೧. ಖೇಮಾಸುತ್ತವಣ್ಣನಾ

೪೧೦. ಅಬ್ಯಾಕತಸಂಯುತ್ತಸ್ಸ ಪಠಮೇ ಖೇಮಾತಿ ಗಿಹಿಕಾಲೇ ಬಿಮ್ಬಿಸಾರಸ್ಸ ಉಪಾಸಿಕಾ ಸದ್ಧಾಪಬ್ಬಜಿತಾ ಮಹಾಥೇರೀ ‘‘ಏತದಗ್ಗಂ, ಭಿಕ್ಖವೇ, ಮಮ ಸಾವಿಕಾನಂ ಭಿಕ್ಖುನೀನಂ ಮಹಾಪಞ್ಞಾನಂ ಯದಿದಂ ಖೇಮಾ’’ತಿ ಏವಂ ಭಗವತಾ ಮಹಾಪಞ್ಞತಾಯ ಏತದಗ್ಗೇ ಠಪಿತಾ. ಪಣ್ಡಿತಾತಿ ಪಣ್ಡಿಚ್ಚೇನ ಸಮನ್ನಾಗತಾ. ವಿಯತ್ತಾತಿ ವೇಯ್ಯತ್ತಿಯೇನ ಸಮನ್ನಾಗತಾ. ಮೇಧಾವಿನೀತಿ ಮೇಧಾಯ ಪಞ್ಞಾಯ ಸಮನ್ನಾಗತಾ. ಬಹುಸ್ಸುತಾತಿ ಪರಿಯತ್ತಿಬಾಹುಸಚ್ಚೇನಪಿ ಪಟಿವೇಧಬಾಹುಸಚ್ಚೇನಪಿ ಸಮನ್ನಾಗತಾ.

ಗಣಕೋತಿ ಅಚ್ಛಿದ್ದಕಗಣನಾಯ ಕುಸಲೋ. ಮುದ್ದಿಕೋತಿ ಅಙ್ಗುಲಿಮುದ್ದಾಯ ಗಣನಾಯ ಕುಸಲೋ. ಸಙ್ಖಾಯಕೋತಿ ಪಿಣ್ಡಗಣನಾಯ ಕುಸಲೋ. ಗಮ್ಭೀರೋತಿ ಚತುರಾಸೀತಿಯೋಜನಸಹಸ್ಸಗಮ್ಭೀರೋ. ಅಪ್ಪಮೇಯ್ಯೋತಿ ಆಳ್ಹಕಗಣನಾಯ ಅಪ್ಪಮೇಯ್ಯೋ. ದುಪ್ಪರಿಯೋಗಾಹೋತಿ ಆಳ್ಹಕಗಣನಾಯ ಪಮಾಣಗಹಣತ್ಥಂ ದುರೋಗಾಹೋ. ಯೇನ ರೂಪೇನ ತಥಾಗತನ್ತಿ ಯೇನ ರೂಪೇನ ದೀಘೋ ರಸ್ಸೋ ಸಾಮೋ ಓದಾತೋತಿ ಸತ್ತಸಙ್ಖಾತಂ ತಥಾಗತಂ ಪಞ್ಞಪೇಯ್ಯ. ತಂ ರೂಪಂ ತಥಾಗತಸ್ಸ ಪಹೀನನ್ತಿ ತಂ ವುತ್ತಪ್ಪಕಾರರೂಪಂ ಸಮುದಯಪ್ಪಹಾನೇನ ಸಬ್ಬಞ್ಞುತಥಾಗತಸ್ಸ ಪಹೀನಂ. ರೂಪಸಙ್ಖಾಯ ವಿಮುತ್ತೋತಿ ಆಯತಿಂ ರೂಪಸ್ಸ ಅನುಪ್ಪತ್ತಿಯಾ ರೂಪಾರೂಪಕೋಟ್ಠಾಸೇನಪಿ ಏವರೂಪೋ ನಾಮ ಭವಿಸ್ಸತೀತಿ ವೋಹಾರಸ್ಸಪಿ ಪಟಿಪಸ್ಸದ್ಧತ್ತಾ ರೂಪಪಣ್ಣತ್ತಿಯಾಪಿ ವಿಮುತ್ತೋ. ಗಮ್ಭೀರೋತಿ ಅಜ್ಝಾಸಯ ಗಮ್ಭೀರತಾಯ ಚ ಗುಣಗಮ್ಭೀರತಾಯ ಚ ಗಮ್ಭೀರೋ. ತಸ್ಸ ಏವಂ ಗುಣಗಮ್ಭೀರಸ್ಸ ಸತೋ ಸಬ್ಬಞ್ಞುತಥಾಗತಸ್ಸ ಯಂ ಉಪಾದಾಯ ಸತ್ತಸಙ್ಖಾತೋ ತಥಾಗತೋತಿ ಪಞ್ಞತ್ತಿ ಹೋತಿ, ತದಭಾವೇನ ತಸ್ಸಾ ಪಞ್ಞತ್ತಿಯಾ ಅಭಾವಂ ಪಸ್ಸನ್ತಸ್ಸ ಅಯಂ ಸತ್ತಸಙ್ಖಾತೋ ಹೋತಿ ತಥಾಗತೋ ಪರಂ ಮರಣಾತಿ ಇದಂ ವಚನಂ ನ ಉಪೇತಿ ನ ಯುಜ್ಜತಿ, ನ ಹೋತಿ ತಥಾಗತೋ ಪರಂ ಮರಣಾತಿಆದಿವಚನಮ್ಪಿ ನ ಉಪೇತಿ ನ ಯುಜ್ಜತೀತಿ ಅತ್ಥೋ.

ಸಂಸನ್ದಿಸ್ಸತೀತಿ ಏಕಂ ಭವಿಸ್ಸತಿ. ಸಮೇಸ್ಸತೀತಿ ನಿರನ್ತರಂ ಭವಿಸ್ಸತಿ. ನ ವಿರೋಧಯಿಸ್ಸತೀತಿ ನ ವಿರುದ್ಧಂ ಪದಂ ಭವಿಸ್ಸತಿ. ಅಗ್ಗಪದಸ್ಮಿನ್ತಿ ದೇಸನಾಯ. ದೇಸನಾ ಹಿ ಇಧ ಅಗ್ಗಪದನ್ತಿ ಅಧಿಪ್ಪೇತಾ.