೯. ಅಚೇಲಕಸ್ಸಪಸುತ್ತವಣ್ಣನಾ

೩೫೧. ನವಮೇ ಕೀವಚಿರಂ ಪಬ್ಬಜಿತಸ್ಸಾತಿ ಕೀವಚಿರೋ ಕಾಲೋ ಪಬ್ಬಜಿತಸ್ಸಾತಿ ಅತ್ಥೋ. ಉತ್ತರಿ ಮನುಸ್ಸಧಮ್ಮಾತಿ ಮನುಸ್ಸಧಮ್ಮೋ ನಾಮ ದಸಕುಸಲಕಮ್ಮಪಥಾ, ತತೋ ಮನುಸ್ಸಧಮ್ಮತೋ ಉತ್ತರಿ. ಅಲಮರಿಯಞಾಣದಸ್ಸನವಿಸೇಸೋತಿ ಅರಿಯಭಾವಂ ಕಾತುಂ ಸಮತ್ಥತಾಯ ಅಲಮರಿಯೋತಿ ಸಙ್ಖಾತೋ ಞಾಣದಸ್ಸನವಿಸೇಸೋ. ನಗ್ಗೇಯ್ಯಾತಿ ನಗ್ಗಭಾವತೋ. ಮುಣ್ಡೇಯ್ಯಾತಿ ಮುಣ್ಡಭಾವತೋ. ಪವಾಳನಿಪ್ಫೋಟನಾಯಾತಿ ಪಾವಳನಿಪ್ಫೋಟನತೋ, ಭೂಮಿಯಂ ನಿಸೀದನ್ತಸ್ಸ ಆನಿಸದಟ್ಠಾನೇ ಲಗ್ಗಾನಂ ಪಂಸುರಜವಾಲಿಕಾನಂ ಫೋಟನತ್ಥಂ ಗಹಿತಮೋರಪಿಞ್ಛಮತ್ತತೋತಿ ಅತ್ಥೋ.