೧. ಪಠಮಸಿಕ್ಖಾಪದವಣ್ಣನಾ

೧೧೮೧. ಛತ್ತವಗ್ಗಸ್ಸ ಪಠಮಸಿಕ್ಖಾಪದೇ – ಸಕಿಮ್ಪಿ ಧಾರೇತಿ ಆಪತ್ತಿ ಪಾಚಿತ್ತಿಯಸ್ಸಾತಿ ಮಗ್ಗಗಮನೇ ಏಕಪಯೋಗೇನೇವ ದಿವಸಮ್ಪಿ ಧಾರೇತಿ, ಏಕಾವ ಆಪತ್ತಿ. ಸಚೇ ಕದ್ದಮಾದೀನಿ ಪತ್ವಾ ಉಪಾಹನಾ ಓಮುಞ್ಚಿತ್ವಾ ಛತ್ತಮೇವ ಧಾರೇನ್ತೀ ಗಚ್ಛತಿ, ದುಕ್ಕಟಂ. ಅಥಾಪಿ ಗಚ್ಛಾದೀನಿ ದಿಸ್ವಾ ಛತ್ತಂ ಅಪನಾಮೇತ್ವಾ ಉಪಾಹನಾರುಳ್ಹಾವ ಗಚ್ಛತಿ, ದುಕ್ಕಟಮೇವ. ಸಚೇ ಛತ್ತಮ್ಪಿ ಅಪನಾಮೇತ್ವಾ ಉಪಾಹನಾಪಿ ಓಮುಞ್ಚಿತ್ವಾ ಪುನ ಧಾರೇತಿ, ಪುನ ಪಾಚಿತ್ತಿಯಂ. ಏವಂ ಪಯೋಗಗಣನಾಯ ಆಪತ್ತಿಯೋ ವೇದಿತಬ್ಬಾ. ಸೇಸಂ ಉತ್ತಾನಮೇವ. ಏಳಕಲೋಮಸಮುಟ್ಠಾನಂ – ಕಿರಿಯಂ, ನೋಸಞ್ಞಾವಿಮೋಕ್ಖಂ, ಅಚಿತ್ತಕಂ, ಪಣ್ಣತ್ತಿವಜ್ಜಂ, ಕಾಯಕಮ್ಮಂ, ತಿಚಿತ್ತಂ, ತಿವೇದನನ್ತಿ.

ಪಠಮಸಿಕ್ಖಾಪದಂ.