೮. ದುಸ್ಸದಾಯಕತ್ಥೇರಅಪದಾನಂ

೩೮. ‘‘ತಿವರಾಯಂ ಪುರೇ ರಮ್ಮೇ, ರಾಜಪುತ್ತೋಸಹಂ [ರಾಜಪುತ್ತೋ ಅಹಂ (ಸೀ. ಸ್ಯಾ.)] ತದಾ;

ಪಣ್ಣಾಕಾರಂ ಲಭಿತ್ವಾನ, ಉಪಸನ್ತಸ್ಸದಾಸಹಂ.

೩೯. ‘‘ಅಧಿವಾಸೇಸಿ ಭಗವಾ, ವತ್ಥಂ [ನವಂ (ಕ.)] ಹತ್ಥೇನ ಆಮಸಿ;

ಸಿದ್ಧತ್ಥೋ ಅಧಿವಾಸೇತ್ವಾ, ವೇಹಾಸಂ ನಭಮುಗ್ಗಮಿ.

೪೦. ‘‘ಬುದ್ಧಸ್ಸ ಗಚ್ಛಮಾನಸ್ಸ, ದುಸ್ಸಾ ಧಾವನ್ತಿ ಪಚ್ಛತೋ;

ತತ್ಥ ಚಿತ್ತಂ ಪಸಾದೇಸಿಂ, ಬುದ್ಧೋ ನೋ ಅಗ್ಗಪುಗ್ಗಲೋ.

೪೧. ‘‘ಚತುನ್ನವುತಿತೋ ಕಪ್ಪೇ, ಯಂ ದುಸ್ಸಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ದುಸ್ಸದಾನಸ್ಸಿದಂ ಫಲಂ.

೪೨. ‘‘ಸತ್ತಸಟ್ಠಿಮ್ಹಿತೋ ಕಪ್ಪೇ, ಚಕ್ಕವತ್ತೀ ತದಾ ಅಹು;

ಪರಿಸುದ್ಧೋತಿ ನಾಮೇನ, ಮನುಜಿನ್ದೋ ಮಹಬ್ಬಲೋ.

೪೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ದುಸ್ಸದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ದುಸ್ಸದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.