೨. ಅಞ್ಞವಾದಕಸಿಕ್ಖಾಪದವಣ್ಣನಾ

೯೪. ದುತಿಯಸಿಕ್ಖಾಪದೇ – ಅನಾಚಾರಂ ಆಚರಿತ್ವಾತಿ ಅಕಾತಬ್ಬಂ ಕತ್ವಾ; ಕಾಯವಚೀದ್ವಾರೇಸು ಆಪತ್ತಿಂ ಆಪಜ್ಜಿತ್ವಾತಿ ವುತ್ತಂ ಹೋತಿ. ಅಞ್ಞೇನಞ್ಞಂ ಪಟಿಚರತೀತಿ ಅಞ್ಞೇನ ವಚನೇನ ಅಞ್ಞಂ ವಚನಂ ಪಟಿಚರತಿ ಪಟಿಚ್ಛಾದೇತಿ ಅಜ್ಝೋತ್ಥರತಿ; ಇದಾನಿ ತಂ ಪಟಿಚರಣವಿಧಿಂ ದಸ್ಸೇನ್ತೋ ‘‘ಕೋ ಆಪನ್ನೋ’’ತಿಆದಿಮಾಹ. ತತ್ರಾಯಂ ವಚನಸಮ್ಬನ್ಧೋ – ಸೋ ಕಿರ ಕಿಞ್ಚಿ ವೀತಿಕ್ಕಮಂ ದಿಸ್ವಾ ‘‘ಆವುಸೋ, ಆಪತ್ತಿಂ ಆಪನ್ನೋಸೀ’’ತಿ ಸಙ್ಘಮಜ್ಝೇ ಆಪತ್ತಿಯಾ ಅನುಯುಞ್ಜಿಯಮಾನೋ ‘‘ಕೋ ಆಪನ್ನೋ’’ತಿ ವದತಿ. ‘‘ತತೋ ತ್ವ’’ನ್ತಿ ವುತ್ತೇ ‘‘ಅಹಂ ಕಿಂ ಆಪನ್ನೋ’’ತಿ ವದತಿ. ಅಥ ‘‘ಪಾಚಿತ್ತಿಯಂ ವಾ ದುಕ್ಕಟಂ ವಾ’’ತಿ ವುತ್ತೇ ವತ್ಥುಂ ಪುಚ್ಛನ್ತೋ ‘‘ಅಹಂ ಕಿಸ್ಮಿಂ ಆಪನ್ನೋ’’ತಿ ವದತಿ. ತತೋ ‘‘ಅಸುಕಸ್ಮಿಂ ನಾಮ ವತ್ಥುಸ್ಮಿ’’ನ್ತಿ ವುತ್ತೇ ‘‘ಅಹಂ ಕಥಂ ಆಪನ್ನೋ, ಕಿಂ ಕರೋನ್ತೋ ಆಪನ್ನೋಮ್ಹೀ’’ತಿ ಪುಚ್ಛತಿ. ಅಥ ‘‘ಇದಂ ನಾಮ ಕರೋನ್ತೋ ಆಪನ್ನೋ’’ತಿ ವುತ್ತೇ ‘‘ಕಂ ಭಣಥಾ’’ತಿ ವದತಿ. ತತೋ ‘‘ತಂ ಭಣಾಮಾ’’ತಿ ವುತ್ತೇ ‘‘ಕಿಂ ಭಣಥಾ’’ತಿ ವದತಿ.

ಅಪಿಚೇತ್ಥ ಅಯಂ ಪಾಳಿಮುತ್ತಕೋಪಿ ಅಞ್ಞೇನಞ್ಞಂ ಪಟಿಚರಣವಿಧಿ – ಭಿಕ್ಖೂಹಿ ‘‘ತವ ಸಿಪಾಟಿಕಾಯ ಕಹಾಪಣೋ ದಿಟ್ಠೋ, ಕಿಸ್ಸೇವಮಸಾರುಪ್ಪಂ ಕರೋಸೀ’’ತಿ ವುತ್ತೋ ‘‘ಸುದಿಟ್ಠಂ, ಭನ್ತೇ, ನ ಪನೇಸೋ ಕಹಾಪಣೋ; ತಿಪುಮಣ್ಡಲಂ ಏತ’’ನ್ತಿ ಭಣನ್ತೋ ವಾ ‘‘ತ್ವಂ ಸುರಂ ಪಿವನ್ತೋ ದಿಟ್ಠೋ, ಕಿಸ್ಸೇವಂ ಕರೋಸೀ’’ತಿ ವುತ್ತೋ ‘‘ಸುದಿಟ್ಠೋ, ಭನ್ತೇ, ನ ಪನೇಸಾ ಸುರಾ, ಭೇಸಜ್ಜತ್ಥಾಯ ಸಮ್ಪಾದಿತಂ ಅರಿಟ್ಠ’’ನ್ತಿ ಭಣನ್ತೋ ವಾ ‘‘ತ್ವಂ ಪಟಿಚ್ಛನ್ನೇ ಆಸನೇ ಮಾತುಗಾಮೇನ ಸದ್ಧಿಂ ನಿಸಿನ್ನೋ ದಿಟ್ಠೋ, ಕಿಸ್ಸೇವಮಸಾರುಪ್ಪಂ ಕರೋಸೀ’’ತಿ ವುತ್ತೋ ‘‘ಯೇನ ದಿಟ್ಠಂ ಸುದಿಟ್ಠಂ, ವಿಞ್ಞೂ ಪನೇತ್ಥ ದುತಿಯೋ ಅತ್ಥಿ, ಸೋ ಕಿಸ್ಸ ನ ದಿಟ್ಠೋ’’ತಿ ಭಣನ್ತೋ ವಾ, ‘‘ಈದಿಸಂ ತಯಾ ಕಿಞ್ಚಿ ದಿಟ್ಠ’’ನ್ತಿ ಪುಟ್ಠೋ ‘‘ನ ಸುಣಾಮೀ’’ತಿ ಸೋತಮುಪನೇನ್ತೋ ವಾ, ಸೋತದ್ವಾರೇ ಪುಚ್ಛನ್ತಾನಂ ಚಕ್ಖುಂ ಉಪನೇನ್ತೋ ವಾ, ಅಞ್ಞೇನಞ್ಞಂ ಪಟಿಚರತೀತಿ ವೇದಿತಬ್ಬೋ. ಅಞ್ಞವಾದಕಂ ರೋಪೇತೂತಿ ಅಞ್ಞವಾದಕಂ ಆರೋಪೇತು; ಪತಿಟ್ಠಾಪೇತೂತಿ ಅತ್ಥೋ. ವಿಹೇಸಕಂ ರೋಪೇತೂತಿ ಏತಸ್ಮಿಮ್ಪಿ ಏಸೇವ ನಯೋ.

೯೮. ಅಞ್ಞವಾದಕೇ ವಿಹೇಸಕೇ ಪಾಚಿತ್ತಿಯನ್ತಿ ಏತ್ಥ ಅಞ್ಞಂ ವದತೀತಿ ಅಞ್ಞವಾದಕಂ; ಅಞ್ಞೇನಞ್ಞಂ ಪಟಿಚರಣಸ್ಸೇತಂ ನಾಮಂ. ವಿಹೇಸೇತೀತಿ ವಿಹೇಸಕಂ; ತುಣ್ಹೀಭೂತಸ್ಸೇತಂ ನಾಮಂ, ತಸ್ಮಿಂ ಅಞ್ಞವಾದಕೇ ವಿಹೇಸಕೇ. ಪಾಚಿತ್ತಿಯನ್ತಿ ವತ್ಥುದ್ವಯೇ ಪಾಚಿತ್ತಿಯದ್ವಯಂ ವುತ್ತಂ.

೧೦೦. ಅರೋಪಿತೇ ಅಞ್ಞವಾದಕೇತಿ ಕಮ್ಮವಾಚಾಯ ಅನಾರೋಪಿತೇ ಅಞ್ಞವಾದಕೇ. ಅರೋಪಿತೇ ವಿಹೇಸಕೇತಿ ಏತಸ್ಮಿಮ್ಪಿ ಏಸೇವ ನಯೋ.

೧೦೧. ಧಮ್ಮಕಮ್ಮೇ ಧಮ್ಮಕಮ್ಮಸಞ್ಞೀತಿಆದೀಸು ಯಂ ತಂ ಅಞ್ಞವಾದಕವಿಹೇಸಕರೋಪನಕಮ್ಮಂ ಕತಂ, ತಞ್ಚೇ ಧಮ್ಮಕಮ್ಮಂ ಹೋತಿ, ಸೋ ಚ ಭಿಕ್ಖು ತಸ್ಮಿಂ ಧಮ್ಮಕಮ್ಮಸಞ್ಞೀ ಅಞ್ಞವಾದಕಞ್ಚ ವಿಹೇಸಕಞ್ಚ ಕರೋತಿ, ಅಥಸ್ಸ ತಸ್ಮಿಂ ಅಞ್ಞವಾದಕೇ ಚ ವಿಹೇಸಕೇ ಚ ಆಪತ್ತಿ ಪಾಚಿತ್ತಿಯಸ್ಸಾತಿ ಇಮಿನಾ ನಯೇನ ಅತ್ಥೋ ವೇದಿತಬ್ಬೋ.

೧೦೨. ಅಜಾನನ್ತೋ ಪುಚ್ಛತೀತಿ ಆಪತ್ತಿಂ ವಾ ಆಪನ್ನಭಾವಂ ಅಜಾನನ್ತೋಯೇವ ‘‘ಕಿಂ ತುಮ್ಹೇ ಭಣಥ, ಅಹಂ ನ ಜಾನಾಮೀ’’ತಿ ಪುಚ್ಛತಿ. ಗಿಲಾನೋ ವಾ ನ ಕಥೇತೀತಿ ಮುಖೇ ತಾದಿಸೋ ಬ್ಯಾಧಿ ಹೋತಿ, ಯೇನ ಕಥೇತುಂ ನ ಸಕ್ಕೋತಿ. ಸಙ್ಘಸ್ಸ ಭಣ್ಡನಂ ವಾತಿಆದೀಸು ಸಙ್ಘಮಜ್ಝೇ ಕಥಿತೇ ತಪ್ಪಚ್ಚಯಾ ಸಙ್ಘಸ್ಸ ಭಣ್ಡನಂ ವಾ ಕಲಹೋ ವಾ ವಿವಾದೋ ವಾ ಭವಿಸ್ಸತಿ, ಸೋ ಮಾ ಅಹೋಸೀತಿ ಮಞ್ಞಮಾನೋ ನ ಕಥೇತೀತಿ ಇಮಿನಾ ನಯೇನ ಅತ್ಥೋ ವೇದಿತಬ್ಬೋ. ಸೇಸಂ ಉತ್ತಾನಮೇವಾತಿ.

ತಿಸಮುಟ್ಠಾನಂ – ಕಾಯಚಿತ್ತತೋ ವಾಚಾಚಿತ್ತತೋ ಕಾಯವಾಚಾಚಿತ್ತತೋ ಚ ಸಮುಟ್ಠಾತಿ, ಸಿಯಾ ಕಿರಿಯಂ, ಸಿಯಾ ಅಕಿರಿಯಂ, ಅಞ್ಞೇನಞ್ಞಂ ಪಟಿಚರನ್ತಸ್ಸ ಹಿ ಕಿರಿಯಂ ಹೋತಿ, ತುಣ್ಹೀಭಾವೇನ ವಿಹೇಸನ್ತಸ್ಸ ಅಕಿರಿಯಂ, ಸಞ್ಞಾವಿಮೋಕ್ಖಂ, ಸಚಿತ್ತಕಂ, ಲೋಕವಜ್ಜಂ, ಕಾಯಕಮ್ಮಂ, ವಚೀಕಮ್ಮಂ, ಅಕುಸಲಚಿತ್ತಂ, ದುಕ್ಖವೇದನನ್ತಿ.

ಅಞ್ಞವಾದಕಸಿಕ್ಖಾಪದಂ ದುತಿಯಂ.