೯. ಅನಿಮಿತ್ತಪಞ್ಹಾಸುತ್ತವಣ್ಣನಾ

೩೪೦. ಅನಿಮಿತ್ತಂ ಚೇತೋಸಮಾಧಿನ್ತಿ ನಿಚ್ಚನಿಮಿತ್ತಾದೀನಿ ಪಹಾಯ ಪವತ್ತಂ ವಿಪಸ್ಸನಾಸಮಾಧಿಂಯೇವ ಸನ್ಧಾಯೇತಂ ವುತ್ತನ್ತಿ. ನಿಮಿತ್ತಾನುಸಾರಿ ವಿಞ್ಞಾಣಂ ಹೋತೀತಿ ಏವಂ ಇಮಿನಾ ವಿಪಸ್ಸನಾಸಮಾಧಿವಿಹಾರೇನ ವಿಹರತೋ ವಿಪಸ್ಸನಾಞಾಣೇ ತಿಕ್ಖೇ ಸೂರೇ ವಹಮಾನೇ. ಯಥಾ ನಾಮ ಪುರಿಸಸ್ಸ ತಿಖಿಣೇನ ಫರಸುನಾ ರುಕ್ಖಂ ಛಿನ್ದನ್ತಸ್ಸ ‘‘ಸುಟ್ಠು ವತ ಮೇ ಫರಸು ವಹತೀ’’ತಿ ಖಣೇ ಖಣೇ ಫರಸುಧಾರಂ ಓಲೋಕೇನ್ತಸ್ಸ ಛೇಜ್ಜಕಿಚ್ಚಂ ನ ನಿಪ್ಫಜ್ಜತಿ, ಏವಂ ಥೇರಸ್ಸಾಪಿ ‘‘ಸೂರಂ ವತ ಮೇ ಹುತ್ವಾ ಞಾಣಂ ವಹತೀ’’ತಿ ವಿಪಸ್ಸನಂ ಆರಬ್ಭ ನಿಕನ್ತಿ ಉಪ್ಪಜ್ಜತಿ. ಅಥ ವಿಪಸ್ಸನಾಕಿಚ್ಚಂ ಸಾಧೇತುಂ ನಾಸಕ್ಖಿ. ತಂ ಸನ್ಧಾಯ ವುತ್ತಂ ‘‘ನಿಮಿತ್ತಾನುಸಾರಿ ವಿಞ್ಞಾಣಂ ಹೋತೀ’’ತಿ. ಸಬ್ಬನಿಮಿತ್ತಾನಂ ಅಮನಸಿಕಾರಾ ಅನಿಮಿತ್ತಂ ಚೇತೋಸಮಾಧಿಂ ಉಪಸಮ್ಪಜ್ಜ ವಿಹಾಸಿನ್ತಿ ಸಬ್ಬೇಸಂ ನಿಚ್ಚಸುಖಅತ್ತನಿಮಿತ್ತಾನಂ ಅಮನಸಿಕಾರೇನ ಅನಿಮಿತ್ತಂ ವುಟ್ಠಾನಗಾಮಿನಿವಿಪಸ್ಸನಾಸಮ್ಪಯುತ್ತಂ ಚೇತೋಸಮಾಧಿಂ ನಿಬ್ಬಾನಾರಮ್ಮಣಂ ಉಪರಿಮಗ್ಗಫಲಸಮಾಧಿಂ ಉಪಸಮ್ಪಜ್ಜ ವಿಹಾಸಿಂ.