೩-೫. ಪಠಮಸಮಿದ್ಧಿಮಾರಪಞ್ಹಾಸುತ್ತಾದಿವಣ್ಣನಾ

೬೫-೬೭. ತತಿಯೇ ಸಮಿದ್ಧೀತಿ ಅತ್ತಭಾವಸ್ಸ ಸಮಿದ್ಧತಾಯ ಏವಂ ಲದ್ಧನಾಮೋ. ತಸ್ಸ ಕಿರ ಥೇರಸ್ಸ ಅತ್ತಭಾವೋ ಅಭಿರೂಪೋ ಅಹೋಸಿ ಪಾಸಾದಿಕೋ, ಉಕ್ಖಿತ್ತಮಾಲಾಪುಟೋ ವಿಯ ಅಲಙ್ಕತಮಾಲಾಗಬ್ಭೋ ವಿಯ ಚ ಸಬ್ಬಾಕಾರಪಾರಿಪೂರಿಯಾ ಸಮಿದ್ಧೋ. ತಸ್ಮಾ ಸಮಿದ್ಧಿತ್ವೇವ ಸಙ್ಖಂ ಗತೋ. ಮಾರೋತಿ ಮರಣಂ ಪುಚ್ಛತಿ. ಮಾರಪಞ್ಞತ್ತೀತಿ ಮಾರೋತಿ ಪಞ್ಞತ್ತಿ ನಾಮಂ ನಾಮಧೇಯ್ಯಂ. ಅತ್ಥಿ ತತ್ಥ ಮಾರೋ ವಾ ಮಾರಪಞ್ಞತ್ತಿ ವಾತಿ ತತ್ಥ ಮರಣಂ ವಾ ಮರಣನ್ತಿ ಇದಂ ನಾಮಂ ವಾ ಅತ್ಥೀತಿ ದಸ್ಸೇತಿ. ಚತುತ್ಥಂ ಉತ್ತಾನಮೇವ, ತಥಾ ಪಞ್ಚಮಂ.