೧. ಕಮ್ಮನಿರೋಧಸುತ್ತವಣ್ಣನಾ

೧೪೬. ನವಪುರಾಣವಗ್ಗಸ್ಸ ಪಠಮೇ ನವಪುರಾಣಾನೀತಿ ನವಾನಿ ಚ ಪುರಾಣಾನಿ ಚ. ಚಕ್ಖು, ಭಿಕ್ಖವೇ, ಪುರಾಣಕಮ್ಮನ್ತಿ ನ ಚಕ್ಖು ಪುರಾಣಂ, ಕಮ್ಮಮೇವ ಪುರಾಣಂ, ಕಮ್ಮತೋ ಪನ ನಿಬ್ಬತ್ತತ್ತಾ ಪಚ್ಚಯನಾಮೇನ ಏವಂ ವುತ್ತಂ. ಅಭಿಸಙ್ಖತನ್ತಿ ಪಚ್ಚಯೇಹಿ ಅಭಿಸಮಾಗನ್ತ್ವಾ ಕತಂ. ಅಭಿಸಞ್ಚೇತಯಿತನ್ತಿ ಚೇತನಾಯ ಪಕಪ್ಪಿತಂ. ವೇದನಿಯಂ ದಟ್ಠಬ್ಬನ್ತಿ ವೇದನಾಯ ವತ್ಥೂತಿ ಪಸ್ಸಿತಬ್ಬಂ. ನಿರೋಧಾ ವಿಮುತ್ತಿಂ ಫುಸತೀತಿ ಇಮಸ್ಸ ತಿವಿಧಸ್ಸ ಕಮ್ಮಸ್ಸ ನಿರೋಧೇನ ವಿಮುತ್ತಿಂ ಫುಸತಿ. ಅಯಂ ವುಚ್ಚತೀತಿ ಅಯಂ ತಸ್ಸಾ ವಿಮುತ್ತಿಯಾ ಆರಮ್ಮಣಭೂತೋ ನಿರೋಧೋ ಕಮ್ಮನಿರೋಧೋತಿ ವುಚ್ಚತಿ. ಇತಿ ಇಮಸ್ಮಿಂ ಸುತ್ತೇ ಪುಬ್ಬಭಾಗವಿಪಸ್ಸನಾ ಕಥಿತಾ.