೧೦. ಅಬ್ಯಾಕತಸಂಯುತ್ತಂ

೧. ಖೇಮಾಸುತ್ತವಣ್ಣನಾ

೪೧೦. ಅಬ್ಯಾಕತಸಂಯುತ್ತಸ್ಸ ಪಠಮೇ ಖೇಮಾತಿ ಗಿಹಿಕಾಲೇ ಬಿಮ್ಬಿಸಾರಸ್ಸ ಉಪಾಸಿಕಾ ಸದ್ಧಾಪಬ್ಬಜಿತಾ ಮಹಾಥೇರೀ ‘‘ಏತದಗ್ಗಂ, ಭಿಕ್ಖವೇ, ಮಮ ಸಾವಿಕಾನಂ ಭಿಕ್ಖುನೀನಂ ಮಹಾಪಞ್ಞಾನಂ ಯದಿದಂ ಖೇಮಾ’’ತಿ ಏವಂ ಭಗವತಾ ಮಹಾಪಞ್ಞತಾಯ ಏತದಗ್ಗೇ ಠಪಿತಾ. ಪಣ್ಡಿತಾತಿ ಪಣ್ಡಿಚ್ಚೇನ ಸಮನ್ನಾಗತಾ. ವಿಯತ್ತಾತಿ ವೇಯ್ಯತ್ತಿಯೇನ ಸಮನ್ನಾಗತಾ. ಮೇಧಾವಿನೀತಿ ಮೇಧಾಯ ಪಞ್ಞಾಯ ಸಮನ್ನಾಗತಾ. ಬಹುಸ್ಸುತಾತಿ ಪರಿಯತ್ತಿಬಾಹುಸಚ್ಚೇನಪಿ ಪಟಿವೇಧಬಾಹುಸಚ್ಚೇನಪಿ ಸಮನ್ನಾಗತಾ.

ಗಣಕೋತಿ ಅಚ್ಛಿದ್ದಕಗಣನಾಯ ಕುಸಲೋ. ಮುದ್ದಿಕೋತಿ ಅಙ್ಗುಲಿಮುದ್ದಾಯ ಗಣನಾಯ ಕುಸಲೋ. ಸಙ್ಖಾಯಕೋತಿ ಪಿಣ್ಡಗಣನಾಯ ಕುಸಲೋ. ಗಮ್ಭೀರೋತಿ ಚತುರಾಸೀತಿಯೋಜನಸಹಸ್ಸಗಮ್ಭೀರೋ. ಅಪ್ಪಮೇಯ್ಯೋತಿ ಆಳ್ಹಕಗಣನಾಯ ಅಪ್ಪಮೇಯ್ಯೋ. ದುಪ್ಪರಿಯೋಗಾಹೋತಿ ಆಳ್ಹಕಗಣನಾಯ ಪಮಾಣಗಹಣತ್ಥಂ ದುರೋಗಾಹೋ. ಯೇನ ರೂಪೇನ ತಥಾಗತನ್ತಿ ಯೇನ ರೂಪೇನ ದೀಘೋ ರಸ್ಸೋ ಸಾಮೋ ಓದಾತೋತಿ ಸತ್ತಸಙ್ಖಾತಂ ತಥಾಗತಂ ಪಞ್ಞಪೇಯ್ಯ. ತಂ ರೂಪಂ ತಥಾಗತಸ್ಸ ಪಹೀನನ್ತಿ ತಂ ವುತ್ತಪ್ಪಕಾರರೂಪಂ ಸಮುದಯಪ್ಪಹಾನೇನ ಸಬ್ಬಞ್ಞುತಥಾಗತಸ್ಸ ಪಹೀನಂ. ರೂಪಸಙ್ಖಾಯ ವಿಮುತ್ತೋತಿ ಆಯತಿಂ ರೂಪಸ್ಸ ಅನುಪ್ಪತ್ತಿಯಾ ರೂಪಾರೂಪಕೋಟ್ಠಾಸೇನಪಿ ಏವರೂಪೋ ನಾಮ ಭವಿಸ್ಸತೀತಿ ವೋಹಾರಸ್ಸಪಿ ಪಟಿಪಸ್ಸದ್ಧತ್ತಾ ರೂಪಪಣ್ಣತ್ತಿಯಾಪಿ ವಿಮುತ್ತೋ. ಗಮ್ಭೀರೋತಿ ಅಜ್ಝಾಸಯ ಗಮ್ಭೀರತಾಯ ಚ ಗುಣಗಮ್ಭೀರತಾಯ ಚ ಗಮ್ಭೀರೋ. ತಸ್ಸ ಏವಂ ಗುಣಗಮ್ಭೀರಸ್ಸ ಸತೋ ಸಬ್ಬಞ್ಞುತಥಾಗತಸ್ಸ ಯಂ ಉಪಾದಾಯ ಸತ್ತಸಙ್ಖಾತೋ ತಥಾಗತೋತಿ ಪಞ್ಞತ್ತಿ ಹೋತಿ, ತದಭಾವೇನ ತಸ್ಸಾ ಪಞ್ಞತ್ತಿಯಾ ಅಭಾವಂ ಪಸ್ಸನ್ತಸ್ಸ ಅಯಂ ಸತ್ತಸಙ್ಖಾತೋ ಹೋತಿ ತಥಾಗತೋ ಪರಂ ಮರಣಾತಿ ಇದಂ ವಚನಂ ನ ಉಪೇತಿ ನ ಯುಜ್ಜತಿ, ನ ಹೋತಿ ತಥಾಗತೋ ಪರಂ ಮರಣಾತಿಆದಿವಚನಮ್ಪಿ ನ ಉಪೇತಿ ನ ಯುಜ್ಜತೀತಿ ಅತ್ಥೋ.

ಸಂಸನ್ದಿಸ್ಸತೀತಿ ಏಕಂ ಭವಿಸ್ಸತಿ. ಸಮೇಸ್ಸತೀತಿ ನಿರನ್ತರಂ ಭವಿಸ್ಸತಿ. ನ ವಿರೋಧಯಿಸ್ಸತೀತಿ ನ ವಿರುದ್ಧಂ ಪದಂ ಭವಿಸ್ಸತಿ. ಅಗ್ಗಪದಸ್ಮಿನ್ತಿ ದೇಸನಾಯ. ದೇಸನಾ ಹಿ ಇಧ ಅಗ್ಗಪದನ್ತಿ ಅಧಿಪ್ಪೇತಾ.

೨. ಅನುರಾಧಸುತ್ತವಣ್ಣನಾ

೪೧೧. ದುತಿಯಂ ಖನ್ಧಿಯವಗ್ಗೇ ವಿತ್ಥಾರಿತಮೇವ, ಅಬ್ಯಾಕತಾಧಿಕಾರತೋ ಪನ ಇಧ ವುತ್ತಂ.

೩-೮. ಪಠಮಸಾರಿಪುತ್ತಕೋಟ್ಠಿಕಸುತ್ತಾದಿವಣ್ಣನಾ

೪೧೨-೪೧೭. ತತಿಯೇ ರೂಪಗತಮೇತನ್ತಿ ರೂಪಮತ್ತಮೇತಂ. ಏತ್ಥ ರೂಪತೋ ಅಞ್ಞೋ ಕೋಚಿ ಸತ್ತೋ ನಾಮ ನ ಉಪಲಬ್ಭತಿ, ರೂಪೇ ಪನ ಸತಿ ನಾಮಮತ್ತಂ ಏತಂ ಹೋತೀತಿ ದಸ್ಸೇತಿ. ವೇದನಾಗತಮೇತನ್ತಿಆದೀಸುಪಿ ಏಸೇವ ನಯೋ. ಅಯಂ ಖೋ ಆವುಸೋ ಹೇತೂತಿ ಅಯಂ ರೂಪಾದೀನಿ ಮುಞ್ಚಿತ್ವಾ ಅನುಪಲಬ್ಭಿಯಸಭಾವೋ ಹೇತು, ಯೇನೇತಂ ಅಬ್ಯಾಕತಂ ಭಗವತಾತಿ. ಚತುತ್ಥಾದೀನಿ ಉತ್ತಾನತ್ಥಾನೇವ.

೯. ಕುತೂಹಲಸಾಲಾಸುತ್ತವಣ್ಣನಾ

೪೧೮. ನವಮೇ ಕುತೂಹಲಸಾಲಾಯನ್ತಿ ಕುತೂಹಲಸಾಲಾ ನಾಮ ಪಚ್ಚೇಕಸಾಲಾ ನತ್ಥಿ, ಯತ್ಥ ಪನ ನಾನಾತಿತ್ಥಿಯಾ ಸಮಣಬ್ರಾಹ್ಮಣಾ ನಾನಾವಿಧಂ ಕಥಂ ಪವತ್ತೇನ್ತಿ, ಸಾ ಬಹೂನಂ ‘‘ಅಯಂ ಕಿಂ ವದತಿ, ಅಯಂ ಕಿಂ ವದತೀ’’ತಿ ಕುತೂಹಲುಪ್ಪವತ್ತಿಟ್ಠಾನತೋ ಕುತೂಹಲಸಾಲಾತಿ ವುಚ್ಚತಿ. ದೂರಮ್ಪಿ ಗಚ್ಛತೀತಿ ಯಾವ ಆಭಸ್ಸರಬ್ರಹ್ಮಲೋಕಾ ಗಚ್ಛತಿ. ಇಮಞ್ಚ ಕಾಯಂ ನಿಕ್ಖಿಪತೀತಿ ಚುತಿಚಿತ್ತೇನ ನಿಕ್ಖಿಪತಿ. ಅನುಪಪನ್ನೋ ಹೋತೀತಿ ಚುತಿಕ್ಖಣೇಯೇವ ಪಟಿಸನ್ಧಿಚಿತ್ತಸ್ಸ ಅನುಪ್ಪನ್ನತ್ತಾ ಅನುಪಪನ್ನೋ ಹೋತಿ.

೧೦. ಆನನ್ದಸುತ್ತವಣ್ಣನಾ

೪೧೯. ದಸಮೇ ತೇಸಮೇತಂ ಸದ್ಧಿಂ ಅಭವಿಸ್ಸಾತಿ ತೇಸಂ ಲದ್ಧಿಯಾ ಸದ್ಧಿಂ ಏತಂ ಅಭವಿಸ್ಸ. ಅನುಲೋಮಂ ಅಭವಿಸ್ಸ ಞಾಣಸ್ಸ ಉಪ್ಪಾದಾಯ ಸಬ್ಬೇ ಧಮ್ಮಾ ಅನತ್ತಾತಿ ಯಂ ಏತಂ ‘‘ಸಬ್ಬೇ ಧಮ್ಮಾ ಅನತ್ತಾ’’ತಿ ವಿಪಸ್ಸನಾಞಾಣಂ ಉಪ್ಪಜ್ಜತಿ, ಅಪಿ ನು ಮೇ ತಸ್ಸ ಅನುಲೋಮಂ ಅಭವಿಸ್ಸಾತಿ ಅತ್ಥೋ.

೧೧. ಸಭಿಯಕಚ್ಚಾನಸುತ್ತವಣ್ಣನಾ

೪೨೦. ಏಕಾದಸಮೇ ಏತಮೇತ್ತಕೇನ ಏತ್ತಕಮೇವಾತಿ ಆವುಸೋ ಯಸ್ಸಾಪಿ ಏತಂ ಏತ್ತಕೇನ ಕಾಲೇನ ‘‘ಹೇತುಮ್ಹಿ ಸತಿ ರೂಪೀತಿಆದಿ ಪಞ್ಞಾಪನಾ ಹೋತಿ, ಅಸತಿ ನ ಹೋತೀ’’ತಿ ಬ್ಯಾಕರಣಂ ಭವೇಯ್ಯ, ತಸ್ಸ ಏತ್ತಕಮೇವ ಬಹು. ಕೋ ಪನ ವಾದೋ ಅತಿಕ್ಕನ್ತೇತಿ ಅತಿಕ್ಕನ್ತೇ ಪನ ಅತಿಮನಾಪೇ ಧಮ್ಮದೇಸನಾನಯೇ ವಾದೋಯೇವ ಕೋ, ನತ್ಥಿ ವಾದೋ, ಛಿನ್ನಾ ಕಥಾತಿ.

ಅಬ್ಯಾಕತಸಂಯುತ್ತವಣ್ಣನಾ ನಿಟ್ಠಿತಾ.