೧. ಸಂಯೋಜನಸುತ್ತವಣ್ಣನಾ

೩೪೩. ಚಿತ್ತಸಂಯುತ್ತಸ್ಸ ಪಠಮೇ ಮಚ್ಛಿಕಾಸಣ್ಡೇತಿ ಏವಂನಾಮಕೇ ವನಸಣ್ಡೇ. ಅಯಮನ್ತರಾಕಥಾ ಉದಪಾದೀತಿ ಪೋರಾಣಕತ್ಥೇರಾ ಅತಿರಚ್ಛಾನಕಥಾ ಹೋನ್ತಿ, ನಿಸಿನ್ನನಿಸಿನ್ನಟ್ಠಾನೇ ಪಞ್ಹಂ ಸಮುಟ್ಠಾಪೇತ್ವಾ ಅಜಾನನ್ತಾ ಪುಚ್ಛನ್ತಿ, ಜಾನನ್ತಾ ವಿಸ್ಸಜ್ಜೇನ್ತಿ, ತೇನ ನೇಸಂ ಅಯಂ ಕಥಾ ಉದಪಾದಿ. ಮಿಗಪಥಕನ್ತಿ ಏವಂನಾಮಕಂ ಅತ್ತನೋ ಭೋಗಗಾಮಂ. ಸೋ ಕಿರ ಅಮ್ಬಾಟಕಾರಾಮಸ್ಸ ಪಿಟ್ಠಿಭಾಗೇ ಹೋತಿ. ತೇನುಪಸಙ್ಕಮೀತಿ ‘‘ಥೇರಾನಂ ಪಞ್ಹಂ ವಿಸ್ಸಜ್ಜೇತ್ವಾ ಫಾಸುವಿಹಾರಂ ಕತ್ವಾ ದಸ್ಸಾಮೀ’’ತಿ ಚಿನ್ತೇತ್ವಾ ಉಪಸಙ್ಕಮಿ. ಗಮ್ಭೀರೇ ಬುದ್ಧವಚನೇತಿ ಅತ್ಥಗಮ್ಭೀರೇ ಚೇವ ಧಮ್ಮಗಮ್ಭೀರೇ ಚ ಬುದ್ಧವಚನೇ. ಪಞ್ಞಾಚಕ್ಖು ಕಮತೀತಿ ಞಾಣಚಕ್ಖು ವಹತಿ ಪವತ್ತತಿ.