೯. ಪಠಮಛಫಸ್ಸಾಯತನಸುತ್ತವಣ್ಣನಾ

೭೧. ನವಮೇ ಫಸ್ಸಾಯತನಾನನ್ತಿ ಫಸ್ಸಾಕರಾನಂ. ಅವುಸಿತನ್ತಿ ಅವುಟ್ಠಂ. ಆರಕಾತಿ ದೂರೇ. ಏತ್ಥಾಹಂ, ಭನ್ತೇ, ಅನಸ್ಸಸನ್ತಿ, ಭನ್ತೇ, ಅಹಂ ಏತ್ಥ ಅನಸ್ಸಸಿಂ, ನಟ್ಠೋ ನಾಮ ಅಹನ್ತಿ ವದತಿ. ಭಗವಾ – ‘‘ಅಯಂ ಭಿಕ್ಖು ‘ಅಹಂ ನಾಮ ಇಮಸ್ಮಿಂ ಸಾಸನೇ ನಟ್ಠೋ’ತಿ ವದತಿ, ಕಿನ್ನು ಖ್ವಸ್ಸ ಅಞ್ಞೇಸು ಧಾತುಕಮ್ಮಟ್ಠಾನ-ಕಸಿಣಕಮ್ಮಟ್ಠಾನಾದೀಸು ಅಭಿಯೋಗೋ ಅತ್ಥೀ’’ತಿ ಚಿನ್ತೇತ್ವಾ, ತಮ್ಪಿ ಅಪಸ್ಸನ್ತೋ – ‘‘ಕತರಂ ನು ಖೋ ಕಮ್ಮಟ್ಠಾನಂ ಇಮಸ್ಸ ಸಪ್ಪಾಯಂ ಭವಿಸ್ಸತೀ’’ತಿ ಚಿನ್ತೇಸಿ. ತತೋ ‘‘ಆಯತನಕಮ್ಮಟ್ಠಾನಮೇವ ಸಪ್ಪಾಯ’’ನ್ತಿ ದಿಸ್ವಾ ತಂ ಕಥೇನ್ತೋ ತಂ ಕಿಂ ಮಞ್ಞಸಿ ಭಿಕ್ಖೂತಿಆದಿಮಾಹ. ಸಾಧೂತಿ ತಸ್ಸ ಬ್ಯಾಕರಣೇ ಸಮ್ಪಹಂಸನಂ. ಏಸೇವನ್ತೋ ದುಕ್ಖಸ್ಸಾತಿ ಅಯಮೇವ ವಟ್ಟದುಕ್ಖಸ್ಸನ್ತೋ ಪರಿಚ್ಛೇದೋ, ನಿಬ್ಬಾನನ್ತಿ ಅತ್ಥೋ.