೨೮. ಸುವಣ್ಣಬಿಬ್ಬೋಹನವಗ್ಗೋ

೧. ಸುವಣ್ಣಬಿಬ್ಬೋಹನಿಯತ್ಥೇರಅಪದಾನಂ

೧. ‘‘ಏಕಾಸನಂ ಅಹಮದಂ, ಪಸನ್ನೋ ಸೇಹಿ ಪಾಣಿಭಿ;

ಬಿಬ್ಬೋಹನಞ್ಚ [ಬಿಮ್ಬೋಹನಞ್ಚ (ಸೀ. ಪೀ.)] ಪಾದಾಸಿಂ, ಉತ್ತಮತ್ಥಸ್ಸ ಪತ್ತಿಯಾ.

೨. ‘‘ಏಕನವುತಿತೋ ಕಪ್ಪೇ, ಬಿಬ್ಬೋಹನಮದಾಸಹಂ;

ದುಗ್ಗತಿಂ ನಾಭಿಜಾನಾಮಿ, ಬಿಬ್ಬೋಹನಸ್ಸಿದಂ ಫಲಂ.

೩. ‘‘ಇತೋ ತೇಸಟ್ಠಿಮೇ ಕಪ್ಪೇ, ಅಸಮೋ ನಾಮ ಖತ್ತಿಯೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೪. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸುವಣ್ಣಬಿಬ್ಬೋಹನಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸುವಣ್ಣಬಿಬ್ಬೋಹನಿಯತ್ಥೇರಸ್ಸಾಪದಾನಂ ಪಠಮಂ.

೨. ತಿಲಮುಟ್ಠಿದಾಯಕತ್ಥೇರಅಪದಾನಂ

೫. ‘‘ಮಮ ಸಙ್ಕಪ್ಪಮಞ್ಞಾಯ, ಸತ್ಥಾ ಲೋಕಗ್ಗನಾಯಕೋ;

ಮನೋಮಯೇನ ಕಾಯೇನ, ಇದ್ಧಿಯಾ ಉಪಸಙ್ಕಮಿ.

೬. ‘‘ಸತ್ಥಾರಂ ಉಪಸಙ್ಕನ್ತಂ, ವನ್ದಿತ್ವಾ ಪುರಿಸುತ್ತಮಂ;

ಪಸನ್ನಚಿತ್ತೋ ಸುಮನೋ, ತಿಲಮುಟ್ಠಿಮದಾಸಹಂ.

೭. ‘‘ಏಕನವುತಿತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ತಿಲಮುಟ್ಠಿಯಿದಂ ಫಲಂ.

೮. ‘‘ಇತೋ ಸೋಳಸಕಪ್ಪಮ್ಹಿ, ತನ್ತಿಸೋ [ಖನ್ತಿಯೋ (ಸ್ಯಾ.)] ನಾಮ ಖತ್ತಿಯೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತಿಲಮುಟ್ಠಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತಿಲಮುಟ್ಠಿದಾಯಕತ್ಥೇರಸ್ಸಾಪದಾನಂ ದುತಿಯಂ.

೩. ಚಙ್ಕೋಟಕಿಯತ್ಥೇರಅಪದಾನಂ

೧೦. ‘‘ಮಹಾಸಮುದ್ದಂ ನಿಸ್ಸಾಯ, ವಸತೀ ಪಬ್ಬತನ್ತರೇ;

ಪಚ್ಚುಗ್ಗನ್ತ್ವಾನ ಕತ್ವಾನ [ಪಚ್ಚುಗ್ಗನ್ತ್ವಾನ’ಕಾಸಹಂ (ಅಟ್ಠ.), ಪಚ್ಚುಗ್ಗಮನಂ ಕತ್ವಾನ (?)], ಚಙ್ಕೋಟಕ [ಚಙ್ಗೋಟಕ (ಸೀ.)] ಮದಾಸಹಂ.

೧೧. ‘‘ಸಿದ್ಧತ್ಥಸ್ಸ ಮಹೇಸಿನೋ, ಸಬ್ಬಸತ್ತಾನುಕಮ್ಪಿನೋ [ಸಯಮ್ಭುಸ್ಸಾನುಕಮ್ಪಿನೋ (ಸ್ಯಾ.)];

ಪುಪ್ಫಚಙ್ಕೋಟಕಂ ದತ್ವಾ, ಕಪ್ಪಂ ಸಗ್ಗಮ್ಹಿ ಮೋದಹಂ.

೧೨. ‘‘ಚತುನ್ನವುತಿತೋ ಕಪ್ಪೇ, ಚಙ್ಕೋಟಕಮದಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಚಙ್ಕೋಟಕಸ್ಸಿದಂ ಫಲಂ.

೧೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಚಙ್ಕೋಟಕಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಚಙ್ಕೋಟಕಿಯತ್ಥೇರಸ್ಸಾಪದಾನಂ ತತಿಯಂ.

೪. ಅಬ್ಭಞ್ಜನದಾಯಕತ್ಥೇರಅಪದಾನಂ

೧೪. ‘‘ಕೋಣ್ಡಞ್ಞಸ್ಸ ಭಗವತೋ, ವೀತರಾಗಸ್ಸ ತಾದಿನೋ;

ಆಕಾಸಸಮಚಿತ್ತಸ್ಸ [ಅಕಕ್ಕಸಚಿತ್ತಸ್ಸಾಥ (ಅಟ್ಠ.)], ನಿಪ್ಪಪಞ್ಚಸ್ಸ ಝಾಯಿನೋ.

೧೫. ‘‘ಸಬ್ಬಮೋಹಾತಿವತ್ತಸ್ಸ, ಸಬ್ಬಲೋಕಹಿತೇಸಿನೋ;

ಅಬ್ಭಞ್ಜನಂ ಮಯಾ ದಿನ್ನಂ, ದ್ವಿಪದಿನ್ದಸ್ಸ ತಾದಿನೋ.

೧೬. ‘‘ಅಪರಿಮೇಯ್ಯೇ ಇತೋ ಕಪ್ಪೇ, ಅಬ್ಭಞ್ಜನಮದಂ ತದಾ [ಅಮ್ಭಞ್ಜನಮದಾಸಹಂ (ಸ್ಯಾ.)];

ದುಗ್ಗತಿಂ ನಾಭಿಜಾನಾಮಿ, ಅಬ್ಭಞ್ಜನಸ್ಸಿದಂ ಫಲಂ.

೧೭. ‘‘ಇತೋ ಪನ್ನರಸೇ ಕಪ್ಪೇ, ಚಿರಪ್ಪೋ ನಾಮ ಖತ್ತಿಯೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೧೮. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಅಬ್ಭಞ್ಜನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಅಬ್ಭಞ್ಜನದಾಯಕತ್ಥೇರಸ್ಸಾಪದಾನಂ ಚತುತ್ಥಂ.

೫. ಏಕಞ್ಜಲಿಕತ್ಥೇರಅಪದಾನಂ

೧೯. ‘‘ಉದುಮ್ಬರೇ ವಸನ್ತಸ್ಸ, ನಿಯತೇ ಪಣ್ಣಸನ್ಥರೇ;

ವುತ್ಥೋಕಾಸೋ ಮಯಾ ದಿನ್ನೋ, ಸಮಣಸ್ಸ ಮಹೇಸಿನೋ.

೨೦. ‘‘ತಿಸ್ಸಸ್ಸ ದ್ವಿಪದಿನ್ದಸ್ಸ, ಲೋಕನಾಥಸ್ಸ ತಾದಿನೋ;

ಅಞ್ಜಲಿಂ ಪಗ್ಗಹೇತ್ವಾನ, ಸನ್ಥರಿಂ ಪುಪ್ಫಸನ್ಥರಂ.

೨೧. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಕರಿಂ ಪುಪ್ಫಸನ್ಥರಂ;

ದುಗ್ಗತಿಂ ನಾಭಿಜಾನಾಮಿ, ಸನ್ಥರಸ್ಸ ಇದಂ ಫಲಂ.

೨೨. ‘‘ಇತೋ ಚುದ್ದಸಕಪ್ಪಮ್ಹಿ, ಅಹೋಸಿಂ ಮನುಜಾಧಿಪೋ;

ಏಕಅಞ್ಜಲಿಕೋ ನಾಮ, ಚಕ್ಕವತ್ತೀ ಮಹಬ್ಬಲೋ.

೨೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕಞ್ಜಲಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಏಕಞ್ಜಲಿಕತ್ಥೇರಸ್ಸಾಪದಾನಂ ಪಞ್ಚಮಂ.

೬. ಪೋತ್ಥಕದಾಯಕತ್ಥೇರಅಪದಾನಂ

೨೪. ‘‘ಸತ್ಥಾರಂ ಧಮ್ಮಮಾರಬ್ಭ, ಸಙ್ಘಞ್ಚಾಪಿ ಮಹೇಸಿನಂ;

ಪೋತ್ಥದಾನಂ ಮಯಾ ದಿನ್ನಂ, ದಕ್ಖಿಣೇಯ್ಯೇ ಅನುತ್ತರೇ.

೨೫. ‘‘ಏಕನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪೋತ್ಥದಾನಸ್ಸಿದಂ ಫಲಂ.

೨೬. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪೋತ್ಥಕದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪೋತ್ಥಕದಾಯಕತ್ಥೇರಸ್ಸಾಪದಾನಂ ಛಟ್ಠಂ.

೭. ಚಿತಕಪೂಜಕತ್ಥೇರಅಪದಾನಂ

೨೭. ‘‘ಚನ್ದಭಾಗಾನದೀತೀರೇ, ಅನುಸೋತಂ ವಜಾಮಹಂ;

ಸತ್ತ ಮಾಲುವಪುಪ್ಫಾನಿ, ಚಿತಮಾರೋಪಯಿಂ ಅಹಂ.

೨೮. ‘‘ಚತುನ್ನವುತಿತೋ ಕಪ್ಪೇ, ಚಿತಕಂ ಯಮಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಚಿತಪೂಜಾಯಿದಂ ಫಲಂ.

೨೯. ‘‘ಸತ್ತಸಟ್ಠಿಮ್ಹಿತೋ ಕಪ್ಪೇ, ಪಟಿಜಗ್ಗಸನಾಮಕಾ;

ಸತ್ತರತನಸಮ್ಪನ್ನಾ, ಸತ್ತಾಸುಂ ಚಕ್ಕವತ್ತಿನೋ [ಪಟಿಜಗ್ಗಸನಾಮಕೋ; ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ (ಸ್ಯಾ.)].

೩೦. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಚಿತಕಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಚಿತಕಪೂಜಕತ್ಥೇರಸ್ಸಾಪದಾನಂ ಸತ್ತಮಂ.

೮. ಆಲುವದಾಯಕತ್ಥೇರಅಪದಾನಂ

೩೧. ‘‘ಪಬ್ಬತೇ ಹಿಮವನ್ತಮ್ಹಿ, ಮಹಾಸಿನ್ಧು ಸುದಸ್ಸನಾ;

ತತ್ಥದ್ದಸಂ ವೀತರಾಗಂ, ಸುಪ್ಪಭಾಸಂ ಸುದಸ್ಸನಂ.

೩೨. ‘‘ಪರಮೋಪಸಮೇ ಯುತ್ತಂ, ದಿಸ್ವಾ ವಿಮ್ಹಿತಮಾನಸೋ;

ಆಲುವಂ ತಸ್ಸ ಪಾದಾಸಿಂ, ಪಸನ್ನೋ ಸೇಹಿ ಪಾಣಿಭಿ.

೩೩. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಫಲಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಆಲುವಸ್ಸ ಇದಂ ಫಲಂ.

೩೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಆಲುವದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಆಲುವದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.

೯. ಏಕಪುಣ್ಡರೀಕತ್ಥೇರಅಪದಾನಂ

೩೫. ‘‘ರೋಮಸೋ ನಾಮ ನಾಮೇನ, ಸಯಮ್ಭೂ ಸುಬ್ಬತೋ [ಸಪ್ಪಭೋ (ಸ್ಯಾ.)] ತದಾ;

ಪುಣ್ಡರೀಕಂ ಮಯಾ ದಿನ್ನಂ, ವಿಪ್ಪಸನ್ನೇನ ಚೇತಸಾ.

೩೬. ‘‘ಚತುನ್ನವುತಿತೋ ಕಪ್ಪೇ, ಪುಣ್ಡರೀಕಮದಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪುಣ್ಡರೀಕಸ್ಸಿದಂ ಫಲಂ.

೩೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕಪುಣ್ಡರೀಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಏಕಪುಣ್ಡರೀಕತ್ಥೇರಸ್ಸಾಪದಾನಂ ನವಮಂ.

೧೦. ತರಣೀಯತ್ಥೇರಅಪದಾನಂ

೩೮. ‘‘ಮಹಾಪಥಮ್ಹಿ ವಿಸಮೇ, ಸೇತು ಕಾರಾಪಿತೋ ಮಯಾ;

ತರಣತ್ಥಾಯ ಲೋಕಸ್ಸ, ಪಸನ್ನೋ ಸೇಹಿ ಪಾಣಿಭಿ.

೩೯. ‘‘ಏಕನವುತಿತೋ ಕಪ್ಪೇ, ಯೋ ಸೇತು ಕಾರಿತೋ ಮಯಾ;

ದುಗ್ಗತಿಂ ನಾಭಿಜಾನಾಮಿ, ಸೇತುದಾನಸ್ಸಿದಂ ಫಲಂ.

೪೦. ‘‘ಪಞ್ಚಪಞ್ಞಾಸಿತೋ ಕಪ್ಪೇ, ಏಕೋ ಆಸಿಂ ಸಮೋಗಧೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೪೧. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ತರಣೀಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ತರಣೀಯತ್ಥೇರಸ್ಸಾಪದಾನಂ ದಸಮಂ.

ಸುವಣ್ಣಬಿಬ್ಬೋಹನವಗ್ಗೋ ಅಟ್ಠವೀಸತಿಮೋ.