೭. ನತುಮ್ಹಸುತ್ತವಣ್ಣನಾ

೩೭. ಸತ್ತಮೇ ನ ತುಮ್ಹಾಕನ್ತಿ ಅತ್ತನಿ ಹಿ ಸತಿ ಅತ್ತನಿಯಂ ನಾಮ ಹೋತಿ. ಅತ್ತಾಯೇವ ಚ ನತ್ಥಿ, ತಸ್ಮಾ ‘‘ನ ತುಮ್ಹಾಕ’’ನ್ತಿ ಆಹ. ನಪಿ ಅಞ್ಞೇಸನ್ತಿ ಅಞ್ಞೋ ನಾಮ ಪರೇಸಂ ಅತ್ತಾ, ತಸ್ಮಿಂ ಸತಿ ಅಞ್ಞೇಸಂ ನಾಮ ಸಿಯಾ, ಸೋಪಿ ನತ್ಥಿ, ತಸ್ಮಾ ‘‘ನಪಿ ಅಞ್ಞೇಸ’’ನ್ತಿ ಆಹ. ಪುರಾಣಮಿದಂ, ಭಿಕ್ಖವೇ, ಕಮ್ಮನ್ತಿ ನಯಿದಂ ಪುರಾಣಕಮ್ಮಮೇವ, ಪುರಾಣಕಮ್ಮನಿಬ್ಬತ್ತೋ ಪನೇಸ ಕಾಯೋ, ತಸ್ಮಾ ಪಚ್ಚಯವೋಹಾರೇನ ಏವಂ ವುತ್ತೋ. ಅಭಿಸಙ್ಖತನ್ತಿಆದಿ ಕಮ್ಮವೋಹಾರಸ್ಸೇವ ವಸೇನ ಪುರಿಮಲಿಙ್ಗಸಭಾಗತಾಯ ವುತ್ತಂ, ಅಯಂ ಪನೇತ್ಥ ಅತ್ಥೋ – ಅಭಿಸಙ್ಖತನ್ತಿ ಪಚ್ಚಯೇಹಿ ಕತೋತಿ ದಟ್ಠಬ್ಬೋ. ಅಭಿಸಞ್ಚೇತಯಿತನ್ತಿ ಚೇತನಾವತ್ಥುಕೋ ಚೇತನಾಮೂಲಕೋತಿ ದಟ್ಠಬ್ಬೋ. ವೇದನಿಯನ್ತಿ ವೇದನಿಯವತ್ಥೂತಿ ದಟ್ಠಬ್ಬೋ. ಸತ್ತಮಂ.