೭-೮. ಹಾಲಿದ್ದಿಕಾನಿಸುತ್ತಾದಿವಣ್ಣನಾ

೧೩೦-೧೩೧. ಸತ್ತಮೇ ಮನಾಪಂ ಇತ್ಥೇತನ್ತಿ ಪಜಾನಾತೀತಿ ಯಂ ಅನೇನ ಮನಾಪಂ ರೂಪಂ ದಿಟ್ಠಂ, ತಂ ಇತ್ಥೇತನ್ತಿ ಏವಮೇತಂ ಮನಾಪಮೇವ ತನ್ತಿ ಪಜಾನಾತಿ. ಚಕ್ಖುವಿಞ್ಞಾಣಂ ಸುಖವೇದನಿಯಞ್ಚ ಫಸ್ಸಂ ಪಟಿಚ್ಚಾತಿ ಚಕ್ಖುವಿಞ್ಞಾಣಞ್ಚೇವ, ಯೋ ಚ ಉಪನಿಸ್ಸಯಕೋಟಿಯಾ ವಾ ಅನನ್ತರಕೋಟಿಯಾ ವಾ ಸಮನನ್ತರಕೋಟಿಯಾ ವಾ ಸಮ್ಪಯುತ್ತಕೋಟಿಯಾ ವಾ ಸುಖವೇದನಾಯ ಪಚ್ಚಯೋ ಫಸ್ಸೋ, ತಂ ಸುಖವೇದನಿಯಂ ಫಸ್ಸಞ್ಚ ಪಟಿಚ್ಚ ಉಪ್ಪಜ್ಜತಿ ಸುಖವೇದನಾತಿ. ಏಸ ನಯೋ ಸಬ್ಬತ್ಥ. ಇತಿ ಇಮೇಸು ದ್ವೀಸು ಸುತ್ತೇಸು ಕಿರಿಯಾಮನೋವಿಞ್ಞಾಣಧಾತು ಆವಜ್ಜನಕಿಚ್ಚಾ, ಮನೋಧಾತುಯೇವ ವಾ ಸಮಾನಾ ಮನೋಧಾತುನಾಮೇನ ವುತ್ತಾತಿ ವೇದಿತಬ್ಬಾ. ಅಟ್ಠಮಂ ಉತ್ತಾನಮೇವ.