೧. ಉಪಯಸುತ್ತವಣ್ಣನಾ

೫೩. ಉಪಯವಗ್ಗಸ್ಸ ಪಠಮೇ ಉಪಯೋತಿ ತಣ್ಹಾಮಾನದಿಟ್ಠಿವಸೇನ ಪಞ್ಚಕ್ಖನ್ಧೇ ಉಪಗತೋ. ವಿಞ್ಞಾಣನ್ತಿ ಕಮ್ಮವಿಞ್ಞಾಣಂ. ಆಪಜ್ಜೇಯ್ಯಾತಿ ಕಮ್ಮಂ ಜವಾಪೇತ್ವಾ ಪಟಿಸನ್ಧಿಆಕಡ್ಢನಸಮತ್ಥತಾಯ ವುದ್ಧಿಆದೀನಿ ಆಪಜ್ಜೇಯ್ಯ. ವಿಞ್ಞಾಣುಪಯನ್ತಿ ಪದಸ್ಸ ಅಗ್ಗಹಣೇ ಕಾರಣಂ ವುತ್ತಮೇವ. ವೋಚ್ಛಿಜ್ಜತಾರಮ್ಮಣನ್ತಿ ಪಟಿಸನ್ಧಿಆಕಡ್ಢನಸಮತ್ಥತಾಯ ಅಭಾವೇನ ಆರಮ್ಮಣಂ ವೋಚ್ಛಿಜ್ಜತಿ. ಪತಿಟ್ಠಾ ವಿಞ್ಞಾಣಸ್ಸಾತಿ ಕಮ್ಮವಿಞ್ಞಾಣಸ್ಸ ಪತಿಟ್ಠಾ ನ ಹೋತಿ. ತದಪ್ಪತಿಟ್ಠಿತನ್ತಿ ತಂ ಅಪ್ಪತಿಟ್ಠಿತಂ. ಅನಭಿಸಙ್ಖಚ್ಚ ವಿಮುತ್ತನ್ತಿ ಪಟಿಸನ್ಧಿಂ ಅನಭಿಸಙ್ಖರಿತ್ವಾ ವಿಮುತ್ತಂ. ಪಠಮಂ.