೧೦. ಗಿಲಾನದಸ್ಸನಸುತ್ತವಣ್ಣನಾ

೩೫೨. ದಸಮೇ ಆರಾಮದೇವತಾತಿ ಪುಪ್ಫಾರಾಮಫಲಾರಾಮೇಸು ಅಧಿವತ್ಥಾ ದೇವತಾ. ವನದೇವತಾತಿ ವನಸಣ್ಡೇಸು ಅಧಿವತ್ಥಾ ದೇವತಾ. ರುಕ್ಖದೇವತಾತಿ ಮತ್ತರಾಜಕಾಲೇ ವೇಸ್ಸವಣೋ ಚ ದೇವತಾತಿ ಏವಂ ತೇಸು ತೇಸು ರುಕ್ಖೇಸು ಅಧಿವತ್ಥಾ ದೇವತಾ. ಓಸಧಿತಿಣವನಪ್ಪತೀಸೂತಿ ಹರೀತಕಾಮಲಕೀಆದೀಸು ಮುಞ್ಜಪಬ್ಬಜಾದೀಸು ವನಜೇಟ್ಠರುಕ್ಖೇಸು ಚ ಅಧಿವತ್ಥಾ ದೇವತಾ. ಸಂಗಮ್ಮಾತಿ ಸನ್ನಿಪತಿತ್ವಾ. ಸಮಾಗಮ್ಮಾತಿ ತತೋ ತತೋ ಸಮಾಗನ್ತ್ವಾ. ಪಣಿಧೇಹೀತಿ ಪತ್ಥನಾವಸೇನ ಠಪೇಹಿ. ಇಜ್ಝಿಸ್ಸತಿ ಸೀಲವತೋ ಚೇತೋಪಣಿಧೀತಿ ಸಮಿಜ್ಝಿಸ್ಸತಿ ಸೀಲವನ್ತಸ್ಸ ಚಿತ್ತಪತ್ಥನಾ. ಧಮ್ಮಿಕೋತಿ ದಸಕುಸಲಧಮ್ಮಸಮನ್ನಾಗತೋ ಅಗತಿಗಮನರಹಿತೋ. ಧಮ್ಮರಾಜಾತಿ ತಸ್ಸೇವ ವೇವಚನಂ, ಧಮ್ಮೇನ ವಾ ಲದ್ಧರಜ್ಜತ್ತಾ ಧಮ್ಮರಾಜಾ. ತಸ್ಮಾತಿ ‘‘ಯಸ್ಮಾ ತೇನ ಹಿ, ಅಯ್ಯಪುತ್ತ, ಅಮ್ಹೇಪಿ ಓವದಾಹೀ’’ತಿ ವದಥ, ತಸ್ಮಾ. ಅಪ್ಪಟಿವಿಭತ್ತನ್ತಿ ‘‘ಇದಂ ಭಿಕ್ಖೂನಂ ದಸ್ಸಾಮ, ಇದಂ ಅತ್ತನಾ ಭುಞ್ಜಿಸ್ಸಾಮಾ’’ತಿ ಏವಂ ಅವಿಭತ್ತಂ ಭಿಕ್ಖೂಹಿ ಸದ್ಧಿಂ ಸಾಧಾರಣಮೇವ ಭವಿಸ್ಸತೀತಿ.

ಚಿತ್ತಸಂಯುತ್ತವಣ್ಣನಾ ನಿಟ್ಠಿತಾ.