೨. ಪಠಮಇಸಿದತ್ತಸುತ್ತವಣ್ಣನಾ

೩೪೪. ದುತಿಯೇ ಆಯಸ್ಮನ್ತಂ ಥೇರನ್ತಿ ತೇಸು ಥೇರೇಸು ಜೇಟ್ಠಕಂ ಮಹಾಥೇರಂ. ತುಣ್ಹೀ ಅಹೋಸೀತಿ ಜಾನನ್ತೋಪಿ ಅವಿಸಾರದತ್ತಾ ನ ಕಿಞ್ಚಿ ಬ್ಯಾಹರಿ. ಬ್ಯಾಕರೋಮಹಂ ಭನ್ತೇತಿ ‘‘ಅಯಂ ಥೇರೋ ನೇವ ಅತ್ತನಾ ಬ್ಯಾಕರೋತಿ, ನ ಅಞ್ಞೇ ಅಜ್ಝೇಸತಿ, ಉಪಾಸಕೋಪಿ ಭಿಕ್ಖುಸಙ್ಘಂ ವಿಹೇಸೇತಿ, ಅಹಮೇತಂ ಬ್ಯಾಕರಿತ್ವಾ ಫಾಸುವಿಹಾರಂ ಕತ್ವಾ ದಸ್ಸಾಮೀ’’ತಿ ಚಿನ್ತೇತ್ವಾ ಆಸನತೋ ವುಟ್ಠಾಯ ಥೇರಸ್ಸ ಸನ್ತಿಕಂ ಗನ್ತ್ವಾ ಏವಂ ಓಕಾಸಮಕಾಸಿ, ಕತಾವಕಾಸೋ ಪನ ಅತ್ತನೋ ಆಸನೇ ನಿಸೀದಿತ್ವಾ ಬ್ಯಾಕಾಸಿ.

ಸಹತ್ಥಾತಿ ಸಹತ್ಥೇನ. ಸನ್ತಪ್ಪೇಸೀತಿ ಯಾವದಿಚ್ಛಕಂ ದೇನ್ತೋ ಸುಟ್ಠು ತಪ್ಪೇಸಿ. ಸಮ್ಪವಾರೇಸೀತಿ ‘‘ಅಲಂ ಅಲ’’ನ್ತಿ ಹತ್ಥಸಞ್ಞಾಯ ಚೇವ ವಾಚಾಯ ಚ ಪಟಿಕ್ಖಿಪಾಪೇಸಿ. ಓನೀತಪತ್ತಪಾಣಿನೋತಿ ಪಾಣಿತೋ ಅಪನೀತಪತ್ತಾ ಧೋವಿತ್ವಾ ಥವಿಕಾಯ ಓಸಾಪೇತ್ವಾ ಅಂಸೇ ಲಗ್ಗಿತಪತ್ತಾತಿ ಅತ್ಥೋ.