೪. ನವಸುತ್ತವಣ್ಣನಾ

೨೩೮. ಚತುತ್ಥೇ ಅಪ್ಪೋಸ್ಸುಕ್ಕೋತಿ ನಿರುಸ್ಸುಕ್ಕೋ. ಸಙ್ಕಸಾಯತೀತಿ ವಿಹರತಿ. ವೇಯ್ಯಾವಚ್ಚನ್ತಿ ಚೀವರೇ ಕತ್ತಬ್ಬಕಿಚ್ಚಂ. ಆಭಿಚೇತಸಿಕಾನನ್ತಿ ಅಭಿಚಿತ್ತಂ ಉತ್ತಮಚಿತ್ತಂ ನಿಸ್ಸಿತಾನಂ. ನಿಕಾಮಲಾಭೀತಿ ಇಚ್ಛಿತಿಚ್ಛಿತಕ್ಖಣೇ ಸಮಾಪಜ್ಜನಸಮತ್ಥತಾಯ ನಿಕಾಮಲಾಭೀ. ಅಕಿಚ್ಛಲಾಭೀತಿ ಝಾನಪಾರಿಪನ್ಥಿಕೇ ಸುಖೇನ ವಿಕ್ಖಮ್ಭೇತ್ವಾ ಸಮಾಪಜ್ಜನಸಮತ್ಥತಾಯ ಅದುಕ್ಖಲಾಭೀ. ಅಕಸಿರಲಾಭೀತಿ ಯಥಾಪರಿಚ್ಛೇದೇನ ವುಟ್ಠಾನಸಮತ್ಥತಾಯ ವಿಪುಲಲಾಭೀ, ಪಗುಣಜ್ಝಾನೋತಿ ಅತ್ಥೋ. ಸಿಥಿಲಮಾರಬ್ಭಾತಿ ಸಿಥಿಲವೀರಿಯಂ ಪವತ್ತೇತ್ವಾ. ಚತುತ್ಥಂ.