೮. ಸಮುಗ್ಘಾತಸಾರುಪ್ಪಸುತ್ತವಣ್ಣನಾ

೩೦. ಅಟ್ಠಮೇ ಸಬ್ಬಮಞ್ಞಿತಸಮುಗ್ಘಾತಸಾರುಪ್ಪನ್ತಿ ಸಬ್ಬೇಸಂ ತಣ್ಹಾಮಾನದಿಟ್ಠಿಮಞ್ಞಿತಾನಂ ಸಮುಗ್ಘಾತಾಯ ಅನುಚ್ಛವಿಕಂ. ಇಧಾತಿ ಇಮಸ್ಮಿಂ ಸಾಸನೇ. ಚಕ್ಖುಂ ನ ಮಞ್ಞತೀತಿ ಚಕ್ಖುಂ ಅಹನ್ತಿ ವಾ ಮಮನ್ತಿ ವಾ ಪರೋತಿ ವಾ ಪರಸ್ಸಾತಿ ವಾ ನ ಮಞ್ಞತಿ. ಚಕ್ಖುಸ್ಮಿಂ ನ ಮಞ್ಞತೀತಿ ಅಹಂ ಚಕ್ಖುಸ್ಮಿಂ, ಮಮ ಕಿಞ್ಚನಪಲಿಬೋಧೋ ಚಕ್ಖುಸ್ಮಿಂ ಪರೋ ಚಕ್ಖುಸ್ಮಿಂ, ಪರಸ್ಸ ಕಿಞ್ಚನಪಲಿಬೋಧೋ ಚಕ್ಖುಸ್ಮಿನ್ತಿ ನ ಮಞ್ಞತಿ. ಚಕ್ಖುತೋ ನ ಮಞ್ಞತೀತಿ ಅಹಂ ಚಕ್ಖುತೋ ನಿಗ್ಗತೋ, ಮಮ ಕಿಞ್ಚನಪಲಿಬೋಧೋ ಚಕ್ಖುತೋ ನಿಗ್ಗತೋ, ಪರೋ ಚಕ್ಖುತೋ ನಿಗ್ಗತೋ, ಪರಸ್ಸ ಕಿಞ್ಚನಪಲಿಬೋಧೋ ಚಕ್ಖುತೋ ನಿಗ್ಗತೋತಿ ಏವಮ್ಪಿ ನ ಮಞ್ಞತಿ, ತಣ್ಹಾಮಾನದಿಟ್ಠಿಮಞ್ಞನಾನಂ ಏಕಮ್ಪಿ ನ ಉಪ್ಪಾದೇತೀತಿ ಅತ್ಥೋ. ಚಕ್ಖುಂ ಮೇತಿ ನ ಮಞ್ಞತೀತಿ ಮಮ ಚಕ್ಖೂತಿ ನ ಮಞ್ಞತಿ, ಮಮತ್ತಭೂತಂ ತಣ್ಹಾಮಞ್ಞನಂ ನ ಉಪ್ಪಾದೇತೀತಿ ಅತ್ಥೋ. ಸೇಸಂ ಉತ್ತಾನಮೇವಾತಿ. ಇಮಸ್ಮಿಂ ಸುತ್ತೇ ಚತುಚತ್ತಾಲೀಸಾಯ ಠಾನೇಸು ಅರಹತ್ತಂ ಪಾಪೇತ್ವಾ ವಿಪಸ್ಸನಾ ಕಥಿತಾ.