೩. ದ್ವೇಭಾಗಸಿಕ್ಖಾಪದವಣ್ಣನಾ

೫೫೨. ತೇನ ಸಮಯೇನಾತಿ ದ್ವೇಭಾಗಸಿಕ್ಖಾಪದಂ. ತತ್ಥ ಅನ್ತೇ ಆದಿಯಿತ್ವಾತಿ ಸನ್ಥತಸ್ಸ ಅನ್ತೇ ಅನುವಾತಂ ವಿಯ ದಸ್ಸೇತ್ವಾ ಓದಾತಂ ಅಲ್ಲಿಯಾಪೇತ್ವಾ.

ದ್ವೇ ಭಾಗಾತಿ ದ್ವೇ ಕೋಟ್ಠಾಸಾ. ಆದಾತಬ್ಬಾತಿ ಗಹೇತಬ್ಬಾ. ಗೋಚರಿಯಾನನ್ತಿ ಕಪಿಲವಣ್ಣಾನಂ. ದ್ವೇ ತುಲಾ ಆದಾತಬ್ಬಾತಿ ಚತೂಹಿ ತುಲಾಹಿ ಕಾರೇತುಕಾಮಂ ಸನ್ಧಾಯ ವುತ್ತಂ. ಅತ್ಥತೋ ಪನ ಯತ್ತಕೇಹಿ ಏಳಕಲೋಮೇಹಿ ಕಾತುಕಾಮೋ ಹೋತಿ, ತೇಸು ದ್ವೇ ಕೋಟ್ಠಾಸಾ ಕಾಳಕಾನಂ ಏಕೋ ಓದಾತಾನಂ, ಏಕೋ ಗೋಚರಿಯಾನನ್ತಿ ಇದಮೇವ ದಸ್ಸಿತಂ ಹೋತೀತಿ ವೇದಿತಬ್ಬಂ. ಸೇಸಂ ಉತ್ತಾನತ್ಥಮೇವ.

ಸಮುಟ್ಠಾನಾದೀನಿಪಿ ಕೋಸಿಯಸಿಕ್ಖಾಪದಸದಿಸಾನೇವ. ಕೇವಲಂ ಇದಂ ಆದಾಯ ಅನಾದಾಯ ಚ ಕರಣತೋ ಕಿರಿಯಾಕಿರಿಯಂ ವೇದಿತಬ್ಬನ್ತಿ.

ದ್ವೇಭಾಗಸಿಕ್ಖಾಪದವಣ್ಣನಾ ನಿಟ್ಠಿತಾ.