವೇದಜಾತೋ ತದಾ ಅಹಂ;

ಬುದ್ಧೇ ಚಿತ್ತಂ ಪಸಾದೇತ್ವಾ, ತಂ ಕಮ್ಮಂ ಪರಿಣಾಮಯಿಂ.

೨೩. ‘‘ಯಂ ಮೇ ಅತ್ಥಿ ಕತಂ ಪುಞ್ಞಂ, ಸಯಮ್ಭುಮ್ಹಪರಾಜಿತೇ;

ಸಬ್ಬೇನ ತೇನ ಕುಸಲೇನ, ವಿಮಲೋ ಹೋಮಿ ಸಾಸನೇ.

೨೪. ‘‘ಚತುನ್ನವುತಿತೋ ಕಪ್ಪೇ, ಪುಪ್ಫಾಸನಮದಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪುಪ್ಫಾಸನಸ್ಸಿದಂ ಫಲಂ.

೨೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪುಪ್ಫಾಸನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪುಪ್ಫಾಸನದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.

೬. ಆಸನಸನ್ಥವಿಕತ್ಥೇರಅಪದಾನಂ

೨೬. ‘‘ಚೇತಿಯಂ ಉತ್ತಮಂ ನಾಮ, ಸಿಖಿನೋ ಲೋಕಬನ್ಧುನೋ;

ಅರಞ್ಞೇ ಇರೀಣೇ ವನೇ, ಅನ್ಧಾಹಿಣ್ಡಾಮಹಂ ತದಾ.

೨೭. ‘‘ಪವನಾ ನಿಕ್ಖಮನ್ತೇನ, ದಿಟ್ಠಂ ಸೀಹಾಸನಂ ಮಯಾ;

ಏಕಂಸಂ ಅಞ್ಜಲಿಂ ಕತ್ವಾ, ಸನ್ಥವಿಂ [ಥವಿಸ್ಸಂ (ಸೀ.)] ಲೋಕನಾಯಕಂ.

೨೮. ‘‘ದಿವಸಭಾಗಂ ಥವಿತ್ವಾನ, ಬುದ್ಧಂ ಲೋಕಗ್ಗನಾಯಕಂ;

ಹಟ್ಠೋ ಹಟ್ಠೇನ ಚಿತ್ತೇನ, ಇಮಂ ವಾಚಂ ಉದೀರಯಿಂ.

೨೯. ‘‘‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ;

ಸಬ್ಬಞ್ಞೂಸಿ ಮಹಾವೀರ, ಲೋಕಜೇಟ್ಠ ನರಾಸಭ’.

೩೦. ‘‘ಅಭಿತ್ಥವಿತ್ವಾ ಸಿಖಿನಂ, ನಿಮಿತ್ತಕರಣೇನಹಂ;

ಆಸನಂ ಅಭಿವಾದೇತ್ವಾ, ಪಕ್ಕಾಮಿಂ ಉತ್ತರಾಮುಖೋ.

೩೧. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಥವಿಂ ವದತಂ ವರಂ;

ದುಗ್ಗತಿಂ ನಾಭಿಜಾನಾಮಿ, ಥೋಮನಾಯ ಇದಂ ಫಲಂ.

೩೨. ‘‘ಸತ್ತವೀಸೇ ಇತೋ ಕಪ್ಪೇ, ಅತುಲಾ ಸತ್ತ ಆಸು ತೇ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೩೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಆಸನಸನ್ಥವಿಕೋ [ಆಸನಸನ್ಥವಕೋ (?), ಆಸನಥವಿಕೋ (ಕ.), ಆಸನತ್ಥವಿಕೋ (ಸೀ. ಸ್ಯಾ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಆಸನಸನ್ಥವಿಕತ್ಥೇರಸ್ಸಾಪದಾನಂ ಛಟ್ಠಂ.

೭. ಸದ್ದಸಞ್ಞಕತ್ಥೇರಅಪದಾನಂ

೩೪. ‘‘ಸುದಸ್ಸನೋ ಮಹಾವೀರೋ, ದೇಸೇತಿ ಅಮತಂ ಪದಂ;

ಪರಿವುತೋ ಸಾವಕೇಹಿ, ವಸತಿ ಘರಮುತ್ತಮೇ.

೩೫. ‘‘ತಾಯ ವಾಚಾಯ ಮಧುರಾಯ, ಸಙ್ಗಣ್ಹಾತಿ [ಸಙ್ಗಣ್ಹನ್ತೇ (ಸೀ.)] ಮಹಾಜನಂ;

ಘೋಸೋ ಚ ವಿಪುಲೋ ಆಸಿ, ಆಸೀಸೋ [ಆಸಂಸೋ (ಸೀ.)] ದೇವಮಾನುಸೇ.

೩೬. ‘‘ನಿಗ್ಘೋಸಸದ್ದಂ ಸುತ್ವಾನ, ಸಿದ್ಧತ್ಥಸ್ಸ ಮಹೇಸಿನೋ;

ಸದ್ದೇ ಚಿತ್ತಂ ಪಸಾದೇತ್ವಾ, ಅವನ್ದಿಂ ಲೋಕನಾಯಕಂ.

೩೭. ‘‘ಚತುನ್ನವುತಿತೋ ಕಪ್ಪೇ, ಯಂ ಸಞ್ಞಮಲಭಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಸಞ್ಞಾಯಿದಂ ಫಲಂ.

೩೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸದ್ದಸಞ್ಞಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸದ್ದಸಞ್ಞಕತ್ಥೇರಸ್ಸಾಪದಾನಂ ಸತ್ತಮಂ.

೮. ತಿರಂಸಿಯತ್ಥೇರಅಪದಾನಂ

೩೯. ‘‘ಕೇಸರಿಂ ಅಭಿಜಾತಂವ, ಅಗ್ಗಿಕ್ಖನ್ಧಂವ ಪಬ್ಬತೇ;

ಓಭಾಸೇನ್ತಂ ದಿಸಾ ಸಬ್ಬಾ [ನಿವಾಸೇನ್ತಂ (ಕ.), ದಿಸಾಸಿನ್ನಂ (ಸ್ಯಾ.)], ಸಿದ್ಧತ್ಥಂ ಪಬ್ಬತನ್ತರೇ.

೪೦. ‘‘ಸೂರಿಯಸ್ಸ ಚ ಆಲೋಕಂ, ಚನ್ದಾಲೋಕಂ ತಥೇವ ಚ;

ಬುದ್ಧಾಲೋಕಞ್ಚ ದಿಸ್ವಾನ, ವಿತ್ತಿ ಮೇ ಉದಪಜ್ಜಥ.

೪೧. ‘‘ತಯೋ ಆಲೋಕೇ ದಿಸ್ವಾನ, ಸಮ್ಬುದ್ಧಂ [ಬುದ್ಧಞ್ಚ (ಸೀ.)] ಸಾವಕುತ್ತಮಂ;

ಏಕಂಸಂ ಅಜಿನಂ ಕತ್ವಾ, ಸನ್ಥವಿಂ ಲೋಕನಾಯಕಂ.

೪೨. ‘‘ತಯೋ ಹಿ ಆಲೋಕಕರಾ, ಲೋಕೇ ಲೋಕತಮೋನುದಾ;

ಚನ್ದೋ ಚ ಸೂರಿಯೋ ಚಾಪಿ, ಬುದ್ಧೋ ಚ ಲೋಕನಾಯಕೋ.

೪೩. ‘‘ಓಪಮ್ಮಂ ಉಪದಸ್ಸೇತ್ವಾ, ಕಿತ್ತಿತೋ ಮೇ ಮಹಾಮುನಿ;

ಬುದ್ಧಸ್ಸ ವಣ್ಣಂ ಕಿತ್ತೇತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.

೪೪. ‘‘ಚತುನ್ನವುತಿತೋ ಕಪ್ಪೇ, ಯಂ ಬುದ್ಧಮಭಿಕಿತ್ತಯಿಂ;

ದುಗ್ಗತಿಂ ನಾಭಿಜಾನಾಮಿ, ಕಿತ್ತನಾಯ ಇದಂ ಫಲಂ.

೪೫. ‘‘ಏಕಸಟ್ಠಿಮ್ಹಿತೋ ಕಪ್ಪೇ, ಏಕೋ ಞಾಣಧರೋ ಅಹು;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೪೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿರಂಸಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿರಂಸಿಯತ್ಥೇರಸ್ಸಾಪದಾನಂ ಅಟ್ಠಮಂ.

೯. ಕನ್ದಲಿಪುಪ್ಫಿಯತ್ಥೇರಅಪದಾನಂ

೪೭. ‘‘ಸಿನ್ಧುಯಾ ನದಿಯಾ ತೀರೇ, ಅಹೋಸಿಂ ಕಸ್ಸಕೋ ತದಾ;

ಪರಕಮ್ಮಾಯನೇ ಯುತ್ತೋ, ಪರಭತ್ತಂ ಅಪಸ್ಸಿತೋ.

೪೮. ‘‘ಸಿನ್ಧುಂ ಅನುಚರನ್ತೋಹಂ, ಸಿದ್ಧತ್ಥಂ ಜಿನಮದ್ದಸಂ;

ಸಮಾಧಿನಾ ನಿಸಿನ್ನಂವ, ಸತಪತ್ತಂವ ಪುಪ್ಫಿತಂ.

೪೯. ‘‘ಸತ್ತ ಕನ್ದಲಿಪುಪ್ಫಾನಿ, ವಣ್ಟೇ ಛೇತ್ವಾನಹಂ ತದಾ;

ಮತ್ಥಕೇ ಅಭಿರೋಪೇಸಿಂ, ಬುದ್ಧಸ್ಸಾದಿಚ್ಚಬನ್ಧುನೋ.

೫೦. ‘‘ಸುವಣ್ಣವಣ್ಣಂ ಸಮ್ಬುದ್ಧಂ, ಅನುಕೂಲೇ ಸಮಾಹಿತಂ;

ತಿಧಾಪಭಿನ್ನಮಾತಙ್ಗಂ, ಕುಞ್ಜರಂವ ದುರಾಸದಂ.

೫೧. ‘‘ತಮಹಂ ಉಪಗನ್ತ್ವಾನ, ನಿಪಕಂ ಭಾವಿತಿನ್ದ್ರಿಯಂ;

ಅಞ್ಜಲಿಂ ಪಗ್ಗಹೇತ್ವಾನ, ಅವನ್ದಿಂ ಸತ್ಥುನೋ ಅಹಂ.

೫೨. ‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೫೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕನ್ದಲಿಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕನ್ದಲಿಪುಪ್ಫಿಯತ್ಥೇರಸ್ಸಾಪದಾನಂ ನವಮಂ.

೧೦. ಕುಮುದಮಾಲಿಯತ್ಥೇರಅಪದಾನಂ

೫೪. ‘‘ಉಸಭಂ ಪವರಂ ವೀರಂ, ಮಹೇಸಿಂ ವಿಜಿತಾವಿನಂ;

ವಿಪಸ್ಸಿನಂ ಮಹಾವೀರಂ, ಅಭಿಜಾತಂವ ಕೇಸರಿಂ.

೫೫. ‘‘ರಥಿಯಂ ಪಟಿಪಜ್ಜನ್ತಂ, ಆಹುತೀನಂ ಪಟಿಗ್ಗಹಂ;

ಗಹೇತ್ವಾ ಕುಮುದಂ ಮಾಲಂ, ಬುದ್ಧಸೇಟ್ಠಂ ಸಮೋಕಿರಿಂ.

೫೬. ‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೫೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕುಮುದಮಾಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕುಮುದಮಾಲಿಯತ್ಥೇರಸ್ಸಾಪದಾನಂ ದಸಮಂ.

ಆರಕ್ಖದಾಯಕವಗ್ಗೋ ಬಾತ್ತಿಂಸತಿಮೋ [ಬತ್ತಿಂಸತಿಮೋ (ಸೀ. ಸ್ಯಾ.)].