೮. ಬಾಹಿತಿಕಸುತ್ತವಣ್ಣನಾ

೩೫೮. ಏವಂ ಮೇ ಸುತನ್ತಿ ಬಾಹಿತಿಕಸುತ್ತಂ. ತತ್ಥ ಏಕಪುಣ್ಡರೀಕಂ ನಾಗನ್ತಿ ಏವಂನಾಮಕಂ ಹತ್ಥಿಂ. ತಸ್ಸ ಕಿರ ಫಾಸುಕಾನಂ ಉಪರಿ ತಾಲಫಲಮತ್ತಂ ಪಣ್ಡರಟ್ಠಾನಂ ಅತ್ಥಿ, ತೇನಸ್ಸ ಏಕಪುಣ್ಡರೀಕೋತಿ ನಾಮಂ ಅಕಂಸು. ಸಿರಿವಡ್ಢಂ ಮಹಾಮತ್ತನ್ತಿ ಪಚ್ಚೇಕಹತ್ಥಿಂ ಅಭಿರುಹಿತ್ವಾ ಕಥಾಫಾಸುಕತ್ಥಂ ಸದ್ಧಿಂ ಗಚ್ಛನ್ತಂ ಏವಂನಾಮಕಂ ಮಹಾಮತ್ತಂ. ಆಯಸ್ಮಾನೋತಿ ಏತ್ಥ ನೋತಿ ಪುಚ್ಛಾಯ ನಿಪಾತೋ. ಮಹಾಮತ್ತೋ ಥೇರಸ್ಸ ಸಙ್ಘಾಟಿಪತ್ತಧಾರಣಾಕಾರಂ ಸಲ್ಲಕ್ಖೇತ್ವಾ ‘‘ಏವಂ, ಮಹಾರಾಜಾ’’ತಿ ಆಹ.

೩೫೯. ಓಪಾರಮ್ಭೋತಿ ಉಪಾರಮ್ಭಂ ದೋಸಂ ಆರೋಪನಾರಹೋ. ಕಿಂ ಪುಚ್ಛಾಮೀತಿ ರಾಜಾ ಪುಚ್ಛತಿ. ಸುನ್ದರಿವತ್ಥುಸ್ಮಿಂ ಉಪ್ಪನ್ನಮಿದಂ ಸುತ್ತಂ, ತಂ ಪುಚ್ಛಾಮೀತಿ ಪುಚ್ಛತಿ. ಯಞ್ಹಿ ಮಯಂ, ಭನ್ತೇತಿ, ಭನ್ತೇ, ಯಂ ಮಯಂ ವಿಞ್ಞೂಹೀತಿ ಇದಂ ಪದಂ ಗಹೇತ್ವಾ ಪಞ್ಹೇನ ಪರಿಪೂರೇತುಂ ನಾಸಕ್ಖಿಮ್ಹಾ, ತಂ ಕಾರಣಂ ಆಯಸ್ಮತಾ ಏವಂ ವದನ್ತೇನ ಪರಿಪೂರಿತಂ.

೩೬೦. ಅಕುಸಲೋತಿ ಅಕೋಸಲ್ಲಸಮ್ಭೂತೋ. ಸಾವಜ್ಜೋತಿ ಸದೋಸೋ. ಸಬ್ಯಾಬಜ್ಝೋತಿ ಸದುಕ್ಖೋ. ದುಕ್ಖವಿಪಾಕೋತಿ ಇಧ ನಿಸ್ಸನ್ದವಿಪಾಕೋ ಕಥಿತೋ. ತಸ್ಸಾತಿ ತಸ್ಸ ಏವಂ ಅತ್ತಬ್ಯಾಬಾಧಾದೀನಂ ಅತ್ಥಾಯ ಪವತ್ತಕಾಯಸಮಾಚಾರಸ್ಸ.

ಸಬ್ಬಾಕುಸಲಧಮ್ಮಪಹೀನೋ ಖೋ, ಮಹಾರಾಜ, ತಥಾಗತೋ ಕುಸಲಧಮ್ಮಸಮನ್ನಾಗತೋತಿ ಏತ್ಥ ಸಬ್ಬೇಸಂಯೇವ ಅಕುಸಲಾನಂ ಧಮ್ಮಾನಂ ಪಹಾನಂ ವಣ್ಣೇತೀತಿ. ಆಮ ವಣ್ಣೇತೀತಿ ವುತ್ತೇ ಯಥಾ ಪುಚ್ಛಾ, ತಥಾ ಅತ್ಥೋ ವುತ್ತೋ ಭವೇಯ್ಯ. ಏವಂ ಬ್ಯಾಕರಣಂ ಪನ ನ ಭಾರಿಯಂ. ಅಪ್ಪಹೀನಅಕುಸಲೋಪಿ ಹಿ ಪಹಾನಂ ವಣ್ಣೇಯ್ಯ, ಭಗವಾ ಪನ ಪಹೀನಾಕುಸಲತಾಯ ಯಥಾಕಾರೀ ತಥಾವಾದೀತಿ ದಸ್ಸೇತುಂ ಏವಂ ಬ್ಯಾಕಾಸಿ. ಸುಕ್ಕಪಕ್ಖೇಪಿ ಏಸೇವ ನಯೋ.

೩೬೨. ಬಾಹಿತಿಕಾತಿ ಬಾಹಿತಿರಟ್ಠೇ ಉಟ್ಠಿತವತ್ಥಸ್ಸೇತಂ ನಾಮಂ. ಸೋಳಸಸಮಾ ಆಯಾಮೇನಾತಿ ಆಯಾಮೇನ ಸಮಸೋಳಸಹತ್ಥಾ. ಅಟ್ಠಸಮಾ ವಿತ್ಥಾರೇನಾತಿ ವಿತ್ಥಾರೇನ ಸಮಅಟ್ಠಹತ್ಥಾ.

೩೬೩. ಭಗವತೋ ಪಾದಾಸೀತಿ ಭಗವತೋ ನಿಯ್ಯಾತೇಸಿ. ದತ್ವಾ ಚ ಪನ ಗನ್ಧಕುಟಿಯಂ ವಿತಾನಂ ಕತ್ವಾ ಬನ್ಧಿ. ತತೋ ಪಟ್ಠಾಯ ಗನ್ಧಕುಟಿ ಭಿಯ್ಯೋಸೋಮತ್ತಾಯ ಸೋಭಿ. ಸೇಸಂ ಸಬ್ಬತ್ಥ ಉತ್ತಾನಮೇವ. ನೇಯ್ಯಪುಗ್ಗಲಸ್ಸ ಪನ ವಸೇನ ಅಯಂ ದೇಸನಾ ನಿಟ್ಠಿತಾತಿ.

ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ

ಬಾಹಿತಿಕಸುತ್ತವಣ್ಣನಾ ನಿಟ್ಠಿತಾ.