೪-೬. ಖೀರರುಕ್ಖೋಪಮಸುತ್ತಾದಿವಣ್ಣನಾ

೨೩೧-೨೩೩. ಚತುತ್ಥೇ ಅಪ್ಪಹೀನಟ್ಠೇನ ಅತ್ಥಿ, ತೇನೇವಾಹ ಸೋ ಅಪ್ಪಹೀನೋತಿ. ಪರಿತ್ತಾತಿ, ಪಬ್ಬತಮತ್ತಮ್ಪಿ ರೂಪಂ ಅನಿಟ್ಠಂ ಅರಜನೀಯಂ ಪರಿತ್ತಂ ನಾಮ ಹೋತಿ, ಏವರೂಪಾಪಿಸ್ಸ ರೂಪಾ ಚಿತ್ತಂ ಪರಿಯಾದಿಯನ್ತೀತಿ ದಸ್ಸೇತಿ. ಕೋ ಪನ ವಾದೋ ಅಧಿಮತ್ತಾನನ್ತಿ ಇಟ್ಠಾರಮ್ಮಣಂ ಪನಸ್ಸ ರಜನೀಯಂ ವತ್ಥು ಚಿತ್ತಂ ಪರಿಯಾದಿಯತೀತಿ ಏತ್ಥ ಕಾ ಕಥಾ? ಏತ್ಥ ಚ ನಖಪಿಟ್ಠಿಪಮಾಣಮ್ಪಿ ಮಣಿಮುತ್ತಾದಿ ರಜನೀಯಂ ವತ್ಥು ಅಧಿಮತ್ತಾರಮ್ಮಣಮೇವಾತಿ ವೇದಿತಬ್ಬಂ. ದಹರೋತಿಆದೀನಿ ತೀಣಿಪಿ ಅಞ್ಞಮಞ್ಞವೇವಚನಾನೇವ. ಆಭಿನ್ದೇಯ್ಯಾತಿ ಪಹರೇಯ್ಯ ಪದಾಲೇಯ್ಯ ವಾ. ಪಞ್ಚಮೇ ತದುಭಯನ್ತಿ ತಂ ಉಭಯಂ. ಛಟ್ಠಂ ಉತ್ತಾನಮೇವ.