೨೭. ಪದುಮುಕ್ಖಿಪವಗ್ಗೋ

೧. ಆಕಾಸುಕ್ಖಿಪಿಯತ್ಥೇರಅಪದಾನಂ

೧. ‘‘ಸುವಣ್ಣವಣ್ಣಂ ಸಿದ್ಧತ್ಥಂ, ಗಚ್ಛನ್ತಂ ಅನ್ತರಾಪಣೇ;

ಜಲಜಗ್ಗೇ ದುವೇ ಗಯ್ಹ, ಉಪಾಗಚ್ಛಿಂ ನರಾಸಭಂ.

೨. ‘‘ಏಕಞ್ಚ ಪುಪ್ಫಂ ಪಾದೇಸು, ಬುದ್ಧಸೇಟ್ಠಸ್ಸ ನಿಕ್ಖಿಪಿಂ;

ಏಕಞ್ಚ ಪುಪ್ಫಂ ಪಗ್ಗಯ್ಹ, ಆಕಾಸೇ ಉಕ್ಖಿಪಿಂ ಅಹಂ.

೩. ‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಪುಪ್ಫದಾನಸ್ಸಿದಂ ಫಲಂ.

೪. ‘‘ಇತೋ ಛತ್ತಿಂಸಕಪ್ಪಮ್ಹಿ, ಏಕೋ ಆಸಿಂ ಮಹೀಪತಿ;

ಅನ್ತಲಿಕ್ಖಕರೋ ನಾಮ, ಚಕ್ಕವತ್ತೀ ಮಹಬ್ಬಲೋ.

೫. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಆಕಾಸುಕ್ಖಿಪಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಆಕಾಸುಕ್ಖಿಪಿಯತ್ಥೇರಸ್ಸಾಪದಾನಂ ಪಠಮಂ.

೨. ತೇಲಮಕ್ಖಿಯತ್ಥೇರಅಪದಾನಂ

೬. ‘‘ಸಿದ್ಧತ್ಥಮ್ಹಿ ಭಗವತಿ, ನಿಬ್ಬುತಮ್ಹಿ ನರಾಸಭೇ;

ಬೋಧಿಯಾ ವೇದಿಕಾಯಾಹಂ, ತೇಲಂ ಮಕ್ಖೇಸಿ ತಾವದೇ.

೭. ‘‘ಚತುನ್ನವುತಿತೋ ಕಪ್ಪೇ, ಯಂ ತೇಲಂ ಮಕ್ಖಯಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಮಕ್ಖನಾಯ ಇದಂ ಫಲಂ.

೮. ‘‘ಚತುವೀಸೇ ಇತೋ ಕಪ್ಪೇ, ಸುಚ್ಛವಿ ನಾಮ ಖತ್ತಿಯೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತೇಲಮಕ್ಖಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತೇಲಮಕ್ಖಿಯತ್ಥೇರಸ್ಸಾಪದಾನಂ ದುತಿಯಂ.

೩. ಅಡ್ಢಚನ್ದಿಯತ್ಥೇರಅಪದಾನಂ

೧೦. ‘‘ತಿಸ್ಸಸ್ಸ ಖೋ ಭಗವತೋ, ಬೋಧಿಯಾ ಪಾದಪುತ್ತಮೇ;

ಅಡ್ಢಚನ್ದಂ ಮಯಾ ದಿನ್ನಂ, ಧರಣೀರುಹಪಾದಪೇ.

೧೧. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಚನ್ದ [ಯಂ ಪುಪ್ಫ (ಕ.)] ಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬೋಧಿಪೂಜಾಯಿದಂ ಫಲಂ.

೧೨. ‘‘ಪಞ್ಚವೀಸೇ ಇತೋ ಕಪ್ಪೇ, ದೇವಲೋ ನಾಮ ಖತ್ತಿಯೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೧೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅಡ್ಢಚನ್ದಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಅಡ್ಢಚನ್ದಿಯತ್ಥೇರಸ್ಸಾಪದಾನಂ ತತಿಯಂ.

೪. ಪದೀಪದಾಯಕತ್ಥೇರಅಪದಾನಂ

೧೪. ‘‘ದೇವಭೂತೋ ಅಹಂ ಸನ್ತೋ, ಓರುಯ್ಹ ಪಥವಿಂ ತದಾ;

ಪದೀಪೇ ಪಞ್ಚ ಪಾದಾಸಿಂ, ಪಸನ್ನೋ ಸೇಹಿ ಪಾಣಿಭಿ.

೧೫. ‘‘ಚತುನ್ನವುತಿತೋ ಕಪ್ಪೇ, ಯಂ ಪದೀಪಮದಂ ತದಾ;

ದುಗ್ಗತಿಂ ನಾಭಿಜಾನಾಮಿ, ದೀಪದಾನಸ್ಸಿದಂ ಫಲಂ.

೧೬. ‘‘ಪಞ್ಚಪಞ್ಞಾಸಕೇ ಕಪ್ಪೇ, ಏಕೋ ಆಸಿಂ ಮಹೀಪತಿ;

ಸಮನ್ತಚಕ್ಖುನಾಮೇನ, ಚಕ್ಕವತ್ತೀ ಮಹಬ್ಬಲೋ.

೧೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪದೀಪದಾಯಕೋ [ಅಪಣ್ಣದೀಪಿಯೋ (ಸೀ. ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪದೀಪದಾಯಕತ್ಥೇರಸ್ಸಾಪದಾನಂ ಚತುತ್ಥಂ.

೫. ಬಿಳಾಲಿದಾಯಕತ್ಥೇರಅಪದಾನಂ

೧೮. ‘‘ಹಿಮವನ್ತಸ್ಸಾವಿದೂರೇ, ರೋಮಸೋ ನಾಮ ಪಬ್ಬತೋ;

ತಮ್ಹಿ ಪಬ್ಬತಪಾದಮ್ಹಿ, ಸಮಣೋ ಭಾವಿತಿನ್ದ್ರಿಯೋ.

೧೯. ‘‘ಬಿಳಾಲಿಯೋ ಗಹೇತ್ವಾನ, ಸಮಣಸ್ಸ ಅದಾಸಹಂ;

ಅನುಮೋದಿ ಮಹಾವೀರೋ, ಸಯಮ್ಭೂ ಅಪರಾಜಿತೋ.

೨೦. ‘‘ಬಿಳಾಲೀ ತೇ ಮಮ ದಿನ್ನಾ, ವಿಪ್ಪಸನ್ನೇನ ಚೇತಸಾ;

ಭವೇ ನಿಬ್ಬತ್ತಮಾನಮ್ಹಿ, ಫಲಂ ನಿಬ್ಬತ್ತತಂ ತವ.

೨೧. ‘‘ಚತುನ್ನವುತಿತೋ ಕಪ್ಪೇ, ಯಂ ಬಿಳಾಲಿಮದಾಸಹಂ;

ದುಗ್ಗತಿಂ ನಾಭಿಜಾನಾಮಿ, ಬಿಳಾಲಿಯಾ ಇದಂ ಫಲಂ.

೨೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಬಿಳಾಲಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಬಿಳಾಲಿದಾಯಕತ್ಥೇರಸ್ಸಾಪದಾನಂ ಪಞ್ಚಮಂ.

೬. ಮಚ್ಛದಾಯಕತ್ಥೇರಅಪದಾನಂ

೨೩. ‘‘ಚನ್ದಭಾಗಾನದೀತೀರೇ, ಉಕ್ಕುಸೋ ಆಸಹಂ ತದಾ;

ಮಹನ್ತಂ ಮಚ್ಛಂ ಪಗ್ಗಯ್ಹ, ಸಿದ್ಧತ್ಥಮುನಿನೋ ಅದಂ.

೨೪. ‘‘ಚತುನ್ನವುತಿತೋ ಕಪ್ಪೇ, ಯಂ ಮಚ್ಛಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಮಚ್ಛದಾನಸ್ಸಿದಂ ಫಲಂ.

೨೫. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಮಚ್ಛದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಮಚ್ಛದಾಯಕತ್ಥೇರಸ್ಸಾಪದಾನಂ ಛಟ್ಠಂ.

೭. ಜವಹಂಸಕತ್ಥೇರಅಪದಾನಂ

೨೬. ‘‘ಚನ್ದಭಾಗಾನದೀತೀರೇ, ಆಸಿಂ ವನಚರೋ ತದಾ;

ಸಿದ್ಧತ್ಥಂ ಅದ್ದಸಂ ಬುದ್ಧಂ, ಗಚ್ಛನ್ತಂ ಅನಿಲಞ್ಜಸೇ.

೨೭. ‘‘ಅಞ್ಜಲಿಂ ಪಗ್ಗಹೇತ್ವಾನ, ಉಲ್ಲೋಕೇನ್ತೋ ಮಹಾಮುನಿಂ;

ಸಕಂ ಚಿತ್ತಂ ಪಸಾದೇತ್ವಾ, ಅವನ್ದಿಂ ನಾಯಕಂ ಅಹಂ.

೨೮. ‘‘ಚತುನ್ನವುತಿತೋ ಕಪ್ಪೇ, ಯಮವನ್ದಿಂ ನರಾಸಭಂ;

ದುಗ್ಗತಿಂ ನಾಭಿಜಾನಾಮಿ, ವನ್ದನಾಯ ಇದಂ ಫಲಂ.

೨೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಜವಹಂಸಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಜವಹಂಸಕತ್ಥೇರಸ್ಸಾಪದಾನಂ ಸತ್ತಮಂ.

೮. ಸಳಲಪುಪ್ಫಿಯತ್ಥೇರಅಪದಾನಂ

೩೦. ‘‘ಚನ್ದಭಾಗಾನದೀತೀರೇ, ಅಹೋಸಿಂ ಕಿನ್ನರೋ ತದಾ;

ವಿಪಸ್ಸಿಂ ಅದ್ದಸಂ ಬುದ್ಧಂ, ರಂಸಿಜಾಲಸಮಾಕುಲಂ.

೩೧. ‘‘ಪಸನ್ನಚಿತ್ತೋ ಸುಮನೋ, ಪರಮಾಯ ಚ ಪೀತಿಯಾ;

ಪಗ್ಗಯ್ಹ ಸಳಲಂ ಪುಪ್ಫಂ, ವಿಪಸ್ಸಿಂ ಓಕಿರಿಂ ಅಹಂ.

೩೨. ‘‘ಏಕನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೩೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಳಲಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಳಲಪುಪ್ಫಿಯತ್ಥೇರಸ್ಸಾಪದಾನಂ ಅಟ್ಠಮಂ.

೯. ಉಪಾಗತಾಸಯತ್ಥೇರಅಪದಾನಂ

೩೪. ‘‘ಹಿಮವನ್ತಸ್ಸ ವೇಮಜ್ಝೇ, ಸರೋ ಆಸಿ ಸುನಿಮ್ಮಿತೋ;

ತತ್ಥಾಹಂ ರಕ್ಖಸೋ ಆಸಿಂ, ಹೇಠಸೀಲೋ ಭಯಾನಕೋ.

೩೫. ‘‘ಅನುಕಮ್ಪಕೋ ಕಾರುಣಿಕೋ, ವಿಪಸ್ಸೀ ಲೋಕನಾಯಕೋ;

ಮಮುದ್ಧರಿತುಕಾಮೋ ಸೋ, ಆಗಚ್ಛಿ ಮಮ ಸನ್ತಿಕಂ.

೩೬. ‘‘ಉಪಾಗತಂ ಮಹಾವೀರಂ, ದೇವದೇವಂ ನರಾಸಭಂ;

ಆಸಯಾ ಅಭಿನಿಕ್ಖಮ್ಮ, ಅವನ್ದಿಂ ಸತ್ಥುನೋ ಅಹಂ.

೩೭. ‘‘ಏಕನವುತಿತೋ ಕಪ್ಪೇ, ಯಂ ವನ್ದಿಂ ಪುರಿಸುತ್ತಮಂ;

ದುಗ್ಗತಿಂ ನಾಭಿಜಾನಾಮಿ, ವನ್ದನಾಯ ಇದಂ ಫಲಂ.

೩೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಉಪಾಗತಾಸಯೋ [ಉಪಾಗತಹಾಸನಿಯೋ (ಸ್ಯಾ.), ಉಪಾಗತಾಹಾಸನಿಯೋ (ಕ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಉಪಾಗತಾಸಯತ್ಥೇರಸ್ಸಾಪದಾನಂ ನವಮಂ.

೧೦. ತರಣಿಯತ್ಥೇರಅಪದಾನಂ

೩೯. ‘‘ಸುವಣ್ಣವಣ್ಣೋ ಸಮ್ಬುದ್ಧೋ, ವಿಪಸ್ಸೀ ದಕ್ಖಿಣಾರಹೋ;

ನದೀತೀರೇ ಠಿತೋ ಸತ್ಥಾ, ಭಿಕ್ಖುಸಙ್ಘಪುರಕ್ಖತೋ.

೪೦. ‘‘ನಾವಾ ನ ವಿಜ್ಜತೇ ತತ್ಥ, ಸನ್ತಾರಣೀ ಮಹಣ್ಣವೇ;

ನದಿಯಾ ಅಭಿನಿಕ್ಖಮ್ಮ, ತಾರೇಸಿಂ ಲೋಕನಾಯಕಂ.

೪೧. ‘‘ಏಕನವುತಿತೋ ಕಪ್ಪೇ, ಯಂ ತಾರೇಸಿಂ ನರುತ್ತಮಂ;

ದುಗ್ಗತಿಂ ನಾಭಿಜಾನಾಮಿ, ತರಣಾಯ ಇದಂ ಫಲಂ.

೪೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತರಣಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತರಣಿಯತ್ಥೇರಸ್ಸಾಪದಾನಂ ದಸಮಂ.

ಪದುಮುಕ್ಖಿಪವಗ್ಗೋ ಸತ್ತವೀಸತಿಮೋ.