೭. ಪಿಯಜಾತಿಕಸುತ್ತವಣ್ಣನಾ

೩೫೩. ಏವಂ ಮೇ ಸುತನ್ತಿ ಪಿಯಜಾತಿಕಸುತ್ತಂ. ತತ್ಥ ನೇವ ಕಮ್ಮನ್ತಾ ಪಟಿಭನ್ತೀತಿ ನ ಸಬ್ಬೇನ ಸಬ್ಬಂ ಪಟಿಭನ್ತಿ, ಪಕತಿನಿಯಾಮೇನ ಪನ ನ ಪಟಿಭನ್ತಿ. ದುತಿಯಪದೇಪಿ ಏಸೇವ ನಯೋ. ಏತ್ಥ ಚ ನ ಪಟಿಭಾತೀತಿ ನ ರುಚ್ಚತಿ. ಆಳಾಹನನ್ತಿ ಸುಸಾನಂ. ಅಞ್ಞಥತ್ತನ್ತಿ ವಿವಣ್ಣತಾಯ ಅಞ್ಞಥಾಭಾವೋ. ಇನ್ದ್ರಿಯಾನಿ ನಾಮ ಮನೋವಿಞ್ಞೇಯ್ಯಾ ಧಮ್ಮಾ, ಪತಿಟ್ಠಿತೋಕಾಸಂ ಪನ ಸನ್ಧಾಯ ಇದಂ ವುತ್ತಂ. ಪಿಯಜಾತಿಕಾತಿ ಪಿಯತೋ ಜಾಯನ್ತಿ. ಪಿಯಪ್ಪಭಾವಿಕಾತಿ ಪಿಯತೋ ಪಭವನ್ತಿ.

೩೫೫. ಸಚೇ ತಂ, ಮಹಾರಾಜಾತಿ ತಸ್ಸ ಅತ್ಥಂ ಅಸಲ್ಲಕ್ಖಯಮಾನಾಪಿ ಸತ್ಥರಿ ಸದ್ಧಾಯ ಏವಂ ವದತಿ. ಚರ ಪಿರೇತಿ ಅಪೇಹಿ ಅಮ್ಹಾಕಂ ಪರೇ, ಅನಜ್ಝತ್ತಿಕಭೂತೇತಿ ಅತ್ಥೋ. ಅಥ ವಾ ಚರ ಪಿರೇತಿ ಪರತೋ ಗಚ್ಛ, ಮಾ ಇಧ ತಿಟ್ಠಾತಿಪಿ ಅತ್ಥೋ.

೩೫೬. ದ್ವಿಧಾ ಛೇತ್ವಾತಿ ಅಸಿನಾ ದ್ವೇ ಕೋಟ್ಠಾಸೇ ಕರೋನ್ತೋ ಛಿನ್ದಿತ್ವಾ. ಅತ್ತಾನಂ ಉಪ್ಫಾಲೇಸೀತಿ ತೇನೇವ ಅಸಿನಾ ಅತ್ತನೋ ಉದರಂ ಫಾಲೇಸಿ. ಯದಿ ಹಿ ತಸ್ಸ ಸಾ ಅಪ್ಪಿಯಾ ಭವೇಯ್ಯ, ಇದಾನಿ ಅಞ್ಞಂ ಮಾತುಗಾಮಂ ಗಣ್ಹಿಸ್ಸಾಮೀತಿ ಅತ್ತಾನಂ ನ ಘಾತೇಯ್ಯ. ಯಸ್ಮಾ ಪನಸ್ಸ ಸಾ ಪಿಯಾ ಅಹೋಸಿ, ತಸ್ಮಾ ಪರಲೋಕೇಪಿ ತಾಯ ಸದ್ಧಿಂ ಸಮಙ್ಗಿಭಾವಂ ಪತ್ಥಯಮಾನೋ ಏವಮಕಾಸಿ.

೩೫೭. ಪಿಯಾ ತೇ ವಜಿರೀತಿ ಏವಂ ಕಿರಸ್ಸಾ ಅಹೋಸಿ – ‘‘ಸಚಾಹಂ, ‘ಭೂತಪುಬ್ಬಂ, ಮಹಾರಾಜ, ಇಮಿಸ್ಸಾಯೇವ ಸಾವತ್ಥಿಯಂ ಅಞ್ಞತರಿಸ್ಸಾ ಇತ್ಥಿಯಾ’ತಿಆದಿಕಥಂ ಕಥೇಯ್ಯಂ, ‘ಕೋ ತೇ ಏವಂ ಅಕಾಸಿ, ಅಪೇಹಿ ನತ್ಥಿ ಏತ’ನ್ತಿ ಮಂ ಪಟಿಸೇಧೇಯ್ಯ, ವತ್ತಮಾನೇನೇವ ನಂ ಸಞ್ಞಾಪೇಸ್ಸಾಮೀ’’ತಿ ಚಿನ್ತೇತ್ವಾ ಏವಮಾಹ. ವಿಪರಿಣಾಮಞ್ಞಥಾಭಾವಾತಿ ಏತ್ಥ ಮರಣವಸೇನ ವಿಪರಿಣಾಮೋ, ಕೇನಚಿ ಸದ್ಧಿಂ ಪಲಾಯಿತ್ವಾ ಗಮನವಸೇನ ಅಞ್ಞಥಾಭಾವೋ ವೇದಿತಬ್ಬೋ.

ವಾಸಭಾಯಾತಿ ವಾಸಭಾ ನಾಮ ರಞ್ಞೋ ಏಕಾ ದೇವೀ, ತಂ ಸನ್ಧಾಯಾಹ.

ಪಿಯಾ ತೇ ಅಹನ್ತಿ ಕಸ್ಮಾ ಸಬ್ಬಪಚ್ಛಾ ಆಹ? ಏವಂ ಕಿರಸ್ಸಾ ಅಹೋಸಿ – ‘‘ಅಯಂ ರಾಜಾ ಮಯ್ಹಂ ಕುಪಿತೋ, ಸಚಾಹಂ ಸಬ್ಬಪಠಮಂ ‘ಪಿಯಾ ತೇ ಅಹ’ನ್ತಿ ಪುಚ್ಛೇಯ್ಯಂ, ‘ನ ಮೇ ತ್ವಂ ಪಿಯಾ, ಚರ ಪಿರೇ’ತಿ ವದೇಯ್ಯ, ಏವಂ ಸನ್ತೇ ಕಥಾ ಪತಿಟ್ಠಾನಂ ನ ಲಭಿಸ್ಸತೀ’’ತಿ ಕಥಾಯ ಪತಿಟ್ಠಾನತ್ಥಂ ಸಬ್ಬಪಚ್ಛಾ ಪುಚ್ಛಿ. ಕಾಸಿಕೋಸಲೇಸು ಛಡ್ಡಿತಭಾವೇನ ವಿಪರಿಣಾಮೋ, ಪಟಿರಾಜೂನಂ ಹತ್ಥಗಮನವಸೇನ ಅಞ್ಞಥಾಭಾವೋ ವೇದಿತಬ್ಬೋ.

ಆಚಮೇಹೀತಿ ಆಚಮನೋದಕಂ ದೇಹಿ. ಆಚಮಿತ್ವಾ ಹತ್ಥಪಾದೇ ಧೋವಿತ್ವಾ ಮುಖಂ ವಿಕ್ಖಾಲೇತ್ವಾ ಸತ್ಥಾರಂ ನಮಸ್ಸಿತುಕಾಮೋ ಏವಮಾಹ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ

ಪಿಯಜಾತಿಕಸುತ್ತವಣ್ಣನಾ ನಿಟ್ಠಿತಾ.