೧೭. ಕೇಸಕಾರೀವಿಮಾನವಣ್ಣನಾ

ಇದಂ ವಿಮಾನಂ ರುಚಿರಂ ಪಭಸ್ಸರನ್ತಿ ಕೇಸಕಾರೀವಿಮಾನಂ. ತಸ್ಸ ಕಾ ಉಪ್ಪತ್ತಿ? ಭಗವಾ ಬಾರಾಣಸಿಯಂ ವಿಹರತಿ ಇಸಿಪತನೇ ಮಿಗದಾಯೇ. ತೇನ ಖೋ ಪನ ಸಮಯೇನ ಸಮ್ಬಹುಲಾ ಭಿಕ್ಖೂ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಬಾರಾಣಸಿಂ ಪಿಣ್ಡಾಯ ಪವಿಸಿಂಸು. ತೇ ಅಞ್ಞತರಸ್ಸ ಬ್ರಾಹ್ಮಣಸ್ಸ ಗೇಹದ್ವಾರಸಮೀಪೇನ ಗಚ್ಛನ್ತಿ. ತಸ್ಮಿಞ್ಚ ಗೇಹೇ ಬ್ರಾಹ್ಮಣಸ್ಸ ಧೀತಾ ಕೇಸಕಾರೀ ನಾಮ ಗೇಹದ್ವಾರಸಮೀಪೇ ಮಾತು ಸೀಸತೋ ಊಕಾ ಗಣ್ಹನ್ತೀ ತೇ ಭಿಕ್ಖೂ ಗಚ್ಛನ್ತೇ ದಿಸ್ವಾ ಮಾತರಂ ಆಹ ‘‘ಅಮ್ಮ, ಇಮೇ ಪಬ್ಬಜಿತಾ ಪಠಮೇನ ಯೋಬ್ಬನೇನ ಸಮನ್ನಾಗತಾ ಅಭಿರೂಪಾ ದಸ್ಸನೀಯಾ ಪಾಸಾದಿಕಾ ಸುಖುಮಾಲಾ ಕೇನಚಿ ಪಾರಿಜುಞ್ಞೇನ ಅನಭಿಭೂತಾ ಮಞ್ಞೇ, ಕಸ್ಮಾ ನು ಖೋ ಇಮೇ ಇಮಸ್ಮಿಂಯೇವ ವಯೇ ಪಬ್ಬಜನ್ತೀ’’ತಿ? ತಂ ಮಾತಾ ಆಹ ‘‘ಅತ್ಥಿ, ಅಮ್ಮ, ಸಕ್ಯಪುತ್ತೋ ಸಕ್ಯಕುಲಾ ಪಬ್ಬಜಿತೋ ಬುದ್ಧೋ ಲೋಕೇ ಉಪ್ಪನ್ನೋ, ಸೋ ಧಮ್ಮಂ ದೇಸೇತಿ ಆದಿಕಲ್ಯಾಣಂ ಮಜ್ಝೇಕಲ್ಯಾಣಂ ಪರಿಯೋಸಾನಕಲ್ಯಾಣಂ ಸಾತ್ಥಂ ಸಬ್ಯಞ್ಜನಂ ಕೇವಲಪರಿಪುಣ್ಣಂ, ಪರಿಸುದ್ಧಂ ಬ್ರಹ್ಮಚರಿಯಂ ಪಕಾಸೇತಿ, ತಸ್ಸ ಇಮೇ ಧಮ್ಮಂ ಸುತ್ವಾ ಪಬ್ಬಜನ್ತೀ’’ತಿ.

ತೇನ ಚ ಸಮಯೇನ ಆಗತಫಲೋ ವಿಞ್ಞಾತಸಾಸನೋ ಅಞ್ಞತರೋ ಉಪಾಸಕೋ ತಾಯ ವೀಥಿಯಾ ಗಚ್ಛನ್ತೋ ತಂ ಕಥಂ ಸುತ್ವಾ ತಾಸಂ ಸನ್ತಿಕಂ ಉಪಸಙ್ಕಮಿ. ಅಥ ನಂ ಬ್ರಾಹ್ಮಣೀ ಆಹ ‘‘ಏತರಹಿ ಖೋ ಉಪಾಸಕ ಬಹೂ ಕುಲಪುತ್ತಾ ಮಹನ್ತಂ ಭೋಗಕ್ಖನ್ಧಂ ಮಹನ್ತಂ ಞಾತಿಪರಿವಟ್ಟಂ ಪಹಾಯ ಸಕ್ಯಸಮಯೇ ಪಬ್ಬಜನ್ತಿ, ತೇ ಕಿಂ ನು ಖೋ ಅತ್ಥವಸಂ ಸಮ್ಪಸ್ಸನ್ತಾ ಪಬ್ಬಜನ್ತೀ’’ತಿ? ತಂ ಸುತ್ವಾ ಉಪಾಸಕೋ ‘‘ಕಾಮೇಸು ಆದೀನವಂ, ನೇಕ್ಖಮ್ಮೇ ಚ ಆನಿಸಂಸಂ ಸಮ್ಪಸ್ಸನ್ತಾ’’ತಿ ವತ್ವಾ ಅತ್ತನೋ ಞಾಣಬಲಾನುರೂಪಂ ತಮತ್ಥಂ ವಿತ್ಥಾರತೋ ಕಥೇಸಿ, ತಿಣ್ಣಞ್ಚ ರತನಾನಂ ಗುಣೇ ಪಕಾಸೇಸಿ, ಪಞ್ಚನ್ನಂ ಸೀಲಾನಂ ದಿಟ್ಠಧಮ್ಮಿಕಂ ಸಮ್ಪರಾಯಿಕಞ್ಚ ಗುಣಾನಿಸಂಸಂ ಪವೇದೇಸಿ. ಅಥ ಬ್ರಾಹ್ಮಣಧೀತಾ ತಂ ‘‘ಕಿಂ ಅಮ್ಹೇಹಿಪಿ ಸರಣೇಸು ಚ ಸೀಲೇಸು ಚ ಪತಿಟ್ಠಾಯ ತಯಾ ವುತ್ತೇ ಗುಣಾನಿಸಂಸೇ ಅಧಿಗನ್ತುಂ ಸಕ್ಕಾ’’ತಿ ಪುಚ್ಛಿ. ಸೋ ‘‘ಸಬ್ಬಸಾಧಾರಣಾ ಇಮೇ ಧಮ್ಮಾ ಭಗವತಾ ಭಾಸಿತಾ, ಕಸ್ಮಾ ನ ಸಕ್ಕಾ’’ತಿ ವತ್ವಾ ತಸ್ಸಾ ಸರಣಾನಿ ಚ ಸೀಲಾನಿ ಚ ಅದಾಸಿ. ಸಾ ಗಹಿತಸರಣಾ ಸಮಾದಿನ್ನಸೀಲಾ ಚ ಹುತ್ವಾ ಪುನ ಆಹ ‘‘ಕಿಂ ಇತೋ ಉತ್ತರಿ ಅಞ್ಞಮ್ಪಿ ಕರಣೀಯಂ ಅತ್ಥೀ’’ತಿ. ಸೋ ತಸ್ಸಾ ವಿಞ್ಞುಭಾವಂ ಸಲ್ಲಕ್ಖೇನ್ತೋ ‘‘ಉಪನಿಸ್ಸಯಸಮ್ಪನ್ನಾ ಭವಿಸ್ಸತೀ’’ತಿ ಞತ್ವಾ ಸರೀರಸಭಾವಂ ವಿಭಾವೇನ್ತೋ ದ್ವತ್ತಿಂಸಾಕಾರಕಮ್ಮಟ್ಠಾನಂ ಕಥೇತ್ವಾ ಕಾಯೇ ವಿರಾಗಂ ಉಪ್ಪಾದೇತ್ವಾ ಉಪರಿ ಅನಿಚ್ಚತಾದಿಪಟಿಸಂಯುತ್ತಾಯ ಧಮ್ಮಿಯಾ ಕಥಾಯ ಸಂವೇಜೇತ್ವಾ ವಿಪಸ್ಸನಾಮಗ್ಗಂ ಆಚಿಕ್ಖಿತ್ವಾ ಗತೋ. ಸಾ ತೇನ ವುತ್ತನಯಂ ಸಬ್ಬಂ ಮನಸಿ ಕತ್ವಾ ಪಟಿಕೂಲಮನಸಿಕಾರೇ ಸಮಾಹಿತಚಿತ್ತಾ ವಿಪಸ್ಸನಂ ಪಟ್ಠಪೇತ್ವಾ ಉಪನಿಸ್ಸಯಸಮ್ಪತ್ತಿಯಾ ನ ಚಿರಸ್ಸೇವ ಸೋತಾಪತ್ತಿಫಲೇ ಪತಿಟ್ಠಹಿ. ಅಥಾಪರೇನ ಸಮಯೇನ ಕಾಲಂ ಕತ್ವಾ ಸಕ್ಕಸ್ಸ ದೇವರಞ್ಞೋ ಪರಿಚಾರಿಕಾ ಹುತ್ವಾ ನಿಬ್ಬತ್ತಿ, ಸತಸಹಸ್ಸಞ್ಚಸ್ಸಾ ಅಚ್ಛರಾಪರಿವಾರೋ ಅಹೋಸಿ. ತಂ ಸಕ್ಕೋ ದೇವರಾಜಾ ದಿಸ್ವಾ ಅಚ್ಛರಿಯಬ್ಭುತಚಿತ್ತಜಾತೋ ಪಮುದಿತಹದಯೋ –

೧೫೦. ‘‘ಇದಂ ವಿಮಾನಂ ರುಚಿರಂ ಪಭಸ್ಸರಂ, ವೇಳುರಿಯಥಮ್ಭಂ ಸತತಂ ಸುನಿಮ್ಮಿತಂ;

ಸುವಣ್ಣರುಕ್ಖೇಹಿ ಸಮನ್ತಮೋತ್ಥತಂ, ಠಾನಂ ಮಮಂ ಕಮ್ಮವಿಪಾಕಸಮ್ಭವಂ.

೧೫೧. ‘‘ತತ್ರೂಪಪನ್ನಾ ಪುರಿಮಚ್ಛರಾ ಇಮಾ, ಸತಂ ಸಹಸ್ಸಾನಿ ಸಕೇನ ಕಮ್ಮುನಾ;

ತುವಂಸಿ ಅಜ್ಝುಪಗತಾ ಯಸಸ್ಸಿನೀ, ಓಭಾಸಯಂ ತಿಟ್ಠಸಿ ಪುಬ್ಬದೇವತಾ.

೧೫೨. ‘‘ಸಸೀ ಅಧಿಗ್ಗಯ್ಹ ಯಥಾ ವಿರೋಚತಿ, ನಕ್ಖತ್ತರಾಜಾರಿವ ತಾರಕಾಗಣಂ;

ತಥೇವ ತ್ವಂ ಅಚ್ಛರಾಸಙ್ಗಣಂ ಇಮಂ, ದದ್ದಲ್ಲಮಾನಾ ಯಸಸಾ ವಿರೋಚಸಿ.

೧೫೩. ‘‘ಕುತೋ ನು ಆಗಮ್ಮ ಅನೋಮದಸ್ಸನೇ, ಉಪಪನ್ನಾ ತ್ವಂ ಭವನಂ ಮಮಂ ಇದಂ;

ಬ್ರಹ್ಮಂವ ದೇವಾ ತಿದಸಾ ಸಹಿನ್ದಕಾ, ಸಬ್ಬೇ ನ ತಪ್ಪಾಮಸೇ ದಸ್ಸನೇನ ತ’’ನ್ತಿ. –

ಚತೂಹಿ ಗಾಥಾಹಿ ತಾಯ ಕತಕಮ್ಮಂ ಪುಚ್ಛಿ.

೧೫೦. ತತ್ಥ ಇದಂ ವಿಮಾನನ್ತಿ ಯಸ್ಮಿಂ ವಿಮಾನೇ ಸಾ ದೇವತಾ ಉಪ್ಪನ್ನಾ, ತಂ ಅತ್ತನೋ ವಿಮಾನಂ ಸನ್ಧಾಯಾಹ. ಸತತನ್ತಿ ಸಬ್ಬಕಾಲಂ ರುಚಿರಂ ಪಭಸ್ಸರನ್ತಿ ಯೋಜನಾ. ಸತತನ್ತಿ ವಾ ಸಮ್ಮಾತತಂ, ಅತಿವಿಯ ವಿತ್ಥಿಣ್ಣನ್ತಿ ಅತ್ಥೋ. ಸಮನ್ತಮೋತ್ಥತನ್ತಿ ಸಮನ್ತತೋ ಅವತ್ಥತಂ ಛಾದಿತಂ. ಠಾನನ್ತಿ ವಿಮಾನಮೇವ ಸನ್ಧಾಯ ವದತಿ. ತಞ್ಹಿ ತಿಟ್ಠನ್ತಿ ಏತ್ಥ ಕತಪುಞ್ಞಾತಿ ಠಾನನ್ತಿ ವುಚ್ಚತಿ. ಕಮ್ಮವಿಪಾಕಸಮ್ಭವನ್ತಿ ಕಮ್ಮವಿಪಾಕಭಾವೇನ ಸಮ್ಭೂತಂ, ಕಮ್ಮವಿಪಾಕೇನ ವಾ ಸಹ ಸಮ್ಭೂತಂ. ಮಮನ್ತಿ ಇದಂ ಮಮ ಠಾನಂ ಮಮ ಕಮ್ಮವಿಪಾಕಸಮ್ಭವನ್ತಿ ದ್ವೀಹಿಪಿ ಪದೇಹಿ ಯೋಜೇತಬ್ಬಂ.

೧೫೧. ತತ್ರೂಪಪನ್ನಾತಿ ಗಾಥಾಯ ಅಯಂ ಸಙ್ಖೇಪತ್ಥೋ – ತತ್ರ ತಸ್ಮಿಂ ಯಥಾವುತ್ತೇ ವಿಮಾನೇ ಉಪಪನ್ನಾತಿ ನಿಬ್ಬತ್ತಾ ಪಗೇವ ಉಪ್ಪನ್ನತ್ತಾ ಪುಬ್ಬದೇವತಾ ಇಮಾ ಪುರಿಮಾ ಅಚ್ಛರಾಯೋ ಪರಿಮಾಣತೋ ಸತಂ ಸಹಸ್ಸಾನಿ. ತುವಂಸೀತಿ ತ್ವಂ ಅಸಿ ಸಕೇನ ಕಮ್ಮುನಾ ಅಜ್ಝುಪಗತಾ ಉಪಪನ್ನಾ. ಯಸಸ್ಸಿನೀತಿ ಪರಿವಾರಸಮ್ಪನ್ನಾ, ತೇನೇವ ಸಕೇನ ಕಮ್ಮುನಾ ಕಮ್ಮಾನುಭಾವೇನ ಓಭಾಸಯನ್ತೀ ವಿರೋಚಮಾನಾ ತಿಟ್ಠಸೀತಿ.

೧೫೨. ಇದಾನಿ ತಮೇವ ಓಭಾಸನಂ ಉಪಮಾಯ ವಿಭಾವೇನ್ತೋ ‘‘ಸಸೀ’’ತಿ ಗಾಥಮಾಹ. ತಸ್ಸತ್ಥೋ – ಯಥಾ ಸಸಲಞ್ಛನಯೋಗೇನ ‘‘ಸಸೀ’’ತಿ, ನಕ್ಖತ್ತೇಹಿ ಅಧಿಕಗುಣತಾಯ ‘‘ನಕ್ಖತ್ತರಾಜಾ’’ತಿ ಚ ಲದ್ಧನಾಮೋ ಚನ್ದೋ ಸಬ್ಬಂ ತಾರಕಾಗಣಂ ಅಧಿಗ್ಗಯ್ಹ ಅಭಿಭವಿತ್ವಾ ವಿರೋಚತಿ ವಿರಾಜತಿ, ತಥೇವ ತ್ವಂ ಇಮಂ ಅಚ್ಛರಾನಂ ದೇವಕಞ್ಞಾನಂ ಗಣಂ ಸಮೂಹಂ ಅತ್ತನೋ ಯಸಸಾ ದದ್ದಲ್ಲಮಾನಾ ಅತಿವಿಯ ವಿಜ್ಜೋತಮಾನಾ ವಿರೋಚಸೀತಿ. ಏತ್ಥ ಚ ‘‘ಇಮಾ’’ತಿ ‘‘ಇಮ’’ನ್ತಿ ಚ ನಿಪಾತಮತ್ತಂ. ಕೇಚಿ ಪನ ‘‘ನಕ್ಖತ್ತರಾಜಾರಿವ ತಾರಾಗಣಂ ತಥೇವ ತ್ವ’’ನ್ತಿ ಪಠನ್ತಿ.

೧೫೩. ಇದಾನಿ ತಸ್ಸಾ ದೇವತಾಯ ಪುರಿಮಭವಂ ತತ್ಥ ಕತಪುಞ್ಞಞ್ಚ ಪುಚ್ಛನ್ತೋ ‘‘ಕುತೋ ನು ಆಗಮ್ಮಾ’’ತಿ ಗಾಥಮಾಹ. ತತ್ಥ ಕುತೋ ನು ಆಗಮ್ಮಾತಿ ಕುತೋ ನು ಭವತೋ ಕುತೋ ನು ಪುಞ್ಞಕಮ್ಮತೋ ಕಾರಣಭೂತತೋ ಇದಂ ಮಮ ಭವನಂ ಆಗಮ್ಮ ಭದ್ದೇ ಅನೋಮದಸ್ಸನೇ ಸಬ್ಬಙ್ಗಸೋಭನೇ ತ್ವಂ ಉಪಪನ್ನಾ ಉಪ್ಪತ್ತಿಗಹಣವಸೇನ ಉಪಗತಾ. ‘‘ಅನೋಮದಸ್ಸನೇ’’ತಿ ವುತ್ತಮೇವತ್ಥಂ ಉಪಮಾಯ ಪಕಾಸೇನ್ತೋ ‘‘ಬ್ರಹ್ಮಂವ ದೇವಾ ತಿದಸಾ ಸಹಿನ್ದಕಾ, ಸಬ್ಬೇ ನ ತಪ್ಪಾಮಸೇ ದಸ್ಸನೇನ ತ’’ನ್ತಿ ಆಹ. ತತ್ಥ ಯಥಾ ಬ್ರಹ್ಮಾನಂ ಸಹಮ್ಪತಿಂ ಸನಙ್ಕುಮಾರಂ ವಾ ಉಪಗತಂ ಸಹ ಇನ್ದೇನಾತಿ ಸಹಿನ್ದಕಾ ತಾವತಿಂಸಾ ದೇವಾ ಪಸ್ಸನ್ತಾ ದಸ್ಸನೇನ ನ ತಪ್ಪನ್ತಿ, ಏವಂ ತವ ದಸ್ಸನೇನ ಮಯಂ ಸಬ್ಬೇ ದೇವಾ ನ ತಪ್ಪಾಮಸೇತಿ ಅತ್ಥೋ.

ಏವಂ ಪನ ಸಕ್ಕೇನ ದೇವಾನಮಿನ್ದೇನ ಪುಚ್ಛಿತಾ ಸಾ ದೇವತಾ ತಮತ್ಥಂ ಪಕಾಸೇನ್ತೀ –

೧೫೪. ‘‘ಯಮೇತಂ ಸಕ್ಕ ಅನುಪುಚ್ಛಸೇ ಮಮಂ, ಕುತೋ ಚುತಾ ತ್ವಂ ಇಧ ಆಗತಾತಿ;

ಬಾರಾಣಸೀ ನಾಮ ಪುರತ್ಥಿ ಕಾಸಿನಂ, ತತ್ಥ ಅಹೋಸಿಂ ಪುರೇ ಕೇಸಕಾರಿಕಾ.

೧೫೫. ‘‘ಬುದ್ಧೇ ಚ ಧಮ್ಮೇ ಚ ಪಸನ್ನಮಾನಸಾ, ಸಙ್ಘೇ ಚ ಏಕನ್ತಗತಾ ಅಸಂಸಯಾ;

ಅಖಣ್ಡಸಿಕ್ಖಾಪದಾ ಆಗತಪ್ಫಲಾ, ಸಮ್ಬೋಧಿಧಮ್ಮೇ ನಿಯತಾ ಅನಾಮಯಾ’’ತಿ. –

ಗಾಥದ್ವಯಮಾಹ.

೧೫೪-೫. ತತ್ಥ ಯಮೇತನ್ತಿ ಯಂ ಏತಂ ಪಞ್ಹನ್ತಿ ಅತ್ಥೋ. ಅನುಪುಚ್ಛಸೇತಿ ಅನುಕೂಲಭಾವೇನ ಪುಚ್ಛಸಿ. ಮಮನ್ತಿ ಮಂ. ಪುರತ್ಥೀತಿ ಪುರಂ ಅತ್ಥಿ. ಕಾಸಿನನ್ತಿ ಕಾಸಿರಟ್ಠಸ್ಸ. ಕೇಸಕಾರಿಕಾತಿ ಪುರಿಮತ್ತಭಾವೇ ಅತ್ತನೋ ನಾಮಂ ವದತಿ. ಬುದ್ಧೇ ಚ ಧಮ್ಮೇ ಚಾತಿಆದಿನಾ ಅತ್ತನೋ ಪುಞ್ಞಂ ವಿಭಾವೇತಿ.

ಪುನ ಸಕ್ಕೋ ತಸ್ಸಾ ತಂ ಪುಞ್ಞಸಮ್ಪತ್ತಿಞ್ಚ ದಿಬ್ಬಸಮ್ಪತ್ತಿಞ್ಚ ಅನುಮೋದಮಾನೋ –

೧೫೬. ‘‘ತನ್ತ್ಯಾಭಿನನ್ದಾಮಸೇ ಸ್ವಾಗತಞ್ಚ ತೇ,

ಧಮ್ಮೇನ ಚ ತ್ವಂ ಯಸಸಾ ವಿರೋಚಸಿ;

ಬುದ್ಧೇ ಚ ಧಮ್ಮೇ ಚ ಪಸನ್ನಮಾನಸೇ,

ಸಙ್ಘೇ ಚ ಏಕನ್ತಗತೇ ಅಸಂಸಯೇ;

ಅಖಣ್ಡಸಿಕ್ಖಾಪದೇ ಆಗತಪ್ಫಲೇ,

ಸಮ್ಬೋಧಿಧಮ್ಮೇ ನಿಯತೇ ಅನಾಮಯೇ’’ತಿ. – ಆಹ;

೧೫೬. ತತ್ಥ ತನ್ತ್ಯಾಭಿನನ್ದಾಮಸೇತಿ ತಂ ತೇ ದುವಿಧಮ್ಪಿ ಸಮ್ಪತ್ತಿಂ ಅಭಿನನ್ದಾಮ ಅನುಮೋದಾಮ. ಸ್ವಾಗತಞ್ಚ ತೇತಿ ತುಯ್ಹಞ್ಚ ಇಧಾಗಮನಂ ಸ್ವಾಗತಂ, ಅಮ್ಹಾಕಂ ಪೀತಿಸೋಮನಸ್ಸಸಂವದ್ಧನಮೇವ. ಸೇಸಂ ವುತ್ತನಯಮೇವಾತಿ.

ತಂ ಪನ ಪವತ್ತಿಂ ಸಕ್ಕೋ ದೇವರಾಜಾ ಆಯಸ್ಮತೋ ಮಹಾಮೋಗ್ಗಲ್ಲಾನತ್ಥೇರಸ್ಸ ಕಥೇಸಿ, ಥೇರೋ ಭಗವತೋ ನಿವೇದೇಸಿ. ಭಗವಾ ತಮತ್ಥಂ ಅಟ್ಠುಪ್ಪತ್ತಿಂ ಕತ್ವಾ ಸಮ್ಪತ್ತಪರಿಸಾಯ ಧಮ್ಮಂ ದೇಸೇಸಿ. ಸಾ ದೇಸನಾ ಸದೇವಕಸ್ಸ ಲೋಕಸ್ಸ ಸಾತ್ಥಿಕಾ ಜಾತಾತಿ.

ಕೇಸಕಾರೀವಿಮಾನವಣ್ಣನಾ ನಿಟ್ಠಿತಾ.

ಇತಿ ಪರಮತ್ಥದೀಪನಿಯಾ ಖುದ್ದಕ-ಅಟ್ಠಕಥಾಯ ವಿಮಾನವತ್ಥುಸ್ಮಿಂ

ಸತ್ತರಸವತ್ಥುಪಟಿಮಣ್ಡಿತಸ್ಸ ಪಠಮಸ್ಸ ಪೀಠವಗ್ಗಸ್ಸ

ಅತ್ಥವಣ್ಣನಾ ನಿಟ್ಠಿತಾ.