೭. ಸಾರಿಪುತ್ತಸಂಯುತ್ತಂ

೧-೯. ವಿವೇಕಜಸುತ್ತಾದಿವಣ್ಣನಾ

೩೩೨-೩೪೦. ಸಾರಿಪುತ್ತಸಂಯುತ್ತಸ್ಸ ಪಠಮೇ ನ ಏವಂ ಹೋತೀತಿ ಅಹಙ್ಕಾರಮಮಙ್ಕಾರಾನಂ ಪಹೀನತ್ತಾ ಏವಂ ನ ಹೋತಿ. ದುತಿಯಾದೀಸುಪಿ ಏಸೇವ ನಯೋ. ಪಠಮಾದೀನಿ.

೧೦. ಸುಚಿಮುಖೀಸುತ್ತವಣ್ಣನಾ

೩೪೧. ದಸಮೇ ಸುಚಿಮುಖೀತಿ ಏವಂನಾಮಿಕಾ. ಉಪಸಙ್ಕಮೀತಿ ಥೇರಂ ಅಭಿರೂಪಂ ದಸ್ಸನೀಯಂ ಸುವಣ್ಣವಣ್ಣಂ ಸಮನ್ತಪಾಸಾದಿಕಂ ದಿಸ್ವಾ ‘‘ಇಮಿನಾ ಸದ್ಧಿಂ ಪರಿಹಾಸಂ ಕರಿಸ್ಸಾಮೀ’’ತಿ ಉಪಸಙ್ಕಮಿ. ಅಥ ಥೇರೇನ ತಸ್ಮಿಂ ವಚನೇ ಪಟಿಕ್ಖಿತ್ತೇ ‘‘ಇದಾನಿಸ್ಸ ವಾದಂ ಆರೋಪೇಸ್ಸಾಮೀ’’ತಿ ಮಞ್ಞಮಾನಾ ತೇನ ಹಿ, ಸಮಣ, ಉಬ್ಭಮುಖೋ ಭುಞ್ಜಸೀತಿ ಆಹ. ದಿಸಾಮುಖೋತಿ ಚತುದ್ದಿಸಾಮುಖೋ, ಚತಸ್ಸೋ ದಿಸಾ ಓಲೋಕೇನ್ತೋತಿ ಅತ್ಥೋ. ವಿದಿಸಾಮುಖೋತಿ ಚತಸ್ಸೋ ವಿದಿಸಾ ಓಲೋಕೇನ್ತೋ.

ವತ್ಥುವಿಜ್ಜಾತಿರಚ್ಛಾನವಿಜ್ಜಾಯಾತಿ ವತ್ಥುವಿಜ್ಜಾಸಙ್ಖಾತಾಯ ತಿರಚ್ಛಾನವಿಜ್ಜಾಯ. ವತ್ಥುವಿಜ್ಜಾ ನಾಮ ಲಾಬುವತ್ಥು-ಕುಮ್ಭಣ್ಡವತ್ಥು-ಮೂಲಕವತ್ಥು-ಆದೀನಂ ವತ್ಥೂನಂ ಫಲಸಮ್ಪತ್ತಿಕಾರಣಕಾಲಜಾನನುಪಾಯೋ. ಮಿಚ್ಛಾಜೀವೇನ ಜೀವಿಕಂ ಕಪ್ಪೇನ್ತೀತಿ ತೇನೇವ ವತ್ಥುವಿಜ್ಜಾತಿರಚ್ಛಾನವಿಜ್ಜಾಸಙ್ಖಾತೇನ ಮಿಚ್ಛಾಜೀವೇನ ಜೀವಿಕಂ ಕಪ್ಪೇನ್ತಿ, ತೇಸಂ ವತ್ಥೂನಂ ಸಮ್ಪಾದನೇನ ಪಸನ್ನೇಹಿ ಮನುಸ್ಸೇಹಿ ದಿನ್ನೇ ಪಚ್ಚಯೇ ಪರಿಭುಞ್ಜನ್ತಾ ಜೀವನ್ತೀತಿ ಅತ್ಥೋ. ಅಧೋಮುಖಾತಿ ವತ್ಥುಂ ಓಲೋಕೇತ್ವಾ ಭುಞ್ಜಮಾನವಸೇನ ಅಧೋಮುಖಾ ಭುಞ್ಜನ್ತಿ ನಾಮ. ಏವಂ ಸಬ್ಬತ್ಥ ಯೋಜನಾ ಕಾತಬ್ಬಾ. ಅಪಿ ಚೇತ್ಥ ನಕ್ಖತ್ತವಿಜ್ಜಾತಿ ‘‘ಅಜ್ಜ ಇಮಂ ನಕ್ಖತ್ತಂ ಇಮಿನಾ ನಕ್ಖತ್ತೇನ ಗನ್ತಬ್ಬಂ, ಇಮಿನಾ ಇದಞ್ಚಿದಞ್ಚ ಕಾತಬ್ಬ’’ನ್ತಿ ಏವಂ ಜಾನನವಿಜ್ಜಾ. ದೂತೇಯ್ಯನ್ತಿ ದೂತಕಮ್ಮಂ, ತೇಸಂ ತೇಸಂ ಸಾಸನಂ ಗಹೇತ್ವಾ ತತ್ಥ ತತ್ಥ ಗಮನಂ. ಪಹಿಣಗಮನನ್ತಿ ಏಕಗಾಮಸ್ಮಿಂಯೇವ ಏಕಕುಲಸ್ಸ ಸಾಸನೇನ ಅಞ್ಞಕುಲಂ ಉಪಸಙ್ಕಮನಂ. ಅಙ್ಗವಿಜ್ಜಾತಿ ಇತ್ಥಿಲಕ್ಖಣಪುರಿಸಲಕ್ಖಣವಸೇನ ಅಙ್ಗಸಮ್ಪತ್ತಿಂ ಞತ್ವಾ ‘‘ತಾಯ ಅಙ್ಗಸಮ್ಪತ್ತಿಯಾ ಇದಂ ನಾಮ ಲಬ್ಭತೀ’’ತಿ ಏವಂ ಜಾನನವಿಜ್ಜಾ. ವಿದಿಸಾಮುಖಾತಿ ಅಙ್ಗವಿಜ್ಜಾ ಹಿ ತಂ ತಂ ಸರೀರಕೋಟ್ಠಾಸಂ ಆರಬ್ಭ ಪವತ್ತತ್ತಾ ವಿದಿಸಾಯ ಪವತ್ತಾ ನಾಮ, ತಸ್ಮಾ ತಾಯ ವಿಜ್ಜಾಯ ಜೀವಿಕಂ ಕಪ್ಪೇತ್ವಾ ಭುಞ್ಜನ್ತಾ ವಿದಿಸಾಮುಖಾ ಭುಞ್ಜನ್ತಿ ನಾಮ. ಏವಮಾರೋಚೇಸೀತಿ ‘‘ಧಮ್ಮಿಕಂ ಸಮಣಾ’’ತಿಆದೀನಿ ವದಮಾನಾ ಸಾಸನಸ್ಸ ನಿಯ್ಯಾನಿಕಂ ಗುಣಂ ಕಥೇಸಿ. ತಞ್ಚ ಪರಿಬ್ಬಾಜಿಕಾಯ ಕಥಂ ಸುತ್ವಾ ಪಞ್ಚಮತ್ತಾನಿ ಕುಲಸತಾನಿ ಸಾಸನೇ ಓತರಿಂಸೂತಿ.

ಸಾರಿಪುತ್ತಸಂಯುತ್ತವಣ್ಣನಾ ನಿಟ್ಠಿತಾ.