೧೦. ದನ್ತಪೋನಸಿಕ್ಖಾಪದವಣ್ಣನಾ

೨೬೩. ದಸಮಸಿಕ್ಖಾಪದೇ – ಚತೂಸು ಪಚ್ಚಯೇಸು ಅನ್ತಮಸೋ ದನ್ತಕಟ್ಠಮ್ಪಿ ಸಬ್ಬಂ ಪಂಸುಕೂಲಮೇವ ಅಸ್ಸಾತಿ ಸಬ್ಬಪಂಸುಕೂಲಿಕೋ. ಸೋ ಕಿರ ಸುಸಾನೇ ಛಡ್ಡಿತಭಾಜನಮೇವ ಪತ್ತಂ ಕತ್ವಾ ತತ್ಥ ಛಡ್ಡಿತಚೋಳಕೇಹೇವ ಚೀವರಂ ಕತ್ವಾ ತತ್ಥ ಛಡ್ಡಿತಮಞ್ಚಪೀಠಕಾನಿಯೇವ ಗಹೇತ್ವಾ ಪರಿಭುಞ್ಜತಿ. ಅಯ್ಯವೋಸಾಟಿತಕಾನೀತಿ ಏತ್ಥ ಅಯ್ಯಾ ವುಚ್ಚನ್ತಿ ಕಾಲಙ್ಕತಾ ಪಿತಿಪಿತಾಮಹಾ. ವೋಸಾಟಿತಕಾನಿ ವುಚ್ಚನ್ತಿ ತೇಸಂ ಅತ್ಥಾಯ ಸುಸಾನಾದೀಸು ಛಡ್ಡಿತಕಾನಿ ಖಾದನೀಯಭೋಜನೀಯಾನಿ; ಮನುಸ್ಸಾ ಕಿರ ಕಾಲಙ್ಕತೇ ಞಾತಕೇ ಉದ್ದಿಸ್ಸ ಯಂ ತೇಸಂ ಸಜೀವಕಾಲೇ ಪಿಯಂ ಹೋತಿ, ತಂ ಏತೇಸು ಸುಸಾನಾದೀಸು ಪಿಣ್ಡಂ ಪಿಣ್ಡಂ ಕತ್ವಾ ‘‘ಞಾತಕಾ ನೋ ಪರಿಭುಞ್ಜನ್ತೂತಿ ಠಪೇನ್ತಿ. ಸೋ ಭಿಕ್ಖು ತಂ ಗಹೇತ್ವಾ ಭುಞ್ಜತಿ, ಅಞ್ಞಂ ಪಣೀತಮ್ಪಿ ದಿಯ್ಯಮಾನಂ ನ ಇಚ್ಛತಿ. ತೇನ ವುತ್ತಂ – ‘‘ಸುಸಾನೇಪಿ ರುಕ್ಖಮೂಲೇಪಿ ಉಮ್ಮಾರೇಪಿ ಅಯ್ಯವೋಸಾಟಿತಕಾನಿ ಸಾಮಂ ಗಹೇತ್ವಾ ಪರಿಭುಞ್ಜತೀ’’ತಿ. ಥೇರೋತಿ ಥಿರೋ ಘನಬದ್ಧೋ. ವಠರೋತಿ ಥೂಲೋ; ಥೂಲೋ ಚ ಘನಸರೀರೋ ಚಾಯಂ ಭಿಕ್ಖೂತಿ ವುತ್ತಂ ಹೋತಿ. ಮನುಸ್ಸಮಂಸಂ ಮಞ್ಞೇ ಖಾದತೀತಿ ಮನುಸ್ಸಮಂಸಂ ಖಾದತೀತಿ ನಂ ಸಲ್ಲಕ್ಖೇಮ; ಮನುಸ್ಸಮಂಸಂ ಖಾದನ್ತಾ ಹಿ ಈದಿಸಾ ಭವನ್ತೀತಿ ಅಯಂ ತೇಸಂ ಅಧಿಪ್ಪಾಯೋ.

೨೬೪. ಉದಕದನ್ತಪೋನೇ ಕುಕ್ಕುಚ್ಚಾಯನ್ತೀತಿ ಏತ್ಥ ತೇ ಭಿಕ್ಖೂ ‘‘ಅದಿನ್ನಂ ಮುಖದ್ವಾರಂ ಆಹಾರಂ ಆಹರೇಯ್ಯಾ’’ತಿ ಪದಸ್ಸ ಸಮ್ಮಾ ಅತ್ಥಂ ಅಸಲ್ಲಕ್ಖೇತ್ವಾ ಕುಕ್ಕುಚ್ಚಾಯಿಸುಂ, ಭಗವಾ ಪನ ಯಥಾಉಪ್ಪನ್ನಸ್ಸ ವತ್ಥುಸ್ಸ ವಸೇನ ಪಿತಾ ವಿಯ ದಾರಕೇ ತೇ ಭಿಕ್ಖೂ ಸಞ್ಞಾಪೇನ್ತೋ ಅನುಪಞ್ಞತ್ತಿಂ ಠಪೇಸಿ.

೨೬೫. ಅದಿನ್ನನ್ತಿ ಕಾಯೇನ ವಾ ಕಾಯಪಟಿಬದ್ಧೇನ ವಾ ಗಣ್ಹನ್ತಸ್ಸ ಕಾಯಕಾಯಪಟಿಬದ್ಧನಿಸ್ಸಗ್ಗಿಯಾನಂ ಅಞ್ಞತರವಸೇನ ನ ದಿನ್ನಂ. ಏತದೇವ ಹಿ ಸನ್ಧಾಯ ಪದಭಾಜನೇ ‘‘ಅದಿನ್ನಂ ನಾಮ ಅಪ್ಪಟಿಗ್ಗಹಿತಕಂ ವುಚ್ಚತೀ’’ತಿ ವುತ್ತಂ. ದುತಿಯಪಾರಾಜಿಕೇ ಪನ ‘‘ಅದಿನ್ನಂ ನಾಮ ಪರಪರಿಗ್ಗಹಿತಕಂ ವುಚ್ಚತೀ’’ತಿ ವುತ್ತಂ. ದಿನ್ನನ್ತಿ ಇದಂ ಪನ ತಸ್ಸೇವ ಅದಿನ್ನಸ್ಸ ಪಟಿಪಕ್ಖವಸೇನ ಲಕ್ಖಣದಸ್ಸನತ್ಥಂ ಉದ್ಧಟಂ. ನಿದ್ದೇಸೇ ಚಸ್ಸ ‘‘ಕಾಯೇನ ವಾ ಕಾಯಪಟಿಬದ್ಧೇನ ವಾ ನಿಸ್ಸಗ್ಗಿಯೇನ ವಾ ದೇನ್ತೇ’’ತಿ ಏವಂ ಅಞ್ಞಸ್ಮಿಂ ದದಮಾನೇ ‘‘ಹತ್ಥಪಾಸೇ ಠಿತೋ ಕಾಯೇನ ವಾ ಕಾಯಪಟಿಬದ್ಧೇನ ವಾ ಪಟಿಗ್ಗಣ್ಹಾತೀತಿ ತಂ ಏವಂ ದಿಯ್ಯಮಾನಂ ಅನ್ತಮಸೋ ರಥರೇಣುಮ್ಪಿ ಸಚೇ ಪುಬ್ಬೇ ವುತ್ತಲಕ್ಖಣೇ ಹತ್ಥಪಾಸೇ ಠಿತೋ ಕಾಯೇನ ವಾ ಕಾಯಪಟಿಬದ್ಧೇನ ವಾ ಪಟಿಗ್ಗಣ್ಹಾತಿ, ಏತಂ ಏವಂ ಪಟಿಗ್ಗಹಿತಂ ದಿನ್ನಂ ನಾಮ ವುಚ್ಚತಿ. ನ ‘‘ಇದಂ ಗಣ್ಹ, ಇದಂ ತವ ಹೋತೂ’’ತಿಆದಿವಚನೇನ ನಿಸ್ಸಟ್ಠಂ.

ತತ್ಥ ಕಾಯೇನಾತಿ ಹತ್ಥಾದೀಸು ಯೇನ ಕೇನಚಿ ಸರೀರಾವಯವೇನ; ಅನ್ತಮಸೋ ಪಾದಙ್ಗುಲಿಯಾಪಿ ದಿಯ್ಯಮಾನಂ ಕಾಯೇನ ದಿನ್ನಂ ನಾಮ ಹೋತಿ, ಪಟಿಗ್ಗಹಣೇಪಿ ಏಸೇವ ನಯೋ. ಯೇನ ಕೇನಚಿ ಹಿ ಸರೀರಾವಯವೇನ ಗಹಿತಂ ಕಾಯೇನ ಗಹಿತಮೇವ ಹೋತಿ. ಸಚೇಪಿ ನತ್ಥುಕರಣಿಯಾ ದಿಯ್ಯಮಾನಂ ನಾಸಾಪುಟೇನ ಅಕಲ್ಲಕೋ ವಾ ಮುಖೇನ ಪಟಿಗ್ಗಣ್ಹಾತಿ. ಆಭೋಗಮತ್ತಮೇವ ಹಿ ಏತ್ಥ ಪಮಾಣನ್ತಿ ಅಯಂ ನಯೋ ಮಹಾಪಚ್ಚರಿಯಂ ವುತ್ತೋ. ಕಾಯಪಟಿಬದ್ಧೇನಾತಿ ಕಟಚ್ಛುಆದೀಸು ಯೇನ ಕೇನಚಿ ಉಪಕರಣೇನ ದಿನ್ನಂ ಕಾಯಪಟಿಬದ್ಧೇನ ದಿನ್ನಂ ನಾಮ ಹೋತಿ. ಪಟಿಗ್ಗಹಣೇಪಿ ಏಸೇವ ನಯೋ. ಯೇನ ಕೇನಚಿ ಸರೀರಪಟಿಬದ್ಧೇನ ಪತ್ತಥಾಲಕಾದಿನಾ ಗಹಿತಂ ಕಾಯಪಟಿಬದ್ಧೇನ ಗಹಿತಮೇವ ಹೋತಿ. ನಿಸ್ಸಗ್ಗಿಯೇನಾತಿ ಕಾಯತೋ ಚ ಕಾಯಪಟಿಬದ್ಧತೋ ಚ ಮೋಚೇತ್ವಾ ಹತ್ಥಪಾಸೇ ಠಿತಸ್ಸ ಕಾಯೇನ ವಾ ಕಾಯಪಟಿಬದ್ಧೇನ ವಾ ಪಾತಿಯಮಾನಮ್ಪಿ ನಿಸ್ಸಗ್ಗಿಯೇನ ಪಯೋಗೇನ ದಿನ್ನಂ ನಾಮ ಹೋತಿ. ಅಯಂ ತಾವ ಪಾಳಿವಣ್ಣನಾ.

ಅಯಂ ಪನೇತ್ಥ ಪಾಳಿಮುತ್ತಕವಿನಿಚ್ಛಯೋ – ಪಞ್ಚಙ್ಗೇಹಿ ಪಟಿಗ್ಗಹಣಂ ರುಹತಿ – ಥಾಮಮಜ್ಝಿಮಸ್ಸ ಪುರಿಸಸ್ಸ ಉಚ್ಚಾರಣಮತ್ತಂ ಹೋತಿ, ಹತ್ಥಪಾಸೋ ಪಞ್ಞಾಯತಿ, ಅಭಿಹಾರೋ ಪಞ್ಞಾಯತಿ, ದೇವೋ ವಾ ಮನುಸ್ಸೋ ವಾ ತಿರಚ್ಛಾನಗತೋ ವಾ ಕಾಯೇನ ವಾ ಕಾಯಪಟಿಬದ್ಧೇನ ವಾ ನಿಸ್ಸಗ್ಗಿಯೇನ ವಾ ದೇತಿ, ತಂ ಚೇ ಭಿಕ್ಖು ಕಾಯೇನ ವಾ ಕಾಯಪಟಿಬದ್ಧೇನ ವಾ ಪಟಿಗ್ಗಣ್ಹಾತಿ. ಏವಂ ಪಞ್ಚಹಙ್ಗೇಹಿ ಪಟಿಗ್ಗಹಣಂ ರುಹತಿ.

ತತ್ಥ ಠಿತನಿಸಿನ್ನನಿಪನ್ನಾನಂ ಪವಾರಣಸಿಕ್ಖಾಪದೇ ವುತ್ತನಯೇನೇವ ಹತ್ಥಪಾಸೋ ವೇದಿತಬ್ಬೋ. ಸಚೇ ಪನ ದಾಯಕಪಟಿಗ್ಗಾಹಕೇಸು ಏಕೋ ಆಕಾಸೇ ಹೋತಿ, ಏಕೋ ಭೂಮಿಯಂ, ಭೂಮಟ್ಠಸ್ಸ ಚ ಸೀಸೇನ ಆಕಾಸಟ್ಠಸ್ಸ ಚ ಠಪೇತ್ವಾ ದಾತುಂ ವಾ ಗಹೇತುಂ ವಾ ಪಸಾರಿತಹತ್ಥಂ, ಯಂ ಆಸನ್ನತರಂ ಅಙ್ಗಂ, ತಸ್ಸ ಓರಿಮನ್ತೇನ ಹತ್ಥಪಾಸಪ್ಪಮಾಣಂ ಪರಿಚ್ಛಿನ್ದಿತಬ್ಬಂ. ಸಚೇಪಿ ಏಕೋ ಕೂಪೇ ಹೋತಿ, ಏಕೋ ಕೂಪತಟೇ, ಏಕೋ ವಾ ಪನ ರುಕ್ಖೇ, ಏಕೋ ಪಥವಿಯಂ, ವುತ್ತನಯೇನೇವ ಹತ್ಥಪಾಸಪ್ಪಮಾಣಂ ಪರಿಚ್ಛಿನ್ದಿತಬ್ಬಂ. ಏವರೂಪೇ ಹತ್ಥಪಾಸೇ ಠತ್ವಾ ಸಚೇಪಿ ಪಕ್ಖೀ ಮುಖತುಣ್ಡಕೇನ ವಾ ಹತ್ಥೀ ವಾ ಸೋಣ್ಡಾಯ ಗಹೇತ್ವಾ ಪುಪ್ಫಂ ವಾ ಫಲಂ ವಾ ದೇತಿ, ಪಟಿಗ್ಗಹಣಂ ರುಹತಿ. ಸಚೇ ಪನ ಅದ್ಧಟ್ಠಮರತನಸ್ಸಾಪಿ ಹತ್ಥಿನೋ ಖನ್ಧೇ ನಿಸಿನ್ನೋ, ತೇನ ಸೋಣ್ಡಾಯ ದಿಯ್ಯಮಾನಂ ಗಣ್ಹಾತಿ, ವಟ್ಟತಿಯೇವ.

ಏಕೋ ಬಹೂನಿ ಭತ್ತಬ್ಯಞ್ಜನಭಾಜನಾನಿ ಸೀಸೇ ಕತ್ವಾ ಭಿಕ್ಖುಸ್ಸ ಸನ್ತಿಕಂ ಆಗನ್ತ್ವಾ ಠಿತಕೋವ ಗಣ್ಹಥಾತಿ ವದತಿ, ನ ತಾವ ಅಭಿಹಾರೋ ಪಞ್ಞಾಯತಿ, ತಸ್ಮಾ ನ ಗಹೇತಬ್ಬಂ. ಸಚೇ ಪನ ಈಸಕಮ್ಪಿ ಓನಮತಿ, ಭಿಕ್ಖುನಾ ಹತ್ಥಂ ಪಸಾರೇತ್ವಾ ಹೇಟ್ಠಿಮಭಾಜನಂ ಏಕದೇಸೇನಾಪಿ ಸಮ್ಪಟಿಚ್ಛಿತಬ್ಬಂ. ಏತ್ತಾವತಾ ಸಬ್ಬಭಾಜನಾನಿ ಪಟಿಗ್ಗಹಿತಾನಿ ಹೋನ್ತಿ, ತತೋ ಪಟ್ಠಾಯ ಓರೋಪೇತ್ವಾ ವಾ ಉಗ್ಘಾಟೇತ್ವಾ ವಾ ಯಂ ಇಚ್ಛತಿ, ತಂ ಗಹೇತ್ವಾ ಭುಞ್ಜಿತುಂ ವಟ್ಟತಿ. ಸಭತ್ತಪಚ್ಛಿಆದಿಮ್ಹಿ ಪನ ಏಕಭಾಜನೇ ವತ್ತಬ್ಬಮೇವ ನತ್ಥಿ, ಕಾಜೇನ ಭತ್ತಂ ಹರನ್ತೋಪಿ ಸಚೇ ಕಾಜಂ ಓನಾಮೇತ್ವಾ ದೇತಿ, ವಟ್ಟತಿ. ತಿಂಸಹತ್ಥೋ ವೇಣು ಹೋತಿ, ಏಕಸ್ಮಿಂ ಅನ್ತೇ ಗುಳಕುಮ್ಭೋ ಬದ್ಧೋ, ಏಕಸ್ಮಿಂ ಸಪ್ಪಿಕುಮ್ಭೋ, ತಞ್ಚೇ ಪಟಿಗ್ಗಣ್ಹಾತಿ, ಸಬ್ಬಂ ಪಟಿಗ್ಗಹಿತಮೇವ. ಉಚ್ಛುಯನ್ತದೋಣಿತೋ ಪಗ್ಘರನ್ತಮೇವ ರಸಂ ಗಣ್ಹಥಾತಿ ವದತಿ, ಅಭಿಹಾರೋ ನ ಪಞ್ಞಾಯತೀತಿ ನ ಗಹೇತಬ್ಬೋ. ಸಚೇ ಪನ ಕಸಟಂ ಛಡ್ಡೇತ್ವಾ ಹತ್ಥೇನ ಉಸ್ಸಿಞ್ಚಿತ್ವಾ ಉಸ್ಸಿಞ್ಚಿತ್ವಾ ದೇತಿ, ವಟ್ಟತಿ.

ಬಹೂ ಪತ್ತಾ ಮಞ್ಚೇ ವಾ ಪೀಠೇ ವಾ ಕಟಸಾರಕೇ ವಾ ದೋಣಿಯಂ ವಾ ಫಲಕೇ ವಾ ಠಪಿತಾ ಹೋನ್ತಿ, ಯತ್ಥ ಠಿತಸ್ಸ ದಾಯಕೋ ಹತ್ಥಪಾಸೇ ಹೋತಿ, ತತ್ಥ ಠತ್ವಾ ಪಟಿಗ್ಗಹಣಸಞ್ಞಾಯ ಮಞ್ಚಾದೀನಿ ಅಙ್ಗುಲಿಯಾಪಿ ಫುಸಿತ್ವಾ ಠಿತೇನ ವಾ ನಿಸಿನ್ನೇನ ವಾ ನಿಪನ್ನೇನ ವಾ ಯಂ ತೇಸು ಪತ್ತೇಸು ದಿಯ್ಯತಿ, ತಂ ಸಬ್ಬಂ ಪಟಿಗ್ಗಹಿತಂ ಹೋತಿ. ಸಚೇಪಿ ಪಟಿಗ್ಗಹೇಸ್ಸಾಮೀತಿ ಮಞ್ಚಾದೀನಿ ಆರುಹಿತ್ವಾ ನಿಸೀದತಿ, ವಟ್ಟತಿಯೇವ. ಸಚೇ ಪನ ಮಞ್ಚಾದೀನಿ ಹತ್ಥೇನ ಗಹೇತ್ವಾ ಮಞ್ಚೇ ನಿಸೀದತಿ, ವತ್ತಬ್ಬಮೇವ ನತ್ಥಿ.

ಪಥವಿಯಂ ಪನ ಸಚೇಪಿ ಕುಚ್ಛಿಯಾ ಕುಚ್ಛಿಂ ಆಹಚ್ಚ ಠಿತಾ ಹೋನ್ತಿ, ಯಂ ಯಂ ಅಙ್ಗುಲಿಯಾ ವಾ ಸೂಚಿಯಾ ವಾ ಫುಸಿತ್ವಾ ನಿಸಿನ್ನೋ ಹೋತಿ, ತತ್ಥ ತತ್ಥ ದಿಯ್ಯಮಾನಮೇವ ಪಟಿಗ್ಗಹಿತಂ ಹೋತಿ. ‘‘ಯತ್ಥ ಕತ್ಥಚಿ ಮಹಾಕಟಸಾರಹತ್ಥತ್ಥರಣಾದೀಸು ಠಪಿತಪತ್ತೇ ಪಟಿಗ್ಗಹಣಂ ನ ರುಹತೀ’’ತಿ ವುತ್ತಂ, ತಂ ಹತ್ಥಪಾಸಾತಿಕ್ಕಮಂ ಸನ್ಧಾಯ ವುತ್ತನ್ತಿ ವೇದಿತಬ್ಬಂ. ಹತ್ಥಪಾಸೇ ಪನ ಸತಿ ಯತ್ಥ ಕತ್ಥಚಿ ವಟ್ಟತಿ ಅಞ್ಞತ್ರ ತತ್ಥಜಾತಕಾ.

ತತ್ಥಜಾತಕೇ ಪನ ಪದುಮಿನಿಪಣ್ಣೇ ವಾ ಕಿಂಸುಕಪಣ್ಣಾದಿಮ್ಹಿ ವಾ ನ ವಟ್ಟತಿ. ನ ಹಿ ತಂ ಕಾಯಪಟಿಬದ್ಧಸಙ್ಖ್ಯಂ ಗಚ್ಛತಿ. ಯಥಾ ಚ ತತ್ಥಜಾತಕೇ; ಏವಂ ಖಾಣುಕೇ ಬನ್ಧಿತ್ವಾ ಠಪಿತಮಞ್ಚಾದಿಮ್ಹಿ ಅಸಂಹಾರಿಮೇ ಫಲಕೇ ವಾ ಪಾಸಾಣೇ ವಾ ನ ರುಹತಿಯೇವ, ತೇಪಿ ಹಿ ತತ್ಥಜಾತಕಸಙ್ಖೇಪುಪಗಾ ಹೋನ್ತಿ. ಭೂಮಿಯಂ ಅತ್ಥತೇಸು ಸುಖುಮೇಸು ತಿನ್ತಿಣಿಕಾದಿಪಣ್ಣೇಸುಪಿ ಪಟಿಗ್ಗಹಣಂ ನ ರುಹತಿ, ನ ಹಿ ತಾನಿ ಸನ್ಧಾರೇತುಂ ಸಮತ್ಥಾನೀತಿ. ಮಹನ್ತೇಸು ಪನ ಪದುಮಿನಿಪಣ್ಣಾದೀಸು ರುಹತಿ. ಸಚೇ ಹತ್ಥಪಾಸಂ ಅತಿಕ್ಕಮ್ಮ ಠಿತೋ ದೀಘದಣ್ಡಕೇನ ಉಳುಙ್ಕೇನ ದೇತಿ, ಆಗನ್ತ್ವಾ ದೇಹೀತಿ ವತ್ತಬ್ಬೋ. ವಚನಂ ಅಸುತ್ವಾ ವಾ ಅನಾದಿಯಿತ್ವಾ ವಾ ಪತ್ತೇ ಆಕಿರತಿಯೇವ, ಪುನ ಪಟಿಗ್ಗಹೇತಬ್ಬಂ. ದೂರೇ ಠತ್ವಾ ಭತ್ತಪಿಣ್ಡಂ ಖಿಪನ್ತೇಪಿ ಏಸೇವ ನಯೋ.

ಸಚೇ ಪತ್ತತ್ಥವಿಕತೋ ನೀಹರಿಯಮಾನೇ ಪತ್ತೇ ರಜನಚುಣ್ಣಾನಿ ಹೋನ್ತಿ, ಸತಿ ಉದಕೇ ಧೋವಿತಬ್ಬೋ, ಅಸತಿ ರಜನಚುಣ್ಣಂ ಪುಚ್ಛಿತ್ವಾ ಪಟಿಗ್ಗಹೇತ್ವಾ ವಾ ಪಿಣ್ಡಾಯ ಚರಿತಬ್ಬಂ. ಸಚೇ ಪಿಣ್ಡಾಯ ಚರನ್ತಸ್ಸ ರಜಂ ಪತತಿ, ಪಟಿಗ್ಗಹೇತ್ವಾ ಭಿಕ್ಖಾ ಗಣ್ಹಿತಬ್ಬಾ. ಅಪ್ಪಟಿಗ್ಗಹೇತ್ವಾ ಗಣ್ಹತೋ ವಿನಯದುಕ್ಕಟಂ. ತಂ ಪನ ಪುನ ಪಟಿಗ್ಗಹೇತ್ವಾ ಭುಞ್ಜತೋ ಅನಾಪತ್ತಿ. ಸಚೇ ಪನ ‘‘ಪಟಿಗ್ಗಹೇತ್ವಾ ದೇಥಾ’’ತಿ ವುತ್ತೇ ವಚನಂ ಅಸುತ್ವಾ ವಾ ಅನಾದಿಯಿತ್ವಾ ವಾ ಭಿಕ್ಖಂ ದೇನ್ತಿಯೇವ, ವಿನಯದುಕ್ಕಟಂ ನತ್ಥಿ, ಪುನ ಪಟಿಗ್ಗಹೇತ್ವಾ ಅಞ್ಞಾ ಭಿಕ್ಖಾ ಗಹೇತಬ್ಬಾ.

ಸಚೇ ಮಹಾವಾತೋ ತತೋ ತತೋ ರಜಂ ಪಾತೇತಿ, ನ ಸಕ್ಕಾ ಹೋತಿ ಭಿಕ್ಖಂ ಗಹೇತುಂ, ‘‘ಅನುಪಸಮ್ಪನ್ನಸ್ಸ ದಸ್ಸಾಮೀ’’ತಿ ಸುದ್ಧಚಿತ್ತೇನ ಆಭೋಗಂ ಕತ್ವಾ ಗಣ್ಹಿತುಂ ವಟ್ಟತಿ. ಏವಂ ಪಿಣ್ಡಾಯ ಚರಿತ್ವಾ ವಿಹಾರಂ ವಾ ಆಸನಸಾಲಂ ವಾ ಗನ್ತ್ವಾ ತಂ ಅನುಪಸಮ್ಪನ್ನಸ್ಸ ದತ್ವಾ ಪುನ ತೇನ ದಿನ್ನಂ ವಾ ತಸ್ಸ ವಿಸ್ಸಾಸೇನ ವಾ ಪಟಿಗ್ಗಹೇತ್ವಾ ಭುಞ್ಜಿತುಂ ವಟ್ಟತಿ.

ಸಚೇ ಭಿಕ್ಖಾಚಾರೇ ಸರಜಂ ಪತ್ತಂ ಭಿಕ್ಖುಸ್ಸ ದೇತಿ, ಸೋ ವತ್ತಬ್ಬೋ – ‘‘ಇಮಂ ಪಟಿಗ್ಗಹೇತ್ವಾ ಭಿಕ್ಖಂ ವಾ ಗಣ್ಹೇಯ್ಯಾಸಿ, ಪರಿಭುಞ್ಜೇಯ್ಯಾಸಿ ವಾ’’ತಿ ತೇನ ತಥಾ ಕಾತಬ್ಬಂ. ಸಚೇ ರಜಂ ಉಪರಿ ಉಪ್ಪಿಲವತಿ, ಕಞ್ಜಿಕಂ ಪವಾಹೇತ್ವಾ ಸೇಸಂ ಭುಞ್ಜಿತಬ್ಬಂ. ಸಚೇ ಅನ್ತೋ ಪವಿಟ್ಠಂ ಹೋತಿ, ಪಟಿಗ್ಗಹೇತಬ್ಬಂ. ಅನುಪಸಮ್ಪನ್ನೇ ಅಸತಿ ಹತ್ಥತೋ ಅಮೋಚೇನ್ತೇನ, ಯತ್ಥ ಅನುಪಸಮ್ಪನ್ನೋ ಅತ್ಥಿ ತತ್ಥ ನೇತ್ವಾ ಪಟಿಗ್ಗಹೇತಬ್ಬಂ. ಸುಕ್ಖಭತ್ತೇ ಪತಿತರಜಂ ಅಪನೇತ್ವಾ ಭುಞ್ಜಿತುಂ ವಟ್ಟತಿ. ಸಚೇ ಅತಿಸುಖುಮಂ ಹೋತಿ, ಉಪರಿಭತ್ತೇನ ಸದ್ಧಿಂ ಅಪನೇತಬ್ಬಂ, ಪಟಿಗ್ಗಹೇತ್ವಾ ವಾ ಭುಞ್ಜಿತಬ್ಬಂ. ಯಾಗುಂ ವಾ ಸೂಪಂ ವಾ ಪುರತೋ ಠಪೇತ್ವಾ ಆಲುಲೇನ್ತಾನಂ ಭಾಜನತೋ ಫುಸಿತಾನಿ ಉಗ್ಗನ್ತ್ವಾ ಪತ್ತೇ ಪತನ್ತಿ, ಪತ್ತೋ ಪಟಿಗ್ಗಹೇತಬ್ಬೋ.

ಉಳುಙ್ಕೇನ ಆಹರಿತ್ವಾ ದೇನ್ತಾನಂ ಪಠಮತರಂ ಉಳುಙ್ಕತೋ ಥೇವಾ ಪತ್ತೇ ಪತನ್ತಿ, ಸುಪತಿತಾ, ಅಭಿಹಟತ್ತಾ ದೋಸೋ ನತ್ಥಿ. ಸಚೇಪಿ ಚರುಕೇನ ಭತ್ತೇ ಆಕಿರಿಯಮಾನೇ ಚರುಕತೋ ಮಸಿ ವಾ ಛಾರಿಕಾ ವಾ ಪತತಿ, ಅಭಿಹಟತ್ತಾ ನೇವತ್ಥಿ ದೋಸೋ. ಅನನ್ತರಸ್ಸ ಭಿಕ್ಖುನೋ ದಿಯ್ಯಮಾನಂ ಪತ್ತತೋ ಉಪ್ಪತಿತ್ವಾ ಇತರಸ್ಸ ಪತ್ತೇ ಪತತಿ, ಸುಪತಿತಂ. ಪಟಿಗ್ಗಹಿತಮೇವ ಹಿ ತಂ ಹೋತಿ.

ಸಚೇ ಜಜ್ಝರಿಸಾಖಾದಿಂ ಫಾಲೇತ್ವಾ ಏಕಸ್ಸ ಭಿಕ್ಖುನೋ ದೇನ್ತಾನಂ ಸಾಖತೋ ಫುಸಿತಾನಿ ಅಞ್ಞಸ್ಸ ಪತ್ತೇ ಪತನ್ತಿ, ಪತ್ತೋ ಪಟಿಗ್ಗಹೇತಬ್ಬೋ. ಯಸ್ಸ ಪತ್ತಸ್ಸ ಉಪರಿ ಫಾಲೇನ್ತಿ, ತಸ್ಸ ಪತ್ತೇ ಪತಿತೇಸು ದಾತುಕಾಮತಾಯ ಅಭಿಹಟತ್ತಾ ದೋಸೋ ನತ್ಥಿ. ಪಾಯಾಸಸ್ಸ ಪೂರೇತ್ವಾ ಪತ್ತಂ ದೇನ್ತಿ, ಉಣ್ಹತ್ತಾ ಹೇಟ್ಠಾ ಗಹೇತುಂ ನ ಸಕ್ಕೋತಿ, ಮುಖವಟ್ಟಿಯಾಪಿ ಗಹೇತುಂ ವಟ್ಟತಿ. ಸಚೇ ತಥಾಪಿ ನ ಸಕ್ಕೋತಿ, ಆಧಾರಕೇನ ಗಣ್ಹಿತಬ್ಬೋ.

ಆಸನಸಾಲಾಯ ಪತ್ತಂ ಗಹೇತ್ವಾ ನಿಸಿನ್ನೋ ಭಿಕ್ಖು ನಿದ್ದಂ ಓಕ್ಕನ್ತೋ ಹೋತಿ, ನೇವ ಆಹರಿಯಮಾನಂ ನ ದಿಯ್ಯಮಾನಂ ಜಾನಾತಿ, ಅಪ್ಪಟಿಗ್ಗಹಿತಂ ಹೋತಿ. ಸಚೇ ಪನ ಆಭೋಗಂ ಕತ್ವಾ ನಿಸಿನ್ನೋ ಹೋತಿ, ವಟ್ಟತಿ. ಸಚೇಪಿ ಸೋ ಹತ್ಥೇನ ಆಧಾರಕಂ ಮುಞ್ಚಿತ್ವಾ ಪಾದೇನ ಪೇಲ್ಲೇತ್ವಾ ನಿದ್ದಾಯತಿ, ವಟ್ಟತಿಯೇವ. ಪಾದೇನ ಆಧಾರಕಂ ಅಕ್ಕಮಿತ್ವಾ ಪಟಿಗ್ಗಣ್ಹನ್ತಸ್ಸ ಪನ ಜಾಗರನ್ತಸ್ಸಪಿ ಅನಾದರಪಟಿಗ್ಗಹಣಂ ಹೋತಿ, ತಸ್ಮಾ ನ ಕಾತಬ್ಬಂ. ಕೇಚಿ ಏವಂ ಆಧಾರಕೇನ ಪಟಿಗ್ಗಹಣಂ ಕಾಯಪಟಿಬದ್ಧಪಟಿಬದ್ಧೇನ ಪಟಿಗ್ಗಹಣಂ ನಾಮ ಹೋತಿ, ತಸ್ಮಾ ನ ವಟ್ಟತೀತಿ ವದನ್ತಿ. ತಂ ತೇಸಂ ವಚನಮತ್ತಮೇವ. ಅತ್ಥತೋ ಪನ ಸಬ್ಬಮ್ಪೇತಂ ಕಾಯಪಟಿಬದ್ಧಮೇವ ಹೋತಿ. ಕಾಯಸಂಸಗ್ಗೇಪಿ ಚೇಸ ನಯೋ ದಸ್ಸಿತೋವ. ಯಮ್ಪಿ ಭಿಕ್ಖುಸ್ಸ ದಿಯ್ಯಮಾನಂ ಪತತಿ, ತಮ್ಪಿ ಸಾಮಂ ಗಹೇತ್ವಾ ಪರಿಭುಞ್ಜಿತುಂ ವಟ್ಟತಿ. ತತ್ರಿದಂ ಸುತ್ತಂ –

‘‘ಅನುಜಾನಾಮಿ, ಭಿಕ್ಖವೇ, ಯಂ ದಿಯ್ಯಮಾನಂ ಪತತಿ, ತಂ ಸಾಮಂ ಗಹೇತ್ವಾ ಪರಿಭುಞ್ಜಿತುಂ ಪರಿಚ್ಚತ್ತಂ ತಂ, ಭಿಕ್ಖವೇ, ದಾಯಕೇಹೀ’’ತಿ (ಚೂಳವ. ೨೭೩).

ಇದಞ್ಚ ಪನ ಸುತ್ತಂ ನೇಯ್ಯತ್ಥಂ. ತಸ್ಮಾ ಏವಮೇತ್ಥ ಅಧಿಪ್ಪಾಯೋ ವೇದಿತಬ್ಬೋ – ಯಂ ದಿಯ್ಯಮಾನಂ ದಾಯಕಸ್ಸ ಹತ್ಥತೋ ಪರಿಗಳಿತ್ವಾ ಸುದ್ಧಾಯ ವಾ ಭೂಮಿಯಾ ಪದುಮಿನಿಪಣ್ಣವತ್ಥಕಟಸಾರಕಾದೀಸು ವಾ ಪತತಿ, ತಂ ಸಾಮಂ ಗಹೇತ್ವಾ ಪರಿಭುಞ್ಜಿತುಂ ವಟ್ಟತಿ. ಯಂ ಪನ ಸರಜಾಯ ಭೂಮಿಯಾ ಪತತಿ, ತಂ ರಜಂ ಪುಞ್ಛಿತ್ವಾ ವಾ ಧೋವಿತ್ವಾ ವಾ ಪಟಿಗ್ಗಹೇತ್ವಾ ವಾ ಪರಿಭುಞ್ಜಿತಬ್ಬಂ. ಸಚೇ ಪನ ಪವಟ್ಟನ್ತಂ ಅಞ್ಞಸ್ಸ ಭಿಕ್ಖುನೋ ಸನ್ತಿಕಂ ಗಚ್ಛತಿ, ತೇನ ಆಹರಾಪೇತುಮ್ಪಿ ವಟ್ಟತಿ. ಸಚೇ ತಂ ಭಿಕ್ಖುಂ ವದತಿ ‘‘ತ್ವಂಯೇವ ಖಾದಾ’’ತಿ ತಸ್ಸಾಪಿ ಖಾದಿತುಂ ವಟ್ಟತಿ. ಅನಾಣತ್ತೇನ ಪನ ತೇನ ನ ಗಹೇತಬ್ಬಂ. ಅನಾಣತ್ತೇನಾಪಿ ‘‘ಇತರಸ್ಸ ದಸ್ಸಾಮೀ’’ತಿ ಗಹೇತುಂ ವಟ್ಟತೀತಿ ಕುರುನ್ದಿಯಂ ವುತ್ತಂ. ಕಸ್ಮಾ ಪನೇತಂ ಇತರಸ್ಸ ಭಿಕ್ಖುನೋ ಗಹೇತುಂ ನ ವಟ್ಟತೀತಿ? ಭಗವತಾ ಅನನುಞ್ಞಾತತ್ತಾ. ಭಗವತಾ ಹಿ ‘‘ಸಾಮಂ ಗಹೇತ್ವಾ ಪರಿಭುಞ್ಜಿತು’’ನ್ತಿ ವದನ್ತೇನ ಯಸ್ಸೇವ ತಂ ದಿಯ್ಯಮಾನಂ ಪತತಿ, ತಸ್ಸ ಅಪ್ಪಟಿಗ್ಗಹಿತಕಮ್ಪಿ ತಂ ಗಹೇತ್ವಾ ಪರಿಭೋಗೋ ಅನುಞ್ಞಾತೋ. ‘‘ಪರಿಚ್ಚತ್ತಂ ತಂ ಭಿಕ್ಖವೇ ದಾಯಕೇಹೀ’’ತಿ ವಚನೇನ ಪನೇತ್ಥ ಪರಸನ್ತಕಾಭಾವೋ ದೀಪಿತೋ. ತಸ್ಮಾ ಅಞ್ಞಸ್ಸ ಸಾಮಂ ಗಹೇತ್ವಾ ಪರಿಭುಞ್ಜಿತುಂ ನ ವಟ್ಟತಿ, ತಸ್ಸ ಪನ ಆಣತ್ತಿಯಾ ವಟ್ಟತೀತಿ ಅಯಂ ಕಿರೇತ್ಥ ಅಧಿಪ್ಪಾಯೋ.

ಯಸ್ಮಾ ಚ ತಂ ಅಪ್ಪಟಿಗ್ಗಹಿತಕತ್ತಾ ಅನುಞ್ಞಾತಂ, ತಸ್ಮಾ ಯಥಾಠಿತಂಯೇವ ಅನಾಮಸಿತ್ವಾ ಕೇನಚಿ ಪಿದಹಿತ್ವಾ ಠಪಿತಂ ದುತಿಯದಿವಸೇಪಿ ಪರಿಭುಞ್ಚಿತುಂ ವಟ್ಟತಿ, ಸನ್ನಿಧಿಪಚ್ಚಯಾ ಅನಾಪತ್ತಿ. ಪಟಿಗ್ಗಹೇತ್ವಾ ಪನ ಪರಿಭುಞ್ಜಿತಬ್ಬಂ. ತಂದಿವಸಂಯೇವ ಹಿ ತಸ್ಸ ಸಾಮಂ ಗಹೇತ್ವಾ ಪರಿಭೋಗೋ ಅನುಞ್ಞಾತೋ, ನ ತತೋ ಪರನ್ತಿ ಅಯಮ್ಪಿ ಕಿರೇತ್ಥ ಅಧಿಪ್ಪಾಯೋ.

ಇದಾನಿ ಅಬ್ಬೋಹಾರಿಕನಯೋ ವುಚ್ಚತಿ – ಭುಞ್ಜನ್ತಾನಞ್ಹಿ ದನ್ತಾ ಖಿಯ್ಯನ್ತಿ, ನಖಾ ಖಿಯ್ಯನ್ತಿ, ಪತ್ತಸ್ಸ ವಣ್ಣೋ ಖಿಯ್ಯತಿ, ಸಬ್ಬಂ ಅಬ್ಬೋಹಾರಿಕಂ. ಯಮ್ಪಿ ಸತ್ಥಕೇನ ಉಚ್ಛುಆದೀಸು ಫಾಲಿತೇಸು ಮಲಂ ಪಞ್ಞಾಯತಿ, ಏತಂ ನವಸಮುಟ್ಠಿತಂ ನಾಮ ಪಟಿಗ್ಗಹೇತ್ವಾ ಪರಿಭುಞ್ಜಿತಬ್ಬಂ. ಸತ್ಥಕಂ ಧೋವಿತ್ವಾ ಫಾಲಿತೇಸು ಮಲಂ ನ ಪಞ್ಞಾಯತಿ, ಲೋಹಗನ್ಧಮತ್ತಂ ಹೋತಿ, ತಂ ಅಬ್ಬೋಹಾರಿಕಂ. ಯಮ್ಪಿ ಸತ್ಥಕಂ ಗಹೇತ್ವಾ ಪರಿಹರನ್ತಿ, ತೇನ ಫಾಲಿತೇಪಿ ಏಸೇವ ನಯೋ. ನ ಹಿ ತಂ ಪರಿಭೋಗತ್ಥಾಯ ಪರಿಹರನ್ತೀತಿ. ಮೂಲಭೇಸಜ್ಜಾದೀನಿ ಪಿಸನ್ತಾನಂ ವಾ ಕೋಟ್ಟೇನ್ತಾನಂ ವಾ ನಿಸದನಿಸದಪೋತಕಉದುಕ್ಖಲಮುಸಲಾದೀನಿ ಖಿಯ್ಯನ್ತಿ, ಪರಿಹರಣಕವಾಸಿಂ ತಾಪೇತ್ವಾ ಭೇಸಜ್ಜತ್ಥಾಯ ತಕ್ಕೇ ವಾ ಖೀರೇ ವಾ ಪಕ್ಖಿಪನ್ತಿ, ತತ್ಥ ನೀಲಿಕಾ ಪಞ್ಞಾಯತಿ. ಸತ್ಥಕೇ ವುತ್ತಸದಿಸೋವ ವಿನಿಚ್ಛಯೋ. ಆಮಕತಕ್ಕಾದೀಸು ಪನ ಸಯಂ ನ ಪಕ್ಖಿಪಿತಬ್ಬಾ. ಪಕ್ಖಿಪತಿ ಚೇ, ಸಾಮಪಾಕತೋ ನ ಮುಚ್ಚತಿ.

ದೇವೇ ವಸ್ಸನ್ತೇ ಪಿಣ್ಡಾಯ ಚರನ್ತಸ್ಸ ಸರೀರತೋ ವಾ ಚೀವರತೋ ವಾ ಕಿಲಿಟ್ಠಉದಕಂ ಪತ್ತೇ ಪತತಿ, ತಂ ಪಟಿಗ್ಗಹೇತಬ್ಬಂ. ರುಕ್ಖಮೂಲಾದೀಸು ಭುಞ್ಜನ್ತಸ್ಸ ಪತಿತೇಪಿ ಏಸೇವ ನಯೋ. ಸಚೇ ಪನ ಸತ್ತಾಹಂ ವಸ್ಸನ್ತೇ ದೇವೇ ಸುದ್ಧಂ ಉದಕಂ ಹೋತಿ, ಅಬ್ಭೋಕಾಸತೋ ವಾ ಪತತಿ, ವಟ್ಟತಿ. ಸಾಮಣೇರಸ್ಸ ಓದನಂ ದೇನ್ತೇನ ತಸ್ಸ ಪತ್ತಗತಂ ಅಚ್ಛುಪನ್ತೇನೇವ ದಾತಬ್ಬೋ. ಪತ್ತೋ ವಾಸ್ಸ ಪಟಿಗ್ಗಹೇತಬ್ಬೋ. ಅಪ್ಪಟಿಗ್ಗಹಿತೇ ಓದನಂ ಛುಪಿತ್ವಾ ಪುನ ಅತ್ತನೋ ಪತ್ತೇ ಓದನಂ ಗಣ್ಹನ್ತಸ್ಸ ಉಗ್ಗಹಿತಕೋ ಹೋತಿ.

ಸಚೇ ಪನ ದಾತುಕಾಮೋ ಹುತ್ವಾ ‘‘ಆಹರ ಸಾಮಣೇರ ಪತ್ತಂ, ಓದನಂ ಗಣ್ಹಾ’’ತಿ ವದತಿ, ಇತರೋ ಚ ‘‘ಅಲಂ ಮಯ್ಹ’’ನ್ತಿ ಪಟಿಕ್ಖಿಪತಿ, ಪುನ ತವೇವೇತಂ ಮಯಾ ಪರಿಚ್ಚತ್ತ’’ನ್ತಿ ಚ ವುತ್ತೇಪಿ ‘‘ನ ಮಯ್ಹಂ ಏತೇನತ್ಥೋ’’ತಿ ವದತಿ. ಸತಕ್ಖತ್ತುಮ್ಪಿ ಪರಿಚ್ಚಜತು, ಯಾವ ಅತ್ತನೋ ಹತ್ಥಗತಂ ಪಟಿಗ್ಗಹಿತಮೇವ ಹೋತಿ.

ಸಚೇ ಪನ ಆಧಾರಕೇ ಠಿತಂ ನಿರಪೇಕ್ಖೋ ‘‘ಗಣ್ಹಾ’’ತಿ ವದತಿ, ಪುನ ಪಟಿಗ್ಗಹೇತಬ್ಬಂ. ಸಾಪೇಕ್ಖೋ ಆಧಾರಕೇ ಪತ್ತಂ ಠಪೇತ್ವಾ ‘‘ಏತ್ತೋ ಪೂವಂ ವಾ ಭತ್ತಂ ವಾ ಗಣ್ಹಾ’’ತಿ ಸಾಮಣೇರಂ ವದತಿ, ಸಾಮಣೇರೋ ಹತ್ಥಂ ಧೋವಿತ್ವಾ ಸಚೇಪಿ ಸತಕ್ಖತ್ತುಂ ಗಹೇತ್ವಾ ಅತ್ತನೋ ಪತ್ತಗತಂ ಅಫುಸನ್ತೋವ ಅತ್ತನೋ ಪತ್ತೇ ಪಕ್ಖಿಪತಿ, ಪುನ ಪಟಿಗ್ಗಹಣಕಿಚ್ಚಂ ನತ್ಥಿ. ಯದಿ ಪನ ಅತ್ತನೋ ಪತ್ತಗತಂ ಫುಸಿತ್ವಾ ತತೋ ಗಣ್ಹಾತಿ, ಸಾಮಣೇರಸನ್ತಕೇನ ಸಂಸಟ್ಠಂ ಹೋತಿ, ಪುನ ಪಟಿಗ್ಗಹೇತಬ್ಬಂ. ಕೇಚಿ ಪನ ‘‘ಸಚೇಪಿ ಗಯ್ಹಮಾನಂ ಛಿಜ್ಜಿತ್ವಾ ತತ್ಥ ಪತತಿ, ಪುನ ಪಟಿಗ್ಗಹೇತಬ್ಬ’’ನ್ತಿ ವದನ್ತಿ. ತಂ ‘‘ಏಕಂ ಭತ್ತಪಿಣ್ಡಂ ಗಣ್ಹ, ಏಕಂ ಪೂವಂ ಗಣ್ಹ, ಇಮಸ್ಸ ಗುಳಪಿಣ್ಡಸ್ಸ ಏತ್ತಕಂ ಪದೇಸಂ ಗಣ್ಹಾ’’ತಿ ಏವಂ ಪರಿಚ್ಛಿನ್ದಿತ್ವಾ ವುತ್ತೇ ವೇದಿತಬ್ಬಂ. ಇಧ ಪನ ಪರಿಚ್ಛೇದೋ ನತ್ಥಿ. ತಸ್ಮಾ ಯಂ ಸಾಮಣೇರಸ್ಸ ಪತ್ತೇ ಪತತಿ, ತದೇವ ಪಟಿಗ್ಗಹಣಂ ವಿಜಹತಿ. ಹತ್ಥಗತಂ ಪನ ಯಾವ ಸಾಮಣೇರೋ ವಾ ‘‘ಅಲ’’ನ್ತಿ ನ ಓರಮತಿ, ಭಿಕ್ಖು ವಾ ನ ವಾರೇತಿ, ತಾವ ಭಿಕ್ಖುಸ್ಸೇವ ಸನ್ತಕಂ, ತಸ್ಮಾ ಪಟಿಗ್ಗಹಣಂ ನ ವಿಜಹತಿ.

ಸಚೇ ಅತ್ತನೋ ವಾ ಭಿಕ್ಖೂನಂ ವಾ ಯಾಗುಪಚನಕಭಾಜನೇ ಕೇಸಞ್ಚಿ ಅತ್ಥಾಯ ಓದನಂ ಪಕ್ಖಿಪತಿ, ‘‘ಸಾಮಣೇರ, ಭಾಜನಸ್ಸ ಉಪರಿ ಹತ್ಥಂ ಕರೋಹೀ’’ತಿ ವತ್ವಾ ತಸ್ಸ ಹತ್ಥೇ ಪಕ್ಖಿಪಿತಬ್ಬಂ, ತಸ್ಸ ಹತ್ಥತೋ ಭಾಜನೇ ಪತಿತಞ್ಹಿ ದುತಿಯದಿವಸೇ ಭಾಜನಸ್ಸ ಅಕಪ್ಪಿಯಭಾವಂ ನ ಕರೋತಿ, ಪರಿಚ್ಚತ್ತತ್ತಾ. ಸಚೇ ಏವಂ ಅಕತ್ವಾ ಪಕ್ಖಿಪತಿ, ಪತ್ತಮಿವ ಭಾಜನಂ ನಿರಾಮಿಸಂ ಕತ್ವಾ ಪರಿಭುಞ್ಜಿತಬ್ಬಂ. ದಾಯಕಾ ಯಾಗುಕುಟಂ ಠಪೇತ್ವಾ ಗತಾ, ತಂ ದಹರಸಾಮಣೇರೋ ಪಟಿಗ್ಗಣ್ಹಾಪೇತುಂ ನ ಸಕ್ಕೋತಿ, ಭಿಕ್ಖು ಪತ್ತಂ ಉಪನಾಮೇತಿ, ಸಾಮಣೇರೋ ಕುಟಸ್ಸ ಗೀವಂ ಪತ್ತಸ್ಸ ಮುಖವಟ್ಟಿಯಂ ಠಪೇತ್ವಾ ಆವಜ್ಜೇತಿ, ಪತ್ತಗತಾ ಯಾಗು ಪಟಿಗ್ಗಹಿತಾವ ಹೋತಿ. ಅಥ ವಾ ಭಿಕ್ಖು ಭೂಮಿಯಂ ಹತ್ಥಂ ಠಪೇತಿ, ಸಾಮಣೇರೋ ಪವಟ್ಟೇತ್ವಾ ತತ್ಥ ಆರೋಪೇತಿ, ವಟ್ಟತಿ. ಪೂವಪಚ್ಛಿಭತ್ತಪಚ್ಛಿಉಚ್ಛುಭಾರಾದೀಸುಪಿ ಏಸೇವ ನಯೋ.

ಸಚೇ ಪಟಿಗ್ಗಹಣೂಪಗಂ ಭಾರಂ ದ್ವೇ ತಯೋ ಸಾಮಣೇರಾ ದೇನ್ತಿ, ಏಕೇನ ವಾ ಬಲವತಾ ಉಕ್ಖಿತ್ತಂ ದ್ವೇ ತಯೋ ಭಿಕ್ಖೂ ಗಣ್ಹನ್ತಿ, ವಟ್ಟತಿ. ಮಞ್ಚಸ್ಸ ವಾ ಪೀಠಸ್ಸ ವಾ ಪಾದೇ ತೇಲಘಟಂ ವಾ ಫಾಣಿತಘಟಂ ವಾ ನವನೀತಘಟಂ ವಾ ಲಗ್ಗೇನ್ತಿ, ಭಿಕ್ಖುಸ್ಸ ಮಞ್ಚೇಪಿ ಪೀಠೇಪಿ ನಿಸೀದಿತುಂ ವಟ್ಟತಿ. ಉಗ್ಗಹಿತಕಂ ನಾಮ ನ ಹೋತಿ.

ನಾಗದನ್ತಕೇ ವಾ ಅಙ್ಕುಸಕೇ ವಾ ದ್ವೇ ತೇಲಘಟಾ ಲಗ್ಗಿತಾ ಹೋನ್ತಿ, ಉಪರಿ ಪಟಿಗ್ಗಹಿತಕೋ ಹೇಟ್ಠಾ ಅಪ್ಪಟಿಗ್ಗಹಿತಕೋ, ಉಪರಿಮಂ ಗಹೇತುಂ ವಟ್ಟತಿ. ಹೇಟ್ಠಾ ಪಟಿಗ್ಗಹಿತಕೋ ಉಪರಿ ಅಪ್ಪಟಿಗ್ಗಹಿತಕೋ, ಉಪರಿಮಂ ಗಹೇತ್ವಾ ಇತರಂ ಗಣ್ಹತೋ ಉಪರಿಮೋ ಉಗ್ಗಹಿತಕೋ ಹೋತಿ. ಹೇಟ್ಠಾಮಞ್ಚೇ ಅಪ್ಪಟಿಗ್ಗಹಿತಕಂ ತೇಲಥಾಲಕಂ ಹೋತಿ, ತಂ ಚೇ ಸಮ್ಮಜ್ಜನ್ತೋ ಸಮ್ಮುಞ್ಜನಿಯಾ ಘಟ್ಟೇತಿ, ಉಗ್ಗಹಿತಕಂ ನ ಹೋತಿ. ಪಟಿಗ್ಗಹಿತಕಂ ಗಣ್ಹಿಸ್ಸಾಮೀತಿ ಅಪ್ಪಟಿಗ್ಗಹಿತಕಂ ಗಹೇತ್ವಾ ಞತ್ವಾ ಪುನ ಠಪೇತಿ, ಉಗ್ಗಹಿತಕಂ ನ ಹೋತಿ. ಬಹಿ ನೀಹರಿತ್ವಾ ಸಞ್ಜಾನಾತಿ, ಬಹಿ ಅಟ್ಠಪೇತ್ವಾ ಹರಿತ್ವಾ ತತ್ಥೇವ ಠಪೇತಬ್ಬಂ, ನತ್ಥಿ ದೋಸೋ. ಸಚೇ ಪನ ಪುಬ್ಬೇ ವಿವರಿತ್ವಾ ಠಪಿತಂ ನ ಪಿದಹಿತಬ್ಬಂ; ಯಥಾ ಪುಬ್ಬೇ ಠಿತಂ ತಥೇವ ಠಪೇತಬ್ಬಂ. ಸಚೇ ಬಹಿ ಠಪೇತಿ, ಪುನ ನ ಛುಪಿತಬ್ಬಂ.

ಹೇಟ್ಠಾಪಾಸಾದಂ ಓರೋಹನ್ತೋ ನಿಸ್ಸೇಣಿಮಜ್ಝೇ ಸಞ್ಜಾನಾತಿ, ಅನೋಕಾಸತ್ತಾ ಉದ್ಧಂ ವಾ ಅಧೋ ವಾ ಹರಿತ್ವಾ ಠಪೇತಬ್ಬಂ. ಪಟಿಗ್ಗಹಿತಕೇ ತೇಲಾದಿಮ್ಹಿ ಕಣ್ಣಕಂ ಉಟ್ಠೇತಿ, ಸಿಙ್ಗಿವೇರಾದಿಮ್ಹಿ ಘನಚುಣ್ಣಂ, ತಂಸಮುಟ್ಠಾನಮೇವ ನಾಮೇತಂ, ಪುನ ಪಟಿಗ್ಗಹಣಕಿಚ್ಚಂ ನತ್ಥಿ.

ತಾಲಂ ವಾ ನಾಳಿಕೇರಂ ವಾ ಆರುಳ್ಹೋ ಯೋತ್ತೇನ ಫಲಪಿಣ್ಡಿಂ ಓತಾರೇತ್ವಾ ಉಪರಿ ಠಿತೋವ ಗಣ್ಹಥಾತಿ ವದತಿ, ನ ಗಹೇತಬ್ಬಂ. ಸಚೇ ಅಞ್ಞೋ ಭೂಮಿಯಂ ಠಿತೋ ಯೋತ್ತಪಾಸಕೇ ಗಹೇತ್ವಾ ಉಕ್ಖಿಪಿತ್ವಾ ದೇತಿ, ವಟ್ಟತಿ. ಸಫಲಂ ಮಹಾಸಾಖಂ ಕಪ್ಪಿಯಂ ಕಾರೇತ್ವಾ ಪಟಿಗ್ಗಣ್ಹಾತಿ, ಫಲಾನಿ ಪಟಿಗ್ಗಹಿತಾನೇವ ಹೋನ್ತಿ, ಯಥಾಸುಖಂ ಪರಿಭುಞ್ಜಿತುಂ ವಟ್ಟತಿ.

ಅನ್ತೋವತಿಯಂ ಠತ್ವಾ ವತಿಂ ಛಿನ್ದಿತ್ವಾ ಉಚ್ಛುಂ ವಾ ತಿಮ್ಬರೂಸಕಂ ವಾ ದೇನ್ತಿ, ಹತ್ಥಪಾಸೇ ಸತಿ ವಟ್ಟತಿ. ವತಿದಣ್ಡಕೇಸು ಅಪ್ಪಹರಿತ್ವಾ ನಿಗ್ಗತಂ ಗಣ್ಹನ್ತಸ್ಸ ವಟ್ಟತಿ. ಪಹರಿತ್ವಾ ನಿಗ್ಗತೇ ಅಟ್ಠಕಥಾಸು ದೋಸೋ ನ ದಸ್ಸಿತೋ. ಮಯಂ ಪನ ಯಂ ಠಾನಂ ಪಹಟಂ, ತತೋ ಸಯಂಪತಿತಮೇವ ಹೋತೀತಿ ತಕ್ಕಯಾಮ. ತಸ್ಮಿಮ್ಪಿ ಅಟ್ಠತ್ವಾ ಗಚ್ಛನ್ತೇ ಯುಜ್ಜತಿ, ಸುಙ್ಕಘಾತತೋ ಪವಟ್ಟೇತ್ವಾ ಬಹಿಪತಿತಭಣ್ಡಂ ವಿಯ. ವತಿಂ ವಾ ಪಾಕಾರಂ ವಾ ಲಙ್ಘಾಪೇತ್ವಾ ದೇನ್ತಿ, ಸಚೇ ಪನ ನ ಪುಥುಲೋ ಪಾಕಾರೋ, ಅನ್ತೋಪಾಕಾರೇ ಚ ಬಹಿಪಾಕಾರೇ ಚ ಠಿತಸ್ಸ ಹತ್ಥಪಾಸೋ ಪಹೋತಿ, ಹತ್ಥಸತಮ್ಪಿ ಉದ್ಧಂ ಗನ್ತ್ವಾ ಸಮ್ಪತ್ತಂ ಗಹೇತುಂ ವಟ್ಟತಿ.

ಭಿಕ್ಖು ಗಿಲಾನಂ ಸಾಮಣೇರಂ ಖನ್ಧೇನ ವಹತಿ, ಸೋ ಫಲಾಫಲಂ ದಿಸ್ವಾ ಗಹೇತ್ವಾ ಖನ್ಧೇ ನಿಸಿನ್ನೋವ ದೇತಿ, ವಟ್ಟತಿ. ಅಪರೋ ಭಿಕ್ಖುಂ ವಹನ್ತೋ ಖನ್ಧೇ ನಿಸಿನ್ನಸ್ಸ ಭಿಕ್ಖುನೋ ದೇತಿ, ವಟ್ಟತಿಯೇವ.

ಭಿಕ್ಖು ಫಲಿನಿಂ ಸಾಖಂ ಛಾಯತ್ಥಾಯ ಗಹೇತ್ವಾ ಗಚ್ಛತಿ, ಫಲಾನಿ ಖಾದಿತುಂ ಚಿತ್ತೇ ಉಪ್ಪನ್ನೇ ಪಟಿಗ್ಗಹಾಪೇತ್ವಾ ಖಾದಿತುಂ ವಟ್ಟತಿ. ಮಚ್ಛಿಕವಾರಣತ್ಥಂ ಕಪ್ಪಿಯಂ ಕಾರೇತ್ವಾ ಪಟಿಗ್ಗಣ್ಹಾತಿ, ಖಾದಿತುಕಾಮೋ ಚೇ ಹೋತಿ, ಮೂಲಪಟಿಗ್ಗಹಣಮೇವ ವಟ್ಟತಿ, ಖಾದನ್ತಸ್ಸ ನತ್ಥಿ ದೋಸೋ.

ಭಿಕ್ಖು ಪಟಿಗ್ಗಹಣಾರಹಂ ಭಣ್ಡಂ ಮನುಸ್ಸಾನಂ ಯಾನೇ ಠಪೇತ್ವಾ ಮಗ್ಗಂ ಗಚ್ಛತಿ, ಯಾನಂ ಕದ್ದಮೇ ಲಗ್ಗತಿ, ದಹರೋ ಚಕ್ಕಂ ಗಹೇತ್ವಾ ಉಕ್ಖಿಪತಿ, ವಟ್ಟತಿ, ಉಗ್ಗಹಿತಕಂ ನಾಮ ನ ಹೋತಿ. ನಾವಾಯ ಠಪೇತ್ವಾ ನಾವಂ ಅರಿತ್ತೇನ ವಾ ಪಾಜೇತಿ, ಹತ್ಥೇನ ವಾ ಕಡ್ಢತಿ, ವಟ್ಟತಿ. ಉಳುಮ್ಪೇಪಿ ಏಸೇವ ನಯೋ. ಚಾಟಿಯಂ ಕುಣ್ಡಕೇ ವಾ ಠಪೇತ್ವಾಪಿ ತಂ ಅನುಪಸಮ್ಪನ್ನೇನ ಗಾಹಾಪೇತ್ವಾ ಅನುಪಸಮ್ಪನ್ನಂ ಬಾಹಾಯಂ ಗಹೇತ್ವಾ ತರಿತುಂ ವಟ್ಟತಿ. ತಸ್ಮಿಮ್ಪಿ ಅಸತಿ ಅನುಪಸಮ್ಪನ್ನಂ ಗಾಹಾಪೇತ್ವಾ ತಂ ಬಾಹಾಯಂ ಗಹೇತ್ವಾ ತರಿತುಂ ವಟ್ಟತಿ.

ಉಪಾಸಕಾ ಗಮಿಕಭಿಕ್ಖೂನಂ ಪಾಥೇಯ್ಯತಣ್ಡುಲೇ ದೇನ್ತಿ. ಸಾಮಣೇರಾ ಭಿಕ್ಖೂನಂ ತಣ್ಡುಲೇ ಗಹೇತ್ವಾ ಅತ್ತನೋ ತಣ್ಡುಲೇ ಗಹೇತುಂ ನ ಸಕ್ಕೋನ್ತಿ, ಭಿಕ್ಖೂ ತೇಸಂ ತಣ್ಡುಲೇ ಗಣ್ಹನ್ತಿ. ಸಾಮಣೇರಾ ಅತ್ತನಾ ಗಹಿತತಣ್ಡುಲೇಸು ಖೀಣೇಸು ಇತರೇಹಿ ತಣ್ಡುಲೇಹಿ ಯಾಗುಂ ಪಚಿತ್ವಾ ಸಬ್ಬೇಸಂ ಪತ್ತಾನಿ ಪಟಿಪಾಟಿಯಾ ಠಪೇತ್ವಾ ಯಾಗುಂ ಆಕಿರನ್ತಿ. ಪಣ್ಡಿತೋ ಸಾಮಣೇರೋ ಅತ್ತನೋ ಪತ್ತಂ ಗಹೇತ್ವಾ ಥೇರಸ್ಸ ದೇತಿ, ಥೇರಸ್ಸ ಪತ್ತಂ ಅನುಥೇರಸ್ಸಾತಿ ಏವಂ ಸಬ್ಬಾನಿ ಪರಿವತ್ತೇತಿ, ಸಬ್ಬೇಹಿ ಸಾಮಣೇರಸ್ಸ ಸನ್ತಕಂ ಭುತ್ತಂ ಹೋತಿ, ವಟ್ಟತಿ.

ಸಚೇಪಿ ಸಾಮಣೇರೋ ಅಪಣ್ಡಿತೋ ಹೋತಿ, ಅತ್ತನೋ ಪತ್ತೇ ಯಾಗುಂ ಸಯಮೇವ ಪಾತುಂ ಆರಭತಿ, ‘‘ಆವುಸೋ ತುಯ್ಹಂ ಯಾಗುಂ ಮಯ್ಹಂ ದೇಹೀ’’ತಿ ಏವಂ ಥೇರೇಹಿ ಪಟಿಪಾಟಿಯಾ ಯಾಚಿತ್ವಾಪಿ ಪಿವಿತುಂ ವಟ್ಟತಿ, ಸಬ್ಬೇಹಿ ಸಾಮಣೇರಸ್ಸ ಸನ್ತಕಮೇವ ಭುತ್ತಂ ಹೋತಿ, ನೇವ ಉಗ್ಗಹಿತಪಚ್ಚಯಾ ನ ಸನ್ನಿಧಿಪಚ್ಚಯಾ ವಜ್ಜಂ ಫುಸನ್ತಿ. ಏತ್ಥ ಪನ ಮಾತಾಪಿತೂನಂ ತೇಲಾದೀನಿ ಛಾಯಾದೀನಂ ಅತ್ಥಾಯ ಸಾಖಾದೀನಿ ಚ ಹರನ್ತಾನಂ ಇಮೇಸಞ್ಚ ವಿಸೇಸೋ ನ ದಿಸ್ಸತಿ. ತಸ್ಮಾ ಕಾರಣಂ ಉಪಪರಿಕ್ಖಿತಬ್ಬಂ.

ಸಾಮಣೇರೋ ಭತ್ತಂ ಪಚಿತುಕಾಮೋ ತಣ್ಡುಲೇ ಧೋವಿತ್ವಾ ನಿಚ್ಚಾಲೇತುಂ ನ ಸಕ್ಕೋತಿ. ಭಿಕ್ಖುನಾ ತಣ್ಡುಲೇ ಚ ಭಾಜನಞ್ಚ ಪಟಿಗ್ಗಹೇತ್ವಾ ತಣ್ಡುಲೇ ಧೋವಿತ್ವಾ ನಿಚ್ಚಾಲೇತ್ವಾ ಭಾಜನಂ ಉದ್ಧನಂ ಆರೋಪೇತಬ್ಬಂ, ಅಗ್ಗಿ ನ ಕಾತಬ್ಬೋ, ಪಕ್ಕಕಾಲೇ ವಿವರಿತ್ವಾ ಪಕ್ಕಭಾವೋ ಜಾನಿತಬ್ಬೋ. ಸಚೇ ದುಪ್ಪಕ್ಕಂ ಹೋತಿ, ಪಾಕತ್ಥಾಯ ಪಿದಹಿತುಂ ನ ವಟ್ಟತಿ. ರಜಸ್ಸ ವಾ ಛಾರಿಕಾಯ ವಾ ಅಪತನತ್ಥಾಯ ವಟ್ಟತಿ, ಪಕ್ಕಕಾಲೇ ಆರೋಪೇತುಮ್ಪಿ ಭುಞ್ಜಿತುಮ್ಪಿ ವಟ್ಟತಿ, ಪುನ ಪಟಿಗ್ಗಹಣಕಿಚ್ಚಂ ನತ್ಥಿ.

ಸಾಮಣೇರೋ ಪಟಿಬಲೋ ಪಚಿತುಂ, ಖಣೋ ಪನಸ್ಸ ನತ್ಥಿ, ಕತ್ಥಚಿ ಗನ್ತುಕಾಮೋ. ಭಿಕ್ಖುನಾ ಸತಣ್ಡುಲೋದಕಭಾಜನಂ ಪಟಿಗ್ಗಹೇತ್ವಾ ಉದ್ಧನಂ ಆರೋಪೇತ್ವಾ ಅಗ್ಗಿಂ ಜಾಲೇತ್ವಾ ಗಚ್ಛಾಹೀತಿ ವತ್ತಬ್ಬೋ. ತತೋ ಪರಂ ಪುರಿಮನಯೇನೇವ ಸಬ್ಬಂ ಕಾತುಂ ವಟ್ಟತಿ.

ಭಿಕ್ಖು ಯಾಗುಅತ್ಥಾಯ ಸುದ್ಧಂ ಭಾಜನಂ ಆರೋಪೇತ್ವಾ ಉದಕಂ ತಾಪೇತಿ, ವಟ್ಟತಿ. ತತ್ತೇ ಉದಕೇ ಸಾಮಣೇರೋ ತಣ್ಡುಲೇ ಪಕ್ಖಿಪತಿ, ತತೋ ಪಟ್ಠಾಯ ಭಿಕ್ಖುನಾ ಅಗ್ಗಿ ನ ಕಾತಬ್ಬೋ. ಪಕ್ಕಯಾಗುಂ ಪಟಿಗ್ಗಹೇತ್ವಾ ಪಾತುಂ ವಟ್ಟತಿ.

ಸಾಮಣೇರೋ ಯಾಗುಂ ಪಚತಿ, ಹತ್ಥಕುಕ್ಕುಚ್ಚಕೋ ಭಿಕ್ಖು ಕೀಳನ್ತೋ ಭಾಜನಂ ಆಮಸತಿ, ಪಿಧಾನಂ ಆಮಸತಿ, ಉಗ್ಗತಂ ಫೇಣಂ ಛಿನ್ದಿತ್ವಾ ಹರತಿ, ತಸ್ಸೇವ ಪಾತುಂ ನ ವಟ್ಟತಿ, ದುರುಪಚಿಣ್ಣಂ ನಾಮ ಹೋತಿ. ಸಚೇ ಪನ ದಬ್ಬಿಂ ವಾ ಉಳುಙ್ಕಂ ವಾ ಗಹೇತ್ವಾ ಅನುಕ್ಖಿಪನ್ತೋ ಆಲುಳೇತಿ, ಸಬ್ಬೇಸಂ ನ ವಟ್ಟತಿ, ಸಾಮಪಾಕಞ್ಚೇವ ಹೋತಿ ದುರುಪಚಿಣ್ಣಞ್ಚ. ಸಚೇ ಉಕ್ಖಿಪತಿ, ಉಗ್ಗಹಿತಕಮ್ಪಿ ಹೋತಿ.

ಭಿಕ್ಖುನಾ ಪಿಣ್ಡಾಯ ಚರಿತ್ವಾ ಆಧಾರಕೇ ಪತ್ತೋ ಠಪಿತೋ ಹೋತಿ, ತತ್ರ ಚೇ ಅಞ್ಞೋ ಲೋಲಭಿಕ್ಖು ಕೀಳನ್ತೋ ಪತ್ತಂ ಆಮಸತಿ, ಪತ್ತಪಿಧಾನಂ ಆಮಸತಿ, ತಸ್ಸೇವ ತತೋ ಲದ್ಧಂ ಭತ್ತಂ ನ ವಟ್ಟತಿ. ಸಚೇ ಪನ ಪತ್ತಂ ಉಕ್ಖಿಪಿತ್ವಾ ಠಪೇತಿ, ಸಬ್ಬೇಸಂ ನ ವಟ್ಟತಿ. ತತ್ಥಜಾತಕಫಲಾನಿ ಸಾಖಾಯ ವಾ ವಲ್ಲಿಯಾ ವಾ ಗಹೇತ್ವಾ ಚಾಲೇತಿ, ತಸ್ಸೇವ ತತೋ ಲದ್ಧಂ ಫಲಂ ನ ವಟ್ಟತಿ, ದುರುಪಚಿಣ್ಣದುಕ್ಕಟಞ್ಚ ಆಪಜ್ಜತಿ. ಫಲರುಕ್ಖಂ ಪನ ಅಪಸ್ಸಯಿತುಂ ವಾ ತತ್ಥ ಕಣ್ಡಕೇ ವಾ ಬನ್ಧಿತುಂ ವಟ್ಟತಿ, ದುರುಪಚಿಣ್ಣಂ ನ ಹೋತೀತಿ ಮಹಾಪಚ್ಚರಿಯಂ ವುತ್ತಂ.

ಅರಞ್ಞೇ ಪತಿತಂ ಪನ ಅಮ್ಬಫಲಾದಿಂ ದಿಸ್ವಾ ಸಾಮಣೇರಸ್ಸ ದಸ್ಸಾಮೀತಿ ಆಹರಿತ್ವಾ ದಾತುಂ ವಟ್ಟತಿ. ಸೀಹವಿಘಾಸಾದಿಂ ದಿಸ್ವಾಪಿ ಸಾಮಣೇರಸ್ಸ ದಸ್ಸಾಮೀತಿ ಪಟಿಗ್ಗಹೇತ್ವಾ ವಾ ಅಪ್ಪಟಿಗ್ಗಹೇತ್ವಾ ವಾ ಆಹರಿತ್ವಾ ದಾತುಂ ವಟ್ಟತಿ. ಸಚೇ ಪನ ಸಕ್ಕೋತಿ ವಿತಕ್ಕಂ ಸೋಧೇತುಂ, ತತೋ ಲದ್ಧಂ ಖಾದಿತುಮ್ಪಿ ವಟ್ಟತಿ, ನೇವ ಆಮಕಮಂಸಪಟಿಗ್ಗಹಣಪಚ್ಚಯಾ ನ ಉಗ್ಗಹಿತಕಪಚ್ಚಯಾ ವಜ್ಜಂ ಫುಸತಿ.

ಮಾತಾಪಿತೂನಂ ಅತ್ಥಾಯ ತೇಲಾದೀನಿ ಗಹೇತ್ವಾ ಗಚ್ಛತೋ ಅನ್ತರಾಮಗ್ಗೇ ಬ್ಯಾಧಿ ಉಪ್ಪಜ್ಜತಿ, ತತೋ ಯಂ ಇಚ್ಛತಿ, ತಂ ಪಟಿಗ್ಗಹೇತ್ವಾ ಪರಿಭುಞ್ಜಿತುಂ ವಟ್ಟತಿ. ಸಚೇ ಪನ ಮೂಲೇಪಿ ಪಟಿಗ್ಗಹಿತಂ ಹೋತಿ, ಪುನ ಪಟಿಗ್ಗಹಣಕಿಚ್ಚಂ ನತ್ಥಿ. ಮಾತಾಪಿತೂನಂ ತಣ್ಡುಲೇ ಆಹರಿತ್ವಾ ದೇತಿ, ತೇ ತತೋಯೇವ ಯಾಗುಆದೀನಿ ಸಮ್ಪಾದೇತ್ವಾ ತಸ್ಸ ದೇನ್ತಿ, ವಟ್ಟತಿ ಸನ್ನಿಧಿಪಚ್ಚಯಾ ವಾ ಉಗ್ಗಹಿತಕಪಚ್ಚಯಾ ವಾ ದೋಸೋ ನತ್ಥಿ.

ಭಿಕ್ಖು ಪಿದಹಿತ್ವಾ ಉದಕಂ ತಾಪೇತಿ, ಯಾವ ಪರಿಕ್ಖಯಾ ಪರಿಭುಞ್ಜಿತುಂ ವಟ್ಟತಿ. ಸಚೇ ಪನೇತ್ಥ ಛಾರಿಕಾ ಪತತಿ, ಪಟಿಗ್ಗಹೇತಬ್ಬಂ. ದೀಘಸಣ್ಡಾಸೇನ ಥಾಲಕಂ ಗಹೇತ್ವಾ ತೇಲಂ ಪಚನ್ತಸ್ಸ ಛಾರಿಕಾ ಪತತಿ, ಹತ್ಥೇನ ಅಮುಞ್ಚನ್ತೇನೇವ ಪಚಿತ್ವಾ ಓತಾರೇತ್ವಾ ಪಟಿಗ್ಗಹೇತಬ್ಬಂ. ಸಚೇ ಅಙ್ಗಾರಾಪಿ ದಾರೂನಿ ವಾ ಪಟಿಗ್ಗಹೇತ್ವಾ ಠಪಿತಾನಿ, ಮೂಲಪಟಿಗ್ಗಹಣಮೇವ ವಟ್ಟತಿ.

ಭಿಕ್ಖು ಉಚ್ಛುಂ ಖಾದತಿ, ಸಾಮಣೇರೋ ‘‘ಮಯ್ಹಮ್ಪಿ ದೇಥಾ’’ತಿ ವದತಿ. ‘‘ಇತೋ ಛಿನ್ದಿತ್ವಾ ಗಣ್ಹಾ’’ತಿ ವುತ್ತೋ ಗಣ್ಹಾತಿ, ಅವಸೇಸೇ ಪುನ ಪಟಿಗ್ಗಹಣಕಿಚ್ಚಂ ನತ್ಥಿ. ಗುಳಪಿಣ್ಡಕಂ ಖಾದನ್ತಸ್ಸಾಪಿ ಏಸೇವ ನಯೋ. ವುತ್ತೋಕಾಸತೋ ಛಿನ್ದಿತ್ವಾ ಗಹಿತಾವಸೇಸಞ್ಹಿ ಅಜಹಿತಪಟಿಗ್ಗಹಣಮೇವ ಹೋತಿ.

ಭಿಕ್ಖು ಗುಳಂ ಭಾಜೇನ್ತೋ ಪಟಿಗ್ಗಹೇತ್ವಾ ಕೋಟ್ಠಾಸೇ ಕರೋತಿ, ಭಿಕ್ಖೂಪಿ ಸಾಮಣೇರಾಪಿ ಆಗನ್ತ್ವಾ ಏಕಗಹಣೇನೇವ ಏಕಮೇಕಂ ಕೋಟ್ಠಾಸಂ ಗಣ್ಹನ್ತಿ, ಗಹಿತಾವಸೇಸಂ ಪಟಿಗ್ಗಹಿತಮೇವ ಹೋತಿ. ಸಚೇ ಲೋಲಸಾಮಣೇರೋ ಗಣ್ಹಿತ್ವಾ ಗಣ್ಹಿತ್ವಾ ಪುನ ಠಪೇತಿ, ತಸ್ಸ ಗಹಿತಾವಸೇಸಂ ಅಪ್ಪಟಿಗ್ಗಹಿತಕಂ ಹೋತಿ.

ಭಿಕ್ಖು ಧೂಮವಟ್ಟಿಂ ಪಟಿಗ್ಗಹೇತ್ವಾ ಧೂಮಂ ಪಿವತಿ, ಮುಖಞ್ಚ ಕಣ್ಠೋ ಚ ಮನೋಸಿಲಾಯ ಲಿತ್ತೋ ವಿಯ ಹೋತಿ, ಯಾವಕಾಲಿಕಂ ಭುಞ್ಜಿತುಂ ವಟ್ಟತಿ, ಯಾವಕಾಲಿಕೇನ ಯಾವಜೀವಿಕಸಂಸಗ್ಗೇ ದೋಸೋ ನತ್ಥಿ.

ಪತ್ತಂ ವಾ ರಜನಂ ವಾ ಪಚನ್ತಸ್ಸ ಕಣ್ಣನಾಸಮುಖಚ್ಛಿದ್ದೇಹಿ ಧೂಮೋ ಪವಿಸತಿ, ಬ್ಯಾಧಿಪಚ್ಚಯಾ ಪುಪ್ಫಂ ವಾ ಫಲಂ ವಾ ಉಪಸಿಙ್ಘತಿ, ಅಬ್ಬೋಹಾರಿಕತ್ತಾ ವಟ್ಟತಿ. ಭತ್ತುಗ್ಗಾರೋ ತಾಲುಂ ಆಹಚ್ಚ ಅನ್ತೋಯೇವ ಪವಿಸತಿ, ಅವಿಸಯತ್ತಾ ವಟ್ಟತಿ. ಮುಖಂ ಪವಿಟ್ಠಂ ಪನ ಅಜ್ಝೋಹರತೋ ವಿಕಾಲೇ ಆಪತ್ತಿ. ದನ್ತನ್ತರೇ ಲಗ್ಗಸ್ಸ ಆಮಿಸಸ್ಸ ರಸೋ ಪವಿಸತಿ, ಆಪತ್ತಿಯೇವ. ಸಚೇ ಸುಖುಮಂ ಆಮಿಸಂ ಹೋತಿ, ರಸೋ ನ ಪಞ್ಞಾಯತಿ, ಅಬ್ಬೋಹಾರಿಕಪಕ್ಖಂ ಭಜತಿ.

ಉಪಕಟ್ಠೇ ಕಾಲೇ ನಿರುದಕಟ್ಠಾನೇ ಭತ್ತಂ ಭುಞ್ಜಿತ್ವಾ ಕಕ್ಖಾರೇತ್ವಾ ದ್ವೇ ತಯೋ ಖೇಳಪಿಣ್ಡೇ ಪಾತೇತ್ವಾ ಉದಕಟ್ಠಾನಂ ಗನ್ತ್ವಾ ಮುಖಂ ವಿಕ್ಖಾಲೇತಬ್ಬಂ. ಪಟಿಗ್ಗಹೇತ್ವಾ ಠಪಿತಸಿಙ್ಗಿವೇರಾದೀನಂ ಅಙ್ಕುರಾ ನಿಕ್ಖಮನ್ತಿ, ಪುನ ಪಟಿಗ್ಗಹಣಕಿಚ್ಚಂ ನತ್ಥಿ. ಲೋಣೇ ಅಸತಿ ಸಮುದ್ದೋದಕೇನ ಲೋಣಕಿಚ್ಚಂ ಕಾತುಂ ವಟ್ಟತಿ. ಪಟಿಗ್ಗಹೇತ್ವಾ ಠಪಿತಂ ಲೋಣೋದಕಂ ಲೋಣಂ ಹೋತಿ, ಲೋಣಂ ವಾ ಉದಕಂ ಹೋತಿ, ರಸೋ ವಾ ಫಾಣಿತಂ ಹೋತಿ, ಫಾಣಿತಂ ವಾ ರಸೋ ಹೋತಿ, ಮೂಲಪಟಿಗ್ಗಹಣಮೇವ ವಟ್ಟತಿ. ಹಿಮಕರಕಾ ಉದಕಗತಿಕಾ ಏವ. ಪರಿಹಾರಿಕೇನ ಕತಕಟ್ಠಿನಾ ಉದಕಂ ಪಸಾದೇನ್ತಿ, ತಂ ಅಬ್ಬೋಹಾರಿಕಂ, ಆಮಿಸೇನ ಸದ್ಧಿಂ ವಟ್ಟತಿ. ಆಮಿಸಗತಿಕೇಹಿ ಕಪಿತ್ಥಫಲಾದೀಹಿ ಪಸಾದಿತಂ ಪುರೇಭತ್ತಮೇವ ವಟ್ಟತಿ.

ಪೋಕ್ಖರಣೀಆದೀಸು ಉದಕಂ ಬಹಲಂ ಹೋತಿ, ವಟ್ಟತಿ. ಸಚೇ ಪನ ಮುಖೇ ಚ ಹತ್ಥೇ ಚ ಲಗ್ಗತಿ, ನ ವಟ್ಟತಿ, ಪಟಿಗ್ಗಹೇತ್ವಾ ಪರಿಭುಞ್ಜಿತಬ್ಬಂ. ಖೇತ್ತೇಸು ಕಸಿತಟ್ಠಾನೇ ಬಹಲಂ ಉದಕಂ ಹೋತಿ, ಪಟಿಗ್ಗಹೇತಬ್ಬಂ. ಸಚೇ ಸನ್ದಿತ್ವಾ ಕನ್ದರಾದೀನಿ ಪವಿಸಿತ್ವಾ ನದಿಂ ಪೂರೇತಿ, ವಟ್ಟತಿ. ಕಕುಧಸೋಬ್ಭಾದಯೋ ಹೋನ್ತಿ, ರುಕ್ಖತೋ ಪತಿತೇಹಿ ಪುಪ್ಫೇಹಿ ಸಞ್ಛನ್ನೋದಕಾ, ಸಚೇ ಪುಪ್ಫರಸೋ ನ ಪಞ್ಞಾಯತಿ, ಪಟಿಗ್ಗಹಣಕಿಚ್ಚಂ ನತ್ಥಿ. ಪರಿತ್ತಂ ಉದಕಂ ಹೋತಿ, ರಸೋ ಪಞ್ಞಾಯತಿ, ಪಟಿಗ್ಗಹೇತಬ್ಬಂ. ಪಬ್ಬತಕನ್ದರಾದೀಸು ಕಾಳವಣ್ಣಪಣ್ಣಸಞ್ಛನ್ನಉದಕೇಪಿ ಏಸೇವ ನಯೋ.

ಪಾನೀಯಘಟೇ ಸರೇಣುಕಾನಿ ವಾ ಸವಣ್ಟಖೀರಾನಿ ವಾ ಪುಪ್ಫಾನಿ ಪಕ್ಖಿತ್ತಾನಿ ಹೋನ್ತಿ, ಪಟಿಗ್ಗಹೇತಬ್ಬಂ. ಪುಪ್ಫಾನಿ ವಾ ಪಟಿಗ್ಗಹೇತ್ವಾ ಪಕ್ಖಿಪಿತಬ್ಬಾನಿ. ಪಾಟಲಿಚಮ್ಪಕಮಲ್ಲಿಕಾ ಪಕ್ಖಿತ್ತಾ ಹೋನ್ತಿ, ವಾಸಮತ್ತಂ ತಿಟ್ಠತಿ ತಂ ಅಬ್ಬೋಹಾರಿಕಂ, ದುತಿಯದಿವಸೇಪಿ ಆಮಿಸೇನ ಸದ್ಧಿಂ ವಟ್ಟತಿ. ಭಿಕ್ಖುನಾ ಠಪಿತಪುಪ್ಫವಾಸಿತಕಪಾನೀಯತೋ ಸಾಮಣೇರೋ ಪಾನೀಯಂ ಗಹೇತ್ವಾ ಪೀತಾವಸೇಸಂ ತತ್ಥೇವ ಆಕಿರತಿ, ಪಟಿಗ್ಗಹೇತಬ್ಬಂ. ಪದುಮಸರಾದೀಸು ಉದಕಂ ಸನ್ಥರಿತ್ವಾ ಠಿತಂ ಪುಪ್ಫರೇಣುಂ ಘಟೇನ ವಿಕ್ಖಮ್ಭೇತ್ವಾ ಉದಕಂ ಗಹೇತುಂ ವಟ್ಟತಿ. ಕಪ್ಪಿಯಂ ಕಾರಾಪೇತ್ವಾ ಪಟಿಗ್ಗಹೇತ್ವಾ ಠಪಿತಂ ದನ್ತಕಟ್ಠಂ ಹೋತಿ, ಸಚೇ ತಸ್ಸ ರಸಂ ಪಿವಿತುಕಾಮೋ, ಮೂಲಪಟಿಗ್ಗಹಣಮೇವ ವಟ್ಟತಿ. ಅಪ್ಪಟಿಗ್ಗಹೇತ್ವಾ ಠಪಿತಂ ಪಟಿಗ್ಗಹೇತಬ್ಬಂ. ಅಜಾನನ್ತಸ್ಸ ರಸೇ ಪವಿಟ್ಠೇಪಿ ಆಪತ್ತಿಯೇವ. ಅಚಿತ್ತಕಞ್ಹಿ ಇದಂ ಸಿಕ್ಖಾಪದಂ.

ಮಹಾಭೂತೇಸು ಕಿಂ ವಟ್ಟತಿ, ಕಿಂ ನ ವಟ್ಟತೀತಿ? ಖೀರಂ ತಾವ ವಟ್ಟತಿ, ಕಪ್ಪಿಯಮಂಸಖೀರಂ ವಾ ಅಕಪ್ಪಿಯಮಂಸಖೀರಂ ವಾ ಹೋತು, ಪಿವನ್ತಸ್ಸ ಅನಾಪತ್ತಿ. ಅಸ್ಸು ಖೇಳೋ ಸಿಙ್ಘಾಣಿಕಾ ಮುತ್ತಂ ಕರೀಸಂ ಸೇಮ್ಹಂ ದನ್ತಮಲಂ ಅಕ್ಖಿಗೂಥಕೋ ಕಣ್ಣಗೂಥಕೋ ಸರೀರೇ ಉಟ್ಠಿತಲೋಣನ್ತಿ ಇದಂ ಸಬ್ಬಂ ವಟ್ಟತಿ. ಯಂ ಪನೇತ್ಥ ಠಾನತೋ ಚವಿತ್ವಾ ಪತ್ತೇ ವಾ ಹತ್ಥೇ ವಾ ಪತತಿ, ತಂ ಪಟಿಗ್ಗಹೇತಬ್ಬಂ. ಅಙ್ಗಲಗ್ಗಂ ಪಟಿಗ್ಗಹಿತಕಮೇವ. ಉಣ್ಹಂಪಾಯಾಸಂ ಭುಞ್ಜನ್ತಸ್ಸ ಸೇದೋ ಅಙ್ಗುಲಿಅನುಸಾರೇನ ಏಕಾಬದ್ಧೋವ ಹುತ್ವಾ ಪಾಯಾಸೇ ಸನ್ತಿಟ್ಠತಿ, ಪಿಣ್ಡಾಯ ವಾ ಚರನ್ತಸ್ಸ ಹತ್ಥತೋ ಪತ್ತಸ್ಸ ಮುಖವಟ್ಟಿಂತೋ ವಾ ಪತ್ತತಲಂ ಓರೋಹತಿ, ಏತ್ಥ ಪಟಿಗ್ಗಹಣಕಿಚ್ಚಂ ನತ್ಥಿ. ಝಾಮಮಹಾಭೂತೇಸು ಇದಂ ನಾಮ ನ ವಟ್ಟತೀತಿ ನತ್ಥಿ, ದುಜ್ಝಾಪಿತಂ ಪನ ನ ವಟ್ಟತಿ. ಸುಜ್ಝಾಪಿತಂ ಮನುಸ್ಸಟ್ಠಿಮ್ಪಿ ಚುಣ್ಣಂ ಕತ್ವಾ ಲೇಹೇ ಉಪನೇತುಂ ವಟ್ಟತಿ.

ಚತ್ತಾರಿ ಮಹಾವಿಕಟಾನಿ ಅಸತಿ ಕಪ್ಪಿಯಕಾರಕೇ ಸಾಮಮ್ಪಿ ಗಹೇತ್ವಾ ಪರಿಭುಞ್ಜಿತುಂ ವಟ್ಟತಿ. ಏತ್ಥ ಚ ದುಬ್ಬಚೋಪಿ ಅಸಮತ್ಥೋಪಿ ಕಪ್ಪಿಯಕಾರಕೋ ಅಸನ್ತಪಕ್ಖೇಯೇವ ತಿಟ್ಠತಿ. ಛಾರಿಕಾಯ ಅಸತಿ ಸುಕ್ಖದಾರುಂ ಝಾಪೇತ್ವಾ ಛಾರಿಕಾ ಗಹೇತಬ್ಬಾ. ಸುಕ್ಖದಾರುಮ್ಹಿ ಅಸತಿ ಅಲ್ಲದಾರುಂ ರುಕ್ಖತೋ ಛಿನ್ದಿತ್ವಾಪಿ ಕಾತುಂ ವಟ್ಟತಿ. ಇದಂ ಪನ ಚತುಬ್ಬಿಧಮ್ಪಿ ಮಹಾವಿಕಟಂ ಕಾಲೋದಿಸ್ಸಂ ನಾಮ ಸಪ್ಪದಟ್ಠಕ್ಖಣೇಯೇವ ವಟ್ಟತಿ. ಸೇಸಮೇತ್ಥ ಉತ್ತಾನಮೇವ.

ಏಳಕಲೋಮಸಮುಟ್ಠಾನಂ – ಕಾಯತೋ ಚ ಕಾಯಚಿತ್ತತೋ ಚ ಸಮುಟ್ಠಾತಿ, ಕಿರಿಯಂ, ನೋಸಞ್ಞಾವಿಮೋಕ್ಖಂ, ಅಚಿತ್ತಕಂ, ಪಣ್ಣತ್ತಿವಜ್ಜಂ, ಕಾಯಕಮ್ಮಂ, ತಿಚಿತ್ತಂ, ತಿವೇದನನ್ತಿ.

ದನ್ತಪೋನಸಿಕ್ಖಾಪದಂ ದಸಮಂ.

ಸಮತ್ತೋ ವಣ್ಣನಾಕ್ಕಮೇನ ಭೋಜನವಗ್ಗೋ ಚತುತ್ಥೋ.