೪. ಆರಕ್ಖದಾಯಕತ್ಥೇರಅಪದಾನಂ

೧೯. ‘‘ಸಿದ್ಧತ್ಥಸ್ಸ ಭಗವತೋ, ವೇದಿ ಕಾರಾಪಿತಾ [ವೇದಿಕಾ ಕಾರಿತಾ (ಸ್ಯಾ.)] ಮಯಾ;

ಆರಕ್ಖೋ ಚ ಮಯಾ ದಿನ್ನೋ, ಸುಗತಸ್ಸ ಮಹೇಸಿನೋ.

೨೦. ‘‘ತೇನ ಕಮ್ಮವಿಸೇಸೇನ, ನ ಪಸ್ಸಿಂ ಭಯಭೇರವಂ;

ಕುಹಿಞ್ಚಿ ಉಪಪನ್ನಸ್ಸ, ತಾಸೋ ಮಯ್ಹಂ ನ ವಿಜ್ಜತಿ.

೨೧. ‘‘ಚತುನ್ನವುತಿತೋ ಕಪ್ಪೇ, ಯಂ ವೇದಿಂ ಕಾರಯಿಂ ಪುರೇ;

ದುಗ್ಗತಿಂ ನಾಭಿಜಾನಾಮಿ, ವೇದಿಕಾಯ ಇದಂ ಫಲಂ.

೨೨. ‘‘ಇತೋ ಛಟ್ಠಮ್ಹಿ ಕಪ್ಪಮ್ಹಿ, ಅಪಸ್ಸೇನಸನಾಮಕೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೨೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಆರಕ್ಖದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಆರಕ್ಖದಾಯಕತ್ಥೇರಸ್ಸಾಪದಾನಂ ಚತುತ್ಥಂ.