೯. ಅಸಙ್ಖತಸಂಯುತ್ತಂ

೧. ಪಠಮವಗ್ಗೋ

೧-೧೧. ಕಾಯಗತಾಸತಿಸುತ್ತಾದಿವಣ್ಣನಾ

೩೬೬-೩೭೬. ಅಸಙ್ಖತಸಂಯುತ್ತೇ ಅಸಙ್ಖತನ್ತಿ ಅಕತಂ. ಹಿತೇಸಿನಾತಿ ಹಿತಂ ಏಸನ್ತೇನ. ಅನುಕಮ್ಪಕೇನಾತಿ ಅನುಕಮ್ಪಮಾನೇನ. ಅನುಕಮ್ಪಂ ಉಪಾದಾಯಾತಿ ಅನುಕಮ್ಪಂ ಚಿತ್ತೇನ ಪರಿಗ್ಗಹೇತ್ವಾ, ಪಟಿಚ್ಚಾತಿಪಿ ವುತ್ತಂ ಹೋತಿ. ಕತಂ ವೋ ತಂ ಮಯಾತಿ ತಂ ಮಯಾ ಇಮಂ ಅಸಙ್ಖತಞ್ಚ ಅಸಙ್ಖತಮಗ್ಗಞ್ಚ ದೇಸೇನ್ತೇನ ತುಮ್ಹಾಕಂ ಕತಂ. ಏತ್ತಕಮೇವ ಹಿ ಅನುಕಮ್ಪಕಸ್ಸ ಸತ್ಥು ಕಿಚ್ಚಂ, ಯದಿದಂ ಅವಿಪರೀತಧಮ್ಮದೇಸನಾ. ಇತೋ ಪರಂ ಪನ ಪಟಿಪತ್ತಿ ನಾಮ ಸಾವಕಾನಂ ಕಿಚ್ಚಂ. ತೇನಾಹ ಏತಾನಿ, ಭಿಕ್ಖವೇ, ರುಕ್ಖಮೂಲಾನಿ…ಪೇ… ಅಮ್ಹಾಕಂ ಅನುಸಾಸನೀತಿ ಇಮಿನಾ ರುಕ್ಖಮೂಲಸೇನಾಸನಂ ದಸ್ಸೇತಿ. ಸುಞ್ಞಾಗಾರಾನೀತಿ ಇಮಿನಾ ಜನವಿವಿತ್ತಂ ಠಾನಂ. ಉಭಯೇನ ಚ ಯೋಗಾನುರೂಪಂ ಸೇನಾಸನಂ ಆಚಿಕ್ಖತಿ, ದಾಯಜ್ಜಂ ನಿಯ್ಯಾತೇತಿ.

ಝಾಯಥಾತಿ ಆರಮ್ಮಣೂಪನಿಜ್ಝಾನೇನ ಅಟ್ಠತಿಂಸಾರಮ್ಮಣಾನಿ, ಲಕ್ಖಣೂಪನಿಜ್ಝಾನೇನ ಚ ಅನಿಚ್ಚಾದಿತೋ ಖನ್ಧಾಯತನಾದೀನಿ ಉಪನಿಜ್ಝಾಯಥ, ಸಮಥಞ್ಚ ವಿಪಸ್ಸನಞ್ಚ ವಡ್ಢೇಥಾತಿ ವುತ್ತಂ ಹೋತಿ. ಮಾ ಪಮಾದತ್ಥಾತಿ ಮಾ ಪಮಜ್ಜಿತ್ಥ. ಮಾ ಪಚ್ಛಾ ವಿಪ್ಪಟಿಸಾರಿನೋ ಅಹುವತ್ಥಾತಿ ಯೇ ಹಿ ಪುಬ್ಬೇ ದಹರಕಾಲೇ ಅರೋಗಕಾಲೇ ಸತ್ತಸಪ್ಪಾಯಾದಿಸಮ್ಪತ್ತಿಕಾಲೇ ಸತ್ಥು ಸಮ್ಮುಖೀಭಾವಕಾಲೇ ಚ ಯೋನಿಸೋಮನಸಿಕಾರರಹಿತಾ ರತ್ತಿನ್ದಿವಂ ಮಙ್ಕುಲಭತ್ತಂ ಹುತ್ವಾ ಸೇಯ್ಯಸುಖಂ ಮಿದ್ಧಸುಖಂ ಅನುಭೋನ್ತಾ ಪಮಜ್ಜನ್ತಿ, ತೇ ಪಚ್ಛಾ ಜರಾಕಾಲೇ ರೋಗಕಾಲೇ ಮರಣಕಾಲೇ ವಿಪತ್ತಿಕಾಲೇ ಸತ್ಥು ಪರಿನಿಬ್ಬುತಕಾಲೇ ಚ ತಂ ಪುಬ್ಬೇ ಪಮಾದವಿಹಾರಂ ಅನುಸ್ಸರನ್ತಾ ಸಪ್ಪಟಿಸನ್ಧಿಕಾಲಕಿರಿಯಞ್ಚ ಭಾರಿಯಂ ಸಮ್ಪಸ್ಸಮಾನಾ ವಿಪ್ಪಟಿಸಾರಿನೋ ಹೋನ್ತಿ. ತುಮ್ಹೇ ಪನ ತಾದಿಸಾ ಮಾ ಅಹುವತ್ಥಾತಿ ದಸ್ಸೇನ್ತೋ ಆಹ ‘‘ಮಾ ಪಚ್ಛಾ ವಿಪ್ಪಟಿಸಾರಿನೋ ಅಹುವತ್ಥಾ’’ತಿ.

ಅಯಂ ವೋ ಅಮ್ಹಾಕಂ ಅನುಸಾಸನೀತಿ ಅಯಂ ಅಮ್ಹಾಕಂ ಸನ್ತಿಕಾ ‘‘ಝಾಯಥ ಮಾ ಪಮಾದತ್ಥಾ’’ತಿ ತುಮ್ಹಾಕಂ ಅನುಸಾಸನೀ, ಓವಾದೋತಿ ವುತ್ತಂ ಹೋತಿ.

೨. ದುತಿಯವಗ್ಗೋ

೧-೩೩. ಅಸಙ್ಖತಸುತ್ತಾದಿವಣ್ಣನಾ

೩೭೭-೪೦೯. ಕಾಯೇ ಕಾಯಾನುಪಸ್ಸೀತಿಆದೀಸು ಯಂ ವತ್ತಬ್ಬಂ, ತಂ ಪರತೋ ವಕ್ಖಾಮ.

ಅನತನ್ತಿಆದೀಸು ತಣ್ಹಾನತಿಯಾ ಅಭಾವೇನ ಅನತಂ. ಚತುನ್ನಂ ಆಸವಾನಂ ಅಭಾವೇನ ಅನಾಸವಂ. ಪರಮತ್ಥಸಚ್ಚತಾಯ ಸಚ್ಚಂ. ವಟ್ಟಸ್ಸ ಪರಭಾಗಟ್ಠೇನ ಪಾರಂ. ಸಣ್ಹಟ್ಠೇನ ನಿಪುಣಂ. ಸುಟ್ಠು ದುದ್ದಸತಾಯ ಸುದುದ್ದಸಂ. ಜರಾಯ ಅಜರಿತತ್ತಾ ಅಜಜ್ಜರಂ. ಥಿರಟ್ಠೇನ ಧುವಂ. ಅಪಲುಜ್ಜನತಾಯ ಅಪಲೋಕಿತಂ. ಚಕ್ಖುವಿಞ್ಞಾಣೇನ ಅಪಸ್ಸಿತಬ್ಬತ್ತಾ ಅನಿದಸ್ಸನಂ. ತಣ್ಹಾಮಾನದಿಟ್ಠಿಪಪಞ್ಚಾನಂ ಅಭಾವೇನ ನಿಪ್ಪಪಞ್ಚಂ.

ಸನ್ತಭಾವಟ್ಠೇನ ಸನ್ತಂ. ಮರಣಾಭಾವೇನ ಅಮತಂ. ಉತ್ತಮಟ್ಠೇನ ಪಣೀತಂ. ಸಸ್ಸಿರಿಕಟ್ಠೇನ ಸಿವಂ. ನಿರುಪದ್ದವತಾಯ ಖೇಮಂ. ತಣ್ಹಾಕ್ಖಯಸ್ಸ ಪಚ್ಚಯತ್ತಾ ತಣ್ಹಕ್ಖಯಂ.

ವಿಮ್ಹಾಪನೀಯಟ್ಠೇನ ಅಚ್ಛರಂ ಪಹರಿತಬ್ಬಯುತ್ತಕನ್ತಿ ಅಚ್ಛರಿಯಂ. ಅಭೂತಮೇವ ಭೂತಂ ಅಜಾತಂ ಹುತ್ವಾ ಅತ್ಥೀತಿ ವಾ ಅಬ್ಭುತಂ. ನಿದ್ದುಕ್ಖತ್ತಾ ಅನೀತಿಕಂ. ನಿದ್ದುಕ್ಖಸಭಾವತ್ತಾ ಅನೀತಿಕಧಮ್ಮಂ. ವಾನಾಭಾವೇನ ನಿಬ್ಬಾನಂ. ಬ್ಯಾಬಜ್ಝಾಭಾವೇನೇವ ಅಬ್ಯಾಬಜ್ಝಂ. ವಿರಾಗಾಧಿಗಮಸ್ಸ ಪಚ್ಚಯತೋ ವಿರಾಗಂ. ಪರಮತ್ಥಸುದ್ಧಿತಾಯ ಸುದ್ಧಿ. ತೀಹಿ ಭವೇಹಿ ಮುತ್ತತಾಯ ಮುತ್ತಿ. ಕಾಮಾಲಯಾನಂ ಅಭಾವೇನ ಅನಾಲಯಂ. ಪತಿಟ್ಠಟ್ಠೇನ ದೀಪಂ. ಅಲ್ಲೀಯಿತಬ್ಬಯುತ್ತಟ್ಠೇನ ಲೇಣಂ. ತಾಯನಟ್ಠೇನ ತಾಣಂ. ಭಯಸರಣಟ್ಠೇನ ಸರಣಂ, ಭಯನಾಸನನ್ತಿ ಅತ್ಥೋ. ಪರಂ ಅಯನಂ ಗತಿ ಪತಿಟ್ಠಾತಿ ಪರಾಯಣಂ. ಸೇಸಮೇತ್ಥ ವುತ್ತನಯಮೇವಾತಿ.

ಅಸಙ್ಖತಸಂಯುತ್ತವಣ್ಣನಾ ನಿಟ್ಠಿತಾ.