೧೭. ಸುಪಾರಿಚರಿಯವಗ್ಗೋ

೧. ಸುಪಾರಿಚರಿಯತ್ಥೇರಅಪದಾನಂ

೧. ‘‘ಪದುಮೋ ನಾಮ ನಾಮೇನ, ದ್ವಿಪದಿನ್ದೋ ನರಾಸಭೋ;

ಪವನಾ ಅಭಿನಿಕ್ಖಮ್ಮ, ಧಮ್ಮಂ ದೇಸೇತಿ ಚಕ್ಖುಮಾ.

೨. ‘‘ಯಕ್ಖಾನಂ ಸಮಯೋ ಆಸಿ, ಅವಿದೂರೇ ಮಹೇಸಿನೋ;

ಯೇನ ಕಿಚ್ಚೇನ ಸಮ್ಪತ್ತಾ, ಅಜ್ಝಾಪೇಕ್ಖಿಂಸು ತಾವದೇ.

೩. ‘‘ಬುದ್ಧಸ್ಸ ಗಿರಮಞ್ಞಾಯ, ಅಮತಸ್ಸ ಚ ದೇಸನಂ;

ಪಸನ್ನಚಿತ್ತೋ ಸುಮನೋ, ಅಪ್ಫೋಟೇತ್ವಾ ಉಪಟ್ಠಹಿಂ.

೪. ‘‘ಸುಚಿಣ್ಣಸ್ಸ ಫಲಂ ಪಸ್ಸ, ಉಪಟ್ಠಾನಸ್ಸ ಸತ್ಥುನೋ;

ತಿಂಸಕಪ್ಪಸಹಸ್ಸೇಸು, ದುಗ್ಗತಿಂ ನುಪಪಜ್ಜಹಂ.

೫. ‘‘ಊನತಿಂಸೇ ಕಪ್ಪಸತೇ, ಸಮಲಙ್ಕತನಾಮಕೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೬. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸುಪಾರಿಚರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸುಪಾರಿಚರಿಯತ್ಥೇರಸ್ಸಾಪದಾನಂ ಪಠಮಂ.

೨. ಕಣವೇರಪುಪ್ಫಿಯತ್ಥೇರಅಪದಾನಂ

೭. ‘‘ಸಿದ್ಧತ್ಥೋ ನಾಮ ಭಗವಾ, ಲೋಕಜೇಟ್ಠೋ ನರಾಸಭೋ;

ಪುರಕ್ಖತೋ ಸಾವಕೇಹಿ, ನಗರಂ ಪಟಿಪಜ್ಜಥ.

೮. ‘‘ರಞ್ಞೋ ಅನ್ತೇಪುರೇ ಆಸಿಂ, ಗೋಪಕೋ ಅಭಿಸಮ್ಮತೋ;

ಪಾಸಾದೇ ಉಪವಿಟ್ಠೋಹಂ, ಅದ್ದಸಂ ಲೋಕನಾಯಕಂ.

೯. ‘‘ಕಣವೇರಂ [ಕರವೀರಂ (ಸಕ್ಕತಾನುಲೋಮಂ), ಕಣವೀರಂ (ಪಾಕತ)] ಗಹೇತ್ವಾನ, ಭಿಕ್ಖುಸಙ್ಘೇ ಸಮೋಕಿರಿಂ;

ಬುದ್ಧಸ್ಸ ವಿಸುಂ ಕತ್ವಾನ, ತತೋ ಭಿಯ್ಯೋ ಸಮೋಕಿರಿಂ.

೧೦. ‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿಪೂಜಯಿಂ [ರೋಪಯಿಂ (ಸ್ಯಾ.)];

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೧೧. ‘‘ಸತ್ತಾಸೀತಿಮ್ಹಿತೋ ಕಪ್ಪೇ, ಚತುರಾಸುಂ ಮಹಿದ್ಧಿಕಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೧೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕಣವೇರಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕಣವೇರಪುಪ್ಫಿಯತ್ಥೇರಸ್ಸಾಪದಾನಂ ದುತಿಯಂ.

೩. ಖಜ್ಜಕದಾಯಕತ್ಥೇರಅಪದಾನಂ

೧೩. ‘‘ತಿಸ್ಸಸ್ಸ ಖೋ ಭಗವತೋ, ಪುಬ್ಬೇ ಫಲಮದಾಸಹಂ;

ನಾಳಿಕೇರಞ್ಚ ಪಾದಾಸಿಂ, ಖಜ್ಜಕಂ ಅಭಿಸಮ್ಮತಂ.

೧೪. ‘‘ಬುದ್ಧಸ್ಸ ತಮಹಂ ದತ್ವಾ, ತಿಸ್ಸಸ್ಸ ತು ಮಹೇಸಿನೋ;

ಮೋದಾಮಹಂ ಕಾಮಕಾಮೀ, ಉಪಪಜ್ಜಿಂ [ಕಾಮಕಾರೀ, ಉಪಪಜ್ಜಂ (ಸೀ.)] ಯಮಿಚ್ಛಕಂ [ಸಬ್ಬತ್ಥಪಿ ಏವಮೇವ ದಿಸ್ಸತಿ].

೧೫. ‘‘ದ್ವೇನವುತೇ ಇತೋ ಕಪ್ಪೇ, ಯಂ ದಾನಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಫಲದಾನಸ್ಸಿದಂ ಫಲಂ.

೧೬. ‘‘ಇತೋ ತೇರಸಕಪ್ಪಮ್ಹಿ, ರಾಜಾ ಇನ್ದಸಮೋ ಅಹು;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೧೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಖಜ್ಜಕದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಖಜ್ಜಕದಾಯಕತ್ಥೇರಸ್ಸಾಪದಾನಂ ತತಿಯಂ.

೪. ದೇಸಪೂಜಕತ್ಥೇರಅಪದಾನಂ

೧೮. ‘‘ಅತ್ಥದಸ್ಸೀ ತು ಭಗವಾ, ಲೋಕಜೇಟ್ಠೋ ನರಾಸಭೋ;

ಅಬ್ಭುಗ್ಗನ್ತ್ವಾನ ವೇಹಾಸಂ, ಗಚ್ಛತೇ ಅನಿಲಞ್ಜಸೇ.

೧೯. ‘‘ಯಮ್ಹಿ ದೇಸೇ ಠಿತೋ ಸತ್ಥಾ, ಅಬ್ಭುಗ್ಗಚ್ಛಿ ಮಹಾಮುನಿ;

ತಾಹಂ ದೇಸಂ ಅಪೂಜೇಸಿಂ, ಪಸನ್ನೋ ಸೇಹಿ ಪಾಣಿಭಿ.

೨೦. ‘‘ಅಟ್ಠಾರಸೇ ಕಪ್ಪಸತೇ, ಅದ್ದಸಂ ಯಂ ಮಹಾಮುನಿಂ;

ದುಗ್ಗತಿಂ ನಾಭಿಜಾನಾಮಿ, ದೇಸಪೂಜಾಯಿದಂ ಫಲಂ.

೨೧. ‘‘ಏಕಾದಸೇ ಕಪ್ಪಸತೇ, ಗೋಸುಜಾತಸನಾಮಕೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೨೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ದೇಸಪೂಜಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ದೇಸಪೂಜಕತ್ಥೇರಸ್ಸಾಪದಾನಂ ಚತುತ್ಥಂ.

೫. ಕಣಿಕಾರಛತ್ತಿಯತ್ಥೇರಅಪದಾನಂ

೨೩. ‘‘ವೇಸ್ಸಭೂ ನಾಮ ಸಮ್ಬುದ್ಧೋ, ಲೋಕಜೇಟ್ಠೋ ನರಾಸಭೋ;

ದಿವಾವಿಹಾರಾಯ ಮುನಿ, ಓಗಾಹಯಿ ಮಹಾವನಂ.

೨೪. ‘‘ಕಣಿಕಾರಂ ಓಚಿನಿತ್ವಾ, ಛತ್ತಂ ಕತ್ವಾನಹಂ ತದಾ;

ಪುಪ್ಫಚ್ಛದನಂ ಕತ್ವಾನ, ಬುದ್ಧಸ್ಸ ಅಭಿರೋಪಯಿಂ.

೨೫. ‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೨೬. ‘‘ಇತೋ ವೀಸತಿಕಪ್ಪಮ್ಹಿ, ಸೋಣ್ಣಾಭಾ ಅಟ್ಠ ಖತ್ತಿಯಾ;

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ.

೨೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಕಣಿಕಾರಛತ್ತಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಕಣಿಕಾರಛತ್ತಿಯತ್ಥೇರಸ್ಸಾಪದಾನಂ ಪಞ್ಚಮಂ.

೬. ಸಪ್ಪಿದಾಯಕತ್ಥೇರಅಪದಾನಂ

೨೮. ‘‘ಫುಸ್ಸೋ ನಾಮಾಸಿ [ನಾಮಾಥ (ಸೀ.)] ಭಗವಾ, ಆಹುತೀನಂ ಪಟಿಗ್ಗಹೋ;

ಗಚ್ಛತೇ ವೀಥಿಯಂ ವೀರೋ, ನಿಬ್ಬಾಪೇನ್ತೋ ಮಹಾಜನಂ.

೨೯. ‘‘ಅನುಪುಬ್ಬೇನ ಭಗವಾ, ಆಗಚ್ಛಿ ಮಮ ಸನ್ತಿಕಂ;

ತತೋ ತಂ [ತತೋಹಂ (ಸೀ. ಸ್ಯಾ.)] ಪತ್ತಂ ಪಗ್ಗಯ್ಹ, ಸಪ್ಪಿತೇಲಮದಾಸಹಂ.

೩೦. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಸಪ್ಪಿಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಸಪ್ಪಿದಾನಸ್ಸಿದಂ ಫಲಂ.

೩೧. ‘‘ಛಪ್ಪಞ್ಞಾಸೇ ಇತೋ ಕಪ್ಪೇ, ಏಕೋ ಆಸಿ ಸಮೋದಕೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೩೨. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಪ್ಪಿದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಪ್ಪಿದಾಯಕತ್ಥೇರಸ್ಸಾಪದಾನಂ ಛಟ್ಠಂ.

೭. ಯೂಥಿಕಪುಪ್ಫಿಯತ್ಥೇರಅಪದಾನಂ

೩೩. ‘‘ಚನ್ದಭಾಗಾನದೀತೀರೇ, ಅನುಸೋತಂ ವಜಾಮಹಂ;

ಸಯಮ್ಭುಂ ಅದ್ದಸಂ ತತ್ಥ, ಸಾಲರಾಜಂವ ಫುಲ್ಲಿತಂ.

೩೪. ‘‘ಪುಪ್ಫಂ ಯೂಥಿಕಮಾದಾಯ, ಉಪಗಚ್ಛಿಂ ಮಹಾಮುನಿಂ;

ಪಸನ್ನಚಿತ್ತೋ ಸುಮನೋ, ಬುದ್ಧಸ್ಸ ಅಭಿರೋಪಯಿಂ.

೩೫. ‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೩೬. ‘‘ಸತ್ತಸಟ್ಠಿಮ್ಹಿತೋ ಕಪ್ಪೇ, ಏಕೋ ಸಾಮುದ್ಧರೋ ಅಹು;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೩೭. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಯೂಥಿಕಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಯೂಥಿಕಪುಪ್ಫಿಯತ್ಥೇರಸ್ಸಾಪದಾನಂ ಸತ್ತಮಂ.

೮. ದುಸ್ಸದಾಯಕತ್ಥೇರಅಪದಾನಂ

೩೮. ‘‘ತಿವರಾಯಂ ಪುರೇ ರಮ್ಮೇ, ರಾಜಪುತ್ತೋಸಹಂ [ರಾಜಪುತ್ತೋ ಅಹಂ (ಸೀ. ಸ್ಯಾ.)] ತದಾ;

ಪಣ್ಣಾಕಾರಂ ಲಭಿತ್ವಾನ, ಉಪಸನ್ತಸ್ಸದಾಸಹಂ.

೩೯. ‘‘ಅಧಿವಾಸೇಸಿ ಭಗವಾ, ವತ್ಥಂ [ನವಂ (ಕ.)] ಹತ್ಥೇನ ಆಮಸಿ;

ಸಿದ್ಧತ್ಥೋ ಅಧಿವಾಸೇತ್ವಾ, ವೇಹಾಸಂ ನಭಮುಗ್ಗಮಿ.

೪೦. ‘‘ಬುದ್ಧಸ್ಸ ಗಚ್ಛಮಾನಸ್ಸ, ದುಸ್ಸಾ ಧಾವನ್ತಿ ಪಚ್ಛತೋ;

ತತ್ಥ ಚಿತ್ತಂ ಪಸಾದೇಸಿಂ, ಬುದ್ಧೋ ನೋ ಅಗ್ಗಪುಗ್ಗಲೋ.

೪೧. ‘‘ಚತುನ್ನವುತಿತೋ ಕಪ್ಪೇ, ಯಂ ದುಸ್ಸಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ದುಸ್ಸದಾನಸ್ಸಿದಂ ಫಲಂ.

೪೨. ‘‘ಸತ್ತಸಟ್ಠಿಮ್ಹಿತೋ ಕಪ್ಪೇ, ಚಕ್ಕವತ್ತೀ ತದಾ ಅಹು;

ಪರಿಸುದ್ಧೋತಿ ನಾಮೇನ, ಮನುಜಿನ್ದೋ ಮಹಬ್ಬಲೋ.

೪೩. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ದುಸ್ಸದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ದುಸ್ಸದಾಯಕತ್ಥೇರಸ್ಸಾಪದಾನಂ ಅಟ್ಠಮಂ.

೯. ಸಮಾದಪಕತ್ಥೇರಅಪದಾನಂ

೪೪. ‘‘ನಗರೇ ಬನ್ಧುಮತಿಯಾ, ಮಹಾಪೂಗಗಣೋ ಅಹು;

ತೇಸಾಹಂ ಪವರೋ ಆಸಿಂ, ಮಮ ಬದ್ಧಚರಾ [ಪಟ್ಠಚರಾ (ಸ್ಯಾ.)] ಚ ತೇ.

೪೫. ‘‘ಸಬ್ಬೇ ತೇ ಸನ್ನಿಪಾತೇತ್ವಾ, ಪುಞ್ಞಕಮ್ಮೇ ಸಮಾದಯಿಂ;

ಮಾಳಂ ಕಸ್ಸಾಮ ಸಙ್ಘಸ್ಸ, ಪುಞ್ಞಕ್ಖೇತ್ತಂ ಅನುತ್ತರಂ.

೪೬. ‘‘ಸಾಧೂತಿ ತೇ ಪಟಿಸ್ಸುತ್ವಾ, ಮಮ ಛನ್ದವಸಾನುಗಾ;

ನಿಟ್ಠಾಪೇತ್ವಾ ಚ ತಂ ಮಾಳಂ, ವಿಪಸ್ಸಿಸ್ಸ ಅದಮ್ಹಸೇ.

೪೭. ‘‘ಏಕನವುತಿತೋ ಕಪ್ಪೇ, ಯಂ ಮಾಳಮದದಿಂ ತದಾ;

ದುಗ್ಗತಿಂ ನಾಭಿಜಾನಾಮಿ, ಮಾಳದಾನಸ್ಸಿದಂ ಫಲಂ.

೪೮. ‘‘ಏಕೂನಸತ್ತತಿಕಪ್ಪೇ [ಏಕೂನಸಟ್ಠಿಕಪ್ಪಮ್ಹಿ (ಸೀ. ಸ್ಯಾ.)],

ಏಕೋ ಆಸಿ ಜನಾಧಿಪೋ.

ಆದೇಯ್ಯೋ ನಾಮ ನಾಮೇನ, ಚಕ್ಕವತ್ತೀ ಮಹಬ್ಬಲೋ.

೪೯. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಸಮಾದಪಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಸಮಾದಪಕತ್ಥೇರಸ್ಸಾಪದಾನಂ ನವಮಂ.

೧೦. ಪಞ್ಚಙ್ಗುಲಿಯತ್ಥೇರಅಪದಾನಂ

೫೦. ‘‘ತಿಸ್ಸೋ ನಾಮಾಸಿ ಭಗವಾ, ಲೋಕಜೇಟ್ಠೋ ನರಾಸಭೋ;

ಪವಿಸತಿ ಗನ್ಧಕುಟಿಂ, ವಿಹಾರಕುಸಲೋ ಮುನಿ.

೫೧. ‘‘ಸುಗನ್ಧಮಾಲಮಾದಾಯ, ಅಗಮಾಸಿಂ ಜಿನನ್ತಿಕಂ;

ಅಪಸದ್ದೋ ಚ ಸಮ್ಬುದ್ಧೇ, ಪಞ್ಚಙ್ಗುಲಿಮದಾಸಹಂ.

೫೨. ‘‘ದ್ವೇನವುತೇ ಇತೋ ಕಪ್ಪೇ, ಯಂ ಗನ್ಧಮಭಿರೋಪಯಿಂ;

ದುಗ್ಗತಿಂ ನಾಭಿಜಾನಾಮಿ, ಪಞ್ಚಙ್ಗುಲಿಸ್ಸಿದಂ [ಪಞ್ಚಙ್ಗುಲಿಯಿದಂ (ಸೀ.)] ಫಲಂ.

೫೩. ‘‘ದ್ವೇಸತ್ತತಿಮ್ಹಿತೋ ಕಪ್ಪೇ, ರಾಜಾ ಆಸಿಂ ಸಯಮ್ಪಭೋ;

ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ.

೫೪. ‘‘ಪಟಿಸಮ್ಭಿದಾ ಚತಸ್ಸೋ…ಪೇ… ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಪಞ್ಚಙ್ಗುಲಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ;

ಪಞ್ಚಙ್ಗುಲಿಯತ್ಥೇರಸ್ಸಾಪದಾನಂ ದಸಮಂ.

ಸುಪಾರಿಚರಿಯವಗ್ಗೋ ಸತ್ತರಸಮೋ.