೭. ದುಕ್ಖಧಮ್ಮಸುತ್ತವಣ್ಣನಾ

೨೪೪. ಸತ್ತಮೇ ದುಕ್ಖಧಮ್ಮಾನನ್ತಿ ದುಕ್ಖಸಮ್ಭವಧಮ್ಮಾನಂ. ಪಞ್ಚಸು ಹಿ ಖನ್ಧೇಸು ಸತಿ ಛೇದನವಧಬನ್ಧನಾದಿಭೇದಂ ದುಕ್ಖಂ ಸಮ್ಭವತಿ, ತಸ್ಮಾ ತೇ ದುಕ್ಖಸಮ್ಭವಧಮ್ಮತ್ತಾ ದುಕ್ಖಧಮ್ಮಾತಿ ವುಚ್ಚನ್ತಿ. ತಥಾ ಖೋ ಪನಸ್ಸಾತಿ ತೇನಾಕಾರೇನಸ್ಸ. ಯಥಾಸ್ಸ ಕಾಮೇ ಪಸ್ಸತೋತಿ ಯೇನಾಕಾರೇನಸ್ಸ ಕಾಮೇ ಪಸ್ಸನ್ತಸ್ಸ. ಯಥಾ ಚರನ್ತನ್ತಿ ಯೇನಾಕಾರೇನ ಚಾರಞ್ಚ ವಿಹಾರಞ್ಚ ಅನುಬನ್ಧಿತ್ವಾ ಚರನ್ತಂ. ಅಙ್ಗಾರಕಾಸೂಪಮಾ ಕಾಮಾ ದಿಟ್ಠಾ ಹೋನ್ತೀತಿ ಪರಿಯೇಟ್ಠಿಮೂಲಕಸ್ಸ ಚೇವ ಪಟಿಸನ್ಧಿಮೂಲಕಸ್ಸ ಚ ದುಕ್ಖಸ್ಸ ವಸೇನ ಅಙ್ಗಾರಕಾಸು ವಿಯ ಮಹಾಪರಿಳಾಹಾತಿ ದಿಟ್ಠಾ ಹೋನ್ತಿ. ಕಾಮೇ ಪರಿಯೇಸನ್ತಾನಞ್ಹಿ ನಾವಾಯ ಮಹಾಸಮುದ್ದೋಗಾಹನಅಜಪಥಸಙ್ಕುಪಥಪಟಿಪಜ್ಜನಉಭತೋಬ್ಯೂಳ್ಹಸಙ್ಗಾಮಪಕ್ಖನ್ದನಾದಿವಸೇನ ಪರಿಯೇಟ್ಠಿಮೂಲಕಮ್ಪಿ, ಕಾಮೇ ಪರಿಭುಞ್ಜನ್ತಾನಂ ಕಾಮಪರಿಭೋಗಚೇತನಾಯ ಚತೂಸು ಅಪಾಯೇಸು ದಿನ್ನಪಟಿಸನ್ಧಿಮೂಲಕಮ್ಪಿ ಮಹಾಪರಿಳಾಹದುಕ್ಖಂ ಉಪ್ಪಜ್ಜತಿ. ಏವಮೇತಸ್ಸ ದುವಿಧಸ್ಸಾಪಿ ದುಕ್ಖಸ್ಸ ವಸೇನ ಅಙ್ಗಾರಕಾಸು ವಿಯ ಮಹಾಪರಿಳಾಹಾತಿ ದಿಟ್ಠಾ ಹೋನ್ತಿ.

ದಾಯನ್ತಿ ಅಟವಿಂ. ಪುರತೋಪಿ ಕಣ್ಟಕೋತಿ ಪುರಿಮಪಸ್ಸೇ ವಿಜ್ಝಿತುಕಾಮೋ ವಿಯ ಆಸನ್ನಟ್ಠಾನೇಯೇವ ಠಿತಕಣ್ಟಕೋ. ಪಚ್ಛತೋತಿಆದೀಸುಪಿ ಏಸೇವ ನಯೋ. ಹೇಟ್ಠಾ ಪನ ಪಾದೇಹಿ ಅಕ್ಕನ್ತಟ್ಠಾನಸ್ಸ ಸನ್ತಿಕೇ, ನ ಅಕ್ಕನ್ತಟ್ಠಾನೇಯೇವ. ಏವಂ ಸೋ ಕಣ್ಟಕಗಬ್ಭಂ ಪವಿಟ್ಠೋ ವಿಯ ಭವೇಯ್ಯ. ಮಾ ಮಂ ಕಣ್ಟಕೋತಿ ಮಾ ಮಂ ಕಣ್ಟಕೋ ವಿಜ್ಝೀತಿ ಕಣ್ಟಕವೇಧಂ ರಕ್ಖಮಾನೋ.

ದನ್ಧೋ, ಭಿಕ್ಖವೇ, ಸತುಪ್ಪಾದೋತಿ ಸತಿಯಾ ಉಪ್ಪಾದೋಯೇವ ದನ್ಧೋ, ಉಪ್ಪನ್ನಮತ್ತಾಯ ಪನ ತಾಯ ಕಾಚಿ ಕಿಲೇಸಾ ನಿಗ್ಗಹಿತಾವ ಹೋನ್ತಿ, ನ ಸಣ್ಠಾತುಂ ಸಕ್ಕೋನ್ತಿ. ಚಕ್ಖುದ್ವಾರಸ್ಮಿಞ್ಹಿ ರಾಗಾದೀಸು ಉಪ್ಪನ್ನೇಸು ದುತಿಯಜವನವಾರೇನ ‘‘ಕಿಲೇಸಾ ಮೇ ಉಪ್ಪನ್ನಾ’’ತಿ ಞತ್ವಾ ತತಿಯೇ ಜವನವಾರೇ ಸಂವರಜವನಂಯೇವ ಜವತಿ. ಅನಚ್ಛರಿಯಞ್ಚೇತಂ, ಯಂ ವಿಪಸ್ಸಕೋ ತತಿಯಜವನವಾರೇ ಕಿಲೇಸೇ ನಿಗ್ಗಣ್ಹೇಯ್ಯ. ಚಕ್ಖುದ್ವಾರೇ ಪನ ಇಟ್ಠಾರಮ್ಮಣೇ ಆಪಾಥಗತೇ ಭವಙ್ಗಂ ಆವಟ್ಟೇತ್ವಾ ಆವಜ್ಜನಾದೀಸು ಉಪ್ಪನ್ನೇಸು ವೋಟ್ಠಬ್ಬನಾನನ್ತರಂ ಸಮ್ಪತ್ತಕಿಲೇಸಜವನವಾರಂ ನಿವತ್ತೇತ್ವಾ ಕುಸಲಮೇವ ಉಪ್ಪಾದೇತಿ. ಆರದ್ಧವಿಪಸ್ಸಕಾನಞ್ಹಿ ಅಯಮಾನಿಸಂಸೋ ಭಾವನಾಪಟಿಸಙ್ಖಾನೇ ಪತಿಟ್ಠಿತಭಾವಸ್ಸ.

ಅಭಿಹಟ್ಠುಂ ಪವಾರೇಯ್ಯುನ್ತಿ ಸುದಿನ್ನತ್ಥೇರಸ್ಸ ವಿಯ ರಟ್ಠಪಾಲಕುಲಪುತ್ತಸ್ಸ ವಿಯ ಚ ಕಾಯೇನ ವಾ ಸತ್ತ ರತನಾನಿ ಅಭಿಹರಿತ್ವಾ ವಾಚಾಯ ವಾ ‘‘ಅಮ್ಹಾಕಂ ಧನತೋ ಯತ್ತಕಂ ಇಚ್ಛಸಿ, ತತ್ತಕಂ ಗಣ್ಹಾ’’ತಿ ವದನ್ತಾ ಪವಾರೇಯ್ಯುಂ. ಅನುದಹನ್ತೀತಿ ಸರೀರೇ ಪಲಿವೇಠಿತತ್ತಾ ಉಣ್ಹಪರಿಳಾಹಂ ಜನೇತ್ವಾ ಅನುದಹನ್ತಿ. ಸಞ್ಜಾತಸೇದೇ ವಾ ಸರೀರೇ ಲಗ್ಗನ್ತಾ ಅನುಸೇನ್ತೀತಿಪಿ ಅತ್ಥೋ. ಯಞ್ಹಿ ತಂ, ಭಿಕ್ಖವೇ, ಚಿತ್ತನ್ತಿ ಇದಂ ಯಸ್ಮಾ ಚಿತ್ತೇ ಅನಾವಟ್ಟನ್ತೇ ಪುಗ್ಗಲಸ್ಸ ಆವಟ್ಟನಂ ನಾಮ ನತ್ಥಿ. ಏವರೂಪಞ್ಹಿ ಚಿತ್ತಂ ಅನಾವಟ್ಟನ್ತಿ, ತಸ್ಮಾ ವುತ್ತಂ. ಇತಿ ಇಮಸ್ಮಿಂ ಸುತ್ತೇ ವಿಪಸ್ಸನಾಬಲಮೇವ ದೀಪಿತಂ.