೮. ನಗರವಿನ್ದೇಯ್ಯಸುತ್ತವಣ್ಣನಾ

೪೩೫. ಏವಂ ಮೇ ಸುತನ್ತಿ ನಗರವಿನ್ದೇಯ್ಯಸುತ್ತಂ. ತತ್ಥ ಸಮವಿಸಮಂ ಚರನ್ತೀತಿ ಕಾಲೇನ ಸಮಂ ಚರನ್ತಿ, ಕಾಲೇನ ವಿಸಮಂ. ಸಮಚರಿಯಮ್ಪಿ ಹೇತನ್ತಿ ಸಮಚರಿಯಮ್ಪಿ ಹಿ ಏತಂ.

೪೩೭. ಕೇ ಆಕಾರಾತಿ ಕಾನಿ ಕಾರಣಾನಿ? ಕೇ ಅನ್ವಯಾತಿ ಕಾ ಅನುಬುದ್ಧಿಯೋ? ನತ್ಥಿ ಖೋ ಪನ ತತ್ಥಾತಿ ಕಸ್ಮಾ ಆಹ, ನನು ಅರಞ್ಞೇ ಹರಿತತಿಣಚಮ್ಪಕವನಾದಿವಸೇನ ಅತಿಮನುಞ್ಞಾ ರೂಪಾದಯೋ ಪಞ್ಚ ಕಾಮಗುಣಾ ಅತ್ಥೀತಿ? ನೋ ನತ್ಥಿ. ನ ಪನೇತಂ ವನಸಣ್ಡೇನ ಕಥಿತಂ, ಇತ್ಥಿರೂಪಾದೀನಿ ಪನ ಸನ್ಧಾಯೇತಂ ಕಥಿತಂ. ತಾನಿ ಹಿ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠನ್ತಿ. ಯಥಾಹ – ‘‘ನಾಹಂ, ಭಿಕ್ಖವೇ, ಅಞ್ಞಂ ಏಕರೂಪಮ್ಪಿ ಸಮನುಪಸ್ಸಾಮಿ, ಯಂ ಏವಂ ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತಿ, ಯಥಯಿದಂ, ಭಿಕ್ಖವೇ, ಇತ್ಥಿರೂಪಂ. ಇತ್ಥಿರೂಪಂ, ಭಿಕ್ಖವೇ, ಪುರಿಸಸ್ಸ ಚಿತ್ತಂ ಪರಿಯಾದಾಯ ತಿಟ್ಠತೀ’’ತಿ (ಅ. ನಿ. ೧.೧) ವಿತ್ಥಾರೇತಬ್ಬಂ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ

ನಗರವಿನ್ದೇಯ್ಯಸುತ್ತವಣ್ಣನಾ ನಿಟ್ಠಿತಾ.