೨. ಸೀಹಾಸನಿಯವಗ್ಗೋ

೧. ಸೀಹಾಸನದಾಯಕತ್ಥೇರಅಪದಾನಂ

೧. ‘‘ನಿಬ್ಬುತೇ ಲೋಕನಾಥಮ್ಹಿ, ಸಿದ್ಧತ್ಥೇ ದ್ವಿಪದುತ್ತಮೇ [ದಿಪದುತ್ತಮೇ (ಸೀ. ಸ್ಯಾ.)];

ವಿತ್ಥಾರಿಕೇ ಪಾವಚನೇ, ಬಾಹುಜಞ್ಞಮ್ಹಿ ಸಾಸನೇ.

೨. ‘‘ಪಸನ್ನಚಿತ್ತೋ ಸುಮನೋ, ಸೀಹಾಸನಮಕಾಸಹಂ;

ಸೀಹಾಸನಂ ಕರಿತ್ವಾನ, ಪಾದಪೀಠಮಕಾಸಹಂ.

೩. ‘‘ಸೀಹಾಸನೇ ಚ ವಸ್ಸನ್ತೇ, ಘರಂ ತತ್ಥ ಅಕಾಸಹಂ;

ತೇನ ಚಿತ್ತಪ್ಪಸಾದೇನ, ತುಸಿತಂ ಉಪಪಜ್ಜಹಂ.

೪. ‘‘ಆಯಾಮೇನ ಚತುಬ್ಬೀಸ, ಯೋಜನಂ ಆಸಿ [ಯೋಜನಾಸಿಂಸು (ಸ್ಯಾ. ಕ.)] ತಾವದೇ;

ವಿಮಾನಂ ಸುಕತಂ ಮಯ್ಹಂ, ವಿತ್ಥಾರೇನ ಚತುದ್ದಸ.

೫. ‘‘ಸತಂ [ಸತ್ತ (ಸ್ಯಾ.)] ಕಞ್ಞಾಸಹಸ್ಸಾನಿ, ಪರಿವಾರೇನ್ತಿ ಮಂ ಸದಾ;

ಸೋಣ್ಣಮಯಞ್ಚ ಪಲ್ಲಙ್ಕಂ, ಬ್ಯಮ್ಹೇ ಆಸಿ ಸುನಿಮ್ಮಿತಂ.

೬. ‘‘ಹತ್ಥಿಯಾನಂ ಅಸ್ಸಯಾನಂ, ದಿಬ್ಬಯಾನಂ ಉಪಟ್ಠಿತಂ;

ಪಾಸಾದಾ ಸಿವಿಕಾ ಚೇವ, ನಿಬ್ಬತ್ತನ್ತಿ ಯದಿಚ್ಛಕಂ.

೭. ‘‘ಮಣಿಮಯಾ ಚ ಪಲ್ಲಙ್ಕಾ, ಅಞ್ಞೇ ಸಾರಮಯಾ ಬಹೂ;

ನಿಬ್ಬತ್ತನ್ತಿ ಮಮಂ ಸಬ್ಬೇ, ಸೀಹಾಸನಸ್ಸಿದಂ ಫಲಂ.

೮. ‘‘ಸೋಣ್ಣಮಯಾ ರೂಪಿಮಯಾ, ಫಲಿಕಾವೇಳುರಿಯಾಮಯಾ;

ಪಾದುಕಾ ಅಭಿರೂಹಾಮಿ, ಪಾದಪೀಠಸ್ಸಿದಂ ಫಲಂ.

೯. ‘‘ಚತುನ್ನವುತಿತೋ [ಚತುನವುತೇ ಇತೋ (ಸೀ. ಸ್ಯಾ.)] ಕಪ್ಪೇ, ಯಂ ಕಮ್ಮಮಕರಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಪುಞ್ಞಕಮ್ಮಸ್ಸಿದಂ ಫಲಂ.

೧೦. ‘‘ತೇಸತ್ತತಿಮ್ಹಿತೋ ಕಪ್ಪೇ, ಇನ್ದನಾಮಾ ತಯೋ ಜನಾ;

ದ್ವೇಸತ್ತತಿಮ್ಹಿತೋ ಕಪ್ಪೇ, ತಯೋ ಸುಮನನಾಮಕಾ.

೧೧. ‘‘ಸಮಸತ್ತತಿತೋ ಕಪ್ಪೇ, ತಯೋ ವರುಣನಾಮಕಾ;

ಸತ್ತರತನಸಮ್ಪನ್ನಾ, ಚತುದೀಪಮ್ಹಿ ಇಸ್ಸರಾ.

೧೨. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸೀಹಾಸನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸೀಹಾಸನದಾಯಕತ್ಥೇರಸ್ಸಾಪದಾನಂ ಪಠಮಂ.

೨. ಏಕತ್ಥಮ್ಭಿಕತ್ಥೇರಅಪದಾನಂ

೧೩. ‘‘ಸಿದ್ಧತ್ಥಸ್ಸ ಭಗವತೋ, ಮಹಾಪೂಗಗಣೋ ಅಹು;

ಸರಣಂ ಗತಾ ಚ ತೇ ಬುದ್ಧಂ, ಸದ್ದಹನ್ತಿ ತಥಾಗತಂ.

೧೪. ‘‘ಸಬ್ಬೇ ಸಙ್ಗಮ್ಮ ಮನ್ತೇತ್ವಾ, ಮಾಳಂ ಕುಬ್ಬನ್ತಿ ಸತ್ಥುನೋ;

ಏಕತ್ಥಮ್ಭಂ ಅಲಭನ್ತಾ, ವಿಚಿನನ್ತಿ ಬ್ರಹಾವನೇ.

೧೫. ‘‘ತೇಹಂ ಅರಞ್ಞೇ ದಿಸ್ವಾನ, ಉಪಗಮ್ಮ ಗಣಂ ತದಾ;

ಅಞ್ಜಲಿಂ ಪಗ್ಗಹೇತ್ವಾನ, ಪರಿಪುಚ್ಛಿಂ ಗಣಂ ಅಹಂ.

೧೬. ‘‘ತೇ ಮೇ ಪುಟ್ಠಾ ವಿಯಾಕಂಸು, ಸೀಲವನ್ತೋ ಉಪಾಸಕಾ;

ಮಾಳಂ ಮಯಂ ಕತ್ತುಕಾಮಾ, ಏಕತ್ಥಮ್ಭೋ ನ ಲಬ್ಭತಿ.

೧೭. ‘‘ಏಕತ್ಥಮ್ಭಂ ಮಮಂ ದೇಥ, ಅಹಂ ದಸ್ಸಾಮಿ ಸತ್ಥುನೋ;

ಆಹರಿಸ್ಸಾಮಹಂ ಥಮ್ಭಂ, ಅಪ್ಪೋಸ್ಸುಕ್ಕಾ ಭವನ್ತು ತೇ [ಭವನ್ತು ವೋ (ಸೀ.), ಭವಾಥ ವೋ (?)].

೧೮. ‘‘ತೇ ಮೇ ಥಮ್ಭಂ ಪವೇಚ್ಛಿಂಸು, ಪಸನ್ನಾ ತುಟ್ಠಮಾನಸಾ;

ತತೋ ಪಟಿನಿವತ್ತಿತ್ವಾ, ಅಗಮಂಸು ಸಕಂ ಘರಂ.

೧೯. ‘‘ಅಚಿರಂ ಗತೇ ಪೂಗಗಣೇ, ಥಮ್ಭಂ ಅಹಾಸಹಂ ತದಾ;

ಹಟ್ಠೋ ಹಟ್ಠೇನ ಚಿತ್ತೇನ, ಪಠಮಂ ಉಸ್ಸಪೇಸಹಂ.

೨೦. ‘‘ತೇನ ಚಿತ್ತಪ್ಪಸಾದೇನ, ವಿಮಾನಂ ಉಪಪಜ್ಜಹಂ;

ಉಬ್ಬಿದ್ಧಂ ಭವನಂ ಮಯ್ಹಂ, ಸತ್ತಭೂಮಂ [ಸತಭೂಮಂ (ಸೀ. ಕ.)] ಸಮುಗ್ಗತಂ.

೨೧. ‘‘ವಜ್ಜಮಾನಾಸು ಭೇರೀಸು, ಪರಿಚಾರೇಮಹಂ ಸದಾ;

ಪಞ್ಚಪಞ್ಞಾಸಕಪ್ಪಮ್ಹಿ, ರಾಜಾ ಆಸಿಂ ಯಸೋಧರೋ.

೨೨. ‘‘ತತ್ಥಾಪಿ ಭವನಂ ಮಯ್ಹಂ, ಸತ್ತಭೂಮಂ ಸಮುಗ್ಗತಂ;

ಕೂಟಾಗಾರವರೂಪೇತಂ, ಏಕತ್ಥಮ್ಭಂ ಮನೋರಮಂ.

೨೩. ‘‘ಏಕವೀಸತಿಕಪ್ಪಮ್ಹಿ, ಉದೇನೋ ನಾಮ ಖತ್ತಿಯೋ;

ತತ್ರಾಪಿ ಭವನಂ ಮಯ್ಹಂ, ಸತ್ತಭೂಮಂ ಸಮುಗ್ಗತಂ.

೨೪. ‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ;

ಅನುಭೋಮಿ ಸುಖಂ ಸಬ್ಬಂ [ಸಬ್ಬಮೇತಂ (ಸ್ಯಾ.)], ಏಕತ್ಥಮ್ಭಸ್ಸಿದಂ ಫಲಂ.

೨೫. ‘‘ಚತುನ್ನವುತಿತೋ ಕಪ್ಪೇ, ಯಂ ಥಮ್ಭಮದದಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಏಕತ್ಥಮ್ಭಸ್ಸಿದಂ ಫಲಂ.

೨೬. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಏಕತ್ಥಮ್ಭಿಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಏಕತ್ಥಮ್ಭಿಕತ್ಥೇರಸ್ಸಾಪದಾನಂ ದುತಿಯಂ.

೩. ನನ್ದತ್ಥೇರಅಪದಾನಂ

೨೭. ‘‘ಪದುಮುತ್ತರಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ;

ವತ್ಥಂ ಖೋಮಂ ಮಯಾ ದಿನ್ನಂ, ಸಯಮ್ಭುಸ್ಸ ಮಹೇಸಿನೋ.

೨೮. ‘‘ತಂ ಮೇ ಬುದ್ಧೋ ವಿಯಾಕಾಸಿ, ಜಲಜುತ್ತರನಾಮಕೋ;

‘ಇಮಿನಾ ವತ್ಥದಾನೇನ, ಹೇಮವಣ್ಣೋ ಭವಿಸ್ಸಸಿ.

೨೯. ‘‘‘ದ್ವೇ ಸಮ್ಪತ್ತೀ ಅನುಭೋತ್ವಾ, ಕುಸಲಮೂಲೇಹಿ ಚೋದಿತೋ;

ಗೋತಮಸ್ಸ ಭಗವತೋ, ಕನಿಟ್ಠೋ ತ್ವಂ ಭವಿಸ್ಸಸಿ.

೩೦. ‘‘‘ರಾಗರತ್ತೋ ಸುಖಸೀಲೋ, ಕಾಮೇಸು ಗೇಧಮಾಯುತೋ;

ಬುದ್ಧೇನ ಚೋದಿತೋ ಸನ್ತೋ, ತದಾ [ತತೋ (ಸ್ಯಾ.)] ತ್ವಂ ಪಬ್ಬಜಿಸ್ಸಸಿ.

೩೧. ‘‘‘ಪಬ್ಬಜಿತ್ವಾನ ತ್ವಂ ತತ್ಥ, ಕುಸಲಮೂಲೇನ ಚೋದಿತೋ;

ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸಸಿನಾಸವೋ’.

೩೨. ‘‘ಸತ್ತ [ಸತ (ಸ್ಯಾ.)] ಕಪ್ಪಸಹಸ್ಸಮ್ಹಿ, ಚತುರೋ ಚೇಳನಾಮಕಾ;

ಸಟ್ಠಿ ಕಪ್ಪಸಹಸ್ಸಮ್ಹಿ, ಉಪಚೇಲಾ ಚತುಜ್ಜನಾ.

೩೩. ‘‘ಪಞ್ಚ ಕಪ್ಪಸಹಸ್ಸಮ್ಹಿ, ಚೇಳಾವ ಚತುರೋ ಜನಾ;

ಸತ್ತರತನಸಮ್ಪನ್ನಾ, ಚತುದೀಪಮ್ಹಿ ಇಸ್ಸರಾ.

೩೪. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ನನ್ದೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ನನ್ದತ್ಥೇರಸ್ಸಾಪದಾನಂ ತತಿಯಂ.

೪. ಚೂಳಪನ್ಥಕತ್ಥೇರಅಪದಾನಂ

೩೫. ‘‘ಪದುಮುತ್ತರೋ ನಾಮ ಜಿನೋ, ಆಹುತೀನಂ ಪಟಿಗ್ಗಹೋ;

ಗಣಮ್ಹಾ ವೂಪಕಟ್ಠೋ ಸೋ, ಹಿಮವನ್ತೇ ವಸೀ ತದಾ.

೩೬. ‘‘ಅಹಮ್ಪಿ ಹಿಮವನ್ತಮ್ಹಿ, ವಸಾಮಿ ಅಸ್ಸಮೇ ತದಾ;

ಅಚಿರಾಗತಂ ಮಹಾವೀರಂ, ಉಪೇಸಿಂ ಲೋಕನಾಯಕಂ.

೩೭. ‘‘ಪುಪ್ಫಚ್ಛತ್ತಂ ಗಹೇತ್ವಾನ, ಉಪಗಚ್ಛಿಂ ನರಾಸಭಂ;

ಸಮಾಧಿಂ ಸಮಾಪಜ್ಜನ್ತಂ, ಅನ್ತರಾಯಮಕಾಸಹಂ.

೩೮. ‘‘ಉಭೋ ಹತ್ಥೇಹಿ ಪಗ್ಗಯ್ಹ, ಪುಪ್ಫಚ್ಛತ್ತಂ ಅದಾಸಹಂ;

ಪಟಿಗ್ಗಹೇಸಿ ಭಗವಾ, ಪದುಮುತ್ತರೋ ಮಹಾಮುನಿ.

೩೯. ‘‘ಸಬ್ಬೇ ದೇವಾ ಅತ್ತಮನಾ, ಹಿಮವನ್ತಂ ಉಪೇನ್ತಿ ತೇ;

ಸಾಧುಕಾರಂ ಪವತ್ತೇಸುಂ, ಅನುಮೋದಿಸ್ಸತಿ ಚಕ್ಖುಮಾ.

೪೦. ‘‘ಇದಂ ವತ್ವಾನ ತೇ ದೇವಾ, ಉಪಗಚ್ಛುಂ ನರುತ್ತಮಂ;

ಆಕಾಸೇ ಧಾರಯನ್ತಸ್ಸ [ಧಾರಯನ್ತಂ ಮೇ (ಕ), ಧಾರಯತೋ ಮೇ (?)], ಪದುಮಚ್ಛತ್ತಮುತ್ತಮಂ.

೪೧. ‘‘ಸತಪತ್ತಛತ್ತಂ ಪಗ್ಗಯ್ಹ, ಅದಾಸಿ ತಾಪಸೋ ಮಮ;

‘ತಮಹಂ ಕಿತ್ತಯಿಸ್ಸಾಮಿ, ಸುಣಾಥ ಮಮ ಭಾಸತೋ.

೪೨. ‘‘‘ಪಞ್ಚವೀಸತಿಕಪ್ಪಾನಿ, ದೇವರಜ್ಜಂ ಕರಿಸ್ಸತಿ;

ಚತುತ್ತಿಂಸತಿಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ.

೪೩. ‘‘‘ಯಂ ಯಂ ಯೋನಿಂ ಸಂಸರತಿ, ದೇವತ್ತಂ ಅಥ ಮಾನುಸಂ;

ಅಬ್ಭೋಕಾಸೇ ಪತಿಟ್ಠನ್ತಂ, ಪದುಮಂ ಧಾರಯಿಸ್ಸತಿ’.

೪೪. ‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ [ನಾಮೇನ (ಸೀ. ಕ.)], ಸತ್ಥಾ ಲೋಕೇ ಭವಿಸ್ಸತಿ.

೪೫. ‘‘‘ಪಕಾಸಿತೇ ಪಾವಚನೇ, ಮನುಸ್ಸತ್ತಂ ಲಭಿಸ್ಸತಿ;

ಮನೋಮಯಮ್ಹಿ ಕಾಯಮ್ಹಿ, ಉತ್ತಮೋ ಸೋ ಭವಿಸ್ಸತಿ.

೪೬. ‘‘‘ದ್ವೇ ಭಾತರೋ ಭವಿಸ್ಸನ್ತಿ, ಉಭೋಪಿ ಪನ್ಥಕವ್ಹಯಾ;

ಅನುಭೋತ್ವಾ ಉತ್ತಮತ್ಥಂ, ಜೋತಯಿಸ್ಸನ್ತಿ ಸಾಸನಂ’.

೪೭. ‘‘ಸೋಹಂ ಅಟ್ಠಾರಸವಸ್ಸೋ [ಸೋ ಅಟ್ಠಾರಸವಸ್ಸೋಹಂ (ಸ್ಯಾ.)], ಪಬ್ಬಜಿಂ ಅನಗಾರಿಯಂ;

ವಿಸೇಸಾಹಂ ನ ವಿನ್ದಾಮಿ, ಸಕ್ಯಪುತ್ತಸ್ಸ ಸಾಸನೇ.

೪೮. ‘‘ದನ್ಧಾ ಮಯ್ಹಂ ಗತೀ ಆಸಿ, ಪರಿಭೂತೋ ಪುರೇ ಅಹುಂ [ಅಹಂ (ಸ್ಯಾ.)];

ಭಾತಾ ಚ ಮಂ ಪಣಾಮೇಸಿ, ಗಚ್ಛ ದಾನಿ ಸಕಂ ಘರಂ.

೪೯. ‘‘ಸೋಹಂ ಪಣಾಮಿತೋ ಸನ್ತೋ, ಸಙ್ಘಾರಾಮಸ್ಸ ಕೋಟ್ಠಕೇ;

ದುಮ್ಮನೋ ತತ್ಥ ಅಟ್ಠಾಸಿಂ, ಸಾಮಞ್ಞಸ್ಮಿಂ ಅಪೇಕ್ಖವಾ.

೫೦. ‘‘ಭಗವಾ ತತ್ಥ [ಅಥೇತ್ಥ ಸತ್ಥಾ (ಸೀ. ಸ್ಯಾ.)] ಆಗಚ್ಛಿ, ಸೀಸಂ ಮಯ್ಹಂ ಪರಾಮಸಿ;

ಬಾಹಾಯ ಮಂ ಗಹೇತ್ವಾನ, ಸಙ್ಘಾರಾಮಂ ಪವೇಸಯಿ.

೫೧. ‘‘ಅನುಕಮ್ಪಾಯ ಮೇ ಸತ್ಥಾ, ಅದಾಸಿ ಪಾದಪುಞ್ಛನಿಂ;

ಏವಂ ಸುದ್ಧಂ ಅಧಿಟ್ಠೇಹಿ, ಏಕಮನ್ತಮಧಿಟ್ಠಹಂ.

೫೨. ‘‘ಹತ್ಥೇಹಿ ತಮಹಂ ಗಯ್ಹ, ಸರಿಂ ಕೋಕನದಂ ಅಹಂ;

ತತ್ಥ ಚಿತ್ತಂ ವಿಮುಚ್ಚಿ ಮೇ, ಅರಹತ್ತಂ ಅಪಾಪುಣಿಂ.

೫೩. ‘‘ಮನೋಮಯೇಸು ಕಾಯೇಸು, ಸಬ್ಬತ್ಥ ಪಾರಮಿಂ ಗತೋ;

ಸಬ್ಬಾಸವೇ ಪರಿಞ್ಞಾಯ, ವಿಹರಾಮಿ ಅನಾಸವೋ.

೫೪. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಚೂಳಪನ್ಥಕೋ [ಚುಲ್ಲಪನ್ಥಕೋ (ಸೀ. ಸ್ಯಾ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಚೂಳಪನ್ಥಕತ್ಥೇರಸ್ಸಾಪದಾನಂ ಚತುತ್ಥಂ.

೫. ಪಿಲಿನ್ದವಚ್ಛತ್ಥೇರಅಪದಾನಂ

೫೫. ‘‘ನಿಬ್ಬುತೇ ಲೋಕನಾಥಮ್ಹಿ, ಸುಮೇಧೇ ಅಗ್ಗಪುಗ್ಗಲೇ;

ಪಸನ್ನಚಿತ್ತೋ ಸುಮನೋ, ಥೂಪಪೂಜಂ ಅಕಾಸಹಂ.

೫೬. ‘‘ಯೇ ಚ ಖೀಣಾಸವಾ ತತ್ಥ, ಛಳಭಿಞ್ಞಾ ಮಹಿದ್ಧಿಕಾ;

ತೇಹಂ ತತ್ಥ ಸಮಾನೇತ್ವಾ, ಸಙ್ಘಭತ್ತಂ ಅಕಾಸಹಂ.

೫೭. ‘‘ಸುಮೇಧಸ್ಸ ಭಗವತೋ, ಉಪಟ್ಠಾಕೋ ತದಾ ಅಹು;

ಸುಮೇಧೋ ನಾಮ ನಾಮೇನ, ಅನುಮೋದಿತ್ಥ ಸೋ ತದಾ.

೫೮. ‘‘ತೇನ ಚಿತ್ತಪ್ಪಸಾದೇನ, ವಿಮಾನಂ ಉಪಪಜ್ಜಹಂ;

ಛಳಾಸೀತಿಸಹಸ್ಸಾನಿ, ಅಚ್ಛರಾಯೋ ರಮಿಂಸು ಮೇ.

೫೯. ‘‘ಮಮೇವ ಅನುವತ್ತನ್ತಿ, ಸಬ್ಬಕಾಮೇಹಿ ತಾ ಸದಾ;

ಅಞ್ಞೇ ದೇವೇ ಅಭಿಭೋಮಿ, ಪುಞ್ಞಕಮ್ಮಸ್ಸಿದಂ ಫಲಂ.

೬೦. ‘‘ಪಞ್ಚವೀಸತಿಕಪ್ಪಮ್ಹಿ, ವರುಣೋ ನಾಮ ಖತ್ತಿಯೋ;

ವಿಸುದ್ಧಭೋಜನೋ [ಸುಸುದ್ಧಭೋಜನೋ (ಸೀ.)] ಆಸಿಂ, ಚಕ್ಕವತ್ತೀ ಅಹಂ ತದಾ.

೬೧. ‘‘ನ ತೇ ಬೀಜಂ ಪವಪನ್ತಿ, ನಪಿ ನೀಯನ್ತಿ ನಙ್ಗಲಾ;

ಅಕಟ್ಠಪಾಕಿಮಂ ಸಾಲಿಂ, ಪರಿಭುಞ್ಜನ್ತಿ ಮಾನುಸಾ.

೬೨. ‘‘ತತ್ಥ ರಜ್ಜಂ ಕರಿತ್ವಾನ, ದೇವತ್ತಂ ಪುನ ಗಚ್ಛಹಂ;

ತದಾಪಿ ಏದಿಸಾ ಮಯ್ಹಂ, ನಿಬ್ಬತ್ತಾ ಭೋಗಸಮ್ಪದಾ.

೬೩. ‘‘ನ ಮಂ ಮಿತ್ತಾ ಅಮಿತ್ತಾ ವಾ, ಹಿಂಸನ್ತಿ ಸಬ್ಬಪಾಣಿನೋ;

ಸಬ್ಬೇಸಮ್ಪಿ ಪಿಯೋ ಹೋಮಿ, ಪುಞ್ಞಕಮ್ಮಸ್ಸಿದಂ ಫಲಂ.

೬೪. ‘‘ತಿಂಸಕಪ್ಪಸಹಸ್ಸಮ್ಹಿ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಗನ್ಧಾಲೇಪಸ್ಸಿದಂ ಫಲಂ.

೬೫. ‘‘ಇಮಸ್ಮಿಂ ಭದ್ದಕೇ ಕಪ್ಪೇ, ಏಕೋ ಆಸಿಂ ಜನಾಧಿಪೋ;

ಮಹಾನುಭಾವೋ ರಾಜಾಹಂ [ರಾಜೀಸಿ (ಸ್ಯಾ. ಕ.)], ಚಕ್ಕವತ್ತೀ ಮಹಬ್ಬಲೋ.

೬೬. ‘‘ಸೋಹಂ ಪಞ್ಚಸು ಸೀಲೇಸು, ಠಪೇತ್ವಾ ಜನತಂ ಬಹುಂ;

ಪಾಪೇತ್ವಾ ಸುಗತಿಂಯೇವ, ದೇವತಾನಂ ಪಿಯೋ ಅಹುಂ.

೬೭. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಿಲಿನ್ದವಚ್ಛೋ [ಪಿಲಿನ್ದಿವಚ್ಛೋ (ಸೀ.)] ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಪಿಲಿನ್ದವಚ್ಛತ್ಥೇರಸ್ಸಾಪದಾನಂ ಪಞ್ಚಮಂ.