೩. ಉಜ್ಝಾಪನಕಸಿಕ್ಖಾಪದವಣ್ಣನಾ

೧೦೩. ತತಿಯಸಿಕ್ಖಾಪದೇ – ದಬ್ಬಂ ಮಲ್ಲಪುತ್ತಂ ಭಿಕ್ಖೂ ಉಜ್ಝಾಪೇನ್ತೀತಿ ‘‘ಛನ್ದಾಯ ದಬ್ಬೋ ಮಲ್ಲಪುತ್ತೋ’’ತಿಆದೀನಿ ವದನ್ತಾ ತಂ ಆಯಸ್ಮನ್ತಂ ತೇಹಿ ಭಿಕ್ಖೂಹಿ ಅವಜಾನಾಪೇನ್ತಿ, ಅವಞ್ಞಾಯ ಓಲೋಕಾಪೇನ್ತಿ, ಲಾಮಕತೋ ವಾ ಚಿನ್ತಾಪೇನ್ತೀ’’ತಿ ಅತ್ಥೋ. ಲಕ್ಖಣಂ ಪನೇತ್ಥ ಸದ್ದಸತ್ಥಾನುಸಾರೇನ ವೇದಿತಬ್ಬಂ. ಓಜ್ಝಾಪೇನ್ತೀತಿಪಿ ಪಾಠೋ. ಅಯಮೇವತ್ಥೋ. ಛನ್ದಾಯಾತಿ ಛನ್ದೇನ ಪಕ್ಖಪಾತೇನ; ಅತ್ತನೋ ಅತ್ತನೋ ಸನ್ದಿಟ್ಠಸಮ್ಭತ್ತಾನಂ ಪಣೀತಾನಿ ಪಞ್ಞಪೇತೀತಿ ಅಧಿಪ್ಪಾಯೋ. ಖಿಯ್ಯನ್ತೀತಿ ‘‘ಛನ್ದಾಯ ದಬ್ಬೋ ಮಲ್ಲಪುತ್ತೋ’’ತಿಆದೀನಿ ವದನ್ತಾ ಪಕಾಸೇನ್ತಿ.

೧೦೫. ಉಜ್ಝಾಪನಕೇ ಖಿಯ್ಯನಕೇ ಪಾಚಿತ್ತಿಯನ್ತಿ ಏತ್ಥ ಯೇನ ವಚನೇನ ಉಜ್ಝಾಪೇನ್ತಿ, ತಂ ಉಜ್ಝಾಪನಕಂ. ಯೇನ ಚ ಖಿಯ್ಯನ್ತಿ ತಂ ಖಿಯ್ಯನಕಂ. ತಸ್ಮಿಂ ಉಜ್ಝಾಪನಕೇ ಖಿಯ್ಯನಕೇ. ಪಾಚಿತ್ತಿಯನ್ತಿ ವತ್ಥುದ್ವಯೇ ಪಾಚಿತ್ತಿಯದ್ವಯಂ ವುತ್ತಂ.

೧೦೬. ಉಜ್ಝಾಪನಕಂ ನಾಮ ಉಪಸಮ್ಪನ್ನಂ ಸಙ್ಘೇನ ಸಮ್ಮತಂ ಸೇನಾಸನಪಞ್ಞಾಪಕಂ ವಾ…ಪೇ… ಅಪ್ಪಮತ್ತಕವಿಸ್ಸಜ್ಜನಕಂ ವಾತಿ ಏತೇಸಂ ಪದಾನಂ ‘‘ಮಙ್ಕುಕತ್ತುಕಾಮೋ’’ತಿ ಇಮಿನಾ ಸಮ್ಬನ್ಧೋ. ಅವಣ್ಣಂ ಕತ್ತುಕಾಮೋ ಅಯಸಂ ಕತ್ತುಕಾಮೋತಿ ಇಮೇಸಂ ಪನ ವಸೇನ ಉಪಸಮ್ಪನ್ನನ್ತಿಆದೀಸು ‘‘ಉಪಸಮ್ಪನ್ನಸ್ಸಾ’’ತಿ ಏವಂ ವಿಭತ್ತಿವಿಪರಿಣಾಮೋ ಕಾತಬ್ಬೋ. ಉಜ್ಝಾಪೇತಿ ವಾ ಖಿಯ್ಯತಿ ವಾ ಆಪತ್ತಿ ಪಾಚಿತ್ತಿಯಸ್ಸಾತಿ ಏತ್ಥ ಪನ ಯಸ್ಮಾ ‘‘ಖಿಯ್ಯನಕಂ ನಾಮಾ’’ತಿ ಏವಂ ಮಾತಿಕಾಪದಂ ಉದ್ಧರಿತ್ವಾಪಿ ‘‘ಉಜ್ಝಾಪನಕಂ ನಾಮಾ’’ತಿ ಇಮಸ್ಸ ಪದಸ್ಸ ವುತ್ತವಿಭಙ್ಗೋಯೇವ ವತ್ತಬ್ಬೋ ಹೋತಿ, ಅಞ್ಞವಾದಕಸಿಕ್ಖಾಪದೇ ವಿಯ ಅಞ್ಞೋ ವಿಸೇಸೋ ನತ್ಥಿ, ತಸ್ಮಾ ತಂ ವಿಸುಂ ಅನುದ್ಧರಿತ್ವಾ ಅವಿಭಜಿತ್ವಾ ನಿಗಮನಮೇವ ಏಕತೋ ಕತನ್ತಿ ವೇದಿತಬ್ಬಂ. ಧಮ್ಮಕಮ್ಮೇ ಧಮ್ಮಕಮ್ಮಸಞ್ಞೀತಿಆದೀಸು ಯಂ ತಸ್ಸ ಉಪಸಮ್ಪನ್ನಸ್ಸ ಸಮ್ಮುತಿಕಮ್ಮಂ ಕತಂ ತಞ್ಚೇ ಧಮ್ಮಕಮ್ಮಂ ಹೋತಿ, ಸೋ ಚ ಭಿಕ್ಖು ತಸ್ಮಿಂ ಧಮ್ಮಕಮ್ಮಸಞ್ಞೀ ಉಜ್ಝಾಪನಕಞ್ಚ ಖಿಯ್ಯನಕಞ್ಚ ಕರೋತಿ, ಅಥಸ್ಸ ತಸ್ಮಿಂ ಉಜ್ಝಾಪನಕೇ ಚ ಖಿಯ್ಯನಕೇ ಚ ಆಪತ್ತಿ ಪಾಚಿತ್ತಿಯಸ್ಸಾತಿ ಇಮಿನಾ ನಯೇನ ಅತ್ಥೋ ವೇದಿತಬ್ಬೋ.

ಅನುಪಸಮ್ಪನ್ನಂ ಉಜ್ಝಾಪೇತಿ ವಾ ಖಿಯ್ಯತಿ ವಾತಿ ಏತ್ಥ ಉಪಸಮ್ಪನ್ನಂ ಸಙ್ಘೇನ ಸಮ್ಮತಂ ಅಞ್ಞಂ ಅನುಪಸಮ್ಪನ್ನಂ ಉಜ್ಝಾಪೇತಿ ಅವಜಾನಾಪೇತಿ, ತಸ್ಸ ವಾ ತಂ ಸನ್ತಿಕೇ ಖಿಯ್ಯತೀತಿ ಅತ್ಥೋ. ಉಪಸಮ್ಪನ್ನಂ ಸಙ್ಘೇನ ಅಸಮ್ಮತನ್ತಿ ಕಮ್ಮವಾಚಾಯ ಅಸಮ್ಮತಂ ಕೇವಲಂ ‘‘ತವೇಸೋ ಭಾರೋ’’ತಿ ಸಙ್ಘೇನ ಆರೋಪಿತಭಾರಂ ಭಿಕ್ಖೂನಂ ವಾ ಫಾಸುವಿಹಾರತ್ಥಾಯ ಸಯಮೇವ ತಂ ಭಾರಂ ವಹನ್ತಂ, ಯತ್ರ ವಾ ದ್ವೇ ತಯೋ ಭಿಕ್ಖೂ ವಿಹರನ್ತಿ, ತತ್ರ ವಾ ತಾದಿಸಂ ಕಮ್ಮಂ ಕರೋನ್ತನ್ತಿ ಅಧಿಪ್ಪಾಯೋ. ಅನುಪಸಮ್ಪನ್ನಂ ಸಙ್ಘೇನ ಸಮ್ಮತಂ ವಾ ಅಸಮ್ಮತಂ ವಾತಿ ಏತ್ಥ ಪನ ಕಿಞ್ಚಾಪಿ ಅನುಪಸಮ್ಪನ್ನಸ್ಸ ತೇರಸ ಸಮ್ಮುತಿಯೋ ದಾತುಂ ನ ವಟ್ಟನ್ತಿ. ಅಥ ಖೋ ಉಪಸಮ್ಪನ್ನಕಾಲೇ ಲದ್ಧಸಮ್ಮುತಿಕೋ ಪಚ್ಛಾ ಅನುಪಸಮ್ಪನ್ನಭಾವೇ ಠಿತೋ, ತಂ ಸನ್ಧಾಯ ‘‘ಸಙ್ಘೇನ ಸಮ್ಮತಂ ವಾ’’ತಿ ವುತ್ತಂ. ಯಸ್ಸ ಪನ ಬ್ಯತ್ತಸ್ಸ ಸಾಮಣೇರಸ್ಸ ಕೇವಲಂ ಸಙ್ಘೇನ ವಾ ಸಮ್ಮತೇನ ವಾ ಭಿಕ್ಖುನಾ ‘‘ತ್ವಂ ಇದಂ ಕಮ್ಮಂ ಕರೋಹೀ’’ತಿ ಭಾರೋ ಕತೋ, ತಾದಿಸಂ ಸನ್ಧಾಯ ‘‘ಅಸಮ್ಮತಂ ವಾ’’ತಿ ವುತ್ತಂ. ಸೇಸಮೇತ್ಥ ಉತ್ತಾನಮೇವಾತಿ.

ತಿಸಮುಟ್ಠಾನಂ – ಕಾಯಚಿತ್ತತೋ ವಾಚಾಚಿತ್ತತೋ ಕಾಯವಾಚಾಚಿತ್ತತೋ ಚ ಸಮುಟ್ಠಾತಿ, ಕಿರಿಯಂ, ಸಞ್ಞಾವಿಮೋಕ್ಖಂ, ಸಚಿತ್ತಕಂ, ಲೋಕವಜ್ಜಂ, ಕಾಯಕಮ್ಮಂ, ವಚೀಕಮ್ಮಂ, ಅಕುಸಲಚಿತ್ತಂ, ದುಕ್ಖವೇದನನ್ತಿ.

ಉಜ್ಝಾಪನಕಸಿಕ್ಖಾಪದಂ ತತಿಯಂ.