೮. ಗಣಿಕಾಸುತ್ತವಣ್ಣನಾ

೫೮. ಅಟ್ಠಮೇ ದ್ವೇ ಪೂಗಾತಿ ದ್ವೇ ಗಣಾ. ಅಞ್ಞತರಿಸ್ಸಾ ಗಣಿಕಾಯಾತಿ ಅಞ್ಞತರಾಯ ನಗರಸೋಭಿನಿಯಾ. ಸಾರತ್ತಾತಿ ಸುಟ್ಠು ರತ್ತಾ. ಪಟಿಬದ್ಧಚಿತ್ತಾತಿ ಕಿಲೇಸವಸೇನ ಬದ್ಧಚಿತ್ತಾ. ರಾಜಗಹೇ ಕಿರ ಏಕಸ್ಮಿಂ ಛಣದಿವಸೇ ಬಹೂ ಧುತ್ತಪುರಿಸಾ ಗಣಬನ್ಧನೇನ ವಿಚರನ್ತಾ ಏಕಮೇಕಸ್ಸ ಏಕಮೇಕಂ ವೇಸಿಂ ಆನೇತ್ವಾ ಉಯ್ಯಾನಂ ಪವಿಸಿತ್ವಾ ಛಣಕೀಳಂ ಕೀಳಿಂಸು. ತತೋ ಪರಮ್ಪಿ ದ್ವೇ ತಯೋ ಛಣದಿವಸೇ ತಂ ತಂಯೇವ ವೇಸಿಂ ಆನೇತ್ವಾ ಛಣಕೀಳಂ ಕೀಳಿಂಸು. ಅಥಾಪರಸ್ಮಿಂ ಛಣದಿವಸೇ ಅಞ್ಞೇಪಿ ಧುತ್ತಾ ತಥೇವ ಛಣಕೀಳಂ ಕೀಳಿತುಕಾಮಾ ವೇಸಿಯೋ ಆನೇನ್ತಾ ಪುರಿಮಧುತ್ತೇಹಿ ಪುಬ್ಬೇ ಆನೀತಂ ಏಕಂ ವೇಸಿಂ ಆನೇನ್ತಿ. ಇತರೇ ತಂ ದಿಸ್ವಾ ‘‘ಅಯಂ ಅಮ್ಹಾಕಂ ಪರಿಗ್ಗಹೋ’’ತಿ ಆಹಂಸು. ತೇಪಿ ತಥೇವ ಆಹಂಸು. ‘‘ಏವಂ ಅಮ್ಹಾಕಂ ಪರಿಗ್ಗಹೋ, ಅಮ್ಹಾಕಂ ಪರಿಗ್ಗಹೋ’’ತಿ ಕಲಹಂ ವಡ್ಢೇತ್ವಾ ಪಾಣಿಪ್ಪಹಾರಾದೀನಿ ಅಕಂಸು. ತೇನ ವುತ್ತಂ – ‘‘ತೇನ ಖೋ ಪನ ಸಮಯೇನ ರಾಜಗಹೇ ದ್ವೇ ಪೂಗಾ’’ತಿಆದಿ. ತತ್ಥ ಉಪಕ್ಕಮನ್ತೀತಿ ಪಹರನ್ತಿ. ಮರಣಮ್ಪಿ ನಿಗಚ್ಛನ್ತೀತಿ ಬಲವೂಪಕ್ಕಮೇಹಿ ಮರಣಂ ಉಪಗಚ್ಛನ್ತಿ, ಇತರೇಪಿ ಮರಣಮತ್ತಂ ಮರಣಪ್ಪಮಾಣದುಕ್ಖಂ ಪಾಪುಣನ್ತಿ.

ಏತಮತ್ಥಂ ವಿದಿತ್ವಾತಿ ಏತಂ ಕಾಮೇಸು ಗೇಧಂ ವಿವಾದಮೂಲಂ ಸಬ್ಬಾನತ್ಥಮೂಲನ್ತಿ ಸಬ್ಬಾಕಾರತೋ ವಿದಿತ್ವಾ. ಇಮಂ ಉದಾನನ್ತಿ ಅನ್ತದ್ವಯೇ ಚ ಮಜ್ಝಿಮಾಯ ಪಟಿಪತ್ತಿಯಾ ಆದೀನವಾನಿಸಂಸವಿಭಾವನಂ ಇಮಂ ಉದಾನಂ ಉದಾನೇಸಿ.

ತತ್ಥ ಯಞ್ಚ ಪತ್ತನ್ತಿ ಯಂ ರೂಪಾದಿಪಞ್ಚಕಾಮಗುಣಜಾತಂ ಪತ್ತಂ ‘‘ನತ್ಥಿ ಕಾಮೇಸು ದೋಸೋ’’ತಿ ದಿಟ್ಠಿಂ ಪುರಕ್ಖತ್ವಾ ವಾ ಅಪುರಕ್ಖತ್ವಾ ವಾ ಏತರಹಿ ಲದ್ಧಂ ಅನುಭುಯ್ಯಮಾನಂ. ಯಞ್ಚ ಪತ್ತಬ್ಬನ್ತಿ ಯಞ್ಚ ಕಾಮಗುಣಜಾತಮೇವ ‘‘ಭುಞ್ಜಿತಬ್ಬಾ ಕಾಮಾ, ಪರಿಭುಞ್ಜಿತಬ್ಬಾ ಕಾಮಾ, ಆಸೇವಿತಬ್ಬಾ ಕಾಮಾ, ಪಟಿಸೇವಿತಬ್ಬಾ ಕಾಮಾ, ಯೋ ಕಾಮೇ ಪರಿಭುಞ್ಜತಿ, ಸೋ ಲೋಕಂ ವಡ್ಢೇತಿ, ಯೋ ಲೋಕಂ ವಡ್ಢೇತಿ, ಸೋ ಬಹುಂ ಪುಞ್ಞಂ ಪಸವತೀ’’ತಿ ದಿಟ್ಠಿಂ ಉಪನಿಸ್ಸಾಯ ತಂ ಅನಿಸ್ಸಜ್ಜಿತ್ವಾ ಕತೇನ ಕಮ್ಮುನಾ ಅನಾಗತೇ ಪತ್ತಬ್ಬಂ ಅನುಭವಿತಬ್ಬಞ್ಚ. ಉಭಯಮೇತಂ ರಜಾನುಕಿಣ್ಣನ್ತಿ ಏತಂ ಉಭಯಂ ಪತ್ತಂ ಪತ್ತಬ್ಬಞ್ಚ ರಾಗರಜಾದೀಹಿ ಅನುಕಿಣ್ಣಂ. ಸಮ್ಪತ್ತೇ ಹಿ ವತ್ಥುಕಾಮೇ ಅನುಭವನ್ತೋ ರಾಗರಜೇನ ವೋಕಿಣ್ಣೋ ಹೋತಿ, ತತ್ಥ ಪನ ಸಂಕಿಲಿಟ್ಠಚಿತ್ತಸ್ಸ ಫಲೇ ಆಯತಿಂ ಆಪನ್ನೇ ದೋಮನಸ್ಸುಪ್ಪತ್ತಿಯಾ ದೋಸರಜೇನ ವೋಕಿಣ್ಣೋ ಹೋತಿ, ಉಭಯತ್ಥಾಪಿ ಮೋಹರಜೇನ ವೋಕಿಣ್ಣೋ ಹೋತಿ. ಕಸ್ಸ ಪನೇತಂ ರಜಾನುಕಿಣ್ಣನ್ತಿ ಆಹ – ‘‘ಆತುರಸ್ಸಾನುಸಿಕ್ಖತೋ’’ತಿ ಕಾಮಪತ್ಥನಾವಸೇನ ಕಿಲೇಸಾತುರಸ್ಸ, ತಸ್ಸ ಚ ಫಲೇನ ದುಕ್ಖಾತುರಸ್ಸ ಚ ಉಭಯತ್ಥಾಪಿ ಪಟಿಕಾರಾಭಿಲಾಸಾಯ ಕಿಲೇಸಫಲೇ ಅನುಸಿಕ್ಖತೋ.

ತಥಾ ಯಞ್ಚ ಪತ್ತನ್ತಿ ಯಂ ಅಚೇಲಕವತಾದಿವಸೇನ ಪತ್ತಂ ಅತ್ತಪರಿತಾಪನಂ. ಯಞ್ಚ ಪತ್ತಬ್ಬನ್ತಿ ಯಂ ಮಿಚ್ಛಾದಿಟ್ಠಿಕಮ್ಮಸಮಾದಾನಹೇತು ಅಪಾಯೇಸು ಪತ್ತಬ್ಬಂ ಫಲಂ. ಉಭಯಮೇತಂ ರಜಾನುಕಿಣ್ಣನ್ತಿ ತದುಭಯಂ ದುಕ್ಖರಜಾನುಕಿಣ್ಣಂ. ಆತುರಸ್ಸಾತಿ ಕಾಯಕಿಲಮಥೇನ ದುಕ್ಖಾತುರಸ್ಸ. ಅನುಸಿಕ್ಖತೋತಿ ಮಿಚ್ಛಾದಿಟ್ಠಿಂ, ತಸ್ಸಾ ಸಮಾದಾಯಕೇ ಪುಗ್ಗಲೇ ಚ ಅನುಸಿಕ್ಖತೋ.

ಯೇ ಚ ಸಿಕ್ಖಾಸಾರಾತಿ ಯೇಹಿ ಯಥಾಸಮಾದಿನ್ನಂ ಸೀಲಬ್ಬತಾದಿಸಙ್ಖಾತಂ ಸಿಕ್ಖಂ ಸಾರತೋ ಗಹೇತ್ವಾ ‘‘ಇಮಿನಾ ಸಂಸಾರಸುದ್ಧೀ’’ತಿ ಕಥಿತಾ. ತೇನಾಹ – ಸೀಲಬ್ಬತಂ ಜೀವಿತಂ ಬ್ರಹ್ಮಚರಿಯಂ ಉಪಟ್ಠಾನಸಾರಾತಿ. ತತ್ಥ ಯಂ ‘‘ನ ಕರೋಮೀ’’ತಿ ಓರಮತಿ, ತಂ ಸೀಲಂ, ವಿಸಭೋಜನಕಿಚ್ಛಾಚರಣಾದಿಕಂ ವತಂ, ಸಾಕಭಕ್ಖತಾದಿಜೀವಿಕಾ ಜೀವಿತಂ, ಮೇಥುನವಿರತಿ ಬ್ರಹ್ಮಚರಿಯಂ, ಏತೇಸಂ ಅನುತಿಟ್ಠನಂ ಉಪಟ್ಠಾನಂ, ಭೂತಪಿಣ್ಡಕಪರಿಭಣ್ಡಾದಿವಸೇನ ಖನ್ಧದೇವಸಿವಾದಿಪರಿಚರಣಂ ವಾ ಉಪಟ್ಠಾನಂ, ಏವಮೇತೇಹಿ ಯಥಾವುತ್ತೇಹಿ ಸೀಲಾದೀಹಿ ಸಂಸಾರಸುದ್ಧಿ ಹೋತೀತಿ ತಾನಿ ಸಾರತೋ ಗಹೇತ್ವಾ ಠಿತಾ ಸಮಣಬ್ರಾಹ್ಮಣಾ ಸಿಕ್ಖಾಸಾರಾ ಸೀಲಬ್ಬತಂ ಜೀವಿತಂ ಬ್ರಹ್ಮಚರಿಯಂ ‘‘ಉಪಟ್ಠಾನಸಾರಾ’’ತಿ ವೇದಿತಬ್ಬಾ. ಅಯಮೇಕೋ ಅನ್ತೋತಿ ಅಯಂ ಸೀಲಬ್ಬತಪರಾಮಾಸವಸೇನ ಅತ್ತಕಿಲಮಥಾನುಯೋಗಸಙ್ಖಾತೋ ಮಜ್ಝಿಮಾಯ ಪಟಿಪತ್ತಿಯಾ ಉಪ್ಪಥಭೂತೋ ಲಾಮಕಟ್ಠೇನ ಚ ಏಕೋ ಅನ್ತೋ. ಅಯಂ ದುತಿಯೋ ಅನ್ತೋತಿ ಅಯಂ ಕಾಮಸುಖಲ್ಲಿಕಾನುಯೋಗೋ ಕಾಮೇಸು ಪಾತಬ್ಯತಾಪತ್ತಿಸಙ್ಖಾತೋ ದುತಿಯೋ ವುತ್ತನಯೇನ ಅನ್ತೋ.

ಇಚ್ಚೇತೇ ಉಭೋ ಅನ್ತಾತಿ ಕಾಮಸುಖಲ್ಲಿಕಾನುಯೋಗೋ ಅತ್ತಕಿಲಮಥಾನುಯೋಗೋ ಚ ಇತಿ ಏತೇ ಉಭೋ ಅನ್ತಾ. ತೇ ಚ ಖೋ ಏತರಹಿ ಪತ್ತೇ, ಆಯತಿಂ ಪತ್ತಬ್ಬೇ ಚ ಕಿಲೇಸದುಕ್ಖರಜಾನುಕಿಣ್ಣೇ ಕಾಮಗುಣೇ ಅತ್ತಪರಿತಾಪನೇ ಚ ಅಲ್ಲೀನೇಹಿ ಕಿಲೇಸದುಕ್ಖಾತುರಾನಂ ಅನುಸಿಕ್ಖನ್ತೇಹಿ, ಸಯಞ್ಚ ಕಿಲೇಸದುಕ್ಖಾತುರೇಹಿ ಪಟಿಪಜ್ಜಿತಬ್ಬತ್ತಾ ಲಾಮಕಾ ಉಪ್ಪಥಭೂತಾ ಚಾತಿ ಅನ್ತಾ. ಕಟಸಿವಡ್ಢನಾತಿ ಅನ್ಧಪುಥುಜ್ಜನೇಹಿ ಅಭಿಕಙ್ಖಿತಬ್ಬಟ್ಠೇನ ಕಟಸಿಸಙ್ಖಾತಾನಂ ತಣ್ಹಾಅವಿಜ್ಜಾನಂ ಅಭಿವಡ್ಢನಾ. ಕಟಸಿಯೋ ದಿಟ್ಠಿಂ ವಡ್ಢೇನ್ತೀತಿ ತಾ ಪನ ಕಟಸಿಯೋ ನಾನಪ್ಪಕಾರದಿಟ್ಠಿಂ ವಡ್ಢೇನ್ತಿ. ವತ್ಥುಕಾಮೇಸು ಅಸ್ಸಾದಾನುಪಸ್ಸಿನೋ ಹಿ ತೇ ಪಜಹಿತುಂ ಅಸಕ್ಕೋನ್ತಸ್ಸ ತಣ್ಹಾಅವಿಜ್ಜಾಸಹಕಾರೀಕಾರಣಂ ಲಭಿತ್ವಾ ‘‘ನತ್ಥಿ ದಿನ್ನ’’ನ್ತಿಆದಿನಾ (ಧ. ಸ. ೧೨೨೧; ವಿಭ. ೯೩೮) ನತ್ಥಿಕದಿಟ್ಠಿಂ ಅಕಿರಿಯದಿಟ್ಠಿಂ ಅಹೇತುಕದಿಟ್ಠಿಞ್ಚ ಗಣ್ಹಾಪೇನ್ತಿ, ಅತ್ತಪರಿತಾಪನಂ ಅನುಯುತ್ತಸ್ಸ ಪನ ಅವಿಜ್ಜಾತಣ್ಹಾಸಹಕಾರೀಕಾರಣಂ ಲಭಿತ್ವಾ ‘‘ಸೀಲೇನ ಸುದ್ಧಿ ವತೇನ ಸುದ್ಧೀ’’ತಿಆದಿನಾ ಅತ್ತಸುದ್ಧಿಅಭಿಲಾಸೇನ ಸೀಲಬ್ಬತಪರಾಮಾಸದಿಟ್ಠಿಂ ಗಣ್ಹಾಪೇನ್ತಿ. ಸಕ್ಕಾಯದಿಟ್ಠಿಯಾ ಪನ ತೇಸಂ ಪಚ್ಚಯಭಾವೋ ಪಾಕಟೋಯೇವ. ಏವಂ ಅನ್ತದ್ವಯೂಪನಿಸ್ಸಯೇನ ತಣ್ಹಾಅವಿಜ್ಜಾನಂ ದಿಟ್ಠಿವಡ್ಢಕತಾ ವೇದಿತಬ್ಬಾ. ಕೇಚಿ ಪನ ‘‘ಕಟಸೀತಿ ಪಞ್ಚನ್ನಂ ಖನ್ಧಾನಂ ಅಧಿವಚನ’’ನ್ತಿ ವದನ್ತಿ. ತೇಸಂ ಯದಗ್ಗೇನ ತತೋ ಅನ್ತದ್ವಯತೋ ಸಂಸಾರಸುದ್ಧಿ ನ ಹೋತಿ, ತದಗ್ಗೇನ ತೇ ಉಪಾದಾನಕ್ಖನ್ಧೇ ಅಭಿವಡ್ಢೇತೀತಿ ಅಧಿಪ್ಪಾಯೋ. ಅಪರೇ ಪನ ‘‘ಕಟಸಿವಡ್ಢನಾ’’ತಿ ಪದಸ್ಸ ‘‘ಅಪರಾಪರಂ ಜರಾಮರಣೇಹಿ ಸಿವಥಿಕವಡ್ಢನಾ’’ತಿ ಅತ್ಥಂ ವದನ್ತಿ. ತೇಹಿಪಿ ಅನ್ತದ್ವಯಸ್ಸ ಸಂಸಾರಸುದ್ಧಿಹೇತುಭಾವಾಭಾವೋಯೇವ ವುತ್ತೋ, ಕಟಸಿಯಾ ಪನ ದಿಟ್ಠಿವಡ್ಢನಕಾರಣಭಾವೋ ವತ್ತಬ್ಬೋ.

ಏತೇ ತೇ ಉಭೋ ಅನ್ತೇ ಅನಭಿಞ್ಞಾಯಾತಿ ತೇ ಏತೇ ಯಥಾವುತ್ತೇ ಉಭೋಪಿ ಅನ್ತೇ ಅಜಾನಿತ್ವಾ ‘‘ಇಮೇ ಅನ್ತಾ ತೇ ಚ ಏವಂಗಹಿತಾ ಏವಂಅನುಟ್ಠಿತಾ ಏವಂಗತಿಕಾ ಏವಂಅಭಿಸಮ್ಪರಾಯಾ’’ತಿ ಏವಂ ಅಜಾನನಹೇತು ಅಜಾನನಕಾರಣಾ. ‘‘ಪಞ್ಞಾಯ ಚಸ್ಸ ದಿಸ್ವಾ ಆಸವಾ ಪರಿಕ್ಖೀಣಾ’’ತಿಆದೀಸು (ಪು. ಪ. ೨೦೮; ಅ. ನಿ. ೯.೪೩) ವಿಯಸ್ಸ ಹೇತುಅತ್ಥತಾ ದಟ್ಠಬ್ಬಾ. ಓಲೀಯನ್ತಿ ಏಕೇತಿ ಏಕೇ ಕಾಮಸುಖಾನುಯೋಗವಸೇನ ಸಙ್ಕೋಚಂ ಆಪಜ್ಜನ್ತಿ. ಅತಿಧಾವನ್ತಿ ಏಕೇತಿ ಏಕೇ ಅತ್ತಕಿಲಮಥಾನುಯೋಗವಸೇನ ಅತಿಕ್ಕಮನ್ತಿ. ಕಾಮಸುಖಮನುಯುತ್ತಾ ಹಿ ವೀರಿಯಸ್ಸ ಅಕರಣತೋ ಕೋಸಜ್ಜವಸೇನ ಸಮ್ಮಾಪಟಿಪತ್ತಿತೋ ಸಙ್ಕೋಚಮಾಪನ್ನತಾ ಓಲೀಯನ್ತಿ ನಾಮ, ಅತ್ತಪರಿತಾಪನಮನುಯುತ್ತಾ ಪನ ಕೋಸಜ್ಜಂ ಪಹಾಯ ಅನುಪಾಯೇನ ವೀರಿಯಾರಮ್ಭಂ ಕರೋನ್ತಾ ಸಮ್ಮಾಪಟಿಪತ್ತಿಯಾ ಅತಿಕ್ಕಮನತೋ ಅತಿಧಾವನ್ತಿ ನಾಮ, ತದುಭಯಂ ಪನ ತತ್ಥ ಆದೀನವಾದಸ್ಸನತೋ. ತೇನ ವುತ್ತಂ – ‘‘ಉಭೋ ಅನ್ತೇ ಅನಭಿಞ್ಞಾಯ ಓಲೀಯನ್ತಿ ಏಕೇ ಅತಿಧಾವನ್ತಿ ಏಕೇ’’ತಿ. ತತ್ಥ ತಣ್ಹಾಭಿನನ್ದನವಸೇನ ಓಲೀಯನ್ತಿ, ದಿಟ್ಠಾಭಿನನ್ದನವಸೇನ ಅತಿಧಾವನ್ತೀತಿ ವೇದಿತಬ್ಬಂ.

ಅಥ ವಾ ಸಸ್ಸತಾಭಿನಿವೇಸವಸೇನ ಓಲೀಯನ್ತಿ ಏಕೇ, ಉಚ್ಛೇದಾಭಿನಿವೇಸವಸೇನ ಅತಿಧಾವನ್ತಿ ಏಕೇ. ಗೋಸೀಲಾದಿವಸೇನ ಹಿ ಅತ್ತಪರಿತಾಪನಮನುಯುತ್ತಾ ಏಕಚ್ಚೇ ‘‘ಇಮಿನಾಹಂ ಸೀಲೇನ ವಾ ವತೇನ ವಾ ತಪೇನ ವಾ ಬ್ರಹ್ಮಚರಿಯೇನ ವಾ ದೇವೋ ವಾ ಭವಿಸ್ಸಾಮಿ ದೇವಞ್ಞತರೋ ವಾ, ತತ್ಥ ನಿಚ್ಚೋ ಧುವೋ ಸಸ್ಸತೋ ಅವಿಪರಿಣಾಮಧಮ್ಮೋ ಸಸ್ಸತಿಸಮಂ ತಥೇವ ಠಸ್ಸಾಮೀ’’ತಿ ಸಸ್ಸತದಸ್ಸನಂ ಅಭಿನಿವಿಸನ್ತಾ ಸಂಸಾರೇ ಓಲೀಯನ್ತಿ ನಾಮ, ಕಾಮಸುಖಮನುಯುತ್ತಾ ಪನ ಏಕಚ್ಚೇ ಯಂಕಿಞ್ಚಿ ಕತ್ವಾ ಇನ್ದ್ರಿಯಾನಿ ಸನ್ತಪ್ಪೇತುಕಾಮಾ ಲೋಕಾಯತಿಕಾ ವಿಯ ತದನುಗುಣಂ ಉಚ್ಛೇದದಸ್ಸನಂ ಅಭಿನಿವಿಸನ್ತಾ ಅನುಪಾಯೇನ ವಟ್ಟುಪಚ್ಛೇದಸ್ಸ ಪರಿಯೇಸನತೋ ಅತಿಧಾವನ್ತಿ ನಾಮ. ಏವಂ ಸಸ್ಸತುಚ್ಛೇದವಸೇನಪಿ ಓಲೀಯನಾತಿಧಾವನಾನಿ ವೇದಿತಬ್ಬಾನಿ.

ಯೇ ಚ ಖೋ ತೇ ಅಭಿಞ್ಞಾಯಾತಿ ಯೇ ಚ ಖೋ ಪನ ಅರಿಯಪುಗ್ಗಲಾ ತೇ ಯಥಾವುತ್ತೇ ಉಭೋ ಅನ್ತೇ ‘‘ಇಮೇ ಅನ್ತಾ ಏವಂಗಹಿತಾ ಏವಂಅನುಟ್ಠಿತಾ ಏವಂಗತಿಕಾ ಏವಂಅಭಿಸಮ್ಪರಾಯಾ’’ತಿ ಅಭಿವಿಸಿಟ್ಠೇನ ಞಾಣೇನ ವಿಪಸ್ಸನಾಸಹಿತಾಯ ಮಗ್ಗಪಞ್ಞಾಯ ಜಾನಿತ್ವಾ ಮಜ್ಝಿಮಪಟಿಪದಂ ಸಮ್ಮಾಪಟಿಪನ್ನಾ, ತಾಯ ಸಮ್ಮಾಪಟಿಪತ್ತಿಯಾ. ತತ್ರ ಚ ನಾಹೇಸುನ್ತಿ ತತ್ರ ತಸ್ಮಿಂ ಅನ್ತದ್ವಯೇ ಪತಿತಾ ನ ಅಹೇಸುಂ, ತಂ ಅನ್ತದ್ವಯಂ ಪಜಹಿಂಸೂತಿ ಅತ್ಥೋ. ತೇನ ಚ ನಾಮಞ್ಞಿಂಸೂತಿ ತೇನ ಅನ್ತದ್ವಯಪಹಾನೇನ ‘‘ಮಮ ಇದಂ ಅನ್ತದ್ವಯಪಹಾನಂ, ಅಹಂ ಅನ್ತದ್ವಯಂ ಪಹಾಸಿಂ, ಇಮಿನಾ ಅನ್ತದ್ವಯಪಹಾನೇನ ಸೇಯ್ಯೋ’’ತಿಆದಿನಾ ತಣ್ಹಾದಿಟ್ಠಿಮಾನಮಞ್ಞನಾವಸೇನ ನ ಅಮಞ್ಞಿಂಸು ಸಬ್ಬಮಞ್ಞನಾನಂ ಸಮ್ಮದೇವ ಪಹೀನತ್ತಾ. ಏತ್ಥ ಚ ಅಗ್ಗಫಲೇ ಠಿತೇ ಅರಿಯಪುಗ್ಗಲೇ ಸನ್ಧಾಯ ‘‘ತತ್ರ ಚ ನಾಹೇಸುಂ, ತೇನ ಚ ನಾಮಞ್ಞಿಂಸೂ’’ತಿ ಅತೀತಕಾಲವಸೇನ ಅಯಂ ದೇಸನಾ ಪವತ್ತಾ, ಮಗ್ಗಕ್ಖಣೇ ಪನ ಅಧಿಪ್ಪೇತೇ ವತ್ತಮಾನಕಾಲವಸೇನೇವ ವತ್ತಬ್ಬಂ ಸಿಯಾ. ವಟ್ಟಂ ತೇಸಂ ನತ್ಥಿ ಪಞ್ಞಾಪನಾಯಾತಿ ಯೇ ಏವಂ ಪಹೀನಸಬ್ಬಮಞ್ಞನಾ ಉತ್ತಮಪುರಿಸಾ, ತೇಸಂ ಅನುಪಾದಾಪರಿನಿಬ್ಬುತಾನಂ ಕಮ್ಮವಿಪಾಕಕಿಲೇಸವಸೇನ ತಿವಿಧಮ್ಪಿ ವಟ್ಟಂ ನತ್ಥಿ ಪಞ್ಞಾಪನಾಯ, ವತ್ತಮಾನಕ್ಖನ್ಧಭೇದತೋ ಉದ್ಧಂ ಅನುಪಾದಾನೋ ವಿಯ ಜಾತವೇದೋ ಅಪಞ್ಞತ್ತಿಕಭಾವಮೇವ ಗಚ್ಛತೀತಿ ಅತ್ಥೋ.

ಅಟ್ಠಮಸುತ್ತವಣ್ಣನಾ ನಿಟ್ಠಿತಾ.