೮. ನಾಗಸಂಯುತ್ತಂ

೧. ಸುದ್ಧಿಕಸುತ್ತವಣ್ಣನಾ

೩೪೨. ನಾಗಸಂಯುತ್ತೇ ಅಣ್ಡಜಾತಿ ಅಣ್ಡೇ ಜಾತಾ. ಜಲಾಬುಜಾತಿ ವತ್ಥಿಕೋಸೇ ಜಾತಾ. ಸಂಸೇದಜಾತಿ ಸಂಸೇದೇ ಜಾತಾ. ಓಪಪಾತಿಕಾತಿ ಉಪಪತಿತ್ವಾ ವಿಯ ಜಾತಾ. ಇದಞ್ಚ ಪನ ಸುತ್ತಂ ಅಟ್ಠುಪ್ಪತ್ತಿಯಾ ವುತ್ತಂ. ಭಿಕ್ಖೂನಞ್ಹಿ ‘‘ಕತಿ ನು ಖೋ ನಾಗಯೋನಿಯೋ’’ತಿ ಕಥಾ ಉದಪಾದಿ. ಅಥ ಭಗವಾ ಪುಗ್ಗಲಾನಂ ನಾಗಯೋನೀಹಿ ಉದ್ಧರಣತ್ಥಂ ನಾಗಯೋನಿಯೋ ಆವಿಕರೋನ್ತೋ ಇಮಂ ಸುತ್ತಮಾಹ.

೨-೫೦. ಪಣೀತತರಸುತ್ತಾದಿವಣ್ಣನಾ

೩೪೩-೩೯೧. ದುತಿಯಾದೀಸು ವೋಸ್ಸಟ್ಠಕಾಯಾತಿ ಅಹಿತುಣ್ಡಿಕಪರಿಬುದ್ಧಂ ಅಗಣೇತ್ವಾ ವಿಸ್ಸಟ್ಠಕಾಯಾ. ದ್ವಯಕಾರಿನೋತಿ ದುವಿಧಕಾರಿನೋ, ಕುಸಲಾಕುಸಲಕಾರಿನೋತಿ ಅತ್ಥೋ. ಸಚಜ್ಜ ಮಯನ್ತಿ ಸಚೇ ಅಜ್ಜ ಮಯಂ. ಸಹಬ್ಯತಂ ಉಪಪಜ್ಜತೀತಿ ಸಹಭಾವಂ ಆಪಜ್ಜತಿ. ತತ್ರಸ್ಸ ಅಕುಸಲಂ ಉಪಪತ್ತಿಯಾ ಪಚ್ಚಯೋ ಹೋತಿ, ಕುಸಲಂ ಉಪಪನ್ನಾನಂ ಸಮ್ಪತ್ತಿಯಾ. ಅನ್ನನ್ತಿ ಖಾದನೀಯಭೋಜನೀಯಂ. ಪಾನನ್ತಿ ಯಂಕಿಞ್ಚಿ ಪಾನಕಂ. ವತ್ಥನ್ತಿ ನಿವಾಸನಪಾರುಪನಂ. ಯಾನನ್ತಿ ಛತ್ತುಪಾಹನಂ ಆದಿಂ ಕತ್ವಾ ಯಂಕಿಞ್ಚಿ ಗಮನಪಚ್ಚಯಂ. ಮಾಲನ್ತಿ ಯಂಕಿಞ್ಚಿ ಸುಮನಮಾಲಾದಿಪುಪ್ಫಂ. ಗನ್ಧನ್ತಿ ಯಂಕಿಞ್ಚಿ ಚನ್ದನಾದಿಗನ್ಧಂ. ವಿಲೇಪನನ್ತಿ ಯಂಕಿಞ್ಚಿ ಛವಿರಾಗಕರಣಂ. ಸೇಯ್ಯಾವಸಥಪದೀಪೇಯ್ಯನ್ತಿ ಮಞ್ಚಪೀಠಾದಿಸೇಯ್ಯಂ ಏಕಭೂಮಿಕಾದಿಆವಸಥಂ ವಟ್ಟಿತೇಲಾದಿಪದೀಪೂಪಕರಣಞ್ಚ ದೇತೀತಿ ಅತ್ಥೋ. ತೇಸಞ್ಹಿ ದೀಘಾಯುಕತಾಯ ಚ ವಣ್ಣವನ್ತತಾಯ ಚ ಸುಖಬಹುಲತಾಯ ಚ ಪತ್ಥನಂ ಕತ್ವಾ ಇಮಂ ದಸವಿಧಂ ದಾನವತ್ಥುಂ ದತ್ವಾ ತಂ ಸಮ್ಪತ್ತಿಂ ಅನುಭವಿತುಂ ತತ್ಥ ನಿಬ್ಬತ್ತನ್ತಿ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ನಾಗಸಂಯುತ್ತವಣ್ಣನಾ ನಿಟ್ಠಿತಾ.