೩. ದುತಿಯಸಂಖಿತ್ತಸುತ್ತವಣ್ಣನಾ

೪೮೩. ತತಿಯೇ ತತೋತಿ ಫಲವಸೇನ ನಿಸ್ಸಕ್ಕಂ ವೇದಿತಬ್ಬಂ. ಸಮತ್ತಾನಿ ಹಿ ಪರಿಪುಣ್ಣಾನಿ ಪಞ್ಚಿನ್ದ್ರಿಯಾನಿ ಅರಹತ್ತಫಲಿನ್ದ್ರಿಯಾನಿ ನಾಮ ಹೋನ್ತಿ, ಅರಹತ್ತಫಲೇನ ಸಮನ್ನಾಗತೋ ಪುಗ್ಗಲೋ ಅರಹಾ ನಾಮ ಹೋತಿ. ಅರಹತ್ತಫಲತೋ ಮುದುತರಾನಿ ಅನಾಗಾಮಿಫಲಿನ್ದ್ರಿಯಾನಿ ನಾಮ ಹೋನ್ತಿ, ತತೋ ಮುದುತರಾನಿ ಸಕದಾಗಾಮಿಫಲಿನ್ದ್ರಿಯಾನಿ, ತತೋ ಮುದುತರಾನಿ ಸೋತಾಪತ್ತಿಫಲಿನ್ದ್ರಿಯಾನಿ, ಸೋತಾಪತ್ತಿಫಲೇನ ಸಮನ್ನಾಗತೋ ಪುಗ್ಗಲೋ ಸೋತಾಪನ್ನೋ ನಾಮ ಹೋತಿ. ಇನ್ದ್ರಿಯವೇಮತ್ತತಾ ಫಲವೇಮತ್ತತಾ ಹೋತೀತಿ ಇನ್ದ್ರಿಯನಾನತ್ತೇನ ಫಲನಾನತ್ತಂ, ಫಲನಾನತ್ತೇನ ಪುಗ್ಗಲನಾನತ್ತನ್ತಿ.