೭. ಗಣಕಮೋಗ್ಗಲ್ಲಾನಸುತ್ತವಣ್ಣನಾ

೭೪. ಏವಂ ಮೇ ಸುತನ್ತಿ ಗಣಕಮೋಗ್ಗಲ್ಲಾನಸುತ್ತಂ. ತತ್ಥ ಯಾವ ಪಚ್ಛಿಮಸೋಪಾನಕಳೇವರಾತಿ ಯಾವ ಪಠಮಸೋಪಾನಫಲಕಾ ಏಕದಿವಸೇನೇವ ಸತ್ತಭೂಮಿಕೋ ಪಾಸಾದೋ ನ ಸಕ್ಕಾ ಕಾತುಂ, ವತ್ಥುಂ ಸೋಧೇತ್ವಾ ಥಮ್ಭುಸ್ಸಾಪನತೋ ಪಟ್ಠಾಯ ಪನ ಯಾವ ಚಿತ್ತಕಮ್ಮಕರಣಾ ಅನುಪುಬ್ಬಕಿರಿಯಾ ಚೇತ್ಥ ಪಞ್ಞಾಯತೀತಿ ದಸ್ಸೇತಿ. ಯದಿದಂ ಅಜ್ಝೇನೇತಿ ತಯೋಪಿ ವೇದಾ ನ ಸಕ್ಕಾ ಏಕದಿವಸೇನೇವ ಅಧೀಯಿತುಂ, ಏತೇಸಂ ಅಜ್ಝೇನೇಪಿ ಪನ ಅನುಪುಬ್ಬಕಿರಿಯಾವ ಪಞ್ಞಾಯತೀತಿ ದಸ್ಸೇತಿ. ಇಸ್ಸತ್ಥೇತಿ ಆವುಧವಿಜ್ಜಾಯಪಿ ಏಕದಿವಸೇನೇವ ವಾಲವೇಧಿ ನಾಮ ನ ಸಕ್ಕಾ ಕಾತುಂ, ಠಾನಸಮ್ಪಾದನಮುಟ್ಠಿಕರಣಾದೀಹಿ ಪನ ಏತ್ಥಾಪಿ ಅನುಪುಬ್ಬಕಿರಿಯಾ ಪಞ್ಞಾಯತೀತಿ ದಸ್ಸೇತಿ. ಸಙ್ಖಾನೇತಿ ಗಣನಾಯ. ತತ್ಥ ಅನುಪುಬ್ಬಕಿರಿಯಂ ಅತ್ತನಾವ ದಸ್ಸೇನ್ತೋ ಏವಂ ಗಣಾಪೇಮಾತಿಆದಿಮಾಹ.

೭೫. ಸೇಯ್ಯಥಾಪಿ ಬ್ರಾಹ್ಮಣಾತಿ ಇಧ ಭಗವಾ ಯಸ್ಮಾ ಬಾಹಿರಸಮಯೇ ಯಥಾ ಯಥಾ ಸಿಪ್ಪಂ ಉಗ್ಗಣ್ಹನ್ತಿ, ತಥಾ ತಥಾ ಕೇರಾಟಿಕಾ ಹೋನ್ತಿ, ತಸ್ಮಾ ಅತ್ತನೋ ಸಾಸನಂ ಬಾಹಿರಸಮಯೇನ ಅನುಪಮೇತ್ವಾ ಭದ್ರಅಸ್ಸಾಜಾನೀಯೇನ ಉಪಮೇನ್ತೋ ಸೇಯ್ಯಥಾಪೀತಿಆದಿಮಾಹ. ಭದ್ರೋ ಹಿ ಅಸ್ಸಾಜಾನೀಯೋ ಯಸ್ಮಿಂ ಕಾರಣೇ ದಮಿತೋ ಹೋತಿ, ತಂ ಜೀವಿತಹೇತುಪಿ ನಾತಿಕ್ಕಮತಿ. ಏವಮೇವ ಸಾಸನೇ ಸಮ್ಮಾಪಟಿಪನ್ನೋ ಕುಲಪುತ್ತೋ ಸೀಲವೇಲಂ ನಾತಿಕ್ಕಮತಿ. ಮುಖಾಧಾನೇತಿ ಮುಖಟ್ಠಪನೇ.

೭೬. ಸತಿಸಮ್ಪಜಞ್ಞಾಯ ಚಾತಿ ಸತಿಸಮ್ಪಜಞ್ಞಾಹಿ ಸಮಙ್ಗಿಭಾವತ್ಥಾಯ. ದ್ವೇ ಹಿ ಖೀಣಾಸವಾ ಸತತವಿಹಾರೀ ಚ ನೋಸತತವಿಹಾರೀ ಚ. ತತ್ಥ ಸತತವಿಹಾರೀ ಯಂಕಿಞ್ಚಿ ಕಮ್ಮಂ ಕತ್ವಾಪಿ ಫಲಸಮಾಪತ್ತಿಂ ಸಮಾಪಜ್ಜಿತುಂ ಸಕ್ಕೋತಿ, ನೋ ಸತತವಿಹಾರೀ ಪನ ಅಪ್ಪಮತ್ತಕೇಪಿ ಕಿಚ್ಚೇ ಕಿಚ್ಚಪ್ಪಸುತೋ ಹುತ್ವಾ ಫಲಸಮಾಪತ್ತಿಂ ಅಪ್ಪೇತುಂ ನ ಸಕ್ಕೋತಿ.

ತತ್ರಿದಂ ವತ್ಥು – ಏಕೋ ಕಿರ ಖೀಣಾಸವತ್ಥೇರೋ ಖೀಣಾಸವಸಾಮಣೇರಂ ಗಹೇತ್ವಾ ಅರಞ್ಞವಾಸಂ ಗತೋ, ತತ್ಥ ಮಹಾಥೇರಸ್ಸ ಸೇನಾಸನಂ ಪತ್ತಂ, ಸಾಮಣೇರಸ್ಸ ನ ಪಾಪುಣಾತಿ, ತಂ ವಿತಕ್ಕೇನ್ತೋ ಥೇರೋ ಏಕದಿವಸಮ್ಪಿ ಫಲಸಮಾಪತ್ತಿಂ ಅಪ್ಪೇತುಂ ನಾಸಕ್ಖಿ. ಸಾಮಣೇರೋ ಪನ ತೇಮಾಸಂ ಫಲಸಮಾಪತ್ತಿರತಿಯಾ ವೀತಿನಾಮೇತ್ವಾ ‘‘ಸಪ್ಪಾಯೋ, ಭನ್ತೇ, ಅರಞ್ಞವಾಸೋ ಜಾತೋ’’ತಿ ಥೇರಂ ಪುಚ್ಛಿ. ಥೇರೋ ‘‘ನ ಜಾತೋ, ಆವುಸೋ’’ತಿ ಆಹ. ಇತಿ ಯೋ ಏವರೂಪೋ ಖೀಣಾಸವೋ, ಸೋ ಇಮೇ ಧಮ್ಮೇ ಆದಿತೋ ಪಟ್ಠಾಯ ಆವಜ್ಜಿತ್ವಾವ ಸಮಾಪಜ್ಜಿತುಂ ಸಕ್ಖಿಸ್ಸತೀತಿ ದಸ್ಸೇನ್ತೋ ‘‘ಸತಿಸಮ್ಪಜಞ್ಞಾಯ ಚಾ’’ತಿ ಆಹ.

೭೮. ಯೇಮೇ, ಭೋ ಗೋತಮಾತಿ ತಥಾಗತೇ ಕಿರ ಕಥಯನ್ತೇವ ಬ್ರಾಹ್ಮಣಸ್ಸ ‘‘ಇಮೇ ಪುಗ್ಗಲಾ ನ ಆರಾಧೇನ್ತಿ, ಇಮೇ ಆರಾಧೇನ್ತೀ’’ತಿ ನಯೋ ಉದಪಾದಿ, ತಂ ದಸ್ಸೇನ್ತೋ ಏವಂ ವತ್ತುಮಾರದ್ಧೋ.

ಪರಮಜ್ಜಧಮ್ಮೇಸೂತಿ ಅಜ್ಜಧಮ್ಮಾ ನಾಮ ಛಸತ್ಥಾರಧಮ್ಮಾ, ತೇಸು ಗೋತಮವಾದೋವ, ಪರಮೋ ಉತ್ತಮೋತಿ ಅತ್ಥೋ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ

ಗಣಕಮೋಗ್ಗಲ್ಲಾನಸುತ್ತವಣ್ಣನಾ ನಿಟ್ಠಿತಾ.