೬. ಮೋಗ್ಗಲ್ಲಾನಸಂಯುತ್ತಂ

೧-೮. ಪಠಮಝಾನಪಞ್ಹಾಸುತ್ತಾದಿವಣ್ಣನಾ

೩೩೨-೩೩೯. ಮೋಗ್ಗಲ್ಲಾನಸಂಯುತ್ತೇ ಕಾಮಸಹಗತಾತಿ ಪಞ್ಚನೀವರಣಸಹಗತಾ. ತಸ್ಸ ಹಿ ಪಠಮಜ್ಝಾನವುಟ್ಠಿತಸ್ಸ ಪಞ್ಚ ನೀವರಣಾನಿ ಸನ್ತತೋ ಉಪಟ್ಠಹಿಂಸು. ತೇನಸ್ಸ ತಂ ಪಠಮಜ್ಝಾನಂ ಹಾನಭಾಗಿಯಂ ನಾಮ ಅಹೋಸಿ. ತಂ ಪಮಾದಂ ಞತ್ವಾ ಸತ್ಥಾ ‘‘ಮಾ ಪಮಾದೋ’’ತಿ ಓವಾದಂ ಅದಾಸಿ. ದುತಿಯಜ್ಝಾನಾದೀಸುಪಿ ಇಮಿನಾವ ನಯೇನ ಅತ್ಥೋ ವೇದಿತಬ್ಬೋ. ಆರಮ್ಮಣಸಹಗತಮೇವ ಹೇತ್ಥ ‘‘ಸಹಗತ’’ನ್ತಿ ವುತ್ತಂ.

೯. ಅನಿಮಿತ್ತಪಞ್ಹಾಸುತ್ತವಣ್ಣನಾ

೩೪೦. ಅನಿಮಿತ್ತಂ ಚೇತೋಸಮಾಧಿನ್ತಿ ನಿಚ್ಚನಿಮಿತ್ತಾದೀನಿ ಪಹಾಯ ಪವತ್ತಂ ವಿಪಸ್ಸನಾಸಮಾಧಿಂಯೇವ ಸನ್ಧಾಯೇತಂ ವುತ್ತನ್ತಿ. ನಿಮಿತ್ತಾನುಸಾರಿ ವಿಞ್ಞಾಣಂ ಹೋತೀತಿ ಏವಂ ಇಮಿನಾ ವಿಪಸ್ಸನಾಸಮಾಧಿವಿಹಾರೇನ ವಿಹರತೋ ವಿಪಸ್ಸನಾಞಾಣೇ ತಿಕ್ಖೇ ಸೂರೇ ವಹಮಾನೇ. ಯಥಾ ನಾಮ ಪುರಿಸಸ್ಸ ತಿಖಿಣೇನ ಫರಸುನಾ ರುಕ್ಖಂ ಛಿನ್ದನ್ತಸ್ಸ ‘‘ಸುಟ್ಠು ವತ ಮೇ ಫರಸು ವಹತೀ’’ತಿ ಖಣೇ ಖಣೇ ಫರಸುಧಾರಂ ಓಲೋಕೇನ್ತಸ್ಸ ಛೇಜ್ಜಕಿಚ್ಚಂ ನ ನಿಪ್ಫಜ್ಜತಿ, ಏವಂ ಥೇರಸ್ಸಾಪಿ ‘‘ಸೂರಂ ವತ ಮೇ ಹುತ್ವಾ ಞಾಣಂ ವಹತೀ’’ತಿ ವಿಪಸ್ಸನಂ ಆರಬ್ಭ ನಿಕನ್ತಿ ಉಪ್ಪಜ್ಜತಿ. ಅಥ ವಿಪಸ್ಸನಾಕಿಚ್ಚಂ ಸಾಧೇತುಂ ನಾಸಕ್ಖಿ. ತಂ ಸನ್ಧಾಯ ವುತ್ತಂ ‘‘ನಿಮಿತ್ತಾನುಸಾರಿ ವಿಞ್ಞಾಣಂ ಹೋತೀ’’ತಿ. ಸಬ್ಬನಿಮಿತ್ತಾನಂ ಅಮನಸಿಕಾರಾ ಅನಿಮಿತ್ತಂ ಚೇತೋಸಮಾಧಿಂ ಉಪಸಮ್ಪಜ್ಜ ವಿಹಾಸಿನ್ತಿ ಸಬ್ಬೇಸಂ ನಿಚ್ಚಸುಖಅತ್ತನಿಮಿತ್ತಾನಂ ಅಮನಸಿಕಾರೇನ ಅನಿಮಿತ್ತಂ ವುಟ್ಠಾನಗಾಮಿನಿವಿಪಸ್ಸನಾಸಮ್ಪಯುತ್ತಂ ಚೇತೋಸಮಾಧಿಂ ನಿಬ್ಬಾನಾರಮ್ಮಣಂ ಉಪರಿಮಗ್ಗಫಲಸಮಾಧಿಂ ಉಪಸಮ್ಪಜ್ಜ ವಿಹಾಸಿಂ.

೧೦-೧೧. ಸಕ್ಕಸುತ್ತಾದಿವಣ್ಣನಾ

೩೪೧-೩೪೨. ಅವೇಚ್ಚಪ್ಪಸಾದೇನಾತಿ ಅಚಲಪ್ಪಸಾದೇನ. ದಸಹಿ ಠಾನೇಹೀತಿ ದಸಹಿ ಕಾರಣೇಹಿ. ಅಧಿಗಣ್ಹನ್ತೀತಿ ಅಭಿಭವನ್ತಿ, ಅತಿಕ್ಕಮಿತ್ವಾ ತಿಟ್ಠನ್ತಿ. ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ.

ಮೋಗ್ಗಲ್ಲಾನಸಂಯುತ್ತವಣ್ಣನಾ ನಿಟ್ಠಿತಾ.