೧೦. ತರಣಿಯತ್ಥೇರಅಪದಾನಂ

೩೯. ‘‘ಸುವಣ್ಣವಣ್ಣೋ ಸಮ್ಬುದ್ಧೋ, ವಿಪಸ್ಸೀ ದಕ್ಖಿಣಾರಹೋ;

ನದೀತೀರೇ ಠಿತೋ ಸತ್ಥಾ, ಭಿಕ್ಖುಸಙ್ಘಪುರಕ್ಖತೋ.

೪೦. ‘‘ನಾವಾ ನ ವಿಜ್ಜತೇ ತತ್ಥ, ಸನ್ತಾರಣೀ ಮಹಣ್ಣವೇ;

ನದಿಯಾ ಅಭಿನಿಕ್ಖಮ್ಮ, ತಾರೇಸಿಂ ಲೋಕನಾಯಕಂ.

೪೧. ‘‘ಏಕನವುತಿತೋ ಕಪ್ಪೇ, ಯಂ ತಾರೇಸಿಂ ನರುತ್ತಮಂ;

ದುಗ್ಗತಿಂ ನಾಭಿಜಾನಾಮಿ, ತರಣಾಯ ಇದಂ ಫಲಂ.

೪೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತರಣಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತರಣಿಯತ್ಥೇರಸ್ಸಾಪದಾನಂ ದಸಮಂ.

ಪದುಮುಕ್ಖಿಪವಗ್ಗೋ ಸತ್ತವೀಸತಿಮೋ.