೭. ಅರಹನ್ತವಗ್ಗೋ

೧. ಉಪಾದಿಯಮಾನಸುತ್ತವಣ್ಣನಾ

೬೩. ಅರಹನ್ತವಗ್ಗಸ್ಸ ಪಠಮೇ ಉಪಾದಿಯಮಾನೋತಿ ತಣ್ಹಾಮಾನದಿಟ್ಠಿವಸೇನ ಗಣ್ಹಮಾನೋ. ಬದ್ಧೋ ಮಾರಸ್ಸಾತಿ ಮಾರಸ್ಸ ಪಾಸೇನ ಬದ್ಧೋ ನಾಮ. ಮುತ್ತೋ ಪಾಪಿಮತೋತಿ ಪಾಪಿಮತೋ ಪಾಸೇನ ಮುತ್ತೋ ನಾಮ ಹೋತಿ. ಪಠಮಂ.

೨. ಮಞ್ಞಮಾನಸುತ್ತವಣ್ಣನಾ

೬೪. ದುತಿಯೇ ಮಞ್ಞಮಾನೋತಿ ತಣ್ಹಾಮಾನದಿಟ್ಠಿಮಞ್ಞನಾಹಿ ಮಞ್ಞಮಾನೋ. ದುತಿಯಂ.

೩. ಅಭಿನನ್ದಮಾನಸುತ್ತವಣ್ಣನಾ

೬೫. ತತಿಯೇ ಅಭಿನನ್ದಮಾನೋತಿ ತಣ್ಹಾಮಾನದಿಟ್ಠಿಅಭಿನನ್ದನಾಹಿಯೇವ ಅಭಿನನ್ದಮಾನೋ. ತತಿಯಂ.

೪-೫. ಅನಿಚ್ಚಸುತ್ತಾದಿವಣ್ಣನಾ

೬೬-೬೮. ಚತುತ್ಥೇ ಛನ್ದೋತಿ ತಣ್ಹಾಛನ್ದೋ. ಪಞ್ಚಮಛಟ್ಠೇಸುಪಿ ಏಸೇವ ನಯೋ. ಚತುತ್ಥಾದೀನಿ.

೭. ಅನತ್ತನಿಯಸುತ್ತವಣ್ಣನಾ

೬೯. ಸತ್ತಮೇ ಅನತ್ತನಿಯನ್ತಿ ನ ಅತ್ತನೋ ಸನ್ತಕಂ, ಅತ್ತನೋ ಪರಿಕ್ಖಾರಭಾವೇನ ಸುಞ್ಞತನ್ತಿ ಅತ್ಥೋ. ಸತ್ತಮಂ.

೮-೧೦. ರಜನೀಯಸಣ್ಠಿತಸುತ್ತಾದಿವಣ್ಣನಾ

೭೦-೭೨. ಅಟ್ಠಮೇ ರಜನೀಯಸಣ್ಠಿತನ್ತಿ ರಜನೀಯೇನ ಆಕಾರೇನ ಸಣ್ಠಿತಂ, ರಾಗಸ್ಸ ಪಚ್ಚಯಭಾವೇನ ಠಿತನ್ತಿ ಅತ್ಥೋ. ನವಮದಸಮಾನಿ ರಾಹುಲಸಂಯುತ್ತೇ ವುತ್ತನಯೇನೇವ ವೇದಿತಬ್ಬಾನೀತಿ. ಅಟ್ಠಮಾದೀನಿ.

ಅರಹನ್ತವಗ್ಗೋ ಸತ್ತಮೋ.