೮. ಅತ್ಥಿನುಖೋಪರಿಯಾಯಸುತ್ತವಣ್ಣನಾ

೧೫೩. ಅಟ್ಠಮೇ ಯಂ ಪರಿಯಾಯಂ ಆಗಮ್ಮಾತಿ ಯಂ ಕಾರಣಂ ಆಗಮ್ಮ. ಅಞ್ಞತ್ರೇವ ಸದ್ಧಾಯಾತಿ ವಿನಾ ಸದ್ಧಾಯ ಸದ್ಧಂ ಅಪನೇತ್ವಾ. ಏತ್ಥ ಚ ಸದ್ಧಾತಿ ನ ಪಚ್ಚಕ್ಖಾ ಸದ್ಧಾ. ಯೋ ಪನ ಪರಸ್ಸ ಏವಂ ಕಿರ ಏವಂ ಕಿರಾತಿ ಕಥೇನ್ತಸ್ಸ ಸುತ್ವಾ ಉಪ್ಪನ್ನೋ ಸದ್ದಹನಾಕಾರೋ, ತಂ ಸನ್ಧಾಯೇತಂ ವುತ್ತಂ. ರುಚಿಆದೀಸುಪಿ ರುಚಾಪೇತ್ವಾ ಖಮಾಪೇತ್ವಾ ಅತ್ಥೇತನ್ತಿ ಗಹಣಾಕಾರೋ ರುಚಿ ನಾಮ, ಏವಂ ಕಿರ ಭವಿಸ್ಸತೀತಿ ಅನುಸ್ಸವನಂ ಅನುಸ್ಸವೋ, ನಿಸೀದಿತ್ವಾ ಏಕಂ ಕಾರಣಂ ಚಿನ್ತೇನ್ತಸ್ಸ ಕಾರಣಂ ಉಪಟ್ಠಾತಿ, ಏವಂ ಉಪಟ್ಠಿತಸ್ಸ ಅತ್ಥೇತನ್ತಿ ಗಹಣಂ ಆಕಾರಪರಿವಿತಕ್ಕೋ ನಾಮ, ಕಾರಣವಿತಕ್ಕೋತಿ ಅತ್ಥೋ. ಕಾರಣಂ ಚಿನ್ತೇನ್ತಸ್ಸ ಪಾಪಿಕಾ ಲದ್ಧಿ ಉಪ್ಪಜ್ಜತಿ, ತಂ ಅತ್ಥೇಸಾತಿ ಗಹಣಾಕಾರೋ ದಿಟ್ಠಿನಿಜ್ಝಾನಕ್ಖನ್ತಿ ನಾಮ. ಅಞ್ಞಂ ಬ್ಯಾಕರೇಯ್ಯಾತಿ ಇಮಾನಿ ಪಞ್ಚ ಠಾನಾನಿ ಮುಞ್ಚಿತ್ವಾ ಅರಹತ್ತಂ ಬ್ಯಾಕರೇಯ್ಯ. ಇಮಸ್ಮಿಂ ಸುತ್ತೇ ಸೇಖಾಸೇಖಾನಂ ಪಚ್ಚವೇಕ್ಖಣಾ ಕಥಿತಾ.